Drejt Europes

Bruksel, Ministri shqiptar i Mbrojtjes, në takimin e homologëve të NATO-s

2008-06-14T17:11:00.002+01:00

13 qeshor 2008. Ministri i Mbrojtjes Gazmend Oketa, mori pjesë në takimin e ministrave të Mbrojtjes të vendeve anëtare të NATO-s dhe kontribuese në KFOR, që u mbajt me 12 qershor 2008 në Bruksel. Ky ishte takimi i parë i këtij formati që Shqipëria mori pjesë, pas marjes së ftesës për anëtarësim në NATO. Në këtë takim u diskutua mbi vlerësimin e situatës së sigurisë dhe për rrugët që duhen ndjekur për një komunitet të sigurtë ndërkombëtar në këtë periudhë të komplikuar. Në fjalën që mbajti në këtë takim Sekretari i Përgjithshëm i NATO-s Jaap de Hoop Scheffer, theksoi se mbledhja e sotme e vendeve që kontribuojnë në KFOR mbahet në një nga momentet më të rëndësishme. Kosova, theksoi ai, po përshkon çdo ditë një periudhë delikate. Vetëm në 3 ditë autoritetet e Kosovës po ndërmarin përgjegjësi të reja dhe roli i misioneve të ONU-t dhe të Bashkimit Europian në këtë vend ka njohur një zhvillim substancial. Prezenca e KFOR-it dhe mandati i tij në Kosovë, deri më tani nuk ka ndryshuar, u shperh z. Scheffer. KFOR-i do të qëndrojë në Kosovë, mbi bazën e Rezolutës 1244 të Këshillit të Sigurisë së Kombeve të Bashkuara dhe derisa Këshilli i Sigurisë të marrë një vendim tjetër. Kemi rënë të gjithë dakort sot, u shpreh numri një i Aleancës së Veriatlantikut, se NATO ka detyra të reja në Kosovë. Me këtë vendim NATO do të jetë në gjendje të asistojë Kosovën dhe nevojat e ndërtimit të institucioneve demokratike dhe të sigurta. KFOR-i do të vazhdojë të kontribuojë për të mbajtur një mjedis të sigurtë për të gjithë ata që jetojnë në Kosovë. Gjatë vizitës së tij në Bruksel, shefi i Mbrojtjes Shqiptare pati një takim me përfaqësues të NAMSA-s, të cilët i bënë atij një prezantim të projekteve dhe mundësive që NAMSA ofron në bashkëpunimin me Shqipërinë dhe, veçanërisht përsa i takon shkatërrimit të municioneve të tepërta. Në të njëjtën kohë, Ministri Oketa diskutoi me ekipin e NAMSA-s dhe për mundësi të tjera bashkëpunimi, si në në fushën e llogjistikës, të menaxhimit të burimeve financiare, projekteve të modernizimit etj. Nga ana e tij, Ministri Oketa vlerësoi bashkëpunimin e suksesshëm me NAMSA, si dhe kontributin e dhënë prej saj në realizimin e dy projekteve të rëndësishëm për shkatërrimin e armatimeve dhe municioneve të tepërta, si minat antipersonel, armët e vogla e të lehta etj. Z. Oketa shprehu angazhimin e tij dhe të Ministrisë së Mbrojtjes për të vazhduar këtë proces. Në këtë kuadër, ai kërkoi asistencën e NAMSA-s për të vazhduar punën në realizimin e objektivit kryesor që ka Ministria e Mbrojtjes e Shqipërisë për shkatërrimin e municioneve të tepërta. Gjithashtu, Ministri Oketa kërkoi që NAMSA të angazhohet edhe në projekte të tjera në interes të Forcave të Armatosura Shqiptare. Vendi ynë ka nënshkruar një memorandum mirëkuptimi me Organizatën për Furnizim dhe Mbështetje të NATO-s (NAMSA) mbi bashkëpunimin për mbështetje logjistike. Ky memorandum është nënshkruar që në janar të vitit 2001 dhe në kuadër të tij janë firmosur e kanë përfunduar edhe dy marrëveshje të suksesshme implementuese. Gjatë qëndrimit në Bruksel ministri i Mbrojtjes Gazmend Oketa pati takime të veçanta me Sekretarin e Përgjithshëm të NATO-s Scheffer, me ministrin e Mbrojtjes të Belgjikes Pieter De Crem, me ministrin e Mbrojtjes të Rumanise Teodor Melescanu, me ministrine Mbrojtjes të Gjermanisë Jung, si dhe me homologë të tjerë të vendeve anëtare të Aleancës.

Liberalizimi i vizave: BE-ja përcakton kushtet për Shqipërinë

2008-06-02T19:47:00.000+01:00

Armand Mero
02-06-2008

Komisioni europian ka përcaktuar kushtet që Shqipëria duhet të plotësojë për të arritur një marrëveshje për liberalizimn e vizave. Dokumenti i cili do të jetë udhërrëfyesi i gjithë këtij procesi, një kopje të të cilit e ka siguruar Zëri i Amerikës, pritet t’i dorëzohet nesër ministrit të Jashtëm shqiptar Lulëzim Basha në Bruksel. Sipas dokumentit Shqipërisë i kërkohen ndërhyrje të shumta në legjislacion, ngritjen e një sërë strukturash, trajnimin e tyre dhe mbështetje të konsiderueshme financiare.Në fillim të muajit mars të këtij viti, zëvendëspresidenti i atëhershëm i Komisionit Evropian Franco Frattini, hapi zyrtarisht në Tiranë bisedimet për liberalizimin e vizave. Pas këtij angazhimi, i cili përfshin edhe vendet e tjera të Ballkanit për heqjen, ndaj qytetarëve të këtyre vendeve, të të gjitha pengesave për udhëtim në vendet Shengen, Brukseli ka përcaktuar në mënyrë të detajuar detyrimet që Shqipëria duhet të përmbushë. Dokumenti është miratuar nga Këshilli i Ministrave dhe nesër pritet t’i dorëzohet zyrtarisht ministrit të Jashtëm Shqiptar Lulëzim Basha. Ai është i ndarë në katër blloqe kryesore që përmbledhin fushat ku kërkohet ndërhyrje dhe përcakton në mënyrë të qartë atë çka Shqipëria dhe autoritetet e saj duhet të realizojnë.Lidhur me dokumentat e udhëtimit ajo që kërkohet qartë është prodhimi e pajisja e qytarëve shqiptare me pasdaporta biometrike, marrja e masave për të garantuar integritetin dhe sigurinë e procesit të shpërndarjes, programe trajnimi për zyratrët dhe autoritet që do të merren me to, raportimin në Interpol të pasaportave të humbura apo të vjedhura.Përsa i përket cështjes së Administrimit të kufijve Komisioni kërkon përshtatjen dhe zbatimin e legjislacionit që rregullon lëvijen e personave të kufitë e jashtëm, mas buxhetore dhe administrative që të sigurojnë infrastrukturë efikase, pajisje dhe teknologji si dhe programe trajnimi me policinë kufitare, doganierët dhe zyrtarë të tjerë të përfshirë. Shqipërisë I kërkohet ngritja dhe zbatimi I mekanmizmave për kontrolin e flukseve migratore, mbajtjen e të dhënave si për emigracionin e ligjshëm ashtu dhe atë illegal apo ngritjen e strukturave për analizimin e tyre. Po ashtu kërkohet përmirësimi edhe në hetimin e rasteve te trafiqeve të organizuara.Rendi Publik dhe Siguria janë një tjetër fushë ku kërkohen ndërhyrje të shumta. Në dokument theksohet se shqipëria duhet të zbatojë strategjinë e luftës kundër krimit të organizuar me një plan veprimi që të ketë afate të përcaktuara kohore e të mbështetet nga burime të mjaftueshme njerëzore dhe financiare. E njëjta gjë kërkohet edhe për luftën kundër trafikut të qënieve njerëzore apo kundër korrupsionit. Lufta kundër pastrimit të parave dhe konfiskimit të pasuriove të kriminelëve apo dhe zbatimi i strategjisë kombëtare kundër trafikut të drogës janë cështje të tjera ku kërkohet të merren masa. Në dokument nënvozohet nevoja e bashkëpunimit të strukturave gjyqësore dhe të prokurorisë me shtetet anëtare të Be dhe vendet e rajonit apo dhe një ndërveprim efikas edhe mes vetë strukturave të brendshme shqiptare.Kërkesat e detajuara të Komisionit europian do të kërkojnë një angazhim serioz të strukturave të shtetit shqiptar. Theksi kudo vihet në nevojën për zbatimin e ligjeve apo konventave ndërkombëtare, një mangësi e dukshme e institucioneve shqiptare. Shqipëria do të duhet të ngrejë një sërë strukturash të reja dhe të japë për to mbështetjen e nevojshme financiare. Sic theksohet edhe në dokument, shpejtësia e lëvizjes drejt liberalizimit do të varte nga progresi I bërë nga secili vend në përmbushje të kushteve të vëna. I gjithë progresi do të vëzhgohet nga afër prej Këshillit dhe komisionit europian. Komisioni do të raportojë rregullisht për ecurinë në zbatimin e kërkesave. Raportimi i parë do të jetë para fundit të këtij viti. Në mbyllje të procesit do të jetë Komisioni europian i cili do t’i propozojë Këshillit të ministrave, pas konsultimit me Parlamentin europian marrjen e vendimit. Një vendim i cili do të kërkojë një votim më shumicë të kualifikuar të vendeve anëtare.VOA

Puna pas “Bukureshtit” një angazhim serioz

2008-05-17T17:08:00.002Z

Takimi i shefave të Shtabeve të NATO-s dhe vendeve
partnere në Shtabin e NATO-s në Bruksel, merr pjesë edhe shefi i shtabit të FASH gjeneral lejtnat Luan hoxha

Ushtarakët më të lartë të vendeve të NATO-s dhe atyre partnere u takuan në Shtabin e NATO-s në Bruksel, në 14-15 maj 2008, në takimin e tyre të pranverës. Për herë të parë, shefat e Mbrojtjes të vendeve që nuk janë anëtarë të NATO-s, vendet e të cilëve japin kontributin e tyre në operacionet që udhëhiqen nga NATO në Afganistan dhe Kosovë, morrin pjesë në një diskutim të përbashkët. Ky është edhe takimi i parë, nga tre të planifikuar, për t’u mbajtur gjatë këtij viti me shefat e Shtabeve të vendeve të NATO-s. Më shumë se 60 shefa të Mbrojtjes nga vendet e NATO-s, nga vendet që japin kontribut në NATO, nga vendet e Partneritetit për Paqe, vendet e Medheut të përfshira në Dialogun Mesdhetar (Ukraina dhe Rusia), ishin pjesëmarrës në këtë aktivitet, duke e bërë këtë, takimin më të madh në numër dhe të nivelit më të lartë në historinë e ekspertizës ushtarakë të NATO. Për më tepër, në këtë takim u realizua edhe ceremonia e firmosjes së Memorandumit të Mirëkuptimit midis NATO-s dhe shtatë vendeve, në lidhje me ngritjen e Qendrës së Mbrojtjes nga Pirateria Kompjuterike në Estoni. Në këtë Samit të nivelit të Lartë u mbajtën disa sesione, ku u përfshinën drejtpërsëdrejti shefat e Mbrojtjes të vendeve të NATO-s। Sikurse mësohet, çështjet kryesore të trajtuara ishin: operacionet (trajtimi tërësor i misioneve dhe operacioneve të drejtuara nga NATO, ISAF dhe KFOR në veçanti) dhe, diskutimi për masat që duhen marrë në lidhje me zbatimin e vendimeve që u muarrën në Samitin e Bukureshtit.Ndërkohë, takime të tjera shtesë, në formatin e Këshillit të Partneritetit Euro Atlantik, u mbajtën me synim shkëmbimin e eksperiencës për operacionet që udhëhiqen nga NATO, diskutime në lidhje me zhvillimet ushtarake të Partneritetit pas Samitit të Bukureshtit; dialogu me vendet e Mesdheut (diskutime për zgjerimin e bashkëpunimit Ushtarak midisvendeve), përditësimi i transformimit të Forcave të Armatosura të Ukrainës si dhe vlerësimi vjetor i Planit të Punës vjetor për vitin 2008 midis NATO-s dhe Ukrainës, shkëmbim pikëpamjesh me Rusinë për çështje Operacionale si dhe rishikimi i progresit të planit të punës për vitin 2008. Ky ishte edhe takimi i fundit i shefave të Shtabeve që u drejtua nga gjeneral Ray Henault, i cili do të largohet nga radhët e Forcave të Armatosura në fund të qershorit të këtij viti.

Gazeta “Ushtria”

Bruksel, Shqipëria mbyll raundin e dytë të negociatave për anëtarësim në NATO

2008-05-10T13:01:00.001Z

“Më 9 maj 2008, përfunduan me sukses, në selinë e NATO-s, në Bruksel, negociatat zyrtare ndërmjet Aleancës së Atlantikut të Veriut dhe Republikës së Shqipërisë në kuadër të procesit të anëtarësimit të plotë të Shqipërisë në NATO, dhe në përputhje me deklaratën përfundimtare te Samitit të NATO-s në Bukuresht”, bëri me dije Qeveria shqiptare. “Janë zhvilluar gjithsej dy raunde bisedimesh ndërmjet ekipit negociator të Qeverisë Shqiptare dhe Përfaqësuesve të Lartë të Aleancës. Ne këto bisedime, Shqipëria u angazhua, që si anëtare e Aleancës, të mbrojë dhe promovojë parimet dhe vlerat e sanksionuara në Traktatin e Uashingtonit, si dhe të ndajë me Aleatët të gjitha përgjegjësitë dhe detyrimet e vendit anëtar me të drejta të plota”, tha Koordinatori Kombëtar për integrimin e Shqipërisë në NATO, Glori Husi. “Shqipëria merr përsipër të jetë një aleate e denjë dhe luajale e NATO-s, dhe e vendeve Aleate, si dhe të japë kontributin e saj për garantimin e paqes dhe sigurisë së rajonit Euroatlantik, e më gjerë”, thuhet më tej nga burimet e Qeverisë shqiptare. Sipas tyre, Përfaqësuesit e lartë të NATO-s vlerësuan qarte se ishin arritjet e padiskutueshme të reformave të thella e të gjithanshme ato që bënë të mundur marrjen e ftesës në Samitin e Bukureshtit. Ishte rezultati i këtyre reformave të suksesshme, që mundësoi mbylljen me sukses të plotë të negociatave zyrtare me NATO-n, në një kohe rekord, vetëm një muaj pas këtij Samiti. “Me mbylljen e negociatave hapet rruga për nënshkrimin e protokolleve të pranimit të Shqipërisë në Aleancën e Atlantikut të Veriut, të cilat pritet të nënshkruhen mbas dy muajsh, pra në Korrik 2008, në selinë e NATO-s ne Bruksel”, paralajmëroi Qeveria e Shqipërisë.

Anëtarësimi i Shqipërisë në NATO, mbyllet raundi i parë i negociatave

2008-04-23T14:46:00.000Z

U u mbyll në Bruksel raundi i parë i negociatave ndërmjet Aleancës së Atlantikut të Veriut (NATO) dhe Republikës së Shqipërisë. Ekipi negociator shqiptar kryesohej nga z. Glori Husi, Koordinator Kombëtar për çështjet me NATO-n. Negociatat e sotme u përqëndruan në çështjet politike dhe të mbrojtjes. Shqipëria angazhohet të përmbushë të gjitha detyrimet që rrjedhin nga parimet bazë të Traktatit të Washingtonit. Pas këtij raundi të bisedimeve, më 9 maj 2008 do të mbahet edhe një raund tjetër, gjatë të cilit do të negociohet për çështje të karakterit tekniko-ligjor, çështje të sigurisë dhe të burimeve financiare dhe njerëzore. Pas përfundimit të negociatave dhe konsultimeve do të aprovohet një plan masash dhe veprimesh me afate të përcaktuara qartë, të domosdoshme për anëtarësimin me të drejta të plota në Aleancë, të cilat do të përmbushen gjatë kësaj periudhe, deri në pranverën e vitit të ardhshëm.

Sekretari i NATO-s Scheffer: Shqipëria e Kroacia të fillojnë bisedimet për anëtarësim të plotë

2008-04-09T17:09:00.001Z

Sekretari i Përgjithshëm i NATO-s Jap de Hoop Scheffer kërkon që Shqipëria dhe Kroacia të fillojnë bisedimet për tu bërë anëtare me të drejta të plota të Aleancës së Atlantikut të Veriut. Nëpërmjet letrave të komunikimit zyrtar me qeveritë e dy vendeve që morën ftesën për anëtarësim në Samitin e Bukureshtit, Scheffer i fton Shqipërinë dhe Kroacinë të dërgojnë pa humbur kohë ekipet e tyre për bisedime lidhur me anëtarësimin me të drejta të plota.
“Shqipëria dhe Kroacia të fillojnë bisedimet për tu bërë anëtare me të drejta të plota të Aleancës. Këto dy vende nuk duhet të humbasin kohë por të dërgojnë ekipet e tyre për nisjen e bisedimeve të cilat do të zgjasin disa javë”, është shorehur Sekretari i Përgjithshëm i NATO-s Jap të Hoop Scheffer. Shqipëria dhe Kroacia morën ftesën për anëtarësim, në Samitin e NATO-s në Bukuresht i cili zhvilloi punimet më 2-4 prill 2008. Dy vendet e ftuara për anëtarësim në Aleancë morën pjesë në “Kartën e Adriatikut” bashkë me Maqedoninë e cila nuk mori ftesë për anëtarësim në NATO pas mosmarrëveshjeve me Greqinë lidhur me çështjen e emrit.

Shqipëria merr ftesën për anëtarësim në NATO

2008-04-03T13:02:00.000Z

Pas përfundimit të punimeve të seancës së parë të Samitit të NATO-s, i cili u zhvillua në Bukuresht të Rumanisë, Sekretari i Përgjithshëm i NATO-s, Jaap de Hoop Scheffer, bëri të ditur në një konferencë për shtyp se të 26 vendet anëtare të NATO-s, miratuan ftesën për anëtarësim të Shqipërisë, si anëtare me të drejta të plota në Aleancën e Atlantikut të Veriut.

Shqiptarët shpresojnë tek ftesa për hyrjen e vendit në NATO

2008-04-02T20:41:00.001Z

Qytetarët shpresojnë se Samiti i Bukureshtit do ti japë Shqipërisë një ftesë për anëtarësim në NATO. Ata thonë se hyrja e vendit në Aleancën Veri-Atlantike është një zhvillim historik pozitiv për vendin. Sipas pyetësorëve më shumë se 94 për qind e qytetarëve shqiptarë mbështesin hyrjen e vendit në NATO. Qytetarët mendojnë se anëtarësimi do të thotë më shumë siguri, stabilitet, luftë kundër krimit e korrupsionit dhe një shtet më funksional. Njerëzit e thjeshtë nuk e dinë megjithatë, se anëtarësimi i vendit në Organizatën më të madhe ushtarake-politike të Atlantikut të Veriut vecc përfitimeve ka edhe kosto e detyrime që duhen përmbushur.

Delegacioni zyrtar që do të përfaqësojë Shqipërinë si vend kandidat për anëtarësim në Samitin e NATO-s është nisur sot për në Bukuresht në një atmosferë optimiste. Presidenti, Kryeministri, Ministri i Mbrojtjes dhe drejtuesit e grupeve parlamentare të maxhorancës dhe opozitës shpresojnë të kthehen në Tiranë me një ftesë për anëtarësimin e Shqipërisë në NATO. Kryeministri Sali Berisha duke shprehur bindjen e tij për marrjen e ftesës, e krahasoi atë me një zhvillim historik po aq të rëndësishëm sa shpallja e Pavarësisë në vitin 1912 dhe rënia e diktaturës komuniste në vitet `90.

Përpjekjet e Shqipërisë për të plotësuar kushtet për marrjen e ftesës së anëtarësimit në NATO, kanë qenë argumenti i vetëm politik për të cilin maxhoranca dhe opozita të karakterizuara tradicionalisht nga një komunikim i tensionuar dhe mungesa e dialogut kanë bërë konsensus dhe kanë pranuar të ulen në bisedime rreth reformës zgjedhore dhe asaj në drejtësi. Kryetari i Partisë më të madhe në opozitë, Edi Rama, është shprehur se vendi duhet të vazhdojë reformat dhe ti thellojë më tej ato për të qenë një vend i denjë si anëtar i NATO-s.

Para Samitit të Bukureshtit ku mes të tjerash pritet të diskutohet edhe për pranimin e tri vendeve kandidate të Kartës së Adriatikut, Shqipëri, Kroaci dhe Maqedoni, Shtetet e Bashkuara kanë dhënë mesazhe optimiste duke thënë se hyrja në NATO e vendeve të “A3” ndikon në rritjen e sigurisë dhe stabilitetit në Ballkan dhe se vendet aspirante për anëtarësim kanë bërë përparime të dukshme.

SHBA: Shpresojmë të hyni në NATO, anëtarësimi është meritë e gjithë popullit shqiptar

2008-03-28T14:00:00.001Z

Ambasadori i Shteteve të Bashkuara të Amerikës në Tiranë, shprehu bindjen e tij se Shqipëria do të marrë ftesën e anëtarësimit në NATO në Samitin e Aleancës Veriatlantike që pritet të mbahet në Bukuresht gjatë ditëve të para të muajit prill.
Diplomati John Withers që përfaqëson SHBA-të në Tiranë, e bëri këtë deklaratë në një takim me drejtuesit e opozitës. Ambasadori amerikan përshëndeti kontributin e opozitës shqiptare në procesin e integrimit të vendit në NATO duke pohuar se anëtarësimi nuk do të shikohet nga Shtetet e Bashkuara si një meritë e një grupi të caktuar politik, por si një arritje të Popullit Shqiptar.
“Është e rëndësishme ftesa e Shqipërisë në NATO. Mund të jeni informuar dje se Presidenti Bush shprehu vendimin e tij se do të ndihmojë vendet e Kartës së Adriatikut, mes tyre dhe Shqipërinë për ftesën në NATO. Shpresojmë që kjo të bëhet realitet në ditët që vijnë”, tha ambasadori amerikan në Tiranë.
Drejtuesi i partisë më të madhe në opozitë, Edi Rama tha se integrimi i vendit në NATO kërkon thellimin e mëtejshëm të reformave.

"Mos na gërric shumë..."

