“Brukseli qëndrim tjetër për ligjin e Gjobave dhe Auditit”

TIRANE - Televizioni Top Channel ka bërë publik një dokument sipas të cilit Komisioni Evropian nuk është shprehur pro ligjit të Auditit të Brendshëm apo ligjit “të Gjobave” siç u shprehën dy ditë më parë zv/ministrat Albert Gajo dhe Florian Mima, përkatësisht zyrtarë të Ministrisë së Integrimit dhe Ministrisë së Financave. Sipas televizionit Top Channel, që deklaroi se zotëron dokumentet përkatëse, në të cilat thuhet se ekspertët e Brukselit janë shprehur se “të dyja palët gjithashtu shkëmbyen informacion dhe pikëpamje mbi gjendjen aktuale sa i takon progresit të fundit në kontrollin financiar publik, duke përfshirë auditin e brendshëm dhe të jashtëm”. Sipas Top Channel, në dokument thuhet më tej se Komisioni Europian, shpreson se çështjet e diskutuara që rrethojnë ligjin për Auditin e Brendshëm të zgjidhen shpejt dhe ligjit ti ofrohet asistencë në çdo aspekt teknik. Ligji për Auditin e Brendshëm dhe ligji i ashtuquajtur i “Gjobave”, janë miratuar së fundi në Parlament, por ende nuk janë deklaruar nga Presidenti i Republikës.
Zv/ministrat Albert Gajo dhe Florian Mima, dolën në konferencë shtypi të djëlën pasi u kthyen nga vizita në Bruksel dhe u shprehën se Komisioni Evropian kishte shprehur mbështetje për ligjin e Gjobave dhe atë të Auditit të Brendshëm. Të dy këto ligje, janë bërë shkak debatesh të ashpra dhe acarimi jo vetëm mes Qeverisë dhe opozitës, por edhe mes ekzekutivit dhe grupeve të interesit.