Presidenti Alfred Moisiu rikonfirmon angazhimin serioz të Shqipërisë për realizimin e reformave integruese në BE

29 maj 2007
Budva,Mal i Zi - Presidenti i Republikës, Alfred Moisiu mori pjesë në Samitin e Kryetarëve të Shteteve të Evropës Juglindore me temë “Evropa Juglindore dhe Bashkimi Evropian”. Me rastin e këtij Samiti, Presidenti i Malit të Zi, Filip Vujanoviç, mirëpriti në qytetin e Budvës dhe Presidentët, Nebojsha Radmanoviç (Bosnje - Hercegovinë), Georgi Parvanov (Bullgari), Stipe Mesiç (Kroaci) dhe Branko Cervenkovski (Maqedoni). Në fjalën mbajtur gjatë punimeve të Samitit, Presidenti Moisiu theksoi se integrimi i Evropës Juglindore në bashkësinë evropiane nuk bën gjë tjetër vetëm sa jetëson edhe bashkimin politik evropian, sepse ky rajon ka qenë, është dhe duhet të jetë i tillë- evropian. “Në këtë mënyrë”, - vuri në dukje Kryetari i Shtetit, - “kemi të bëjmë me një proces riafirmimi politik, një ribashkim natyral me pjesët e tjera të Evropës së tërë”. Në këtë drejtim,Presidenti rikonfirmoi faktin inkurajues se tashmë shtetet dhe qeveritë në rajonin e Ballkanit Perëndimor e shohin procesin e integrimit euroatlantik si një interes madhor kombëtar, si dhe jetik për të ardhmen e rajonit, stabilitetin dhe prosperitetin e tij.
Gjithashtu, z. Moisiu shprehu mendimin se “integrimi evropian i rajonit do t’i japë atij një hapësirë shumë më të madhe për zhvillimin ekonomik, thithjen e investimeve të huaja dhe rritjen e mirëqënies për qytetarët”, duke vënë theksin në domosdoshmërinë e pranisë intensive të BE-së me ndihma financiare për projekte të mëdha të infrastrukturës, energjitikës dhe sektorëve të tjerë me interes të përbashkët. “Ne duam që problemet e vështirësitë e tranzicionit, siç janë papunësia, niveli i ulët i jetesës, problemet e kujdesit shëndetësor, lëvizjes, arsimimit, etj, të mos lejohet të ndikojë negativisht në vizionin dhe vullnetin e brezit të ri për aspiratën e integrimit euroatlantik. Ndërkohë vetë qytetarët e vendeve tona, pavarësisht nga etnia, kombësia e besimet fetare, duhet të gëzojnë të drejta të barabarta, jo vetëm në legjislacion por edhe në realitetin praktik”, - vuri në dukje Presidenti. Në vijim të fjalës së tij, Presidenti Moisiu, pasi iu referua disa prej arritjeve pozitive të rajonit tonë në rrugën e integrimit në BE, nënvizoi se “ecja drejt integrimit do të thotë edhe të mos mbyllim sytë ndaj problemeve tona ende të pazgjidhura, por të ndihmojmë për zgjidhjen sa më optimale”, duke patur parasysh këtu çështjen e statusit të Kosovës. Edhe në këtë Samit, Kryetari i Shtetit ritheksoi se “Kosova ka nevojë për një përgjigje përfundimtare për statusin e saj, ka nevojë për një Real Politik, e cila njeh realitetet e reja dhe nuk mbetet peng i së shkuarës. Për përcaktimin e këtij statusi ekziston një bazë e mirë: ky është Plani Ahtisari – një dokument kompromisi, i prodhuar pas një angazhimi serioz ndërkombëtar dhe rolit të Presidentit Ahtisari, i cili për një vit e gjysmë uli në tavolinë Prishtinën dhe Beogradin dhe paraqiti këtë paketë si më të drejtën dhe më të mirën për zgjidhjen e problemit të Kosovës”. Në Samitin e Kryetarëve të Shteteve të Evropës Juglindore, sot, në Budva, ishte e pranishme me fjalën e saj dhe europarlamentarja Doris Pack. Gjatë punimeve të Samitit, Presidenti i Republikës u takua dhe bisedoi me znj. Pak, si dhe me Presidentë të tjerë pjesëmarrës në këtë aktivitet.
Burimi: Zyra për Shtyp e Presidencës, TIRANE