Florian Mima: KE mbështet ligjin e “gjobave” dhe Auditit të Brendshëm

TIRANE – Zyrtarët e Qeverisë Berisha pretendojnë se Komisioni Europian ka shprehur mbështetje për miratimin e ligjit të Auditit të Brendshëm dhe Ligjin e Gjobave. Albert Gajo dhe Florian Mima, zv/ministra përkatësisht të Integrimit dhe Financave, deklaruan pas kthimit nga Brukseli se “Komisioni Europian mbështet miratimin e ligjit të Auditit të Brendshëm, ligjin e gjobave, vlerëson shërbimin doganor dhe atë tatimor, si dhe vlerëson përpjekjet e Qeverisë shqiptare për menaxhimin e borxhit publik”. Në një konferencë të përbashkët për shtyp, dhënë në mjediset e Ministrisë së Integrimit, zv. ministrat Gajo dhe Mima informuan mediat rreth mbledhjes së punës Shqipëri - BE që u zhvillua në Bruksel më 23-24 maj. Duke iu referuar ligjit të gjobave, zv/ministri i Financave Florian Mima, tha se “Komisioni Europian ka qenë në të njëjtin mendim me FMN-në, që procesi i mbledhjes së detyrimeve të papaguara duhet të ndahet nga procesi i ankimimeve të subjekteve”. Sipas Mimës përfaqësuesit e Komisionit Europian kanë inkurajuar qeverinë në miratimin e këtyre dy ligjeve. “Sa i përket ligjit të Auditit, ata thanë se ka një keqkuptim të madh me këtë ligj dhe ofruan asistencën e tyre teknike për të argumentuar se projekti i paraqitur nga Qeveria shqiptare i përmbush të gjitha standardet ndërkombëtare. Përfaqësuesit e KE-së nënvizuan se ky projektligj nuk është një ligj konkurrues me ligjin ekszistues të Kontrollit të Lartë të shtetit, por ndihmon edhe më shumë këtë të fundit, për plotësimin e funksioneve të tij”, tha zv/ministri Mima gjatë konferencës për shtyp të zhvilluar në ambientet e Ministrisë së Integrimit në Tiranë.
I pyetur nga media nëse Komisioni Europian dha mbështetje në lidhje me taksën e sheshtë, z.Florian Mima iu përgjigj duke thënë se “Qeveria shqiptare e ka prezantuar këtë taksë 1 muaj përpara dhe përfaqësuesit e KE, në atë kohë deklaruan se duhet të diskutojnë më Fondin Monetar Ndërkombëtar. Por pasi është dhënë mbështetje nga FMN-ja, edhe KE ka mbështetur këtë iniciativë të Qeverisë”. Gjatë konferencës për shtyp të dy zv.ministrat thanë se në këtë takim Komisioni Europian u njoh gjithashtu me përmirësimet e situatës energjitike dhe minimizimin e efekteve që vijnë nga mungesa e energjisë mbi ekonominë shqiptare, si dhe masat afatshkurtra dhe afatmesme që po ndërmerren për përmirësimin e situatës financiare të Korporatës Elektroenergjitike Shqiptare. Në këtë mbledhje delegacioni shqiptar përfaqësohej nga zv.ministri i Integrimit Albert Gajo dhe ai i Financave, Florion Mima, ndërsa pala komunitare, nga Kristof Pavret de la Roshfordiere nga Drejtoria e Përgjithshme e Ekonomisë dhe Financës pranë KE-së.
Ligji i gjobave ka ngjallur reagimin e ashpër të biznesit në Shqipëri i cili ka hedhur kritika të forta se përmbajtja e projektit po shmang gjykatat nga vendimmarrja në këtë rast. Ndërsa Ligji për Auditin e Brendshëm, është vënë në pikëpyetje kryesisht nga opozita e cila mendon se ky projektligj dublon Kontrollin e Lartë të Shtetit.