Ministria e Mbrojtjes: “Edhe Bullgaria mbështet anëtarësimin e Shqipërisë në NATO”

TIRANE – Ministria e Mbrojtjes në Tiranë, deklaroi se edhe Bullgaria mbështet plotësisht anëtarësimin e Shqipërisë në NATO. Gjatë takimit të Ministrit shqiptar të Mbrojtjes Fatmir Mediu zhvilluar në Sofje në 26-27 Maj 2007, me homologun e tij bullgar Veselin Blizankov, burimet zyrtare thanë se u shpreh gatishmëria e Bullgarisë për të mbështetur anëtarësimin e Shqipërisë në NATO. Në takim, referuar burimeve zyrtare, u vlerësuan arritjet e Forcave të Armatosura të Shqipërisë, si në kryerjen e reformave ashtu dhe në transformimin e tyre.
Ministri i Mbrojtjes Fatmir Mediu e njohu homologun e tij bullgar Veselin Bliznakov, me intensitetin e punës për arritjen e objektivave për marrjen e ftesës për anëtarësim në NATO si dhe me reformat e qeverisë dhe hapat në luftën kundër krimit dhe korrupsionit. “Marrja e ftesës për anëtarësim në NATO është objektivi ynë kryesor kombëtar”, - u shpreh Ministri Fatmir Mediu. – “Qeveria shqiptare ka zyrtarizuar 2 përqind të Prodhimit të Brendshëm Bruto për buxhetin e mbrojtjes brenda vitit 2008, në mënyrë që brenda vitit 2010 të kemi një forcë tërësisht profesioniste”. Ministri bullgar Bliznakov deklaroi se: “Arritjet e Shqipërisë janë të dukshme si në kryerjen e reformave ashtu dhe në transformimin e Forcave të Armatosura. Në këtë kontekst, jemi optimistë se Shqipëria do të marrë ftesën për anëtarësim në vitin 2008”.
Ministri Mediu u shpreh më tej se momenti në prag të anëtarësimit në NATO kërkon konsolidimin e stabilitetit politik në vend dhe zhvillim të mëtejshëm ekonomik, që është i rëndësishëm për kryerjen e plotë të reformave. Ministri bullgar Bliznakov, theksoi se anëtarësimi në NATO sjell edhe zhvillim ekonomik, duke sjellë shembullin e vendit të vet, që ka katërfishuar investimet e huaja pas hyrjes në Aleancën e Atlantikut të Veriut si dhe u vlerësua alokimi i 2 përqindëshit të GDP, pasi sot, vetëm shtatë vende anëtare të NATO-s e kanë këtë shifër dhe kështu, është plotësuar një nga kriteret kryesore të anëtarësimit.
Dy Ministrat e Mbrojtjes u shprehën dhe për të ardhmen e Kosovës dhe zhvillimet në rajonin tonë. Ministri Mediu deklaroi se: “Shqipëria mbështet plotësisht paketën Ahtisaari për Kosovën. Ky plan mund të bëhet një marrëveshje e vërtetë e paqes dhe stabilitetit jetëgjatë në Kosovë. Por paqja dhe stabiliteti në Kosovë janë shumë të çmuara për Shqipërinë dhe fqinjët e tjerë të Kosovës. Në këtë kuptim, ne nuk shohim asnjë alternativë përveçse projektit Ahtisaari dhe sa më shpejt të votohet ky plan, aq më mirë do të jetë.
Ndërsa Ministri bullgar Bliznakov deklaroi se “Presim nga qeveria e re serbe të tregojë konstruktivitet dhe dëshirë për të bashkëpunuar me Gjykatën e Hagës. Bullgaria mbështet paketën e presidentit Ahtisaari dhe qëndrimin e BE për Kosovën”.
Vizita e Ministrit të Mbrojtjes Fatmir Mediu në Sofje është në vazhdën e turit të tij në vendet anëtare të NATO-s, përpara Samitit të Bukureshtit të pranverës 2008, ku Shqipëria pritet të marrë ftesën për anëtarësim në Aleancën e Atlantikut të Veriut.