2008-03-23T16:14:00.001Z

Së bashku me një kolegun tim, ndodhesha diku në brendësi të fshatit Gërdec, atje ku më tepër se një javë më parë, ndodhi shpërthimi i një fabrike demontimi municionesh luftarake që shkaktoi tragjedinë më të madhe të ndodhur ndonjëherë në Shqipëri. Isha zgjuar në mëngjes me idenë se kjo është një ditë e diel, kur në Tiranë nuk ka shumë aktivitete, me idenë se kaloi një javë nga tragjedia e Gërdecit, dhe, se tani ja vlente të shkoje edhe njëherë atje, për të parë më ftohtë pasojat e asaj që ka ndodhur. Po ecnim në një rrugicë të fshatit, ishim nisur drejt zonës ku ndodhej krateri i shpërthimit, kur një makinë e policisë ushtarake, u shfaq në fund të rrugicës. Prej saj zbritën dy efektiva të policisë ushtarake. Vërshëlluan prej larg ndërsa u nisën me vrap drejt nesh. “Kjo është zonë e ndaluar”, thanë duke na zënë rrugën e më pas duke na thënë se “duhet të ktheheni, kemi urdhër të mos ju lejojmë”. I kërkova një urdhër, policit që në moshë dukej më i madh, i thashë dua ta shikoj atë urdhër zotëri. Hajde të shkojmë tek komandanti tha, është atje poshtë, tek postblloku. Epo mirë i thashë, shkojmë. Në fund të rrugicës, ndodhej po aty ku kishte ndaluar më parë, makina e policisë ushtarake. Njëri nga efektivat hapi derën dhe na ftoi në makinë. Jo zotëri i thashë, unë do të eci në këmbë, dua të shikoj fshatin, nëse mundeni më shoqëroni deri tek komandanti juaj, unë nuk jam kriminel dhe as keqbërës që të më ndaloni, të më shoqëroni me makinë. Kjo ndjesi me nervozoi pak. U thashë se do të ishte mirë sikur të merreshin me banorët e zonës që kanë nevojë për ndihmë dhe të mos harxhonin kohë me gazetarët. Ky natyrisht nuk ishte një incident. Unë nuk e konsideroj të tillë, por pas kësaj që u thashë dy policëve, njëri prej tyre mu kthye duke më thënë “ec ore, mos na gërric shumë”. Ndalova. Iu afrova dhe i kapa uniformën ushtarake në krahun e majtë. “Zotëri i thashë, respektoje këtë uniformë që ke veshur, unë nuk po kërkoj të më respektosh. Ky që përdor ti, nuk mundet të jetë kurrë, fjalor i një ushtaraku që ka vend në NATO”. U step por nuk kisha dëshirë të vazhdoja më tej. U pendova që ia thashë tani këto fjalë, sepse në fakt kisha menduar tja thosha në sy të Komandantit. Fillova ecjen dhe pashë se po afroheshim tek qendra e Komandës. I pyeta ku ndodhej Komandanti. Njëri nga policët më tha se ai ishte lart në zonë. Sa mund të vonohet zotëri. Nuk e di më tha. Unë nuk kam kohë të pres këtu me orë i thashë, por ai si duket nuk e kishte mendjen. Ia përsërita dhe mu kthye gjithë ironi: Përse zotëri doni të hyni në atë zonë, përse doni të filmoni?. E sqarova duke i thënë se unë nuk dua të filmoj, dua të flas me njerëzit, ti pyes. “Kush ti pyesë, ti?, mu përgjigj. Po unë i thashë do ti pyes, kam dëshirë të shkruaj për ata dhe jo për ju. Në këtë kohë mbërriti komandanti, i cili nuk kishte qenë aty. Policët e tij më kishin gënjyer kur më thanë hajde se na pret komandanti poshtë. Ai erdhi pasi kisha pritur rreth 35 minuta. U zemërua me një kolegun tim, u tha ushtarëve se kishin bërë shumë mirë që ishin sjellë në atë mënyrë me të, dhe harroi fare që unë, i kisha bërë një telefonatë dhe i kisha thënë se po prisja një konfirmim nga ai për të hyrë në zonë. Kaloi kufizimin e zonës ushtarake dhe po ecte. I thirra disa herë por nuk ktheu kokën. E telefonova kur kishte hyrë brenda çadrave ushtarake dhe i thashë se të paktën duhej të komunikonte me mua. Përfundimisht unë hyra në zonë dhe mbarova çfarë kisha për të bërë. Ky episod mu fiksua keq në mendje, parë në dritën e një diskutimi që kam pasur këtu e muaj të shkuar me një Komandant të Forcave Speciale Gjermane. E pata takuar në repartin RENEA. “Problemi kryesor i Shqipërisë është reformimi. Unë nuk e di çfarë nënkuptojnë politikanët tuaj me reforma, por unë flas për reformimin e njeriut. Ju keni policë të mirë, ata kanë vullnet dhe aftësi, por më vjen keq kur i shikoj që vijnë në punë sa për të qenë, nuk kanë asnjë ide dhe nuk kërkojnë asgjë më shumë nga vetja. Nuk përpiqen çdo ditë ti japin një kuptim asaj që bëjnë, nuk mundohen të gjejnë forma për tu përmirësuar gradualisht”. Ngjarja e mësipërme dhe dialogu me efektivin gjerman mu kujtuan ndërsa po mendoja edhe unë si shumëkush në këtë vend: A do të ketë ndikim ngjarja e Gërdecit në procesin e anëtarësimit të Shqipërisë në NATO? Pa dyshim që do të ketë ndikimin e saj, por gjithsesi, Shqipëria hyn në NATO atëherë kur ta meritojë. Atëherë kur ushtarët e saj, të paktën në kohën kur kanë uniformën mbi trup, të lënë mënjanë fjalorin prej gangsteri, atë sjelljen prej rrugaçi dhe zyrtari që bën insinuata personale ndaj shtetasve të këtij vendi. Edhe nëse Shqipëria nuk hyn në NATO, për shqiptarët do të jetë një fitore e madhe nëse reformohen këta njerëz, nëse policia ushtarake, apo çdo efektiv i ushtrisë, e konsideron vetën në shërbim të qytetarit dhe partner të denjë e të besueshëm të tij. Unë kam qenë i ftuar në Shtabin e Përgjithshëm të NATO-s, kam qenë edhe në Komandën e Operacioneve në Mons, një qytet thuajse tërësisht ushtarak në Belgjikë. Aty kam pasur rastin të komunikoj me ushtarakë të ndryshëm gjatë qëndrimit disaditor. Nuk më vjen aspak mirë, që ushtarakët grekë, italianë, francezë apo polonezë, u sollën dhe komunikuan me mua në një mënyrë shumë më zyrtare, njerëzore dhe korrekte, sesa ushtarakët e vendit tim, Shqipërisë, të cilët doja të doja me gjithë shpirt, që një ditë të silleshin, të shërbenin dhe të komunikonin me qytetarët si ata, ushtarakët e NATO-s.

Qeveria Shqiptare miraton Strategjinë e Integrimit 2007-2013

2008-03-13T18:53:00.001Z

TIRANE-13 mars, 2007-Qeveria e Shqipërisë miratoi Strategjinë Kombëtare për Zhvillim dhe Integrim 2007-2013 (SKZHI). Dokumenti i Strategjisë, sikurse shprehen burimet qeveritare, është një përcaktim prioritetesh qeverisëse në ato fusha dhe ata sektorë që renditen ndër më të kritikuarit nga raportet ndërkombëtare. Kryeministri Berisha, duke prezantuar Strategjinë, tha se ajo përcakton programin e reformave, prioritetet dhe standardet për përgatitjen e vendit për anëtarësim në Bashkimin Europian dhe NATO. “Strategjia, - u shpreh Kryeministri - është dokument themelor që përcakton vizionin dhe përparësitë e qeverisë për vitet 2007-2013. Ajo sintetizon mendimin më të avancuar të kohës për të adresuar të gjitha problemet e vendit, në mënyrë që t’i ofrojë qytetarëve shqiptarë të njëjtat standarde që u ofrohen qytetarëve të vendeve anëtare të BE-së, standarde të detyrueshme dhe që kanë të bëjnë me liritë e të drejtat e tyre, lirinë ekonomike, me luftën kundër krimit të organizuar dhe korrupsionit.” Kryeministri falënderoi grupin e ekspertëve shqiptarë dhe të huaj për punën e bërë në përgatitjen e këtij dokumenti të rëndësishëm, që adreson problemet e të gjitha fushave. “Në përgatitjen e këtij dokumenti kanë punuar mbi 300 ekspertë shqiptarë të fushave të ndryshme dhe me dhjetëra ekspertë ndërkombëtarë, të cilët kanë sjellë ekspertizën më të mirë në të gjitha fushat, në atë ekonomike, sociale, arsim, shëndetësi, shkencë, bujqësi, në fushën e mbrojtjes, infrastrukturë, kulturë, financa, çështjeve sociale, mjedisit.” Duke vlerësuar se Strategjia konsolidon revolucionin dhe performancën fiskale të vendit, Kryeministri tha se liberalizimi i tregut, privatizimi dhe digitalizimi janë objektivat kryesore të këtij viti. “Liberalizimi, privatizimi dhe digjitalizimi janë drejtimet më kryesore të këtij viti, por që do të konsolidohen edhe në vitet në vazhdim, si edhe derregullimi i tregut, ‘one stop shop’ për licencat e lejet, thjeshtimi i madh i sistemit fiskal. Shqipëria do të jetë një nga vendet me sistemin më të mirë fiskal në Europë. Ne premtuam se Shqipëria do të jetë vendi me barrën fiskale më të ulët dhe e bëmë këtë, tani vendi do të ketë sistemin më të thjeshtë. Qëllimi ynë është nxitja e biznesit,” u shpreh Kryeministri. Gjithashtu shëndetësia, bujqësia, problemet sociale janë drejtimet e tjera të rëndësishme të parashikuara në dokumentin e SKZHI-së. “Reforma në sistemin shëndetësor dhe kompletimi i saj është një nga objektivat madhore. Qeveria është gjithnjë shumë e ndjeshme ndaj problemeve sociale, ndaj edhe këto shërbime do të kenë programet, projektet dhe financimin e tyre, në mënyrë që të përmirësohet cilësia e shërbimeve sociale. Po ashtu, bujqësia zë një vend të rëndësishëm në këtë Strategji. Fermerët shqiptarë kanë konstatuar se kanë tek qeveria një mike të vërtetë, e cila, në sajë të luftës kundër kontrabandës, ka bërë të mundur që prodhimet e tyre të shiten. Por tashmë do të ketë edhe masa të tjera nxitëse, në mënyrë që të inkurajohet prodhimi dhe eksporti i prodhimeve të tyre,” theksoi Kryeministri. Mbrojtja, tha Kryeministri, do të mbetet me programin dhe buxhetin të palëvizur, sepse roli i Shqipërisë do të bëhet gjithnjë e më i rëndësishëm, besojmë si vend anëtar i NATO-s, duke shpresuar te marrja e ftesës në samitin e Bukureshtit, në misionet dhe në të gjitha detyrat që rrjedhin nga përgjegjësitë që duhet të marrë. Strategjia parashikon gjithashtu, - vijoi Kryeministri - një ndryshim rrënjësor pozitiv në institucionet e vuajtjes së dënimit, të cilat po ecin me shpejtësi drejt zhvillimit dhe që duhet të fitojnë standardet që këto institucione duhet të kenë në një vend të lirë. Kryeministri tha se Strategjia Kombëtare për Zhvillim dhe Integrim e përgatit plotësisht vendin për integrim, drejt këtij stacioni, ku Shqipëria po udhëton në mënyrë të pandalshme.

Hyrja e vendeve të “A3” në NATO vendim politik i momentit të fundit

2008-03-12T13:31:00.001Z

Afrimi i kohës së paralajmëruar për zhvillimin e punimeve të Samitit të NATO-s në Bukuresht është shoqëruar me rritjen e interesit publik lidhur me këtë proces, në tri vendet ballkanike që aspirojnë të bëhen anëtare të Aleancës së Atlantikut të Veriut. Në dialogun politik dhe veprimtarinë institucionale të Shqipërisë, Maqedonisë dhe Kroacisë gjithnjë e më shumë muajt dhe javët e fundit zë vend integrimi në NATO dhe përpjekjet për përmbushjen e kushteve e reformave të kërkuara. Rritja e dukshme e interesit publik lidhur me këtë proces, është pasqyruar edhe në Shqipëri. Politikanët dhe shtetarët gjithnjë e më shumë veprimtarinë shtetërore të kohëve të fundit ia referojnë përgatitjeve për marrjen e ftesës së anëtarësimit në NATO. Mediat gjithashtu po i kushtojnë më tepër hapësirë se më parë, çdo reagimi nga brena apo jashtë Shqipërisë që flet për procesin e anëtarësimit të vendit në NATO. Kjo rritje e interesit publik, në rastin e medias ka shkaktuar brenda Shqipërisë edhe konfuzion. Disa javë më parë, Ambasada Amerikane në Tirënë u detyrua të sqaronte publikisht se nuk kishte ndonjë ftesë të firmosur për hyrjen e Shqipërisë në NATO. Përfaqësia diplomatike e SHBA-ve në Shqipëri, sqaroi po ashtu se vendimi do të merrej në përfundim të monitorimit të përparimit që ka bërë vendi deri momentin e fundit dhe se, vendimi për ftesën, i përkiste të gjitha vendeve anëtare të NATO-s. Ky sqarim erdhi pasi mediat referuar burimeve qeveritare nga Tirana, e bënë fakt të kryer marrjen e ftesës nga Shqipëria në Samitin e Bukureshtit. Pak kohë më vonë, mediat shqiptare, kësaj radhe referuar burimeve nga Brukseli, përmendën se NATO kishte nënshkruar tri ftesa “të bardha” në të cilat nuk ishte hedhur ende emri i ndonjë shteti kandidat. Nga ana tjetër, Ministri Shqiptar i Mbrojtjes Fatmir Mediu, i cili përgjigjet drejtpërdrejt për procesin e anëtarësimit të vendit në NATO dhe reformat në fushën e mbrojtjes, ka pasur një aktivitet intensiv muajt e fundit. Ai ka zhvilluar takime të rëndësishme në Departamentin e Shtetit të SHBA-ve dhe në Qeverinë Britanike në Londër, ku ka marrë mbështetje dhe sinjale pozitive rreth hyrjes së Shqipërisë në NATO. Qëndrimi i deritanishëm i faktorit ndërkombëtar rreth përpjekjeve të Shqipërisë me qëllim meritimin e ftesës së NATO-s në Bukuresht, mund të konsiderohet pozitiv. Sekretari i Përgjithshëm i Aleancës Veriatlantike Jaap de Hoop Scheffer ka vlerësuar reformat e ndërmarra së fundi nga Shqipëria, konkretisht konsensusin politik mbi reformën zgjedhore dhe atë në drejtësi. Scheffer kërkoi konsolidimin e këtyre reformave duke thënë se dyert e NATO-s janë të hapura për vendet e Kartës së Adriatikut nëse ato i përmbushin kushtet për anëtarësim në NATO. Është e qartë se Aleanca e Atlantikut të Veriut ka një objektivat e saj zgjerimin në Ballkan përmes anëtarësimit të Shqipërisë, Maqedonisë dhe Kroacisë. Ndryshe nuk do të kishte kuptim mardhënia aktuale e partneritetit mes këtyre tri vendeve dhe NATO-s. Nga ana tjetër një prani më e zgjeruar e NATO-s në Ballkan, do të thotë më tepër siguri, stabilitet dhe demokratizim. Roli i NATO-s në rajonin e Ballkanit, si një faktor madhor në ruajtjen e sigurisë bashkë me faktorin amerikan, u konfirmua edhe njëherë gjatë dhe pas shpalljes së Pavarësisë nga Republika e Kosovës. Mirëpo përkundër këtyre argumenteve, votimi i vendeve anëtare të NATO-s në Bukuresht, në fakt veç të tjerave, do të vlerësojë mbi një parametër të domosdoshëm: Arritjet dhe reformat e ndërmarra nga secili prej vendeve kandidate. Sikurse mund të mendohet, pavarësisht gjithë faktorëve të tjerë nxitës, anëtarësimi i vendeve të “A3” në këtë moment mund të konsiderohet i vështirë. Secili vend anëtar i NATO-s rreth 2 për qind të Prodhimit të Përgjithshëm, ia dedikon fushës së mbrojtjes. Kjo është bërë shkak për përparime dhe përmirësime të dukshme jo vetëm të forcës ushtarake të secilit vend anëtar të NATO-s, por edhe për vetë Aleancën. Nga ana tjetër, për të gjitha operacionet ushtarake ndërkombëtare të NATO-s, secili vend anëtar paguan dhe paguan shumë në fakt, për të kontribuar në ruajtjen e sigurisë dhe të paqes. Vendet e Kartës së Adriatikut nuk kanë shumë për ti ofruar NATO-s, në fakt. Shqipëria aktualisht nuk ka asnjë skuadër avionësh gjuajtës nga ata që i afrohen parametrave të NATO-s. Më tepër si rezultat i programeve të mbërritura në kuadër të përpjekjeve dhe programit të anëtarësimit, Forcat e Armatosura shqiptare kanë krijuar një trupë elitë, e cila është stërvitur dhe formuar mbi bazën e koncepteve të NATO-s. Është e vërtetë së FA-të Shqiptare e kanë arritur këtë, ato janë të pranishme në disa misione paqeruajtëse ndërkombëtare në kuadër të Partneritetit për Paqe. Pra Shqipëria me kapacitetet e saj po importon siguri. Nga ana tjetër, roli i Shqipërisë në rajon është vlerësuar pozitiv ashtu si dhe mardhëniet e saj me fqinjët apo edhe me vendet anëtare të NATO-s dhe Bashkimit Evropian. Është e qartë se në shumë fusha është bërë përparim ashtu sikurse ka shumë për të bërë në drejtime të tjera të domosdoshme. Rezultantja e të gjithë këtyre do të mësohet në fund të punimeve të Samitit të Bukureshtit. Vendimi siç e kanë përsëritur vazhdimisht zyrtarët ndërkombëtarë, do të jetë politik. Është e qartë se vendimi do të merret në momentin e fundit, sepse në fakt nuk është një vendim i lehtë, jo vetëm sepse kërkon votën e 26 vendeve anëtare të NATO-s, por sepse vendosja në peshore e arritjeve dhe të metave të tri shteteve kandidate, duket se ka shkaktuar diskutime serioze edhe brenda vetë Aleancës së Atlantikut të Veriut.

Sekretari i Përgjithshëm i NATO-s: Reformat mjaftojnë për kualifikim, por duhet të jenë të qëndrueshme

2008-03-02T16:01:00.000Z

Sekretari i Përgjithshëm i NATO-s, Jap de Hoop Schefer vlerësoi reformat e ndërmarra nga vendet e Kartës së Adriatikut, Shqipëri, Maqedoni dhe Kroaci, aspirante për anëtarësim në Organizatën Veriatlantike në Samitin e Bukureshtit që mbahet në prill 2008. Shefi i NATO-s tha se reformat e ndërmarra deri më tani janë të mjaftueshme për kualifikimin e vendeve kandidate. Ai tha më tej se Aleanca nuk ka marrë ende vendim përfundimtar për ftesat për anëtarësim. Schefer konfirmoi se vendet kandidate për anëtarësi, tani duhet të tregojnë se reformat e ndërmarra deri më tani, janë stabile dhe të qëndrueshme.

