Shqipëri, Parlamenti krijon Komisionin për Integrimin në NATO

TIRANE – Parlamenti Shqiptar shpalli sot krijimin e grupit Parlamentar për Integrimin e Shqipërisë në Organizatën e Atlantikut Verior, NATO. Komisioni sipas vendimit të Parlamentit, do të ketë dy bashkëkryetarë nga pozita dhe opozita si dhe një ndarje të barabartë anëtarësh mes dy krahëve të politikës shqiptare. Miratimi i vendimit për krijimin e Komisionit Parlamentar për Integrimin në NATO është bërë me shumicë votash, ndërsa në përbërje të tij, bien në sy Ish-ministri i Mbrojtjes Pandeli Majko, ish-ministri i Drejtësisë Aldo Bumçi dhe ish-ministrja e Integrimit Arenca Trashani. Komisioni Parlamentar do të ketë si objekt të punës së tij ndjekjen e procesit të reformave të Shqipërisë në rrugën e saj drejt anëtarësimit në Organizatën e Atlantikut Verior, huazimin e përvojave të vendeve të tjera fqinje apo më gjerë që janë pranuar në NATO ose që janë vlerësuar pozitivisht në përpjekjet e tyre për anëtarësim. Në dokumentin ku paracaktohet mënyra e funksionimit të Komisionit, thuhet se vendimet merren me shumicë votash dhe se ky komision, do të ketë një rol të rëndësishëm në përpjekjet e Shqipërisë për të bërë realitet reformat e kërkuara për anëtarësimin në Organizatën e Atlantikut Verior. Politikanët e Tiranës deklarojnë publikisht se kanë shpresë që Shqipëria të ftohet në samitin e radhës të NATOS në Bukuresht në vitin 2008. Por në këtë proces, nga Shqipëria kërkohet të bëhet më shumë në drejtim të stabilitetit politik, forcimit të ekonomisë, vendosjes së shtetit ligjor, luftë kundër krimit të organizuar dhe korrupsionit dhe funksionimin e pavarur të drejtësisë.