PS: TVSH, monumenti i shpërdorimit, projektligji i transmetimeve televizive kaloi në mënyrë klandestine

TIRANE - Partia Socialiste shprehu sot shqetësimin e saj për atë që zëdhënësi i partisë më të madhe të opozitës Sajmir Tahiri, e cilësoi "shkatërrim të Televizionit Publik Shqiptar”. Sipas deklaratës së bërë ditën e sotme nga PS-ja, Televizioni publik Shqiptar “është kthyer në monumentin e shpërdorimit dhe abuzimit me shërbimin publik". Sajmir Tahiri deklaroi në konferencë shtypi se "TVSH është kthyer në armën politike të maxhorancës, duke manipuluar percepsionin publik, duke abuzuar me parimet e funksionimit të këtij operatori televiziv që mbahet me taksat e shqiptarëve, siç janë barazia, paanshmëria dhe informacioni në interes të vendit”. Në deklaratën e Partisë Socialiste thuhet se “sot TVSH është shumë larg së qënit i barabartë, i paanshëm dhe në shërbim të publikut, por është fatkeqësisht shumë mirë njësh me maxhorancën në interes të politikës së saj të mbrapshtë”.
Deklarata e Partisë Socialiste fokusohet më tej në zhvillimet e fundit për projektligjin e transmetimeve televizive. "Një shembulli i mendësisë totalitare të Kryeministrit Berisha për të dhunuar dhe kontrolluar mediat e pavarura, është edhe rasti i djeshëm, kur në mes të natës, një grusht deputetësh klandestinë, pa marrë parasysh sugjerimet imperative të BE-së, sugjerimet e medias dhe grupeve të interesit si dhe sugjerimet e deputetëve të opozitës, miratuan projektligjin për transmetimet numerike”, tha zëdhënësi Tahiri. Sipas tij, një grusht deputetësh jo të maxhorancës, por vetëm të Partisë Demokratike, të cilët me urdhër të prerë të shefit të tyre, dhe me ndihmën shpëtimtare të forcave speciale nga pjesa tjetër e grupit parlamentar të PD-së për të plotësuar numrin e nevojshëm, nëpërkëmbën jo vetëm frymën konsensuale që duhet të shoqëronte miratimin e këtij projektligji, por edhe standardet minimale të diktuara nga BE", cilësoi Partia Socialiste. Projektligji për transmetimet televizive është bërë objekt debati kohët e fundit në Tiranë, jo vetëm mes forcave politike por edhe mes maxhorancës dhe grupeve të interesit. Pak kohë më parë, projektligji u shqyrtua edhe nga organet e Bashkimit Evropian të cilat i kërkuan Kryetares së Parlamentit Shqiptar të njiheshin me përmbajtjen e projektligjit. Grupet e interesit dhe opozita, thonë se projektligji kaloi së fundi në mënyrë klandestine ndërsa përmbajtja e tij nuk pasqyron rekomandimet e Brukselit.