Departamenti i Shtetit: Lufta kundër narkotikëve në Shqipëri, frenohet nga korrupsioni

2008-03-02T15:53:00.001Z

01-03-2008
Në raportin e përvitshëm për drogën dhe pastrimin e parave, Departamenti Amerikan i Shtetit thotë se Shqipëria ka bërë përmirësim në luftën kundër narkotikëve dhe krimit financial, por se përpjekjet e saj pengohen nga korrupsioni, mangësitë profesionale në strukturat e rendit, sistemi i pareformuar gjyqësor, si edhe ekonomia informale.
Dëshira e Shqipërisë për të hyrë në BE dhe NATO vazhdon të përbëjë shtysë për qeverinë për të zbatuar reforma, por natyra e përçarë e politikës shqiptare dhe zhvillimi i ngadaltë i shoqërisë civile e kanë penguar përparimin.
Shqipëria thuhet në raportin e Departamentit të Shtetit, shërben si një vend tranzit për trafikun e heroinës nga vendet e Azisë Qendrore në Evropën perëndimore.
Në vitin 2007, kapja e heroinës ra disi, ndërsa kapja e drogave të tjera mbeti e lartë. Qeveria e Shqipërisë, thuhet në raport, në përgjigje të trysnisë dhe me ndihmë ndërkombëtare, po i lufton më me agresivitet elementët kriminalë, por puna e saj vazhdon të pengohet nga mungesa e burimeve dhe përhapja e madhe e korrupsionit.
Portet, kufijtë jo shumë të ruajtura tokësore, së bashku me një polici dhe dogana të financuara e menaxhuar keq dhe me mangësi në paisje, e bëjnë Shqipërinë një vend të lakmueshëm tranzit për trafikantët që transportojnë droga në Evropën Perëndimore.
Qeveria, thuhet në raport, ka ndërmarrë disa hapa kundër korrupsionit: si miratimi i ligjit për Parandalimin e Konflikteve të Interesave dhe nxjerrja e një afati kohor për zbatimin e tij. Po ashtu vëzhdimi nga ana e shoqërisë civile i ka rritur shpresat se korrupsioni do të bjerë. Qeveria nxorri jashtë ligjit qarkullimin e gomoneve dhe disa llojeve të tjera mjetesh lundruese në të gjitha ujrat territoriale për një periudhë prej tre vjetësh, gjë që duket se e ka pakësuar lëvizjen e drogave përmes mjeteve të vogla të lundrimit veçanërisht në Itali. Shqipëria punon me fqinjët në marrëdhënie dypalëshe dhe nisma rajonale për të luftuar krimin e organizuar dhe trafiqet.
Sipas raportit, policia shqiptare vazhdoi të shënojë përparim në operacionet kundër narkotikëve. Sasia e drogës së kapur si nga Italia, ashtu edhe Greqia ka rënë çka do to thotë se Shqipëria ka pasur sukses në përpjekjet e saj. Bashkëpunimi ndërkombëtar u rrit, përfshirë operacione të përbashkëtar me autoritetet italiane, maqedonase, greke dhe turke.
Në raport thuhet se korrupsioni mbetet një problem me rrënjë të thella në Shqipëri. Pagat e ulëta, rryshfetet dhe rrjetet e lidhje të ngushta sociale në Shqipëri e vështirësojnë luftën ndaj korrupsionit në polici, gjykata dhe dogana. Në kuadër të përpjekjeve anti-korrupsion, Shqipëria ratifikoi Konventën e OKB-së kundër korrupsionit. Në vitin 2007 policia dhe gjyqësori u bënë më aktive në hetimin e zyrtarëve të qeverisë dhe personelit të rendit për korrupsion. Në raport përmenden shifrat e dhëna nga Prokuroria e Përgjithshme në bazë të së cilave nga rritja 13 për qind e rasteve që arritën të paraqiten në gjykata, shumica kishte të bënte me korrupsionin, veprimtaritë e paligjshme të zyrtarëve të qeverisë dhe trafikimin.
Grupet e krimit të organzuar, thekson më tej raporti, vazhdojnë ta përdorin Shqipërinë si pikë tranziti për drogat dhe kontrabanda të tjera, për shkak të pozitës strategjike gjeografike të vendit, dobësisë së shtetit ligjor dhe sistemit të pareformuar gjyqësor, si edhe kufijve lehtësisht të depërtueshëm. Shqipëria është pikë tranziti për heroinën që vjen nga Afganistani, përmes rrugës së Ballkanit Turqi-Bullgari-Maqedoni-Shqipëri pastaj në Itali, Mal të Zi, Greqi dhe pjesën tjetër të Evropës Perëndimore. Një sasi e kufizuar por që sa vjen e rritet e kokainës kontrabandohet nga Amerika Jugore në Shqipëri, si për konsum të brendshëm dhe për eksport. Përveç kësaj rrjetet kriminale po përdorin gjithnjë e më shumë shqiptarët për të transportuar koakinë dhe heroinë nga vendet e tjera në Shqipëri, Itali dhe Greqi.
Qeveria e Shqipërisë vazhdon të mirëpresë ndihmën e Shteteve të Bashkuara dhe Evropës Perëndimore. Shtetet e Bashkuara po i intensifikojnë aktivitetet në fushat e rendit dhe reformës ligjore. Një nga problemet e hasura lidhur me ndihmën në kualifikim, është politizimi i lartë në të gjitha nivelet e qeverisjes që sjell si rezultat mungesën e një administrate civile të fortë, kështu që shumë punonjës që i nënshtrohen kualifikimit, bëhen objekt largimi nga detyra gjatë tranizicioneve politike. Ky problem ishte veçanërisht i mprehtë në policinë e shtetit pas zgjedhjeve lokale të vitit 2007. Mes viteve 2005-2006, pothuajse 90 për qind e shefave të pikave kryesore kufitare u transferuan ose u zëvendësuan. Në shumë raste, personeli i ri nuk kishte përvojë të mëparshme, kualifikimin e duhur, apo një ide të qartë të funksionimit të kufirit.
Shqipëria e ka bërë përparësi luftën kundër krimit të organizuar dhe trafikut dhe policia po e rrit rolin në operacionet kundër narkotikëve. Dëshira e Shqipërisë për të hyrë në Bashkimin Evropian dhe NATO vazhdon të përbëjë shtysë për qeverinë për të zbatuar reforma, por natyra e përçarë e politikës shqiptare dhe zhvillimi i ngadaltë i shoqërisë civile e kanë penguar përparimin. Shtetet e Bashkuara së bashku me Bashkimin Evropian dhe partnerë të tjerë ndërkombëtarë do të vazhdojnë të punojnë me qeverinë për të bërë përaparim në luftën kundër trafikut të paligjshëm të drogës, për të përdorur me efektivitet të ndihmës për strukurat e rendit dhe për të mbështetur reformën ligjore.
Si vend tranzit për trafikimin e narkotikëve, armëve, kontrabandës dhe qenieve njerëzore, Shqipëria përballet me rrezikun e lartë të pastrimit të parave
Në kapitullin për pastrimin e parave, raporti thekson se Shqipëria nuk ështe qendër e rëndësishme financiare rajonale. Megjithatë, thekson raporti, duke qënë një vend tranzit për trafikimin e narkotikëve, armëve, kontrabandës dhe qenieve njerëzore, Shqipëria përballet me rrezikun e lartë të pastrimit të parave. Të ardhurat që sigurohen me rruge kriminale burojnë kryesisht nga trafiqet, korrupsioni zyrtar dhe mashtrimet. Korrupsioni dhe krimi i organizuar janë burimet kryesore të pastrimit të parave. Përmasa e saktë që të shumat nga këto aktivitete të paligjshme zenë tek të ardhurat totale të krimit dhe të pastrimit të parave nuk dihet.
Kriminelët investojnë para të pista në ndërtimin e banesave dhe në projektet e zhvillimit të bizneseve. Shqipëria ka një treg të zi të konsiderueshëm për mallrat kontrabandë për shkak të kontrollit të dobët në dogana. Grupet e krimit të organizuar e përdorin Shqipërinë si bazë operacionesh për kryerjen e aktiviteteve kriminale në vende të tjera dhe shpesh i kthejnë fitimet e paligjshme në Shqipëri. Fitimet nga këto aktivitete pastrohen lehtësisht në Shqipëri falë ekonomisë që zhvillohet me para në dorë dhe kontrollit të dobët të qeverisë ndaj veprimtarive bankare.
Sipas Bankës së Shqipërisë, 25 për qind e parave në qarkullim janë jashtë sistemit bankar, krahasuar me 10 për qind në vendet e tjera të Evropës Lindore dhe Qendrore. Një pjesë e konsiderueshme e të ardhurave nga imigrantët hyjnë në vend përmes kanaleve jozyrtare. Këmbimet në tregun e zi janë ende të pranishme me gjithë përpjekjet e qeverisë. Sipas shifrave të qeverisë, të ardhurat nga tregu informal përbëjnë 30-60 për qind të Prodhimit të Brendshëm Bruto.
Megjithëse ka pasur nisma të vazhdueshme për të përmirësuar aftësinë e Shqipërisë për të luftuar krimet financiare dhe pastrimin e parave, mungesa e rezultateve pozitive dhe paaftësia për t’u bërë ballë siç duhet mangësive në programe, vazhdojnë të pengojnë përparimin।

Marrë nga VOA

SHBA rezolutë për marrjen e ftesës së NATO nga Shqipëria

2008-02-29T15:47:00.000Z

Kur ka mbetur edhe një muaj nga Samiti i Bukureshtit, Shtetet e Bashkuara të Amerikës konfirmojnë qëndrimin e tyre për marrjen e ftesës nga Shqipëria, Maqedonia dhe Kroacia në prill në Samitin e Bukureshtit. Senatori Richard Lugar, i njohur për mbështetjen e tij pro vendeve të A3 për t'u anëtarësuar në NATO, i është drejtuar senatit amerikan me një rezolutë, ku mbështetet marrja e ftesës nga ana e tre vendeve të rajonit në Bukuresht në fillim të muajit prill. Rezoluta është miratuar fillimisht më 25 shkurt në komisionin e jashtëm të senatit amerikan dhe nga aty ka kaluar për t'u miratuar në senat. Në dokumentin e senatorit Lugar vlerësohet progresi i bërë nga Shqipëria, Maqedonia dhe Kroacia në tetë vitet e fundit në forcimin e demokracisë në këto vende dhe në transformimin e tregut të lirë. "Për shkak se Shqipëria, Kroacia dhe Maqedonia, në përgatitjet për anëtarësimin në NATO prej më shumë se 8 vitesh kanë kaluar nëpër procese historike të forcimit të demokracisë, transformimin e tregut të lirë; për shkak se Shqipëria, Kroacia dhe Maqedonia kanë bërë progrese të rëndësishme për të vendosur kontrollin civil të ushtrive të tyre duke demonstruar zotësinë për të operuar me forcat e NATO-s dhe standardet e aleancës", thuhet në rezolutën e paraqitur nga senatori Lugar. Në të njëjtën kohë, vendet e Kartës Adriatik 3 vlerësohen edhe për diversitetet etnike të cilat ekzistojnë në to, respektimi i të drejtave të njeriut, ndërtimi i tregut të lirë dhe marrëdhëniet e mira që kanë me fqinjët. Gjithashtu marrja e ftesës nga këto tre vende shikohet edhe në favor të stabilitetit në rajon pas shpalljes së pavarësisë së Kosovës. Në të njëjtën kohë, Shqipëria, Maqedonia dhe Kroacia, vlerësohen edhe për rolin e rëndësishëm që luajnë përmes pjesëmarrjes së tyre në aktivitetet e NATO-s, për të ndaluar çdo përpjekje për dhunë në këtë rajon. Për të gjitha këto arsye, senatori Lugar i propozon senatit amerikan që "SHBA duhet të kenë rolin e liderit në suportin e anëtarësimit të shteteve si Shqipëria, Kroacia dhe Maqedonia për t'iu bashkuar aleancës në prill të 2008". Në të njëjtën kohë senati amerikan, sipas Lugar, duhet të rikonfirmojë mbështetjen për procesin e zgjerimit të NATO-s, për vendet kandidate.

Rezoluta e propozuar nga senatori Lugar
Duke shprehur mbështetjen e fortë të Senatit për NATO, për projektin e zgjerimit me dhënien e ftesave për Shqipërinë, Kroacinë dhe Maqedoninë në Samitin e Bukureshtit në prill 2008 dhe për qëllime të tjera;
Ku NATO do të mbajë një takim mes krerëve të shteteve dhe qeverive në Samitin e Bukureshtit, në Rumani në prill 2008;
Ku NATO ka mbrojtur me sukses territorin dhe interesat e anëtarëve të tij për më shumë se 50 vjet dhe ka kontribuar në lirinë, demokracinë, stabilitetin dhe paqen në të gjithë Evropën;
Për shkak se Shqipëria, Kroacia dhe Maqedonia, në përgatitjet për anëtarësimin në NATO prej më shumë se 8 vitesh kanë kaluar nëpër procese historike të forcimit të demokracisë, transformimin e tregut të lirë;
Për shkak se Shqipëria, Kroacia dhe Maqedonia kanë bërë progrese të rëndësishme për të vendosur kontrollin civil të ushtrive të tyre duke demonstruar zotësinë për të operuar me forcat e NATO-s dhe standardet e aleancës;
Për shkak se Shqipëria, Kroacia dhe Maqedonia vazhdojnë të japin kontributin e tyre të vyer në krah të forcave të Kombeve të Bashkuara, në forcat ndërkombëtare të asistencës dhe sigurisë nën lidershipin e NATO-s në Afganistan, për të stabilizuar dhe rindërtuar këtë shtet;
Për shkak se Shqipëria, Kroacia dhe Maqedonia kanë bërë hapa të rëndësishme për të vendosur proceset e tyre të demokratizimit, përfshirë këtu:
1. Përqafimin e diversiteteve etnike
2. Respektimin e të drejtave të njeriut
3. Ndërtimin e një tregu të lirë
4. Promovimin e marrëdhënieve të mira me vendet fqinjë
Për shkak se NATO ka kryer një ndërhyrje ushtarake kundër Republikës Federale të Jugosllavisë për të vendosur paqen në Kosovë;
Për shkak se diplomacia amerikane e ka përkrahur pavarësinë e Kosovës dhe duhet të mbështesë integrimin e saj në institucionet euro-atlantike;
Për shkak se stabiliteti dhe siguria afatgjatë në Evropën Juglindore kërkon integrimin ushtarak, ekonomik dhe politik të demokracive të reja në strukturat ekzistuese evropiane;
Për shkak se Shqipëria, Kroacia dhe Maqedonia mund të luajnë një rol të rëndësishëm në aktivitetet e NATO-s në Evropën Juglindore nëpërmjet pozicionit unik gjeostrategjik dhe duke ndaluar dhe frenuar çdo përpjekje të çdo lloj pale për të destabilizuar rajonin nëpërmjet dhunës;
Për shkak se neni 10 i marrëveshjes veri-atlantike, i përpiluar në Ëashington më 4 prill 1949, citon se "çdo shtet tjetër evropian që është në gjendje të përmbushë principet e kësaj marrëveshje dhe të kontribuojë në sigurinë e zonës veri atlantike", mund t'i garantohet anëtarësimi në NATO; dhe
Për shkak se deklarata e Samitit të Rigës, e realizuar nga NATO në nëntor 2006 riafirmon se "NATO mbetet e hapur për anëtarë të rinj evropianë":
Bën që senati amerikan të dalë me përfundimin se:
1. Pavarësia politike dhe integriteti territorial i demokracive emergjente në Evropën Juglindore është i një rëndësie vitale për paqen, sigurinë e Evropës dhe është në interes të SHBA.
2. Zgjerimi i NATO-s, kontribuon në efikasitetin dhe aftësinë e vazhdueshme të Aleancës.
3. Senati riafirmon suportin e tij për procesin zgjerues të NATO-s përfshirë këtu vendet kandidate.
4. SHBA duhet të kenë rolin e liderit në suportin e anëtarësimit të shteteve Shqipëria, Kroacia dhe Maqedonia për t'iu bashkuar aleancës në prill të 2008.
Shqipëria, Kroacia dhe Maqedonia nuk janë perfekte dhe kanë nevojë të bëjnë ende progres në fushën ekonomike dhe politike. Megjithatë të tre vendet kanë bërë përparime të dukshme. "Kroacia ka performancën më impresionuese ekonomike dhe në çmimet e pasurive të patundshme në krahasim me çdo vend tjetër në Evropën jugore. Në vitet e fundit Shqipëria ka kontribuar me më shumë ushtarë në misionet në Irak dhe Afganistan dhe paqeruajtësit ndërkombëtarë si të gjithë aleatët e tjerë të NATO-s. Dhe që nga fundi i luftërave ballkanike në vitin 1999, Maqedonia ka ndërtuar një shoqëri shumetnike dhe të integruar në kohën më të shkurtër se çdo komb tjetër në Evropë. Tashmë ne kemi një shans të sjellim në komunitetin euroatlantik të demokracive Kroacinë katolike, Shqipërinë me shumicë myslimane dhe shumetnike dhe Maqedoninë Ortodokse. Kjo nuk është keq.

Kongresmenët
Pak ditë më parë, një delegacion me 6 kongresmenë mbështetën marrjen e ftesës nga Shqipëria në Samitin e Bukureshtit. "Vendimet në NATO merren në bazë të parimit të konsensusit. Shpresojmë që vendet të marrin një ftesë, por ajo që unë them këtu, që kongresi i SHBA-ve i mbështet aspiratat për anëtarësim në NATO të Shqipërisë", theksoi kongresmeni amerikan Tanner gjatë vizitës në Tiranë.

Marrë nga Gazeta “Panorama”, Tiranë

Pentagoni: Vendet e “Adriatik 3” kanë përmbushur kushtet ushtarake për të hyrë në NATO

2008-02-21T13:39:00.000Z

SHBA do të kenë vetëm një nga 26 votat e vendeve anëtare të NATO-s në Samitin e Bukureshtit, por Pentagoni mendon se vendet e Kartës së Adriatikut, Shqipëria, Maqedonia dhe Kroacia kanë përmbushur standardet për të marrë ftesën e hyrjes në Organizatën e Atlantikut të Veriut.
“Nëse flasim për zgjerimin e NATO-s, kjo ndërtesë mendon se kriteret ushtarake gjithsesi janë përmbushur nga vendet e A3”, tha zv/ministri Amerikan i Mbrojtjes Daniell Fata, përgjegjës për Europën dhe NATO-n gjatë konferencës së shtypit që mbajti në Pentagon. Deklarata e zyrtarit të lartë amerikan është bërë pas takimeve të tij me ministrat e mbrojtjes të tri vendeve të “A3” aspirante për anëtarësim në NATO, Shqipëri, Kroaci dhe Maqedoni.
Pasi vlerësoi përparimet e arritura, zv.ministri Amerikan i Mbrojtjes tha se gjithsesi vendet e Kartës së Adriatikut, kanë ende punë për ta bërë me qellim që të bindin vendet anëtare të NATO-s se kanë përmbushur reformat e duhura për të hyrë në Organizatën e Atlantikut te Veriut.
"SHBA-të vlerësojnë se të tri shtetet e “Adriatik 3” i përmbushin kriteret e duhura. Besojmë se Shqipëria, Kroacia dhe Maqedonia të jenë të ftuara për të qenë anëtare të NATO-s", tha zv.ministri Amerikan i Mbrojtjes gjatë konferencës së shtypit mbajtur në ndërtesën e Pentagonit në Uashington.

David L. Filips: NATO duhet ta ftojë Shqipërinë për anëtarësim

2008-02-20T13:54:00.003Z

"NATO duhet të ftojë Shqipërinë që të aderojë pranë aleancës". Kështu deklaroi dje pasdite, David L. Filips, drejtuesi i Komitetit Kombëtar për Politikën e Jashtme amerikane gjatë prezantimit të raportit mbi progresin e reformave të Shqipërisë.Raporti i paraqitur titullohet "Shqipëria, një shtet i brishtë me partner të besueshëm ndërkombëtar". Ky raport analizon reformat dhe rezultatet e qeverisë shqiptare, të cilat, sipas tij, mundësojnë anëtarësimin e saj në NATO. Ai ka qenë i ftuar në Tiranë nga shoqata shqiptare e Atlantikut, që drejtohet nga deputeti Arjan Starova. "Duke vlerësuar progresin e arritur gjatë këtyre 30 muajve, sugjerojmë që NATO ta ftojë Shqipërinë të aderojë në aleancë nëpërmjet Samitit të Bukureshtit në prill të 2008-ës. Së bashku me vendet e NATO-s, Shqipëria ofron kushte të favorshme, duke bërë pjesë si faktor stabiliteti në vendet e Evropës Juglindore, në momentin kur rajoni përgatitet të përballet me rajonin e Kosovës", thuhet në raportin e paraqitur nga Filips. Ai ka vlerësuar progresin e bërë nga ana e Kroacisë dhe Shqipërisë, duke bërë të ditur se Maqedonia ndodhet më prapa në krahasim me dy vendet e tjera të Kartës së Adriatikut. Sipas tij, do të ishte mirë që tre vendet e A3-it, Shqipëria, Kroacia dhe Maqedonia të merrnin njëherësh ftesën nga Samiti i Bukureshtit, por progresi i vendeve nuk mund të pengojë në marrjen e ftesës dhe në mënyrë të veçantë të këtyre shteteve. "Marrja e ftesës nga ana e Shqipërisë do të ndihmonte NATO-n që të forconte pozitat e saj në Evropën Juglindore. Shqipëria ka nevojë për NATO-n dhe NATO-ja ka nevojë për Shqipërinë", deklaroi për median Filips. Ndërsa raporti i paraqitur thekson dhe një veçori, apo një arsye më shumë se pse Shqipëria duhet të pranohet në aleancën më të madhe ushtarake. Pranimi i Shqipërisë në të njëjtën kohë mund të shërbejë si një sinjal pozitiv për vendet e tjera që kanë besime të ndryshme dhe vende multietnike me popullsi myslimane", thuhet në raportin e paraqitur. Ndërsa ky raport nuk rekomandon të njëjtën gjë edhe për BE-në për këtë periudhë. "Për të mbështetur vazhdimësinë e progresit të reformave të Shqipërisë, raporti propozon mbështetjen suplementare nga NATO dhe BE-ja. Për t'u bërë një anëtar i BE-së është një proces i gjatë dhe i vështirë, është një objekt i realizuar për afatgjatë. Perspektiva e vullneti i vendosur i të gjitha vendeve të BE-së do të ndihmojë që të pranojë angazhimet për arritjet e standardeve ndërkombëtare e do të rigarantonte vendet e NATO-s që janë të interesuara për ndjekjen e këtij procesi", thuhet në dokumentin prej rreth 30 faqesh. Raporti e cilëson si mjaft pozitiv rotacionin paqësor të pushtetit të ndodhur me zgjedhjet parlamentar të vitit 2005. "Pavarësisht problemeve teknike që u vërejtën në zgjedhjet lokale të vitit 2007, si dhe zgjedhja e presidentit në korrik të vitit 2007, ishin gjithashtu një gur i rëndësishëm në zhvillimin demokratik të Shqipërisë", thuhet në raport. Ndërsa për çështjen e ekonomisë në vend, theksohet se problem mbetet ekonomia informale. "Ekonomia informale zë ende një vend të rëndësishëm, duke përbërë 24-28% të PPB-së. Titujt e pamjaftueshëm të pronësisë kanë dobësuar përpjekjet për krijimin e një tregu të besueshëm të pronave. Dhe nuk ka ndonjë planifikim për adresimin e problemit mbi qartësimin dhe sigurimin e të drejtave të pronësisë. Numri i shqiptarëve që jetojnë në varfëri ekstreme (më pak se 1 USD në ditë, ra nga 5% në 2002 në rreth 3.5% në 2005. Numri i njerëzve që jetojnë në varfëri (më pak se 2 USD në ditë) ra nga 25.4% në 2002, në 18.5% në 2005. Në 2002, papunësia e grave ishte 19.1% dhe 13.6% për burrat. Ndërsa papunësia totale për 9 muajt e parë të 2007-ës ishte 13.2%", thuhet në raport.

Qëndrimet e raportit

Anëtarësimi i Shqipërisë në NATO ofron përfitime për Aleancën, duke zgjeruar zonën e stabilitetit në Evropën Juglindore, në një kohë kur rajoni është duke iu përshtatur Pavarësisë së Kosovës.

Qeveria shqiptare hedh poshtë idenë e "Shqipërisë së Madhe", që përfshin Shqipërinë, Kosovën dhe shqiptarët e Maqedonisë dhe Malit të Zi. Ajo ka rikonfirmuar në mënyrë të përsëritur mbështetjen e saj për ruajtjen e kufijve ndërkombëtarë në Ballkan, përfshirë Kosovën.

Anëtarësimi i Shqipërisë në NATO do të ishte një sinjal i mirë për vendet e tjera me popullsi myslimane, që kanë diversitet fetar dhe popullsi multietnike.

Bashkimi Evropian dhe NATO duhet të sigurojë asistencë shtesë në mbështetje të vazhdimit të progresit të reformave në Shqipëri. Megjithëse, Shqipëria nuk i mbush kushtet për anëtarësim në BE këtë radhë.

Anëtarësimi në BE do të jetë një proces i gjatë dhe i vështirë, i realizueshëm, por një objektiv i largët.

