Nano: Evropianët mbështetën mesazhet e mia për konsensus

TIRANE - Ish-kryeministri Fatos Nano deklaron se mesazhet që ai ka dhënë gjatë vizitës së fundit në Bruksel janë mbështetur nga të gjithë autoritetet e larta evropiane. Në një intervistë për Televizionin Publik Shqiptar, Nano ka pohuar se “ndërkombëtarët kanë mirëpritur dhe kanë shprehur vlerësimin e tyre lidhur me misionin tim për ndërtimin e një konsensusi ndërpartiak.”.

Kandidati i vetëshpallur për president, Fatos Nano, ka deklaruar më tej se “produkti që bashkon shumicën e shqiptarëve dhe konsensuset e tyre është shumë më i madh se sa shqetësimi apo llogaria e ditës se cili do të jetë emri i presidentit të ardhshëm.”. Ish-kryeministri i Shqipërisë ka nënvizuar rëndësinë e bashkëpunimit midis pozitës dhe opozitës në lidhje me çështjen e zgjedhjes së presidentit të ardhshëm, veprim ky që do të shpëtonte vendin nga zgjedhjet e parakohshme që sipas tij do të shënonte hapa prapa për Shqipërinë. Nano ka zbutur tonet e kritikave ndaj kryetarit aktual të PS-së Edi Rama, duke e ftuar atë që të merret më shtruar me problemet aktuale që po kalon vendi.