Ministri Mediu takon dy zyrtarë të lartë britanikë

TIRANE - Ministri i Mbrojtjes Fatmir Mediu priti sot një delegacion zyrtarësh të lartë të qeverisë britanike, i përbërë nga Adam Bye, kryetar i Grupit të Jashtëm për vendet ballkanike, që mbulon politikat e Mbretërisë së Bashkuar në Ballkanin Perendimor dhe John Thurlow, kryetar i Seksionit të Programeve për Integrimin në Bashkimin Evropian për Shqipërinë dhe Maqedoninë, i cili drejton në Ministrinë e Jashtme marrëdhëniet direkte mes Mbretërisë së Bashkuar dhe Shqipërisë. Delegacionin e shoqëronte ambasadori i Mbretërisë së Bashkuar në vendin tonë, Fraser Wilson dhe atasheu ushtarak nënkolonel Mark Vickers. Ministri Mediu, pasi vlerësoi marrëdhëniet mjaft të mira mes dy vendeve tona, bëri një përshkrim të shkurtër të reformave të ndërmarra nga Forcat e Armatosura dhe të arritjeve të shënuara në kuadër të marrjes së ftesës për anëtarësim në Aleancë në vitin 2008. Sinjalet e dhëna në Samitin e Rigës, theksoi Ministri Mediu, kanë angazhuar maksimalisht jo vetëm Forcat tona të Armatosura, por edhe qeverinë shqiptare. Në këtë kuadër janë bërë hapa mjaft progresiv përsa i përket luftës kundër krimit të organizuar, korrupsionit e trafiqeve të paligjshme. “Ne, - nënvizoi më tej ai, - do të përdorim në mënyrën më efektive të mundshme kohën e mbetur në mënyrë që të meritojmë ftesën në Samitin e Bukureshtit”. Gjatë takimit u diskutua për intensifikimin e mëtejshëm të marrëdhënieve midis dy vendeve tona, duke u ndalur në mbështetjen që i duhet dhënë Shqipërisë, sidomos në këtë periudhë ku pritet marrja e ftesës për anëtarësim në NATO. Gjithashtu u diskutua edhe për forcimin e bashkëpunimit midis vendeve të rajonit tonë, duke e cilësuar këtë bashkëpunim si rrugën më të mirë për paqen, stabilitetin dhe integrimin euroatlantik. Karta e Adriatikut, u shpreh Ministri Mediu, provoi se është kthyer në një mekanizëm të qartë bashkëpunimi dhe integrimi rajonal. Zyrtarët e lartë britanikë vlerësuan progresin e bërë nga FA Shqiptare në rrugën e reformimit dhe transformimit të tyre, si dhe mbështetjen që qeveria shqiptare u ka dhënë atyre për plotësimin e standardeve që kërkon anëtarësimi në NATO. Veçanërisht të dy zyrtarët britanikë vlerësuan kontributin që Shqipëria jep në luftën kundër terrorizmit për mbrojtjen e paqes dhe stabitiletit në botë, ku treguesi më i qartë për këtë është pjesëmarrja në misionet paqeruajtëse e trupave shqiptare në Bosnjë-Hercegovinë, në Afganistan, në Irak etj, si dhe gatishmërinë për të shtuar prezencën e saj në misionin në Afganistan. Burimi: Ministria e Mbrojtjes