Perspektiva për anëtarësim në BE do të ndihmojë që Shqipëria të garantojë angazhimin e vazhdueshme për përmbushjen e standardeve evropiane, dhe do të risigurojë vendet e NATO-s, që janë të shqetësuara për një kthim të mundshëm mbrapa.

Marrëdhëniet e fqinjësisë së mire janë një kriter i rëndësishëm për anëtarësimin në NATO. Qeveria shqiptare është një mbështetëse e fuqishme e pavarësisë së Kosovës dhe ka luajtur një rol të dobishëm në inkurajimin e moderimit mes liderëve politikë kosovarë dhe ka mbështetur përpjekjet e NATO-s dhe komunitetit ndërkombëtar në nxitjen e stabilitetit.

Ekonomia informale zë ende një vend të rëndësishëm, duke përbërë 24-28% të PPB-së. Titujt e pamjaftueshëm të pronësisë kanë dobësuar përpjekjet për krijimin e një tregu të besueshëm të pronave. Dhe nuk ka ndonjë planifikim për adresimin e problemit mbi qartësimin dhe sigurimin e të drejtave të pronësisë.

Në lidhje me reformën juridike, qeveria e Shqipërisë ka rritur besimin e njerëzve në sistemin gjyqësor, duke miratuar një legjislacion që përkrah një sistem gjyqësor të pavarur, duke forcuar kontrollet dhe ekuilibrin ndërmjet degëve të qeverisë. Vendimet gjyqësore tani publikohen për të rritur përgjegjësinë.

Megjithëse kushtet e punës për gjykatësit janë përmirësuar dhe rekrutimi i gjyqtarëve të rinj bazohet në meritë, Shqipëria ka ende nevojë të përmirësojë cilësinë e prokurorëve publikë dhe të sigurojë zbatim të plotë të vendimeve gjyqësore. Një bashkëpunim më i madh mes qeverisë së Shqipërisë dhe partive të opozitës do ta ndihmojë Shqipërinë të arrijë objektivin e saj për reformë të plotë të sistemit gjyqësor.

Shqipëria ka qenë historikisht një pikë tranziti për heorinën, kokainën dhe kanabisin e rritur në vend, por kjo situatë është përmirësuar si pasojë e përforcimit të ligjeve dhe rritjes së bashkëpunimit me autoritet ndërkombëtare. Të gjitha këto zhvillime tregojnë një progres të konsiderueshëm, por - sipas informacioneve që GOA zotëron - trafikimi është një problem që kryhet në bashkëpunim me zyrtarë të korruptuar. Plani anti-trafikim i GOA-s ka përfunduar dhe nuk është ripërtërirë.

Uashington, Mediu takohet me Gejt dhe Negroponten

Ministri i Mbrojtjes, Fatmir Mediu, gjatë vizitës zyrtare në SHBA ka marrë mbështetjen e Departamentit Amerikan për Anëtarësimin në NATO. Mediu së bashku me homologët e tij të vendeve të Ballkanit, të Maqedonisë dhe Kroacisë, që përfshihen në vendet e Kartës së Adriatikut (A 3). Sipas "Zërit të Amerikës", ministri Mediu u prit dje nga sekretari amerikan i Mbrojtjes, Robet Gejts. Më pas mësohet se Mediu është takuar edhe me nënsekretarin e Shtetit amerikan, Negroponte. Në këto takime mësohet se ministri shqiptar i Mbrojtjes ka marrë mbështetjen e plotë të shtetit amerikan për anëtarësimin e Shqipërisë në NATO, ku në muajin prill mbahet Samiti i Aleancës në Bukuresht të Rumanisë. Tre ministrat e Mbrojtjes do të miratojnë një deklaratë të përbashkët për bashkëpunimin e suksesshëm në kuadër të SHBA-ve - Karta e Adriatikut. Njëra prej temave për të cilën do të bisedohet gjatë vizitës janë edhe të arriturat e forcave të armatosura, të domosdoshme për anëtarësim në NATO, stërvitjet e përbashkëta, pjesëmarrjen në misionin ISAF në Afganistan.

Kush është David L. Filips

David L. Phillips, drejtor i Komitetit Kombëtar për Politikën e Jashtme amerikane, ka punuar si Këshilltar i lartë në Departamentin e Shtetit të SHBA-ve dhe në sekretariatin e Kombeve të Bashkuara, si dhe ka mbajtur një sërë postesh të rëndësishme akademike në universitete të njohura të botës. Ai është autor i shumë librave dhe raporteve politike, si dhe i mbi 100 artikujve, në gazeta si: “New York Times”, “Wall Street Journal”, “Finnacial Times”, “International Herald Tribune” and “Foreing Affairs”.

Marrë nga gazeta “Panorama”, Tiranë

Ambasada Amerikane në Tiranë: NATO ende nuk ka vendosur për anëtarësimin e Shqipërisë

2008-02-08T19:19:00.000Z

Trazhgim Sokolaj
TIRANE – Ambasada Amerikane në Tiranë bëri një sqarim rreth lajmit të publikuar në median elektronike e më pas atë të shkruar në Shqipëri, se Organizata e Atlantikut të Veriut- NATO, tashmë kishte marrë një vendim formal pozitiv e paraprak për procesin e anëtarësimit. Deklarata është bërë publike ditën e sotme në rrugë zyrtare nga Ambasada Amerikane në Tiranë. Ajo i referohet raportimeve të cilat u shfaqën fillimisht në median elektronike dhe më pas në median e shkruar në Tiranë. Këto raportime pretenduan se NATO kishte vendosur paraprakisht ti jepte Shqipërisë ftesën për anëtarësim në Samitin e Bukureshtit që pritet të mbahet në muajin prill të 2008. Në deklaratën e Ambasadës Amerikane në Tiranë, vlerësohet fryma bipartizane që po demonstron politika shqiptare për përmbushjen e reformave të kërkuara nga Plani i Veprimit për Anëtarësim në NATO, por theksohet se Shqipëria ka ende shumë për të bërë megjithë përparimin e arritur deri më tani. Më poshtë deklarata e Ambasadës Amerikane:

--------------------------

Deklaratë për Shtyp (8 Shkurt 2008)
Si Ambasada që shërben si pikë kontakti e NATO-s, kemi vënë re raportime nga media në datat 5 e 6 shkurt që sugjerojnë se Aleatët e NATO-s kanë marrë tashmë një vendim për t’i ofruar ftesën e anëtarësimit Shqipërisë apo vendeve të tjera të Kartës së Adriatikut. Dëshirojmë të sqarojmë që asnjë vendim formal nuk është marrë ende në lidhje me anëtarësimin e mundshëm në NATO për Shqipërinë apo ndonjë prej vendeve të Adriatikut 3. Të 26 Aleatët duhet të jenë në një mendje në mënyrë që të ofrohet një ftesë.
Kohët e fundit, kemi vënë re përparim domethënës në përpjekjet e Shqipërisë për të përmbushur standardet e bazuara mbi rezultate të NATO-s, siç janë përvijuar në Planin e Veprimit për Anëtarësim. Megjithëkëtë, mbetet më shumë për t’u bërë.
Jemi inkurajuar nga qëndrimi i përmirësuar bipartizan kundrejt bashkëpunimit, diçka e evidentuar, midis të tjerash, nga miratimi unanimisht i një rezolute të paraqitur nga opozita në mbështetje të reformave për të përmbushur kriteret e NATO-s. Megjithatë, një numër domethënës reformash, specifikisht në fushat e reformës zgjedhore dhe gjyqësore, mbeten të paplota. Vazhdojmë të presim përparim të mëtejshëm drejt këtyre reformave për t’u siguruar që Shqipëria të jetë kandidatja më e fortë e mundshme në kohën kur të merren vendimet përfundimtare të NATO-s.

Shqipëria nënshkruan marrëveshje me NATO-n për operacionet detare Antiterror

2008-02-07T16:32:00.000Z

Në kuadër të bashkëpunimit me Komandën e Bashkuar të NATO-s në Napoli, sot në mesditë në Ministrinë e Mbrojtjes u zhvillua ceremonia e nënshkrimit të Memorandumit Taktik të Mirëkuptimit për Pjesëmarrjen dhe Kontributin e Shqipërisë në Operacionin “Active Endeavour” (TMOU). Në ceremoni ishte i pranishëm zv.ministri i Mbrojtjes Petrit Karabina, shefi i Shtabit të Përgjithshëm i FA-së gjeneral lejtnant Luan Hoxha, drejtorë dhe ushtarakë të lartë të Ministrisë së Mbrojtjes dhe Shtabit të Përgjithshëm. Gjithashtu i pranishëm ishte edhe komandanti i Komponentit Detar në Komandën e Bashkuar të NATO-s në Napoli, admiral Cesaretti, si dhe ushtarakë të tjerë që e shoqëronin me këtë rast. Memorandumi Taktik i Mirëkuptimit për Pjesëmarrjen dhe Kontributin e Shqipërisë në operacionin “Active Endeavour” u nënshkrua nga komandanti i CC MAR Napoli, admirali Cesaretti dhe komandanti i Brigadës Detare, Kapiten i Rangut të Parë Kristaq Gerveni. Z.ministri Karabina, duke folur pas këtij nënshkrimi, theksoi se tashmë Shqipëria është fare pranë NATO-s dhe nënshkrimi i këtij Memorandumi është një tjetër evenimet i rëndësishëm që konfirmon këtë moment. Tashmë Shqipëria dhe Forcat e saj të Armatosura bëhen plotësisht pjesë e kësaj iniciative të rëndësishme të NATO-s që ka të bëjë me pjesëmarrjen dhe kontributin e saj të drejtpërdrejtë në operacionin “Active Endeavour, i cili është një operacion nga më të rëndësishmit të NATO-s që ushtron aktivitetin e tij në hapësirat detare të rajonit tonë. FA Shqiptare, nënvizoi më tej ai, obilgohen që t’i shërbejnë sigurisë jo vetëm të rajonit tonë, por edhe më gjërë. Zoti Karabina falenderoi sidomos komandantin e Komponentit Detar të Komandës së Bashkuar të NATO-s në Napoli, admiralin Cesaretti, cili “sot është prezent në këtë ceremoni dhe nënshkruan këtë Memorandum të rëndësishëm”. Ndërsa Admirali Cesaretti e cilësoi nënshkrimin e Memorandumit si një moment historik midis FA Shqiptare dhe NATO-s. Ai vlerësoi rolin dhe kontributin e Shqipërisë dhe të Forcave të saj të Armatosura në rajon dhe theksoi se, tani Shqipëria do të jetë një pjesëtare aktive në ndërveprime të tjera të rëndësishme të NATO-s, siç është edhe operacioni “Active Endeavour, ku do të jap një kontribut të rëndësishëm në ruajtjen e sigurisë detare dhe në luftën kundër terrorizmit në rajonin tonë. Më herët, Admirali Cesaretti u prit në një takim të veçantë nga zv.ministri i Mbrojtjes Petrit Karabina. Zv.ministri Karabina vlerësoi kontributin e dhënë nga Admirali Cesaretti, sidomos në ideimin dhe vlerësimin e stërvitjes “Cooperative Engagment 05”, si dhe rëndësinë që ka nënshkrimi i TMOU-së për pjesëmarrjen dhe kontributin e Shqipërisë në operacionin “Active Endeavour”. Operacioni “Active Endeavour” ka për mision për të treguar vendosmërinë dhe solidaritetin e vendeve anëtare të Aleancës së Atlantikut për të parandaluar, luftuar dhe shpërbërë aktivitetet terroriste në Detin Mesdhe dhe Detin e Zi. Ky operacion është një nga masat e NATO-s për të zbatuar Nenin 5 të Traktatit të Washingtonit me qëllim zgjerimin e mundësive në fushatën kundër terrorizmit. Duke filluar që nga viti 2001 ky operacion ka arritur suksese të mëdha në nivelin strategjik, operacional dhe taktik, duke e pozicionuar NATO-n si instrument pararojë për të luftuar terrorizmin detar. Shqipëria ka qenë një nga vendet e para të PfP-së që tregoi interesim dhe vendosmëri për të marrë pjesë dhe kontribuar në këtë Operacion. Dhe në maj të vitit 2007, Sekretari i Përgjithshëm i NATO-s Shefer miratoi kërkesën e qeverisë shqiptare për pjesëmarrjen dhe kontributin në operacionin “Active Endeavour”. Që nga kjo kohë vendi ynë rreshtohet përkrah aleatëve duke dhënë kontributin e tij modest në këtë operacion me rëndësi të madhe për sigurinë detare dhe duke konfirmuar edhe njëherë aspiratat tona për integrimin euroatlantik. Ky bashkëpunim konsiton në shkëmbimin e informacionit për situatën detare, caktimin e oficerëve ndërlidhës në strukturat e NATO-s, kontrollin e anijeve të dyshimta në ujrat tona territoriale, lejimin e bordimit të anijeve me flamur shqiptar nga anijet e NATO-s dhe caktimi i pikës kombëtare të koordinimit. Një takim të veçantë me Admiralin Cesaretti pati edhe shefi i Shtabit të Përgjithshëm i FA-së, gjeneral lejtnant Luan Hoxha.

Scheffer-Berishës: Reformat e kërkuara nga NATO të jenë të qëndrueshme

2008-01-30T15:18:00.001Z

BRUKSEL

Kryeministri i Shqipërisë Sali Berisha zhvilloi në Bruksel, një takim me Sekretarin e Përgjithshëm të NATO-s, Jaap de Hoop Scheffer. Burime zyrtare nga Kryeministria në Tiranë pohuan se gjatë këtij takimit, Sekretari i Përgjithshëm i NATO-s, Scheffer, është shprehur se muajt në vazhdim janë shumë të rëndësishëm për Shqipërinë, e cila ka bërë hapa të mëdha në drejtim të zbatimit të reformave, me qëllim integrimin në NATO. Sipas Qeverisë Shqiptare, Sekretari i Përgjithshëm Scheffer e përgëzoi Kryeministrin Berisha për bashkëpunimin e mirë me opozitën dhe ndërtimin e një kulture të duhur politike, kulturë kjo e domosdoshme për çdo demokraci, por veçanërisht për ato vende që inspirojnë të hyjnë në NATO. Kreu i Aleancës Scheffer u shpreh se një tregues i qartë i kësaj fryme bashkëpunimi me opozitën është dhe delegacioni, i cili shoqëron Kryeministrin në Bruksel, një delegacion multipartiak, i cili është një shembull i fuqishëm se si ka ndryshuar kultura politike në Shqipëri gjatë këtyre viteve. Sekretari i NATO-s theksoi se do të ketë një vlerësim pozitiv, në vendimin për të integruar Shqipërinë në NATO, edhe roli i Shqipërisë në stabilitetin e rajonit. “Roli i Shqipërisë ka qenë vendimtar për të ruajtur ekuilibrat në rajon, sidomos lidhur me çështjen e statusit të Kosovës. Shqipëria, është bërë eksportuese e stabilitetit në të gjithë rajonin”, tha Scheffer i cili më tej vlerësoi klimën shumë të mirë të bashkëpunimit që Shqipëria ka ndërtuar me vendet e tjera të rajonit. Sekretari i Përgjithshëm i NATO-s vlerësoi pozitivisht kontributin e Shqipërisë, në misionet paqeruajtëse përkrah trupave të NATO-s në Ballkan, Irak, Afganistan, si dhe së shpejti në vende të tjera, i cili sipas Scheffer është mjaft i rëndësishëm në ruajtjen e demokracisë në këto vende. Kreu i NATO-s shprehu vlerësim të veçantë për vendimin e Qeverisë me qëllim rritjen me 2 % të GDP-së për Forcat e Armatosura, për të cilin Scheffer tha se Shqipëria po jep një shembull pozitiv për vende të tjera që janë larg këtij standardi. “Tashmë, kilometri i fundit drejt marrjes së ftesës në Samitin e Bukureshtit është afruar edhe më shumë dhe Shqipëria po ecën në rrugë të mbarë. Në këtë pikë, është e domosdoshme që zbatimi i reformave të bëhet mbi baza të qëndrueshme dhe zhvillimi i tyre të jetë i pakthyeshëm”, tha Scheffer. Ai vlerësoi arritjet e qeverisë shqiptare në luftën kundër krimit të organizuar dhe korrupsionit. Ndërkaq Kryeministri Berisha u shpreh se është vendimtare për qeverinë shqiptare që procesi i zhvillimit të reformave të jetë i pakthyeshëm. Berisha shprehu bindjen e tij të plotë se ky proces është i tillë. “Ka një klimë të re bashkëpunimi me forcat politike, në interes të kombit dhe të integrimit në NATO”, tha Berisha i cili konfirmoi se ekziston mbështetja e plotë e opozitës në zbatimin e reformave kryesore, të cilat kanë si objektiv integrimin e Shqipërisë në NATO dhe marrjen e ftesës në Samitin e Bukureshtit.

Takimi Rajs – Basha

2008-01-30T14:42:00.000Z

Zëri i Amerikës
Uashington
29-01-2008
Sekretarja amerikane e Shtetit, Kondolisa Rajs, u takua sot me ministrin e Jashtëm të Shqipërisë Lulzim Basha. Një zyrtar i Departamentit të Shtetit i tha Zërit të Amerikës pas takimit se Sekretarja Rajs përshëndeti përparimin e bërë nga Shqipëria drejt plotësimit të standardeve të anëtarësimit në aleancën e NATO-s, përfshirë përpjekjet për të luftuar korrupsionin. Zonja Rajs i bëri thirrje ministrit Basha të vazhdojë dialogun me vendet e tjera të NATO-s para takimit të nivelit të lartë të Bukureshtit. Sekretarja e Shtetit po ashtu shprehu vlerësimin e Shteteve të Bashkuara për rolin konstruktiv që ka luajtur Shqipëria në rajon.

