"Gjoleka, djali i Abazit" hap javën e Filmit Shqiptar në Athinë

Në Athinë u hap mbrëmë Java e Filmit Shqiptar, një aktivitet i përbashkët i Qendrës Kinematografike Shqiptare edhe asaj greke. Pasazhi që sapo dëgjuat është shkëputur nga filmi shqiptar "Gjoleka, djali i Abazit" i regjisorit të shquar shqiptar Dhimitër Anagnosti, që me dramën që mbarte por edhe vlerat e tij artistike, përmes kontradiktës së brezave duke qenë njëkohësisht dhe një reçensë e së sotmes, mbajti të gozhduar për rreth 2 orë të 500 spektatorët e sallës së kinemasë së njohur të Athinës "Trianon". Pa ekzagjerim ishte ishte një premierë befasuese e Javës së Filmit Shqiptar të organizuar për herë të parë në Athinë nga Qendra Kinematografike Greke edhe ajo Shqiptare, duke përligjur kështu edhe publicitetin e madh paraprak të këtij aktiviteti në median qendrore greke. Një fillim i zgjuar –duhet thënë- nga ana e drejtorit artistik të këtij aktiviteti, regjisorit shqiptar të emigracionit Bujar Alimani, që është nderuar me çmim për filmin "Gazi" në Festivalin e filmit me metrazh të shkurtër të Dhramës së Greqisë dhe në këtë aktivitet prezantohet me filmin "Busulla", dhe që paralajmëron për supriza të tjera gjatë kësaj jave: "Mbi të gjitha ishte një film kombëtar, një film ku spikaste qartë nota shqiptare. Jam shumë i kënaqur që shkoi kaq mirë dhe u pëlqye shumë edhe nga publiku grek. Nesër, pasnesër do të kemi supriza të tjera". "Është një film që përcjell një epokë të caktuar. Tregon me vërtetësi dhe realizëm të madh se nga vijmë ne të gjithë fqinjët e Ballkanit" na thotë zoti Iliopullos, përfaqësues i Qendrës Kinematografike Greke edhe sekretar ekzekutiv i një rrjeti kinematografik ku marrin pjesë 11 vende ballkanike duke shprehur njëkohësisht edhe urimin e tij për vijimësinë e aktiviteteve të kësaj natyre. "Ishte vërtet një diçka e mrekullueshme, u gëzova shumë që pashë sallën kaq të mbushur. Kjo ndodh rrallë. Më pëlqeu shumë filmi, i cili ishte tragjik dhe komik, i ëmbël edhe i zgjuar. S’ kemi asgjë për të ndarë, shumë gjëra na bashkojnë" na thotë grekja Marina Kondi si për të ndarë të njëjtin vlerësim me bashkëspektatorët e saj shqiptarë si aktori dhe regjisori Lefter Simoni. "Në këtë Javë të Filmit Shqiptar do të jem i pranishëm me dy angazhimet e mia: në filmin e regjisorit Gjergj Xhuvani "I dashur armik" dhe në filmin me metrazh të shkurtër "Busulla" të Bujar Alimanit. Mbi të gjitha dua të theksoj se është një ngjarje vërtet e madhe, me mesazhe jashtëzakonisht të mëdha".Miho Gjini, shkrimtari i njohur i emigracionit, do t’i kërkojë rrenjët e bashkëjetesës dhe bashkëpunimit thellë në histori: "Kjo Javë krijon atë që kërkojmë vazhdimisht: urën e miqësisë, urën e dashurisë midis dy popujve, midis dy vendeve. Se historia jonë është kaq e vjetër, kaq e lashtë. Perenditë greke ishin të përbashkëta me ato shqiptare. Aktorët shqiptarë luanin në Budrint, Apolloni dhe Durrës së bashku me fqinjët e tyre grekë". Një prezantim dinjitoz i vlerave të artit kinematografik shqiptar por edhe festë e përbashkët kulturore midis dy popujve është kjo javë e filmit shqiptar edhe për ambasadorin shqiptar në Athinë Vili Minarolli, i cili i mëshon njëkohësisht aspektit kulturor të integrimit të emigrantëve shqiptarë në Greqi: "Kultura dhe arti shqiptar këtu po lulëzojnë si pjesë e proçesit të integrimit të emigrantëve shqiptarë në shoqërinë greke jo vetëm ekonomikisht, miqësisht e familjarisht, por edhe me kulturën dhe artin shqiptar, me identitetin tonë". Të enjten në darkë me drejtorin e Qendres Kinematografike shqiptare Xhevdet Ferri prezent, ditët e tjera me regjisorë të tjerë, që do të kenë edhe një diskutim të përbashkët me kolegët e tyre grekë, me rreth 25 filma, katër të periudhës komuniste si "Ferri 1943" i Rikard Ljarjes, dhe 21 të asaj postkomuniste si "Tirana viti zero" i Fatmir Koçit, që u nderua me çmimin Aleksandri i Artë i vitit 2001 në Festivalin Ndërkombëtar të Selanikut, kinematografia shqiptare pritet të shpalosë për një javë të tërë para një publiku të etur vlerat e saj më të mira. Ndër to edhe dy filma nga Kosova, "Kosova" e Burbuqe Berishes dhe "Kukumi" i Isat Qoses, që plotësojnë mozaikun e kinematografisë shqiptare.

Niko Anagnosti, Deutsche Velle, Seksioni Shqip