Basha në Uashington: Shqipëria - më pranë se kurrë anëtarësimit në NATO

Laura Konda
Zëri i Amerikës
29-01-2008
Ministri i Jashtëm i Shqipërisë, Lulzim Basha, u takua sot paradite në Departamentin e Shtetit me Sekretaren Kondoliza Rajs. Takimi u përqëndrua në përpjekjet e Shqipërisë për t’u integruar në institucionet euro-atlantike dhe tek gjendja në rajon, tani që Kosova ndodhet pranë shpalljes së pavarësisë. Ministri Basha ishte edhe në Zërin e Amerikës, ku dha një intervistë për programin "Ditari".
Zëri i Amerikës: Zoti Basha, ju sapo keni ardhur nga një takim, që e përfunduat ndoshta më pak se një orë më pare, me Sekretaren e Shtetit, Kondoliza Rajs. Për çfarë biseduat në takim?
Lulzim Basha: Takimi me Sekretaren Rajs vjenë në një moment shumë të veçantë për Shqipërinë, disa javë para Samitit të Bukureshtin dhe në një moment kulmor përsa i përket statusit të Kosovës dhe si i tillë, ishte një moment shumë i rëndësishëm për ne, për të njohur zonjën Rajs, administratën amerikane, me përparimin e bërë nga Shqipëri në reforma të ndryshme, që nga takimi i fundit, në maj të vitit të kaluar, si dhe për të rrahur mendimet dhe për të koordinuar veprimet, si për çështjet rajonale në veçanti, statusit politik të Kosovës, qoftë përsa i përket finishit, deri në Bukuresht, në këtë samit historik, ku Shqipëria shpreson të marrë ftesën për anëtarësim. Takimi ishte jashtëzakonisht i përzemërt, mund të them se ndonëse ka një diferencë prej 6 orësh midis Tiranës dhe Washingtonit, akrepat e orave tona rrahin me të njëjtin ritëm, sinkronizimi ynë është i plotë, përsa i përket çështjeve rajonale, përsa i përket çështjes së Kosovës, por edhe përsa i përket perspektivës euroatlantike të Shqipërisë, dhe në fakt të të gjithë rajonit. Kjo sigurisht na jep një këanqësi të veçantë, është fryt i përpjekjeve të vazhdueshme të Shqipërisë për t’u afirmuar dhe për të siguruar perspektivën e saj euroatlantike, dhe vjen në një moment, kur Shqipëria me krenari, tregon arritjet e saj në reforma të ndryshme, dhe në saj të bashkëpunimit dhe pjekurisë të klasës politike shqiptare, është në gjendje të demonstrojë progres të veçantë edhe në ato fusha, të cilat janë në qendër të vëmendjes së partnerëve euroatlantike, siç është reforma në drejtësi dhe reforma elektorale. Prandaj largohem nga ky takim, nga kjo vizitë me përshtypjet më të mira; mendoj se ka qenë një vizitë shumë e suksesshme, dhe mendoj se ashtu siç janë shprehur aleatët tanë në Washington, dhe në kryeqytetet evropiane, Shqipëria ndodhet më afër se kurrë marrjes së ftesës për anëtarësim në aleancën e Atlantikut të Veriut, në Samitin e Bukureshtit.
Zëri i Amerikës: Zoti Ministër, Shtetet e Bashkuara e kanë mbështetur vazhdimisht Shqipërinë në përpjekjet e saj për t’u anëtarësuar Nato, dhe siç jeni shprehur edhe ju, ky anëtarësim është më tepër një gjest politik se sa ushtarak. A jeni ju i mendimit se Shqipëria i ka përmbushur kriteret për t’u anëtarësuar në Aleancë?
Lulzim Basha: Ka një mekanizën objektiv, i cili quhet “plani i anëtarësimit”, veprimi i anëtarësimit, plan veprimi i anëtarësimit, i cili aplikohet ndaj vendeve që synojnë të marrin ftesën dhe në fakt nesër, kryeministri Berisha është nisur tashmë drejt Brukselit dhe unë do t’i bashkangjitem nesër, për të bërë prezantimin e arritjeve të Shqipërisë në ciklin e 9-të, i cili tashmë shpresojmë që të jetë edhe cikli i fundit, në të cilin shpresojmë për të marrë ftesën në Samitin e Bukureshtit. Ky cikël përbëhet nga dy elementë: elementi i parë përbëhet nga reformat, nga hapat që qeveria e vendit aspirant parashtron se do të ndërmarrë gjatë periudhës së ciklit dhe elementi i dytë është vlerësimi, monitorimi i ecurisë së këtyre reformave, të cilat do të jetë në formën e një progres-raporti. Takimi me zonjën Rajs, siç thashë, shërbeu siç thashë, në këtë drejtim, edhe për të ilustruar përparimin e dukshëm që Shqipëria ka bërë në fusha si lufta kundër krimit të organizuar, lufta kundër korrupsionit, lufta kundër informalitetit dhe masat e marra për gjallërimin e mëtejshëm dhe konsolidimin e rritjes ekonomike të Shqipërisë, të ilustruara këto nga rritja e vazhdueshme, galopante e investimeve të drejtpërdrejta të huaja dhe nga rritja e eksporteve, nga rritja e të ardhurave buxhetore, pavarësisht uljes së taksave në një nivel rekord më të ulët në Evropë, konsolidimi i praktikave buxhetore, të orjentuar në 5 drejtime kryesore, që janë infrastruktura, arsimi, shëndetësia, mbrojtja, dhe pensionet, që tregojnë që Shqipëria ka sot teksturën e duhur ekonomiko-politike për të qenë një anëtar i Aleancës, një anëtar i cili i sjell vlera Aleancës, në stabilitetin e brendshëm dhe në aftësinë për të eskportuar sigurinë jo vetëm në rajon, siç bojmë sot, si pjesë e politikës sonë të jashtme, por edhe në Afganistan dhe Irak. Nga ana tjetër, angazhimet tona për këtë cickël, që përkojnë me reforma të tilla si ajo elektorale dhe refroma në drejtësi, kanë kërkuar dhe vazhdojnë të kërkojnë një shpirt bashkëpunimi bipartisan, i cili është qartësisht i evidentueshëm sot në Tiranë, jo vetëm për vëzhguesit e brendshëm, por edhe për vëzhguesit e jashtëm, dhe mendoj se parë në totalitet, vlerësimi për Shqipërinë do të jetë një vlerësim pozitiv. Kjo ka shumë rëndësi, pasi pavarësisht prej dëshirës dhe vullnetit të shprehur, për të konsideruar futjen e të tri vendeve në Aleancë, vlerësimi për çdo vend bëhet në mënyrë të veçantë, në bazë të përpjekjeve dhe të sukeseve që ai vend ka arritur, në reformat e parashikuara.
Zëri i Amerikës: Në kushtet kur po thuhet se zgjidhja e statusit të Kosovës, shpallja e pavarësisë është çështje ditësh, në këto momente përgatitjesh të fundit, cili është roli po luan Shqipëria?
Lulzim Basha: Edhe në këtë çështje, ashtu sikurse thashë, gjatë vizitës sime të pare në Shtetet e Bashkuara, ne kemi qenë të sinkronizuar për këtë çështje me Washingtonin. Shqipëri beson se zgjatja e procesit mbart rreziqe, se tani ka ardhur koha që procesi të finalizohet, dhe se është plotësisht e panevojshme të paguhet një kosto e përditshme, pa patur një benefit; sepse çdo ditë, apo çdo javë që kalon, me një zgjatje jo konstruktive të procesit, sjell pasoja negative, duke forcuar radikalët, dhe duke dobësuar të moderuarit, ndërkohë që një zgjidhje në bazë të Planit Ahtisaari, i cili ka dhe vazhdon të ketë një mbështetje të gjerë, jo vetëm tek aleatët tanë euroatlantikë, por edhe në Asamblenë e Përgjithshme dhe në Këshillin e Sigurimit, do t’i jepte fund këtij procesi të lodhshëm, do të hapte perspektivën jo vetëm për Kosovën, por edhe për Serbinë, që t’i bashkangjietet një vizioni euroatlantik, që sot e ndjanë nga të gjitha kryeqytetet e tjera të rajonit. Pra, në këtë kuadër, Shqipëria, jo vetëm që mbështet fuqimisht vënien në zbatim të planit Ahtisaari, pa vonesë, por në koordinim të plotë me Prishtinën, Washingtonin dhe me kryqytetet e tjera evropiane, mendoj se edhe pa u formalizuar pavarësia e Kosovës, çka është me të vërtetë një çështje kohe shumë e shkurtër, Kosova ka filluar tashmë të dëshmojë atributet e një shteti, e një subjekti sovran të së drejtës ndërkombëtare, i cili ka orjentime të qarta dhe ka një vision të qartë. Çfarë dua të them me këtë? Udhëheqja kosovare në Prishtinë, presidenti Sejdiu, kryeministri Thaçi, në të gjitha bisedat e tyre me partnerët ndërkombëtarë, tashmë janë tërësisht të orjentuar jo vetëm tek momenti i shpalljes së pavarësisë, por edhe tek sfidat që vijnë menjëherë pas këtij momenti, në veçanti tek e ardhmja e Kosovës, sigurimi i një jete më të mirë për qytetarët, dhe sigurimi i një perspektive të sigurtë politike për Kosovën, e cila pa dyshim, do të ketë perspektiva euroatlantike.
Zëri i Amerikës: Pikërisht, le të qëndrojmë tek sfidat. Çfarë ndihme do të ofronte Shqipëria për Kosovën, në rast se ajo do të përballej me bllokadë ekonomike nga ana e Serbisë?
Lulzim Basha: Serbia nuk është në gjendje të bëjë bllokadë ndaj Kosovës, pasi Kosova rrethohet nga shumë fqinjë. Përpjekjet për të përdorur ndalimin e shkëmbimit ekonomik midis Serbisë dhe Kosovës, në radhë të parë do të dëmtonin vetë Serbinë, qytetarët dhe bizneset serbe; do të ishte një gjest që nuk do të vlerësohej pozitivisht nga shumica dërrmuese e komunitetit ndërkombëtar, ndërkohë që sigurisht Kosova i ka rrugët e hapura në të gjitha drejtimet e tjera, për të vazhduar funksionimin normal nëpërmjet tregëtisë, shkëmbimit dhe lëvizjes së lirë. Kështu që, në këtë kuadër, nuk parashikoj që ndonjë përpjekje për të “ndëshkuar”, nëse mund ta them kështu, zhvillimin e pandalshëm të shpalljes së pavarësisë me masa të iniciuara nga Beogradi do të ishte në radhë të parë e drejtuar ndaj publikut në Serbi, drejt opinionit publik në Serbi, sesa ndaj Kosovës. Ndikimet ndaj Kosovës do të ishin shumë të vogla. Sigurisht që ne kemi dhe do të vazhdojmë të mbajmë intensivisht kontakt me autoritetet në Prishtinë për çdo fushë ku ata do të ndjejnë nevojën e një asistence apo bashkëpunimi në rritje për një periudhë kalimtare ne do të jemi të hapur që nga energjitika, transportet e çdo fushë tjetër. Por mendoj se nuk duhet mbivlerësuar aftësia e Serbisë për të patur ndikim mbi Kosovën shpejt të pavarur, nëpërmjet masave të tilla represive. Edhe një herë them që masa të tilla do të kishin në radhë të parë një efekt demagogjik tek vetë qytetarët serbë.
Zëri i Amerikës: Kalojmë tek një çështje tjetër. Kontrolli i Lartë i Shtetit ditët e fundit, ndoshta pikërisht ditën kur ju jeni nisur për në Shtetet e Bashkuara, ka dorëzuar në Prokurori një raport ku vihte re se ka patur shkelje në rrugën Rrëshen-Kalimash. Tashmë ky është një institucion i specializuar. Cili do të ishte komenti juaj?
Lulzim Basha: Unë nuk jam njohur me raportin pasi kam qenë në udhëtim, siç thatë edhe ju. Sigurisht që institucionet kanë të drejtën e tyre për të vepruar në këtë drejtim dhe fjala e fundit i takon gjithmonë drejtësisë. Unë i mbetem asaj që ky është investimi jo vetëm më madhor në historinë e Shqipërisë dhe të shqiptarëve, por është edhe investimi më transparent që është kryer nodnjëherë, dhe këtu fus çdo lloj investimi, nga ato më të voglat, tek ato më të mëdhatë.
Zëri i Amerikës: Pak a shumë në raport flitet për shkelje në procedurat e tenderit, shkelje më vonë në procesin e ndërtimit...
Lulzim Basha: Nuk njihem me detajet e raportit, por mund t’ju them se procedurat e tenderimit të kësaj rruge janë të niveleve më të larta ndërkombëtare. Ato janë më të larta se kërkesat e atëhershme të ligjit shqiptar. Transparenca e këtyre procedurave është vërtetuar katërcipërisht dhe e pranuar si e tillë nga të gjithë partnerët ndërkombëtarë të përfshirë në procedurë. Rruga Shqipëri-Kosovë, e cila është rruga e integrimit euro-atlantik është e pandalshme. Dhe pavarësisht prej përpjekjeve të palëve që mund të kenë interes në ngadalësimin e këtij ritmi, Shqipëria do të ecë e vendosur në këtë drejtim dhe investimet në infrastrukturë dhe veçanërisht investimet në rrugën Durrës-Kukës-Morinë janë vetëm një mishërim i kësaj vendosmërie të Shqipërisë për të kapitalizuar mbi këtë moment të ëndërruar nga breza të tërë dhe për t’i hapur vendit dhe shqiptarëve kudo që janë, horizontet e një prosperiteti vetëm të ëndërruar më parë.
Zëri i Amerikës: Zoti Basha, çështja e vizave të Maqedonisë për shtetasit shqiptarë. A mund të thuhet se është e kaluar tashmë?
Lulzim Basha: Ne vazhdojmë diskutimet me Maqedoninë në këtë drejtim. Me Maqedoninë na bashkojnë aspirata dhe vizione të mëdha, siç është vizioni euro-atlantik. Ne gjithashtu ndajmë shumë aspekte të tjera të bashkëpunimit qoftë në punët e jashtme, qoftë në ekonomi apo në bashkëpunimin kulturor dhe arsimor dhe besoj se kemi bazë të mjaftueshme për të gjetur një zgjidhje të qendrueshme, e cila ka për bazë parimet e lëvizjes së lirë midis dy vendeve tona. Kështu që pavarësisht prej vështirësive momentale, shpreh bindjen time dhe besimin tim që asnjë vështirësi e këtij lloji nuk mund të mbetet pa u tejkaluar.
Zëri i Amerikës: Zoti Basha ju faleminderit për intervistën.
Lulzim Basha :Ju faleminderit ju.

Kryetari i Komitetit Ushtarak të BE-së: Shqipëria e angazhuar në sfidat që kërkon anëtarësimi në NATO

2008-01-26T15:10:00.000Z

Ministri shqiptar i Mbrojtjes Fatmir Mediu zhvilloi një takim të veçantë kryetarin e Komitetit Ushtarak të BE-së, gjeneral Henri Bentegeat, i cili ndodhet në Tiranë për një vizitë zyrtare. Në takim ishte i pranishëm edhe shefi i Shtabit të Përgjithshëm i FA-së gjeneral lejtnant Luan Hoxha. Ministri i Mbrojtjes Fatmir Mediu, shprehu falenderimet për mbështetjen e vazhdueshme që ka dhënë dhe jep Bashkimi Evropian për Shqipërinë, për ecurinë dhe progresin e bërë në reformimin e institucioneve dhe gjithë strukturave tona shtetërore. Mediu e njohu ushtarakun e lartë të BE-së edhe me disa nga arritjet e shënuara në FA Shqiptare, si dhe me angazhimin e gjithanshëm të tyre për të plotësuar objektivat dhe standardet që kërkon anëtarësimi në NATO. Duke folur për angazhimin dhe kontributin e strukturave ushtarake të BE-së, Ministri Mediu theksoi se, pas përfundimit me sukses të misionit ALTHEA në Bosnje-Hercegovië, Shqipëria dhe Forcat e saj të Armatosura janë të gatshme për t’u angazhuar me trupa ushtarake edhe në misione të tjera të BE-së, siç është misioni në Çad. Gjenerali Henri Bentegeat vlerësoi arritjet dhe përpjekjet që ka bërë Shqipëria dhe Forcat e saj të Armatosura për integrimin euroatlantik. Ai vlerësoi si mjaft konstruktiv rolin e Shqipërisë në politikën rajonale, si dhe angazhimin e saj për të përballuar të gjitha sfidat që kërkon anëtarësimi në NATO dhe në Bashkimin Evropian. Shqipëria, theksoi ai, është pjesë e kontributit të NATO-s, por edhe të BE-së në misionet në interes të ruajtjes së paqes dhe lirisë në botë. Një vend të veçantë në takim zuri situata në rajonin e Ballkanit Perëndimor, i cili konsiderohet si prioritet i parë për BE. Në këtë kontekst u diskutua edhe për çështjen e Kosovës dhe të statusit të saj. Gjenerali Bentegeat tha se BE po bën të gjitha përpjekjet që të jetë unike në mendimin për statusin e Kosovës dhe se plani Ahtisaari është zgjidhja e saj. Kryetari i Komitetit Ushtarak të BE-së gjeneral Henri Bentegeat u prit në një takim të veçantë nga shefi i Shtabit të Përgjithshëm i FA-së gjeneral lejtnant Luan Hoxha, ndërsa më pas për gjeneral Bentegeat dhe delegacionin që ai kryeson u dha një brifing për reformimin dhe transformimin e FA Shqiptare dhe integrimin e tyre në NATO.

Parlamenti i Shqipërisë miraton rezolutën për anëtarësimin në NATO

2008-01-22T14:48:00.000Z

Parlamenti i Shqipërisë miratoi dje në mbrëmje një rezolutë të propozuar nga Partia Socialiste lidhur me procesin e anëtarësimit të vendit në NATO. Dokumenti mori shumicën e votave nga partitë e gjithë spektrit politik shqiptar, ndërsa Kryetarja e Kuvendit Jozefina Topalli kërkoi gjatë seancës parlamentare më shumë angazhim nga politika dhe institucionet në hartimin e legjislacionit të ri zgjedhor dhe në fushën e reformës në drejtësi. Të dyja këto bëjnë pjesë në kërkesat imediate të artikuluara në procesin e anëtarësimit të Shqipërisë në Organizatën e Atlantikut të Veriut. Miratimi i rezolutës është përshëndetur nga përfaqësues të Qeverise dhe të opozitës si dhe nga vetë Presidenti i vendit Bamir Topi. Rezoluta për anëtarësimin e vendit në NATO, është argumenti i parë që shënon “paqe të nënshkruar” mes qeverisë dhe opozitës aktuale në Shqipëri. Pak kohë më parë, kryetari i Partisë më të madhe në opozitë deklaroi gatishmërinë për bashkëpunim lidhur me plotësimin e reformave të nevojshme për marrjen e ftesës së anëtarësimit të Shqipërisë në NATO. Edhe më parë, Kryetarja e Parlamentit ka përshëndetur këtë qëndrim të opozitës dhe ka shprehur gatishmërinë për bashkëpunim. Shqipëria po bën përpjekje për plotësimin e kushteve të kërkuara deri në Samitin e NATO-s që pritet të mbahet në Bukuresht në muajin prill të këtij viti.

Presidenti Shqipërisë dhe Ministri i Mbrojtjes takime në Tiranë me 5 ambasadorë të vendeve anëtare të NATO-s

2008-01-17T13:59:00.000Z

Trazhgim Sokolaj
Presidenti i Shqipërisë Bamir Topi priti sot më 17 janar 2008, në një takim pesë ambasadorë të NATO-s që ndodhen në Tiranë për një vizitë pune. Ambasadori i Britanisë së Madhe, Stjuart Eldon, Ambasadori danez Per Polsen-Hansen, Ambasadori francez Rishard Dyk, Ambasadori gjerman Ulrih Brandenburg dhe Ambasadori holandez Herman Shaper janë njohur nga Presidenti Topi me punën konkrete që po bëhet me reformat kryesore në vend, reformën zgjedhore dhe atë në drejtësi si dhe klimën pozitive të bashkëpunimit mes mazhorancës e opozitës për këto reforma thelbësore si një tregues i vullnetit të përbashkët për të marrë një ftesë në Samitin e Bukureshtit në muajin prill të këtij viti. Duke u ndalur në çështje të rajonit Presidenti Topi ka evidentuar rolin dhe mesazhet moderuese të Shqipërisë, që janë përcjellë nga Kryetari i Shtetit gjatë vizitave të zhvilluara në Ballkan e më gjerë, por edhe qëndrimin e palëkundur të Shqipërisë mbi statusin e ardhshëm të Kosovës, qëndrim i koordinuar me atë të faktorit ndërkombëtar. Ambasadorët e NATO-s duke vlerësuar rolin moderues të Shqipërisë në rajon, kanë inkurajuar vazhdimin e reformave me të njëjtin ritëm si rruga e domosdoshme për të marrë rezultatin e pritshëm nga Samiti i Bukureshtit. Presidenti Topi ka vlerësuar mbështetjen konstante të vendeve të NATO-s për procesin integrues të Shqipërisë dhe i ka garantuar ambasadorët për angazhimin e plotë të vendit tonë për të përmbushur detyrimet që do mundësojnë integrimin euroatlantik.
Pas takimeve që ambasadorët e NATO-s zhvilluan në Presidencën e Shqipërisë, rreth mesditës ata janë pritur në një takim të veccantë edhe nga ministri i Mbrojtjes Fatmir Mediu. Ai bisedoi me delegacionin e lartë të NATO-s që përbëhej nga pesë ambasadorët e vendeve anëtare të Aleancës së Atlantikut të Veriut, Danimarkë, Francë, Holandë, Britani e Madhe dhe Gjermani dhe përkatësisht: ambasadorin danez Poulsen Hansen, ambasadorin francez Richard Duque, ambasadorin holandez Herman Schaper, ambasadorin anglez Steëart Eldon dhe ambasadorin gjerman Ulrich Brandenburg. Në takim merrnin pjesë edhe ambasadorët e këtyre vendeve të akredituara në vendin tonë.

Anëtarësimi në NATO, Shqipëria pritet të raportojë në Bruksel

2008-01-13T15:59:00.000Z

Trazhgim Sokolaj
BRUKSEL-Vendet aspirante për anëtarësim në NATO, Shqipëria, Maqedonia dhe Kroacia pritet që së shpejti të raportojnë në mënyrë të detajuar para ambasadorëve të Aleancës në Bruksel. Objekt i raportimit do të jetë faza e fundit e planit të anëtarësimit të tri vendeve të kartës “Adriatik 3”. Pas këtij raportimi pritet që ambasadorët e vendeve anëtare të NATO-s të japin vlerësimin teknik. Vendimi politik për vendet e “A 3” pritet të merret më pas nga Ministrat e Jashtëm të vendeve që bëjnë pjesë në Organizatën e Atlantikut të Veriut. Sekretari i Përgjithshëm i Aleancës, Jaap De Hoop Scheffer tha para gazetarëve se “niveli i testimit për tri vendet kandidate për në NATO ka arritur në fazën më intensive të tij. Përfaqësuesit e tri vendeve kandidate do të vijnë së shpejti në Bruksel ku do tu përgjigjen pyetjeve të Ministrave të Jashtëm të Aleancës. Pas kësaj do të merret një vendim politik”, është shprehur Scheffer. Vendimi përfundimtar pritet të merret në Samitin e Bukureshtit që do të mbahet në muajin prill të këtij viti. Zyrtarët e NATO-s janë shprehur se monitorimi dhe vlerësimi lidhur me përmbushjen e kushteve nga tri vendet kandidate do të vazhdojë deri në momentin e fundit.

Shanse konsensusi politik në Tiranë për anëtarësimin e Shqipërisë në NATO

2008-01-07T14:38:00.000Z

Trazhgim Sokolaj
Pas një viti të tendosur politik në komunikimin e marëdhëniet pozitë-opozitë, kur ndodhemi ende në ditët e para të vitit të ri 2008, në Tiranë u shfaqën shenjat e para të konsensusit politik lidhur me reformat e nevojshme për anëtarësimin e vendit në NATO. Kryetari i Partisë Socialiste, më e madhja në opozitë deklaroi publikisht se mbështet të gjitha nismat që do të ndikonin në afrimin e Shqipërisë me Aleancën e Atlantikut Verior. Edi Rama, kryetar i Partisë Socialiste tha se Grupi Parlamentar i partisë së tij do të paraqesë në Kuvend një projektrezolutë përmes të shprehet gatishmëria për bashkëpunim në plotësimin e reformave të kërkuara për hyrjen në NATO. “Partia Socialiste e Shqipërisë, e ndërgjegjshme për rëndësinë e jashtëzakonshme që ka për vendin tonë, Samiti i NATO-s, që do të mbahet në prill të këtij viti, shpreh mbështetjen e saj të plotë për të gjitha masat e nevojshme dhe të domosdoshme që duhen realizuar, që në këtë samit Shqipëria të marrë ftesën historike për anëtarësim në NATO, si dhe siguron e garanton për gatishmërinë dhe vendosmërinë e saj për të kryer të gjitha detyrimet që asaj i takojnë në këtë proces”, tha Edi Rama, kryetari i partisë më të madhe të opozitës shqiptare.
Vetëm pak orë pas këtij qëndrimi të kreut të opozitës ka ardhur edhe reagimi i parë nga kampi tjetër politik. Kryetarja e Parlamentit Jozefina Topalli ka përshëndetur qëndrimin e kreut të Partisë Socialiste si dhe rezolutën që pritet të paraqitet në Kuvend nga grupi parlamentar i kësaj partie. “Jam gati që nesër të mbledh Konferencën e Kryetarëve që të nisim sa më parë punën me komisionet në mënyrë për shqyrtimin e rezolutës së opozitës, që deklaratat të kthehen në veprime”, tha kryeparlamentarja Topalli. Ajo është shprehur e gatshme të thërrasë një seancë të jashtëzakonshme me deputetët për të miratuar çdo nismë lidhur me integrimin e vendit në strukturat euroatlantike.
Këto duket se janë shanset e para të një konsensusi politik për reformat e nevojshme që Shqipëria duhet të përmbushë me qëllim përafrimin me NATO-n. Fjalori i përdorur nga të dy përfaqësuesit e lartë politikë ka qenë i qetë dhe me terma bashkëpunues. Komunikimi është i hapur dhe deri më tani nuk ka shkak për të paragjykuar se ky aksion i filluar nga opozita dhe i mbështetur deri më tani nga Kryetarja e Parlamentit mund të dështojë apo të transformohet. Megjithatë koha që ka mbetur është shumë pak. Samiti i NATO-s zhvillohet në muajin prill në Bukuresht. Kanë mbetur vetëm më pak se katër muaj kohë. Sfidat që duhet të kalojë Shqipëria në këtë hark kohor janë të mëdha. Bëhet fjalë për reformën në drejtësi, luftën kundër krimit të organizuar dhe korrupsionit, reformën zgjedhore, pajisjen e shtetasve me karta identiteti, modernizimin e mëtejshëm të Forcave të Armatosura, stabilitetin politik dhe një sërë reformash në fusha të tjera. Megjithatë ka gjasa që nëse deklaratat e sotme të dy kampeve politike kthehen në veprime, të krijohet një atmosferë besimi për përmbushjen e reformave e cila mund të marrë vlerësim pozitiv në Bukuresht. Politika shqiptare nuk kishte asnjë pengesë që deklaratat dhe veprimet bashkëpunuese ti artikulonte që vitin e kaluar, atëherë kur realisht kishte më tepër kohë dhe shanse që ky vullnet i përbashkët politik bashkëpunimi të konkretizohej derisa në Bukuresht të mblidheshin përfaqësuesit e vendeve anëtare të NATO-s.

Presidenti i takoi Komandot shqiptare në Irak, tani duhet që politika të respektojë sakrificën e tyre!

2007-12-26T14:30:00.000Z

Trazhgim Sokolaj
“Kryeministri iraken Al-Maliki shprehu mirënjohjen për kontributin e Shqipërisë në rrëzimin e diktaturës në Irak, vendosjen e demokracisë dhe forcimin e institucioneve të saj, si dhe në luftën kundër terrorizmit ndërkombëtar përkrah partnerëve dhe aleatëve të rëndësishëm, që janë pjesë e koalicionit ndërkombëtar”.
Ky është njëri nga pesë paragrafët e njoftimit zyrtar të Presidencës së Shqipërisë lidhur me vizitën e kryetarit të shtetit Bamir Topi në Mosul, kryeqytetin e Irakut, fundjavën e kaluar. Presidenti shoqërohej në atë vizitë nga delegacioni zyrtar ku bëjnë pjesë Ministri i Mbrojtjes, Fatmir Mediu, Shefi i Shtabit të Përgjithshëm, Gjeneral Lejtnant Luan Hoxha dhe zyrtarë të tjerë shqiptarë.
Sipas njoftimit, Presidenti Topi gjatë vizitës zyrtare në Irak, zhvilloi takim të përbashkët me Komandantin e Forcës Shumëkombëshe, Gjeneralin Dejvid Petraeus dhe me Ambasadorin amerikan në Bagdad, Rajën Kroker. Në këtë takim ishte e pranishme edhe ish-ambasadorja amerikane ne Tiranë, Marsi Rijs.
“Presidenti Topi, pasi vuri në dukje bashkëpunimin e ngushtë dhe të frytshëm me aleatët ndërkombëtarë, sidomos me aleatin më të madh dhe mbështetësen e fuqishme e të vendosur të demokracisë dhe lirisë SHBA-ve, shprehu edhe njëherë vullnetin dhe gatishmërinë e Shqipërisë për të shtuar numrin e trupave tona paqeruajtëse që shërbejnë në Irak, duke pasur parasysh edhe efektshmërinë, kurajon dhe vlerat që ata kanë shfaqur deri tani, duke u vlerësuar maksimalisht dhe duke e bërë vendin tonë të ndihet gjithnjë e më shume krenar”, thuhet në njoftimin e Presidencës. Sipas këtij njoftimi Kryetari i Shtetit theksoi se kjo do t'i shërbente Shqipërisë jo vetëm për të kurorëzuar me sukses përpjekjet e saj integruese për në NATO, ku shpresojmë që të marrim ftesën e anëtarësimit në Samitin e ardhshëm të Bukureshtit, por do t'i jepte Shqipërisë vendin e saj të merituar në familjen e madhe euro-atlantike.
Presidenti Bamir Topi i cilësoi Komandot shqiptare që shërbejnë në Irak krenari kombëtare. Ai zhvilloi me ushtarakët shqiptarë takime të zgjeruara, u publikuan fotografi të përzemërta dhe çaste emocionuese gjatë takimeve të zhvilluara në Irak. Çdokush mundet të kuptojë se Komandot tanë në Irak janë ndjerë optimistë për vëmendjen që u kushtoi Presidenti, i cili konfirmoi vullnetin e Shqipërisë për të shtuar numrin e trupave ushtarake në Irak. Të gjithë shqiptarët, të paktën sipas sondazheve vlerësojnë pozitivisht përfaqësimin tonë ushtarak në Irak. Edhe ndërkombëtarët, madje edhe NATO vlerëson praninë e Shqipërisë me trupa ushtarake në Irak si një rast tipik i importimit të sigurisë që vendi ynë demonstron.
Por pavarësisht vizitës së pa paralajmëruar të Presidentit, takimeve të ngrohta me efektivat ushtarakë dhe bisedave të shpenguara, si dhe premtimit për të rritur numrin e Komandove në Irak, duket se është e nevojshme që politika dhe institucionet e Tiranës të vlerësojnë sakrificën e ushtarakëve shqiptarë në Irak. U bënë vite që Komandot tanë shërbejnë atje, u bënë vite që për ata mbërrijnë vetëm vlerësime pozitive kur flitet për anëtarësimin në NATO. Por pikërisht kur flitet për këtë proces, ndërkombëtarët thonë se Shqipëria duhet të përmbushë kushtet tjera të vendosura për pranimin në NATO. Presidenti Topi, veçanërisht pasi ka parë kushtet ku shërbejnë Komandot tanë, i ka të gjitha kompetencat të ndikojë që politika e Tiranës jo vetëm të mos frenojë, por të ushqejë dhe të zhvillojë ato reforma të shumëkërkuara që do ta afronin vendin me NATO-n. Nëse do të ndodhte kjo, qoftë edhe në respekt të misionit të Komandove në Irak apo edhe të besimit dhe dëshirës së shqiptarëve për të qenë anëtarë të BE-së dhe NATO-s, më shumë se kushdo tjetër nga ne shqiptarët, do të ndiheshin të shpërblyer ata, Komandot shqiptare, vëllezërit, baballarët, shokët dhe të afërmit tanë që shërbejnë atje mes rrezikut që po largohet çdo ditë e më shumë edhe falë kontributit simbolik shqiptar.

“Shqipëria ftesë në Samitin e Bukureshtit nëse përmbush objektivat e NATO-s”

2007-12-22T20:48:00.001Z

Ministri i Jashtëm z. Lulzim Basha, zhvilloi një vizitë pune në selinë e NATO-s në Bruksel ku u takua me ambasadoren e SHBA-së znj. Victoria Nuland, ambasadorin e Kanadasë z. Robert McRae, ambasadorin e Holandës z. Herman Schaper, ambasadorin e Portugalisë z. Manuel Pereira dhe ambasadorin e Danimarkës z. Per Poulsen-Hansen në NATO. Ministri Basha gjithashtu mori pjesë ne hapjen e foto-ekspozitës promovuese “Shqipëria e parë nga ajri” të Alket Islamit, në ambientet e selisë së NATO-s në Bruksel.

Ecuria e diskutimit të procesit të anëtarësimit të Shqipërisë në NATO, progresi i reformave në Shqipëri, situata aktuale në rajon dhe veçanërisht në Kosovë, ishin temat kryesore të diskutimit mes ministrit Basha dhe ambasadorëve të vendeve anëtare.Duke u ndalur në zhvillimet më të fundit në Shqipëri në planin politik, ekonomik dhe situatën e brendshme, ministri Basha i informoi ambasadorët mbi masat e marra ne kuadër të Plan Veprimit të Anëtarësimit. Ai theksoi se vëmendja e qeverisë shqiptare është fokusuar në drejtim të reformës zgjedhore dhe reformës në sistemin e drejtësisë. Ministri Basha i njohu ambasadorët me veprimet konkrete që qeveria shqiptare po ndërrmerr deri në Samitin e Bukureshtit dhe më tej, për të konsoliduar dhe cuar përpara reformat edhe pas marrjes së ftesës. Ambasadorët nga ana e tyre, vlerësuan progresin e qëndrueshëm që ka bërë Shqipëria veçanërisht gjatë ciklit të 9-të të MAP-it, kontributin e saj në zhvillimet në rajon dhe qëndrimin e matur dhe konstruktiv në zgjidhjen e statusit të Kosovës. Ata shprehën besimin se me realizimin e objektivave të programuara, Shqipëria i ka të gjitha mundësitë për të marrë ftesën në Samitin e Bukureshtit. Një vend të veçantë në diskutim ka zënë edhe situata në rajon, në veçanti Kosova dhe sfidat e përbashkëta të aleatëve, para dhe pas shpalljes së statusit. Ministri Basha theksoi angazhimin konstruktiv të qeverisë shqiptare në këtë fazë përmbyllëse të statusit të Kosovës. Duke diskutuar masat e marra nga NATO për t’iu përgjigjur çdo sfide para dhe pas përcaktimit të statusit, bashkëbiseduesit vlerësuan rëndësinë vendimtare që ka angazhimi i plotë dhe i vendosur i trupave të NATO-s në Kosovë për parandalimin dhe frenimin e çdo akti që synon destabilizimin e situatës në Kosovë dhe me gjerë. Gjatë vizitës Ministri Basha mori pjesë në hapjen e foto-ekspozitës promovuese “Shqipëria e parë nga ajri” në selinë e NATO-s në Bruksel. Hapja e kësaj foto-ekspozite është një nga aktivitetet e organizuara nga Ministria e Punëve të Jashtme në kuadër të promovimit të imazhit të Shqipërisë në NATO dhe BE. Në pritjen e organizuar me këtë rast morën pjesë ambasadorë të vendeve anëtare të NATO-s si dhe zyrtarë të lartë të Aleancës. Në fjalën e tij përshëndetëse ministri Basha theksoi ndryshimet e mëdha që kanë ndodhur në Shqipëri gjatë viteve të fundit dhe vuri në pah vlerat kulturore, historike dhe bukuritë natyrore të vendit tonë. Ai i ftoi të pranishmit të vizitojnë Shqipërinë për t’i prekur këto vlera së afërmi. Ekspozita e cila zgjoi një interes të madh tek të pranishmit do të qëndrojë e hapur gjatë gjithë javës në vijim.

Basha në Bruksel, takime me ambasadorët e vendeve anëtare të NATO-s

2007-12-17T13:42:00.000Z

Ministri i Jashtëm i Shqipërisë Lulzim Basha pritet të diskutojë ecurinë e procesit të anëtarësimit të vendit në NATO, gjatë vizitës zyrtare që po zhvillon në Bruksel. Dikasteri i diplomacisë shqiptare njoftoi më 16 dhjetor 2007, se Ministri Basha gjatë qëndrimit në Bruksel do të takohet me më Ambasadorët e SHBA-së znj. Victoria Nuland, Kanadasë z. Dr. Robert McRae, Holandës z. Herman Schaper, Portugalisë z. Manuel Pereira dhe Danimarkës z. Per Poulsen-Hansen në NATO. Në këto takime, sipas Ministrisë së Jashtme në Tiranë, do të diskutohet ecuria e procesit të anëtarësimit të Shqipërisë në NATO dhe hapat e mëtejshëm në ditët dhe javët që vijnë, deri në Samitin e Bukureshtit, në prill të vitit të ardhshëm.

Sipas burimeve zyrtare, Ministri Basha do të marrë pjesë në hapjen e Ekspozitës së Alket Islamit “Shqipëria e Parë nga Ajri” në ambientet e selisë së NATO-s në Bruksel

Ministrat e Jashtëm të anëtarëve të NATO-s: Në Bukuresht ftesë për vendet e “A3”

2007-12-10T20:05:00.000Z

BRUKSEL - Vendet anëtare të Bashkimit Europian të cilat bëjnë pjesë në NATO, shprehen pro dhënies së ftesës së anëtarësimit në Aleancën Veriatlantike për vendet e Kartës së Adriatikut, Shqipëri, Kroaci dhe Maqedoni. Vendet e BE-së u shprehën dakord që ftesa për vendet e “A 3” të bëhet gjatë Samitit të shteteve anëtare të NATO-s që pritet të zhvillohet në Bukuresht në muajin prill të vitit 2008. Në Samitin e mbajtur në Bruksel, Ministrat e Jashtëm të vendeve anëtare të NATO-s, dhanë mesazhin se Aleanca e Atlantikut të Veriut mbetet e gatshme të zgjerojë radhët e saj. “Konfirmojmë se Aleanca është e hapur për të pranuar anëtare të rinj në Europë, në zbatim të nenit 10 të traktatit të NATO-s”, thuhet në deklaratën e përbashkët të Ministrave të Jashtëm të 26 vendeve anëtare të NATO-s.

Nga deklaratat e zyrtarëve dhe diplomatëve perëndimorë, nuk kuptohet qartë cila nga vendet e Kartës “Adriatik 3” është më pranë anëtarësimit në NATO. Shqipëria është vlerësuar për reformat në fushën e mbrojtjes por ka marrë kritika lidhur me stabilitetin dhe dialogun politik, hartimin e kartave të identitetit, ndërtimin e një kornize të qëndrueshme ligjore për zhvillimin e zgjedhjeve, reformën në drejtësi dhe luftën kundër krimit të organizuar dhe korrupsionit.

Mesazhi i Romano Prodit, parada e Forcave të Armatosura dhe pranimi në NATO

2007-12-06T14:23:00.001Z

Trazhgim Sokolaj

06/12/2007-Një mënyrë e thjeshtë për të kuptuar rëndësinë e politikanit që po qëndronte gjatë atyre orëve në Tiranë do të ishte edhe vëzhgimi i masave te forta të sigurisë që shoqëruan vizitën e Romano Prodit në kryeqytetin e Shqipërisë pak ditë më parë. Në përmasa disi më të reduktuara masat e sigurisë ngjanin shumë në skemë me ato që u aplikuan më 10 qershor të këtij viti kur Presidenti Amerikan Bush qëndroi për një vizitë disa orëshe në Tiranë. Kreu i Qeverisë italiane, simbol i një partie të majtë vizitoi Tiranën, shtrëngoi duart me Kryeministrin e djathtë të Shqipërisë dhe mbajti një konferencë shtypi e më pas takoi edhe Presidentin e vendit dhe liderin e opozitës. Në atë konferencë shtypi Prodi dha një mesazh të qartë lidhur me çështjen e Kosovës, e cila sipas tij “nuk duhet të marrë vendime të nxituara” për shpalljen e njëanshme të pavarësisë. Nuk është habi të mendohet se në protokollin e Kryeministrit italian, ky ka qenë mesazhi kryesor që ai kishte parashikuar të jepte gjatë vizitës së tij në kryeqytetin e Shqipërisë. Politikani i shquar i cili për shkak të detyrave të tij të mëparshme ka një raport të afërt me strukturat e Bashkimit Europian, i uroi Shqipërisë hyrje sa më të shpejtë në BE dhe në NATO. Ky mesazh u dha nga Romano Prodi, kryeministër i Italisë. Ai artikuloi edhe premtimin se Parlamenti italian së shpejti do të ratifikojë MSA-në Shqipëri-BE. Prodi nuk hyri në hollësira lidhur me kërkesat e NATO-s dhe BE-së, nuk përsëriti frazat e vjetra se “është bërë shumë por duhet ecur përpara me reformat” e të tjera si këto. Ai tha se Italia mbështet integrimin e Shqipërisë në NATO dhe BE dhe si Kryeministër uroi që kjo të ndodhte sa më shpejt. Ishte një urim i cili nuk ka pse të paragjykohet në asnjë mënyrë. Nëse pranohet se ndër mesazhet e parashikuara për tu dhënë prej Prodit, për shkak të situatës në rajon e veçanërisht në Kosovë, theksi ka qenë tek kjo e fundit, urimi i Prodit është më shumë një problem yni, sesa një shkak për paragjykimin e asaj çfarë tha Kryeministri italian. Ai gjithashtu shprehu entuziazmin e tij për ndryshimet që kanë ndodhur në Shqipëri vitet e fundit. Një ditë pas vizitës së Prodit në Tiranë, Bulevardi kryesor i Kryeqytetit të Shqipërisë kishte një gjallëri të mahnitshme. Marshi ushtarak i Forcave të Armatosura bëri kuriozë shumë qytetarë dhe mblodhi në një tribunë liderët e këtij vendi. Ushtarakët tanë demonstruan para publikut ecjen harmonike, uniformën, armët dhe mjetet e zakonshme që kanë në përdorim. Për fat të mirë të paktë kanë qenë ata kureshtarë që janë zhgënjyer nga ajo paradë. Pikësëpari sepse ajo ngjante shumë me paradat ushtarake të viteve të komunizmit dhe së dyti për disa hollësi të neveritshme. Mund të përmendim faktin se një pjesë e mirë e kamionëve dhe automobilave që kaluan në bulevard, mbanin targa italiane të cilat ishin mbuluar derisa bëhej fjalë për paradën e Forcave të Armatosura të Shqipërisë që mbushën atë ditë plot 95 vjet nga krijimi i tyre. Radhës së fakteve të neveritshme i shtohet edhe veshja e ushtarakëve tanë. Përveçse të gjithë ata mbanin Kallashnikovë në duar, kostumet ushtarake dukej qartë se kishin mangësi, pasi disa efektivave u binin të gjata ndërsa të tjerëve u rrinin ngushtë. Disa prej veshjeve ishin marrë borxh tek Garda e Republikës apo institucione të tjera të policisë. Teorikisht duhet pranuar se shfaqja në publik është një shans i mirë për të përfituar vlerësim pozitiv, famë dhe respekt, por nga ana tjetër shfaqja në publik mund të jetë një veprim mirëfilli vetëekzekutues. Presidenti i vendit tha para paradës së FA-të shqiptare tashmë kanë hyrë në NATO. Natyrisht ky është një mesazh inkurajimi për ata efektiva të ushtrisë shqiptare e cila deri më tani vlerësohet pozitivisht në disa drejtime në raport me kërkesat e NATO-s. Politikanët tanë përmendin plotësimin e kërkesave të NATO-s kur ushtarët dalin në paradë me kostume që nuk u bëjnë, kur gjysma e mjeteve që ekspozohen aty janë ose dhurata të partnerëve ushtarakë ose mjete të tyre. Është shumë e thjeshtë kjo. Po flasim për veshjen e ushtarëve dhe për disa pajisje të thjeshta transporti apo këmbësorie. Shfaqja në atë mënyrë në paradë, krijon terren për mendime pesimiste lidhur me atë çfarë ndodh në repartet dhe në përditshmërinë e atyre ushtarakëve. Përsëri nuk po flasim për armë moderne këmbësorie, për avionë sulmues e gjuajtës F-16 apo për raketa satelitore. Po flasim për gjerat elementare të një ushtrie simbolike jo vetëm në numër por edhe në pretendime dhe në strategji. Pavarësisht çfarë deklarohet nga politikanët, ajo paradë por edhe mesazhet që marrim çdo ditë nga zyrtarët europianë dhe përfaqësues të vendeve të BE-së apo të NATO-s, duhet ta pranojmë një herë e mirë, se ushtarakët tanë mund të jenë shumë të përgatitur, të përkushtuar, të aftë, ata mund të komunikojnë shumë mirë anglisht me çdo ushtar të NATO-s, mund të zbatojnë teknikat moderne të luftimit dhe veprimeve operacionale të Aleancës Veriatlantike, por ama kemi mangësi të theksuara në logjistikë dhe në administrimin e logjistikës. E ky nuk është problemi i vetëm që kemi. Kaq e rëndë ngjan situata në këtë drejtim, por duket se jemi akoma pas në drejtime të tjera. Aq sa logjistika e ushtrisë shqiptare nuk përmendet në kritikat e ndërkombëtareve të cilët prej vitesh po bëjnë apel për plotësimin e disa gjërave elementare, si regjistrimi i popullsisë apo dhënia e kartave të identitetit apo për të shkuar më tej, reforma në drejtësi, lufta kundër krimit të organizuar dhe korrupsionit dhe vendosja e shtetit ligjor. Nëse partnerët tanë na tolerojnë në infrastrukturën dhe logjistikën ushtarake, vendet anëtare të NATO-s kur të votojnë për pranimin apo të Shqipërisë, sigurisht nuk mund të tolerojnë fenomene të tilla si korrupsioni galopant, mungesa e informacionit minimal për numrin e popullsisë dhe karakteristikat e saj, informaliteti në ekonomi apo mungesa e një kuadri ligjor demokratik për zgjedhjet dhe deficitet në kulturën demokratike të institucioneve dhe faktorëve politikë. Të gjitha këto janë elementë stainacioni që ndikojnë negativisht në stabilitetin dhe qëndrueshmërinë politikë të një vendi për të cilat duhet pasur frikë se nuk do të ketë tolerancë ndaj nesh në prillin e vitit 2008 në Samitin e Bukureshtit.

Lange: Shqipëria të zgjidhë çështjet e gjyqësorit dhe shtetit të së drejtës

2007-12-05T21:16:00.001Z

Shefi i Sektorit të Drejtorisë së Përgjithshme të Zgjerimit, të Komisionit Europian, Dirk Lange, deklaroi sot ( e mërkurë), se "Shqipëria duhet që të zgjidhë çështjet që kanë të bëjnë me funksionimin e sistemit gjyqësor dhe se për të siguruar dhe garantuar shtetin e së drejtës duhet të bëjë çdo përpjekje për të zgjidhur çështje si korrupsioni dhe lufta kundër krimit të organizuar". I pranishëm në takimin e 17 të Grupit të Përbashkët Konsultativ Task-Force, BE-Shqipëri, që po zhvillohet në Tiranë, zoti Lange theksoi se kjo kërkon një bashkëpunim politik dhe udhëheqësit shqiptarë duhet të punojnë sëbashku, në mënyrë që vendi të eci në mënyrë të shpejtë drejt BE. Sipas tij, janë bërë përmirësime në një sërë fushash, të cilat kanë çuar në konsolidimin e marrëveshjes Interim. " Shqipëria në fakt ka ecur përpara përsa i përket proçesit të stabilizim-asocimit, por ka nevojë të bëjë më tepër", vuri në dukje zoti Lange. "Shqipëria nuk mund të përballojë t'i vihet gishti shpeshherë si një vend që ka vështirësi në çështje zgjedhore dhe që nuk përmbush standarde ndërkombëtare", theksoi shefi i Sektorit të Drejtorisë së Përgjithshme të Zgjerimit, të Komisionit Europian, Dirk Lange. ATSH

Solana: Drejtësia dhe zgjedhjet, duhet të vazhdoni reformat me vendosmëri

2007-11-21T20:44:00.000Z

Presidenti i Republikës, Bamir Topi zhvilloi sot një takim me Përfaqësuesin e Lartë të Politikës së Përbashkët të Jashtme dhe Sigurisë së Bashkimit Europian, Havier Solana.Kreu i Shtetit shqiptar mori mbështetjen e Shefit të Politikës së Jashtme të BE-së për përmbushjen e aspiratës integruese të vendit tonë në familjen e madhe europiane. Në këtë takim ku u diskutuan edhe ekuilibrimi i jetës politike në vend, rëndësia e thellimit të reformave dhe përkushtimi ndaj procesit të integrimit, roli moderator i Shqipërisë në rajon, situata në Ballkan dhe çështja e Kosovës, Presidenti Topi shoqërohej nga z. Preç Zogaj, Kryetar i Komisionit të Jashtëm Parlamentar dhe nga znj. Arta Dade, Nënkryetare e Komisionit të Jashtëm Parlamentar. Në përfundim të takimit Presidenti Topi dhe Z. Solana dhanë një konferencë të përbashkët për shtyp. Përfaqësuesi i Lartë i BE-s për Politikën e Jashtme dhe Sigurinë, z. Solana: Z. President, jeni i mirëpritur këtu dhe jam shumë i lumtur që kam mundësinë për t’ju takuar dhe biseduar me ju. Patëm një takim të mirë e të gjatë, ku analizuam situatën në Shqipëri, evolucionin e saj dhe rajonin në përgjithësi. Më lejoni të them vetëm disa gjëra. E para, Shqipëria është një vend i rëndësishëm i rajonit të Ballkanit Perëndimor, është një vend që ka nënshkruar tashmë Marrëveshjen e Associm Stabilizimit me Bashkimin Europian, një proces që po ratifikohet nga vendet anëtare të BE-së, dhe për elementin tepër të rëndësishëm të reformave në Shqipëri. Pa kurrfarë dyshimi, nënshkrimi dhe zbatimi i kësaj Marrëveshjeje duhet të sjellë si rezultat edhe kryerjen e disa reformave të nevojshme në Shqipëri, nga pikëpamja ekonomike, gjyqësore dhe politike gjithashtu. Kohët e fundit ka pasur një farë tensioni në Parlament, por kjo i përket tashmë së shkuarës dhe nuk do të jetë pjesë e së ardhmes. Unë shpresoj shumë që me këto lëvizje në marrëdhëniet tona mes BE-së dhe Shqipërisë të gjitha këto çështje do të trajtohen, dhe jo vetëm do të trajtohen, por do të zgjidhen. Ashtu si edhe mund ta imagjinoni, ne folëm edhe për situatën në rajon, por nuk do të them shumë për këtë, sepse ju jeni vetë këtu në Bruksel dhe i dini mirë sesi po shkojnë gjërat lidhur me Kosovën, për takimin që u bë dje, për takimin që do të bëhet pas disa ditësh në Vjenë dhe për aktivitetin që po zhvillohet rreth çështjes së Kosovës në Bashkim Europian. Fola me zotin President edhe për angazhimin e tij në mënyrë konstruktive. Po i afrohemi shumë shpejt mesit të dhjetorit ku do të jetë një datë e rëndësishme dhe është shumë e rëndësishme që të gjithë të bëjnë përpjekje gjatë kohës që ka mbetur për të arritur vërtet një zgjidhje që të jetë e pranueshme dhe e rënë dakord nga të gjitha palët. Trojka do të vazhdojë të ruajë të gjithë unitetin dhe vendosmërinë për të drejtuar procesin në këtë rrjedhë dhe jam i sigurt që do të gëzojmë edhe mbështetjen konstruktive të Shqipërisë si edhe të shumë vendeve të rajonit për të mundësuar një qëndrim konstruktiv që i shërben garantimit të qëndrueshmërisë në Ballkan, që është qëllimi ynë kryesor dhe i rëndësishëm tani. Edhe një herë ju faleminderit shumë! Presidenti ka ardhur me një delegacion të përbërë nga përfaqësues nga të dyja partitë kryesore në Parlament dhe e vlerësoj shumë vendimin e Presidentit për të ardhur këtu së bashku me dy anëtarët e Parlamentit shqiptar. Edhe një herë shumë faleminderit, suksese dhe ju uroj gjithë të mirat!
Presidenti Topi: Ju falenderoj shumë për këtë mundësi dhe për mikpritjen! Ne diskutuam sot për çështje mjaft të rëndësishme me Përfaqësuesin e Lartë z. Solana. Mund t’ju them që prezantuam arritje, por natyrisht ndamë së bashku dhe shqetësimin që gjërat duhet të ecin më shpejtë konkretisht, së pari në bashkëpunimin mes forcat politike në funksion të ekuilibrimit të jetës politike në Shqipëri, për reformën në drejtësi, nga vullneti politik të futemi menjëherë në implementimin për ta transformuar vullnetin politik në ligje dhe për të kthyer në mënyrë definitive shtetin e së drejtës në Shqipëri. Moment mjaft i rëndësishëm është përfundimi sa më i shpejtë i reformës elektorale, me regjistrin e votuesve dhe kartat e identitetit. Shqipëria do të vazhdojë të luajë rolin moderator në rajonin ballkanik për një klimë sigurie në rajon dhe, sigurisht për çështjen mjaft të rëndësishme të Kosovës. Institucionet shqiptare inkurajojnë autoritetet e Kosovës që të krijojnë sa më shpejt institucionet që dolën nga zgjedhjet e përgjithshme politike dhe lokale dhe të bashkëpunojnë ngushtë me vendet e Bashkimit Europian, me Shtetet e Bashkuara të Amerikës në mënyrë që harmonizimi i axhendës së tyre të jetë jashtëzakonisht i kujdesshëm dhe unë besoj që do të shkojë në këtë linjë. Unë e falenderova z. Solana për mesazhet mjaft të qarta, shumë konkrete, që do t’u shërbejnë institucioneve të Shqipërisë, forcave politike që të kenë më pak fjalë dhe më shumë punë. Ne jemi shumë të qartë për këtë dhe kjo është një eksperiencë shumë e vyer që ne e marrim nga një personalitet kaq i shquar si z. Solana.

Top Channel: Zoti Solana, mesazhi juaj është i qartë, por cilat janë çështjet më të rëndësishme që Shqipëria duhet t’i zgjidhë në muajt e ardhshëm, sipas mendimit tuaj! Dhe pyetja për Presidentin Topi: Masat e kohëve të fundit që qeveria dhe opozita kanë ndërmarrë për reformën në drejtësi dhe pjesëmarrja juaj a janë të mirëpritura nga zoti Solana?

Z. Solana: Udhëheqësit e vendit e dinë shumë mirë se ç’duhet të bëjnë dhe MSA-ja që kemi nënshkruar me ta i përmban të gjitha elementët që duhen bërë. Më lejoni të jem tepër i qartë për këtë. Procesi i reformave duhet të vazhdojë me vendosmëri. Ne nuk mund të bëjmë gjë, por janë ata vetë që duhet t’i bëjnë. Ne do të jemi të gatshëm t’ju shoqërojmë gjatë procesit dhe zhvillimeve, gjatë zbatimit të pjesës së vështirë, të punës, e cila duhet të bëhet në Shqipëri nga vetë shqiptarët, nga shoqëria dhe udhëheqësit e vendit. Në këtë drejtim ne nuk mund të bëjmë dot asgjë, ata duhet ta bëjnë këtë gjë. Këto ia thashë edhe Presidentit Topi, sepse ne duam të kemi marrëdhënie të thella mes Shqipërisë dhe BE-së. Nëqoftëse ju doni çështje të veçanta, mendoj që Presidenti i përmendi në deklaratën e tij; duhen reforma, në gjyqësor, luftë kundër krimit të organizuar, të gjitha këto çështje që ju i dini, janë të rëndësishme. U përmend gjithashtu edhe ligji zgjedhor, për të cilin mendoj se do të jetë shumë i rëndësishëm për qëndrueshmërinë politike të vendit. E përmenda edhe në ndërhyrjen time të parë, ato që keni përjetuar në jetën parlamentare duhet të ndryshojnë, duhet të ecin në rrugën e duhur dhe duhet të ketë kompromis.Fakti që dy anëtarë të Parlamentit po e shoqërojnë Presidentin sot këtu është shumë i rëndësishëm dhe pata mundësinë të takohesha me ta. Ashtu si e tha edhe Presidenti dhe këtu po e citoj: ‘’Fjalët janë shumë të rëndësishme, deklaratat janë shumë të rëndësishme, por veprat janë edhe më të rëndësishme’’.

Presidenti Topi: Unë shoqërohem nga znj. Dade, që është Nënkryetare e Komisionit të Jashtëm Parlamentar dhe përfaqësuese e Partisë Socialiste, një njeri me eksperiencë në politikë dhe ish-ministre e Jashtme, si dhe z. Preç Zogaj, Kryetar i Komisionit të Jashtëm Parlamentar dhe përfaqësues i Partisë Demokratike, si një shenjë e qartë e domosdoshmërisë për bashkëpunim të së gjitha forcave politike në sfidat e integrimit. Të gjitha janë shumë të rëndësishme. Besoj se këto që janë në këtë moment në Parlament, reforma elektorale dhe reforma në sistemin e drejtësisë janë imediate për t’u përfunduar. Ne shpresojmë që do të ecim shumë fort në këtë drejtim.

Televizioni Satelitor Shqiptar: Pyetja e parë për z. Solana, lufta e ashpër politike ka dëmtuar sërish ecurinë e reformave në Shqipëri. Është hera e parë që ka edhe përfaqësues të opozitës me Presidentin. Cili ishte mesazhi juaj i qartë për bashkimin e energjive për reforma akoma edhe më të mëdha integruese dhe pyetja për Presidentin Topi. Kemi të dhëna nga media në Tiranë, që ju e keni dekretuar tashmë heqjen e Prokurorit të Përgjithshëm dhe që do ta bëni publike gjatë kthimit tuaj. A mund ta konfirmoni këtë gjë?

Z. Solana: Unë dhashë një mesazh të qartë, të cilin po jua jap edhe ju të medias. Presidenti Topi ka një të kaluar, e cila është e rëndësishme. Ai ka qenë dikur kreu i grupit parlamentar të njërës prej partive politike dhe mundi të organizonte konsensus mes dy partive dhe është e rëndësishme që të vazhdohet në këtë frymë dhe kjo gjë e rëndësishme u pranua dhe u njoh edhe nga dy anëtarë të rëndësishëm të Parlamentit dhe ky mesazh nuk është vetëm i imi, por jam i sigurt që është edhe mesazhi i Presidentit të Republikës.

Presidenti Topi: Lidhur me pyetjen tuaj për çështjen e Prokurorit të Përgjithshëm, Institucioni i Presidentit është institucion kushtetues i pavarur, ka marrë në shqyrtim raportin e Parlamentit shqiptar, është konsultuar me një grup konstitucionalistësh dhe ekspertësh të fushës, të cilët janë në përfundim të raportit të tyre. Pavarësisht nga lajmet që vijnë, ende, në këtë moment që ne po diskutojmë, nuk ka një vendim të Presidentit të Republikës

Ministri Mediu: Ambasadorët e NATO-s, mbështetje Shqipërisë për integrimin në Aleancën Veriatlantike

2007-11-18T09:41:00.000Z

Ministri shqiptar i Mbrojtjes Fatmir Mediu zhvilloi më 16 nëntor 2007 në Bruksel një takim me ambasadorët e NATO-s të akredituar në Selinë Qendrore të Aleancës së Atlantikut të Veriut. Ambasadorët e vendeve anëtare të NATO-s u njohën me progresin e bërë nga Shqipëria në reformat në fushën e mbrojtjes, si dhe në angazhimet madhore që ka vendi ynë për të marrë ftesën e anëtarësimit në Aleancën e Atlantikut të Veriut në pranverën e vitit të ardhshëm. Ministri Mediu mbajti një fjalë përshëndetëse, ku ndër të tjera foli për kontributet e pranisë së NATO-s në rajonin e Ballkanit Perëndimor, përparimet e rajonit në fushën e mbrojtjes, bashkëpunimin rajonal, sfidat dhe arritjet e vendeve të A3 në përgjithësi e të Shqipërisë në veçanti. Në fjalën e tij, Ministri Mediu theksoi rëndësinë e marrjes së ftesës për anëtarësim në Samitin e Bukureshtit dhe sigurinë që kjo do të reflektojë në mbarë rajonin. Të gjithë ambasadorët vlerësuan arritjet e Shqipërisë në reformat e mbrojtjes dhe dhanë mbështetjen e vendeve të tyre për marrjen e ftesës për anëtarësim nga Shqipëria në Samitin e NATO-s që do të zhvillohet në Bukuresht, në pranverën e vitit të ardhshëm. Gjatë takimit, Zëvendës Sekretari i NATO-s, Claudio Bisognero theksoi kontributin e Shqipërisë në operacionet paqeruajtëse në kuadër të NATO-s dhe kërkoi që për periudhën e mbetur deri në Samitin e Bukureshtit, të hidhen hapa konkretë nga Shqipëria në reformën zgjedhore dhe atë ligjore. Gjatë qëndrimit në Bruksel, Ministri Mediu zhvilloi një takim të veçantë me Ndihmësin e Sekretarit të Përgjithshëm të NATO-s për Planizimin dhe Politikën e Mbrojtjes, Jiri Sedivy. Zoti Sedivy ritheksoi vlerësimin e NATO-s për arritjet e Shqipërisë në fushën e reformave të mbrojtjes. “E rëndësishme është që të ruhet dhe të çohet më tej progresi i arritur veçanërisht në fushën e mbrojtjes, si dhe të demonstrohet në muajt që vijnë që sukseset e arritura në reforma janë të pakthyeshëm”, - deklaroi zoti Sedivy. Ai vlerësoi rolin e Shqipërisë në marrëdhëniet e mira me fqinjët, e cila ka ndikuar pozitivisht në stabilitetin rajonal. Ndihmësi i Sekretarit të Përgjithshëm të NATO-s vlerësoi qëndrimin e Qeverisë Shqiptare për rritjen buxhetit të Mbrojtjes në masën 2 përqind të Prodhimit të Brendshëm Bruto, si dhe faktin që ka një plan të qartë afatgjatë për mënyrën e përdorimit në mënyrë efektive të parave të taksapaguesve shqiptarë në fushën e mbrojtjes. Ministri Mediu zhvilloi dhe një takim me Ambasadoren e SHBA-së në NATO, Victoria Nuland, të cilën e njohu me zhvillimet më të fundit në Shqipëri, si dhe me angazhimet e Qeverisë Shqiptare lidhur me reformat zgjedhore, në fushën e drejtësisë dhe luftën kundër krimit të organizuar e korrupsionit.

Kërkesat e NATO-s, Shqipëria nënshkruan marrëveshje për blerjen e anijeve luftarake

2007-11-13T21:18:00.000Z

13 nëntor 2007.

Në Ministrinë e Mbrojtjes në Tiranë, u organizua një ceremoni me rastin e nënshkrimit të marrëveshjes midis Ministrisë së Mbrojtjes të Shqipërisë dhe kompanisë holandeze “Damen Shipyards”. Në këtë ceremoni të rëndësishme ishte i pranishëm ministri i Mbrojtjes Fatmir Mediu, zv.ministrat e Mbrojtjes Zana Xhuka dhe Petrit Karabina, zv.shefi i Shtabit të Përgjithshëm gjeneral brigade Agim Lala, drejtorë dhe ushtarakë të lartë të Ministrisë së Mbrojtjes dhe Shtabit të Përgjithshëm të FA-së, përfaqësues të kompanisë amerikane CUBIC etj. Të pranishëm ishin gjithashtu Menaxheri i Përgjithshëm i kompanisë holandeze “Damen Shipyards”, Rene Berkvens, ambasadori i Holandës në Tiranë Van Voorst tot Voorst, si dhe përfaqësues të tjerë të kësaj kompanie. Marrëveshja u nënshkrua nga ministri i Mbrojtjes Fatmir Mediu dhe Menaxheri i Përgjithshëm i kompanisë “Damen Shipyards”, Rene Berkvens. Duke folur për këtë marrëveshje, Ministri Mediu theksoi se nënshkrimi i saj përbën një eveniment shumë të rëndësishëm, jo vetëm për Forcat tona të Armatosura dhe qeverinë shqiptare, por për të gjithë popullin shqiptar. Ai është një projekt i gjërë që përfshinë investime të rëndësishme dhe që rrit më tej kapacitetin operacional të forcave tona detare. Realizimi me sukses i tij do të ndikojë dukshëm në forcimin e kontrollit të ujrave tona detare nëpërmjet forcimit dhe modernizmit të Rojes Bregdetare. Gjithashtu, ky projekt do të kontribuojë edhe për garantimin dhe zhvillimin e mëtejshëm të turizmit, në forcimin e luftës kundër trafiqeve dhe kontrabandës etj. Të gjitha këto, nënvizoi Ministri Mediu, flasin për bashkëpunimin dhe ndihmën e vyer që qeveria dhe kompanitë holandeze kanë dhënë për vendin tonë, si dhe përbëjnë për ne një hap tjetër të rëndësishëm në procesin e reformimit dhe modernizimit të Forcave të Armatosura dhe në arritjen e standardeve për anëtarësimin në NATO. Në bazë të kësaj marrëveshje, Ministria e Mbrojtjes do të blejë nga kompania holandeze “Damen Shipyards” 4 anije të patrullimit detar për Rojen Bregdetare Shqiptare. Vlera totale e kësaj kontrate është 31 milion euro, nga të cilat 11 milion euro do të subvencionohen në formë granti nga qeveria holandeze në kuadër të Programit ORET. Ky program ndihmon vendet në zhvillim, të cilat kanë nevojë për produkte dhe shërbime të huaja duke iu afruar kështu mundësi grantesh speciale. Anija e parë e patrullimit detar do të ndërtohet në Hollandë, ndërsa tre të tjerat do të ndërtohen në Shqipëri, në Bazën e Pashalimanit në Vlorë, e cila do të rihabilitohet në kuadrin e këtij projekti. Këto anije, përveç funksionit ushtarak, do të kryejnë edhe një serë funksionesh civle në ujrat detare shqiptare.

INTEGRIMI NË NATO, NJË NDËR PROJEKTET MË MADHORE TË SHQIPËRISË

2007-11-11T16:27:00.000Z

TIRANË, 11 Nëntor 2007 - Integrimi në NATO mbetet një ndër projektet më madhore të Shqipërisë dhe qeverisjes së saj. Në këtë kuadër, Shqipëria ka ndërmarrë një sërë reformash, me qëllim marrjen e ftesës në Samitin e Bukureshtit në prill të vitit 2008.
Aktualisht vendi ynë është më afër se kurrë procesit të anëtarësimit në NATO dhe ky proces, përveç se ka mbështetjen e gjithë politikës shqiptare, gëzon mbështetjen edhe të mbi 94 % të shqiptarëve. Ministria e Mbrojtjes, pas Samitit të Rigës, me synimin për të marrë ftesën për anëtarësim në NATO në Samitin e Bukureshtit, hartoi një platformë me 15 objektiva. Shumë prej tyre do të realizohen para Samitit të Bukureshtit, që do të mbahet në prill të vitit 2008, dhe të tjera parashikohen deri dhe matanë vitit 2010. Objektivat ambicioze, por të planifikuara, janë të mbështetura me fonde, me përgjegjësi dhe me afate të përcaktuara qartë.

ECURIA E INTEGRIMIT NË NATO DHE
PLANI AFATGJATË DERI NË VITIN 2020
Ndër objektivat më të rëndësishme të platformës është implementimi i konceptit “Joint & Jointness” jo vetëm përsa i përket strukturës së FA, por edhe përsa i përket trajnimit, doktrinës dhe operacioneve të përbashkëta, sistemeve dhe pajisjeve te ndërveprueshme, dhe atje ku është e mundur, edhe vendosjes në vendbazime të përbashkëta.
Përmbushja e Direktivës së Samitit të Rigës për të zhvilluar 8 % të sasisë së komponentit tokësor të aftë për pjesëmarrje të menjëhershme në operacione të drejtuara nga NATO dhe 40 % të komponentit tokësor deri në 2013 janë të tjera objektiva të platformës.
Plani Afatgjatë, i cili shtrihet deri në 2020, ka një vizion strategjik që mbështetet në disa prioritete; Planin Afatgjatë të Zhvillimit të FA, ku përfshihet vizioni strategjik i Ministrisë së Mbrojtjes, 2007 – 2020. Disa supozime të Planit Afatgjatë të Zhvillimit të FA-së, deri në vitin 2020, janë; mjedisi strategjik i sigurisë të mos ketë ndryshime madhore; marrja e ftesës për në NATO do të realizohet në Samitin e Bukureshtit 2008, parashikojmë dhe pranimi si anëtar me të drejta të plota do të bëhet para vitit 2010; krijimi i forcës 100% profesioniste do të bëhet sipas planit deri në fund të vitit 2010; mbështetja e Planit Afatgjatë të zhvillimit me rritje vjetore konstante të buxhetit të mbrojtjes te paktën 2% të PPB nga 2008-2020; rritja e Prodhimit të Përgjithshëm Bruto (PPB) të vendit, me 5-6% për çdo vit si dhe mbajtjes nën kontroll të inflacionit në 3%; përmbushja nga ministritë dhe institucionet e tjera përkatëse te detyrimeve në kuadrin e MAP-it.
Plani Afatgjatë i Zhvillimit 2020 reflekton me koherencë angazhimet e Qeverisë në fushën e mbrojtjes dhe integrimit në NATO. Gjithashtu ai orienton zhvillim të kapaciteteve operacionale, sipas eksperiencës së vendeve të NATO-s dhe konceptit Strategjik të Aleancës. Plani Afatgjatë i zhvillimit 2020 mbështetet në dy vlerësimet e mbrojtjes të bëra gjatë vitit 2006, nga Komanda për Transformimin e NATO-s (ACT) dhe Departamenti i Mbrojtjes së SHBA (US OSD).
Shqipëria është Anëtare e Këshillit të Bashkëpunimit të Atlantikut të Veriut që nga qershori 1992, bëhet e ditur nga historiku dhe të dhënat e Ministrisë së Mbrojtjes, të bëra publike në faqen zyrtare të saj.
Sipas këtij historiku, Shqipëria përkrahu Iniciativën e Partneritetit për Paqe në janar 1994 dhe nënshkroi Dokumentin Kuadër më 23 shkurt 1994, duke u bërë vend anëtar i Partneritetit për Paqe. Më 22 shtator 1994, paraqiti Dokumentin e Prezantimit, në të cilën përcaktohen fushat, përmasat dhe niveli i pjesëmarrjes në bashkëpunim me NATO-n.
Dokumentet e mësipërme përbënë dhe bazën e hartimit të Programit Individual të Partneritetit për vitet 1995, 1996, 1997, Programet Individuale Speciale NATO -Shqipëri për vitet 1997-2000.
Programi i Partneritetit Individual (IPP) është zhvilluar që të përkrahë programet kryesore që burojnë nga rishikimi i mbrojtjes. Ky program përforcon vazhdimësinë e procesit të ristrukturimit, duke synuar rritjen e aftësive operacionale të FA. Prioritetet kryesore të mbrojtjes për 2002 u fokusuan në zhvillimin e një strategjie ushtarake kombëtare, të shoqëruar nga një strukturë organizimi, e orientuar në nivel të lartë profesionalisht, me një numër më të vogël të FA, adaptimin e konceptit të trajnimit të forcës, një sistem menaxhimi personeli dhe një sistem menaxhimi burimesh.
Programi i Partneritetit Individual (IPP), i vitit 2002, synoi tre çështje kryesore bashkëpunimi; të ndihmojë Shqipërinë në ristrukturimin e FA të saj, nën kontrollin demokratik të autoritetit civil, sipas planit afatgjatë të implementimit; të sigurojë përkrahjen në fusha të interesit të NATO-s dhe Shqipërisë; t’i japë më shumë përmbajtje marrëdhënieve me PfP, në një afat kohor më të gjatë.
Qëllimi kryesor për NATO-n dhe Shqipërinë në IPP 2002, ishte arritja e rezultateve konkrete, me qëllim që të demostrohen efektet pozitive të PfP.
Shqipëria ka marrë pjesë dhe në Proçesin e Planifikim - Rishikimit që nga viti 1996 e në vazhdim. Për vitin 2000, ajo pranoi 53 Objektiva Partneriteti, ndërsa në shkurt 2002 diskutoi për Paketën e Re të tyre.
Në nëntor 1999, Shqipëria paraqiti Planin e Veprimit për Antarësim, duke u bërë një nga 9 vendet aspirante për antarësim në Aleancë.
MAP (Membership Action Plan), Plani i Veprimit për Antarësim është fokusuar në përpjekjet që bën Shqipëria në rrugën e saj drejt Integrimit.
Shqipëria konsideron se anëtarësimi saj në NATO do të paraqiste në shtrirjen natyrale të Aleancës në krahun e saj Juglindor. Pozicioni gjeografik i Shqipërisë është i favorshëm për implementimin e konceptit të ri strategjik të NATO-s, të aprovuar në Samitin e Washingtonit.
Nëpërmjet MAP-it, Shqipëria është e angazhuar të arrijë këto objektiva; të vazhdojë të përmirësojë rendin dhe ekonominë e tregut, duke i kushtuar vëmendje të veçantë përmirësimit të rendit dhe luftës kundër korrupsionit; të inkurajojë dhe zhvillojë respektin për të drejtat e njeriut, duke përfshirë të drejtat e minoriteteve; të forcojë institucionet demokratike dhe, si pasojë, rolin e tyre në shoqëri; të vendosë një administratë publike efektive; të forcojë kontrollin civil demokratik mbi FA; të ruajë rezultatet e arritura vitet e fundit në rritjen ekonomike dhe të vazhdojë reformat e saj ekonomike, veçanërisht në fushën e privatizimit, etj.

BASHKËPUNIMI SHQIPËRI-SHBA
Ndërkohë, në fushën e mbrojtjes, Shqipëria ka bashkëpunime dypalëshe me vende të ndryshme. Përsa i përket bashkëpunimit dypalësh me Shtetet e Bashkuara të Amerikës, ai mbështetet në Memorandumin e Mirëkuptimit për marrëdhëniet ushtarake midis Departamentit të Mbrojtjes të SHBA-së dhe Ministrisë së Mbrojtjes së Republikës së Shqipërisë (tetor 1993); Memorandumin e Mirëkuptimit midis Shqipërisë dhe Komandës Europiane të SHBA-së për mbështetjen (LIASON TEAM) (janar 1993); Memorandumin e Marrëveshjes, lidhur me studimet hidrografike (korrik 1994); Memorandumin e Mirëkuptimit ndërmjet Qeverisë së Republikës së Shqipërisë dhe Qeverisë së SHBA për Sigurimin e Pajisjeve të Komunikimit SY-71E për vendet partnere (1998); Memorandumin e Mirëkuptimit midis Task Force dhe Drejtorisë së Aviacionit Civil mbi kontrollin e aeroportit të Rinasit (maj 1999); Marrëveshje midis Ministrisë së Mbrojtjes dhe Zyrës së Atasheut Ushtarak të SHBA (USDAO) për punësimin e nje koordinatori për problemet e PfP-SE (qershor 2000); Marrëveshje sigurimi midis SHBA dhe Qeverisë shqiptare, në lidhje me masat e sigurimit për mbrojtjen e informacionit të klasifikuar ushtarak; Marrëveshje midis Shteteve të bashkuara të Amerikës dhe Republikës së Shqipërisë për shkatërrimin e municioneve (dhjetor 2001).
Për realizimin e bashkëpunimit, SHBA kanë ngritur disa struktura; Ekipi Amerikan i Koordinimit ne MM, që mbulon shkëmbim ekipesh për dhënie asistence teknike dhe familjarizim me përvojën e SHBA-së, asistencë për Ristrukturimin e FA, plotësim të kuadrit ligjor të FA; Zyra e Asistencës së Sigurimit, që mbulon Menaxhimin e Programit të Asistencës së Sigurimit.

SHQIPËRIA NË MISIONE PAQERUAJTËSE
Shqipëria është pjesëmarrëse me forca paqeruajtëse në Forcën e Stabilizimit (SFOR), e drejtuar nga NATO në Bosnje dhe Hercegovinë. Misioni parësor i SFOR-it është që të kontribuojë për një situatë të qetë dhe të sigurtë çka është e nevojshme për konsolidimin e paqes.
Në Shtator 1996, Shqipëria dërgoi 33 trupa për të shtuar Forcën e Aplikimit të Paqes “Peace Implementation Force” (IFOR). Këta ushtarë u dërguan nga Gjermania, ku kishin marrë pjesë në trajnime paqeruajtëse. Ata e filluan dislokimin duke u vendosur fillimisht në Kroaci, por tani janë të vendosur në Kampin Franko – Gjerman në Rajlovac.
Nga viti 2000, në Bosnje Shqipëria dërgon një personel prej 70 officerë, n/oficerë dhe ushtarë. Deri tani Shqipëria ka dërguar 15 misione ushtarake në Bosnjë.
Detyra e Paqeruajtësve shqiptarë në Afganistan është ruajtja dhe sigurimi i aeroportit te Kabulit, në kuadrin e një njësie shumëkombëshe të përbërë prej 1400 vetësh, me forca nga shtetet anëtare të NATO-s. Kontigjenti i parë ka filluar misionin në terren më datë 16.08.2002. Ishin 30 paqeruajtës shqiptarë, efektiv i Batalionit special “Komando”, trupa profesioniste dhe ndër më të përgatiturit për situata paqeruajtese, si ajo në Afganistan.
Përsa i përket forcave komando në Irak, misioni i tyre është përgatitja dhe zhvillimi i operacioneve stabilizuese dhe të sigurimit, në mbështetje të koalicionit “Liria e Irakut”. Përbërja e kontigjentit është; 9 oficerë, 17 kapterë, 3 ushtarë profesionistë, 42 ushtarë të shërbimit të detyrueshëm.
Detyrat që ka kontigjenti ynë paqeruajtës në Irak janë shoqërim konvoi, pikë kontrolli (check point), patrullim në qytet, kontroll objektesh (banesash), ruajtja e qetësisë dhe e rendit publik (gaz, karburant), detyra siguruese (sigurimin e bazës, të shtabit, stacioni i trenit, etj), patrullim brenda dhe jashtë perimetrit të bazës.

KONTRIBUTI I SHQIPËRISË NË SEEBRIG
Iniciativë, që konsiston në qëllimet dhe principet e Kartës së Kombeve të Bashkuara (OKB), është dhe SEEBRIG. Duke besuar se bashkëpunimi dhe dialogu ndërmjet vendeve të Evropës Jug – Lindore duhet të zhvillohet më tej dhe duke patur në konsideratë dedikimin e këtyre vendeve që të kontribojnë për siguri dhe stabilitet në rajon, si dhe nxitjen e marrëdhënieve të mira fqinjësore ndërmjet këtyre vendeve, Ministrat e Mbrojtjes së shtatë vendeve pjesëmarrëse firmosën në Shkup më 26 shtator 1998, Marrëveshjen për një Forcë Shumëkombëshe për Paqe të Europës Jug-Lindore.
Sllovenia dhe Shtetet e Bashkuara, si vende vëzhguese, shprehën mbështetjen e tyre totale dhe dedikimin për të kontribuar në këtë iniciativë.
Gjatë takimit të pestë të SEDM-it në Selanik më 9 tetor 2000, Kroacia u pranua si vëzhguesi i tretë në Forcën Shumëkombëshe për Paqe të Europës Jug-Lindore. Pas kësaj, Ukraina u bë vëzhguesi i radhës gjatë Takimeve Ministrore në Proçesin e SEDM-it.
Në përgjigje të ofertës së forcës, dërguar NATO-s në prill 2003, një grup i NATO-s vizitoi Shtabin e SEEBRIG-ut në shtator, me qëllim caktimin e programit të vlerësimit dhe të kritereve. Në prill 2004, NATO bëri vlerësimin e Aftësisë Fillestare Operacionale. Në përfundim të këtij proçesi, SEEBRIG-u do të çertifikohej nga NATO si e aftë për pjesëmarrje në Operacione në Mbështetje të Paqes të drejtuara nga NATO ose EU.
Në kuadër të këtij bashkëpunimi, janë zhvilluar disa stërvitje përgjatë viteve.
Shenim i Agjencise Telegrafike Shqiptare

Qytetarët, politika shqiptare dhe iluzioni i integrimit

2007-11-08T21:54:00.000Z

Trazhgim Sokolaj
Politikëbërësit shqiptarë kanë qenë optimistë gjatë muajve të fundit lidhur me përpjekjet e vendit për të marrë ftesën e anëtarësimit në NATO në samitin e Bukureshtit në pranverë 2008. Në fakt përpjekjet dhe rëndësia e procesit të anëtarësimit në Organizatën e Atlantikut Verior kishin disa muaj që ishin kthyer në pjesë të përditshme të ligjërimit politik dhe publik të politikanëve dhe qeveritarëve shqiptarë. Është përmendur se Shqipëria ndodhej në kilometrin e fundit të rrugës së saj drejt NATO-s. Ka pasur pretendime se pas arritjeve të vlerësuara në fushën e mbrojtjes, kryesisht me reformimin e Forcave të Armatosura dhe plotësimin e 2 për qind të GDP-së për investime në këtë fushë, anëtarësimi do të ishte më i lehtë dhe më i sigurt. Të dy krahët e politikës janë përpjekur të “rrëmbejnë” suksesin e përafrimit me NATO-n ose ti faturojnë kundërshtarit mangësitë që na shkaktojnë vështirësi në përpjekjet për anëtarësim. Së fundi morëm dy mesazhe shumë të rëndësishme lidhur me përpjekjet e vendit për anëtarësim në Organizatën e Atlantikut. Ambasadorja e SHBA-ve në NATO, konfirmoi se tani, Shqipëria nuk është gati për ftesën. Po kështu raport-progresi i autoriteteve evropiane gjeti përparim në disa fusha por mangësi të dukshme dhe të theksuara sa i përket luftës efektive kundër korrupsionit, reformës në drejtësi, stabilitetit dhe dialogut politik dhe reformës zgjedhore. Në fakt këto nuk janë gjëra që thuhen për herë të parë. Gjithnjë kemi pasur probleme në këto aspekte. Çfarë po ndodh? Po ndodh që politikëbërësit dhe vdimarrësit e këtij vendi jo vetëm që nuk po i kuptojnë ose nuk po duan ti kuptojnë mesazhet e Brukselit por nuk po na lejojnë edhe ne qytetarëve të kuptojmë si duhet. Sepse pas çdo raporti apo deklarate të Brukselit lidhur me Shqipërinë dhe procesin e saj të hyrjes në BE apo anëtarësimit në NATO, vendimarrësit tanë dalin në konferenca shtypi dhe na bëjnë interpretime boshe për qëllime krejt elektorale. Përfundimisht nuk kemi nevojë për këtë gjë, i ka ikur koha. Tani na duhet që të kemi vendimarrës dhe politikëbërës që i dëgjojnë mirë këshillat dhe kërkesat e Brukselit dhe që mbi të gjitha përpiqen seriozisht ti zbatojnë ato në mënyrë të efektshme gjatë mandatit të tyre qeverisës si dhe të hedhin baza për pasardhësit e tyre në vendimmarrje që procesi të mos ndalojë. Pra nesh arrijmë përparim në një fushë të caktuar, të ecim përpara aty dhe jo të ndodhë siç në fakt ka ndodhur që me rotacionet politike gjithçka është arritur shkatërrohet dhe këtu e kam fjalën për ata nëpunës të zotë që duhet të vazhdojnë të punojnë seriozisht për të kapur standardet dhe kërkesat e BE-së dhe NATO-s, pa menduar se një ditë të bukur zgjedhjesh do të mësojnë lajmin e shkarkimit nga puna. Tani nuk kemi nevojë të na mburren politikanët se 2 për qind të GDP-së po e investojnë në fushën e mbrojtjes, dhe kjo është një arritje sepse këtë kërkon NATO. Ka vende anëtare të NATO-s që nuk investojnë 2 për qind të GDP-së në fushën e mbrojtjes dhe pse përpiqen të jenë afër kësaj shifre. Kjo ndodh sepse në këto vende demokratike, qytetarët janë aktivë dhe pjesëmarrës në vendimmarrje dhe duan që veç ushtrisë së fortë e moderne të kenë edhe shkolla, spitale, librari, rrugë, kanalizime dhe infastrukturë. Në Shqipëri politikanët nuk u vendosën asnjëherë jo vetëm nën presionin e qytetarëve po as përballë tyre, për të debatuar nëse është me vend që ato pak miliona të GDP-së në masën 2 për qind ti harxhojmë për investime në fushën e mbrojtjes. E gjitha kjo ndodh në një kohë kur kemi probleme me rrugët, spitalet, shkollat, kanalizimet, ujësjellësit, rrjetin e transmetimit të energjisë apo krizën energjetike. Më shumë se 92 për qind e shqiptarëve janë dakord me anëtarësimin e vendit në NATO edhe pse sondazhet tregojnë se qytetarët nuk janë të qartë me përfitimet apo detyrimet që vijnë nga anëtarësimi. Mbi të gjitha konferencat e shtypit të ministrave dhe qeveritarëve që dalin dhe “zbusin” kritikat e Brukselit për Shqipërinë përbëjnë një kohë të çmuar që nëse do të harxhohej duke punuar do të kishim bërë ca përpara në fushat ku kritikohemi më shumë, lufta kundër korrupsionit, reforma zgjedhore dhe ajo në drejtësi. Komunikimi politik natyrisht që nuk zgjidhet me një ditë, ai më së shumti ka të bëjë me karakterin e gjithsecilit aktor në politikë dhe mënyrën se ai ka vendosur të ndërtojë aksionin e tij politik. Qytetarët shqiptarë duhet të jenë mirënjohës ndaj atyre që nuk na lejuan të krijojmë iluzione për anëtarësimin e sigurt në NATO në Bukuresht, sepse nëse do të vazhdonim të dëgjonim politikëbërësit tanë, atëherë kur të mësonim vendimin e Samitit të ardhshëm do të pësonim një zhgënjim të madh. Deri atëherë do të ndërgjegjësohemi për problemet që kemi dhe për ato që nuk shkojnë në mënyrë që kur të mësojmë se duhet bërë akoma më shumë, së paku të mos zhgënjehemi por të fillojmë të arsyetojmë shkaqet e vendimit.

Ambasadorja e SHBA në NATO: Shqipëria nuk është gati për hyrjen në Aleancë

2007-11-08T14:36:00.000Z

Politikanët dhe pushtetarët e Tiranës duket se kanë rënë “me këmbë në tokë” pas deklaratës së Ambasadores së SHBA-së në NATO. Viktoria Nuland, ambasadore e Shteteve të Bashkuara të Organizatën e Atlantikut të Veriut qëndroi për një vizitë zyrtare në kryeqytetin e Shqipërisë. Në një konferencë shtypi përkrah Ambasadorit Amerikan në Tiranë, diplomatja nga SHBA u shpreh se “ftesa për anëtarësimin e Shqipërisë në NATO, varet nga arritja konkrete e reformave të nevojshme”. “Shqipëria ka shumë për të bërë derisa të marrë një ftese për anëtarësimin në NATO, në fillim të vitit 2008”, tha Viktoria Nuland. Ajo bëri thirrje që forcat politike të arrijnë rezultate konkrete në realizmin e reformës në drejtësi, në atë zgjedhore dhe në luftën kundër krimit të organizuar dhe korrupsionit. “Ne besojmë se me më shumë punë Shqipëria mund të ishte gati, por nuk është gati sot. Shqipëria ka bërë përparime të ndjeshme, por sa më shumë që i afrohemi Samitit të Bukureshtit, prillin e ardhshëm, lipset të garantohet shpejtësia në realizmin konkret të reformave të domosdoshme”, është shprehur ambasadorja e SHBA në NATO. Diplomatja Nuland tha se gjatë qëndrimit në Tiranë ka shprehur nevojën e forcimit të sistemit të drejtësisë dhe luftës kundër korrupsionit dhe krimit të organizuar si dhe domosdoshmërinë e vazhdimit të reformës zgjedhore. Duke iu referuar angazhimit të Shqipërisë në kartën “Adriatik 3” bashkë me Kroacinë dhe Maqedoninë, Nuland sqaroi se vlerësimi për secilin vend do të bëhet në mënyrë të ndarë.

Raporti i Komisionit Evropian mbi Shqipërinë-kritik mbi reformat elektorale, gjyqësore dhe punën e Parlamentit

2007-11-06T21:37:00.000Z

Armand Mero
06-11-2007
Raporti I komisionit europian për ecurinë e vendeve të Ballkanit perëndimor, ku përfshihet edhe Shqipëria, u prezantua sot nga komisioneri europian për zgjerimin Olli Rehn. Raporti bënë një përshkrim të hollësishëm të zhvillimeve në të gjitha fushat. Komisioneri Rehn duke njohur përparimet e bëra deklaroi se nevojitet ende shumë punë për të bërë dhe sipas shefit të departamentit për Shqipërinë në Komisionin Europian Dirk Lange i cili ishte sot në Tiranë për t’i dorëzuar autoriteteve shqiptare raportin e progresit pikat kritike kanë të bëjnë me reformat elektorale, atë në gjyqësor dhe veprimtarinë e parlamentit: "Do të përmendja në veçanti mungesën e progresit në reformën elektorale dhe atë gjyqësore. Funksionimi i gjyqësorit është i rëndësishëm për shtetin ligjor. Është kritik roli i parlamentit. Ne shikojmë se parlamenti nuk ka ecur përpara me axhendën e reformave." Sipas raportit puna e parlamentit është dominuar shpesh nga ngjarjet e politikes së ditës dhe debatet e përqendruara nga interesa të ngushta partiake kanë shtyrë vendimet e parlamentit ose këto vendime janë future me nxitim dhe pa përgatitjen e duhur. Dështimi i partive politike për të bashkëpunuar vazhdon të frenojë reformat e nevojshme për të përmbushur detyrimet e Marëveshjes së Asocim Stabilizimit. Sipas raportit reforma e duhur e kuadrit zgjedhor në një kohë të mjaftueshme para zgjedhjeve të ardhshme parlamentare kërkon pjesmarrjen konstrukltive të partive politike në komisionin e reformës elektorale ndërsa sistemi gjyqësor kritikohet për proceduar përgjithësisht të ngadalta dhe me mungesë transparence. Masat e qeverisë për të luftuar korrupsionin në gjyqësor cilësohet në raport kanë cuar në konflikte të vazhdueshme mes ekzekutivit dhe gjyqësorit e veçanërisht prokurorit të përgjithshëm. Ndonëse bëhen vlerësime për masat e marra çështja e korrupsionit dhe e krimit të organizuar konsiderohen ende si mjaft serioze për Shqipërinë. Kryeministri Sali Berisha theksoi se për këto probleme priten tani e tutje zhvillime shumë të rëndësishme, duke nënkuptuar qartë se ato lidhen me ndryshimin e prokurorit të përgjithshëm: "Qeveria mbetet thellësisht e angazhuar në konsolidmin dhe thellimin e reformave. Se lufta jonë kundër korrupsionit dhe krimit të organizuar do të njoh zhvillime shumë të rëndësishme të reja".Raporti vlerëson ecurinë ekonomike të vendit por shpreh shqetësimin lidhur me situatën energjetike e cila sipas zotit Lange pengon zhvillimin e shpejtë të ekonomisë.

Marrë nga VOA

Komisioneri i KE-së pas vizitës në Shqipëri: Koha të kaloni nga standardet te veprimi

2007-11-06T16:38:00.000Z

“Ka ardhur koha të kalohet nga vendosja e standardeve tek zbatimi i tyre, ” tha Z. Thomas Hammerberg, Komisioneri i Këshillit të Europës për të Drejtat e Njeriut, pas vizitës së tij vlerësuese në Republikën e Shqipërisë. ”Keni shumë ligje të rëndësishme e janë aprovuar mjaft strategji, por tashmë të gjitha përpjekjet duhen përqëndruar tek zbatimi i tyre në praktikë”. Gjatë vizitës së tij zyrtare 6-ditore, të nivelit të lartë, Komisioneri u takua me Presidentin, Kryeministrin, Kryetaren e Parlamentit dhe përfaqësues të tjerë të lartë të organeve ekzekutive, gjyqësore e legjislative, për të diskutuar rrugët për rritjen e domethënies praktike të standardeve të të drejtave të njeriut në jetën e përditshme të qytetarit shqiptar. Gjatë vizitave të tij në Shkodër, Elbasan e Vlorë, Komisioneri u takua me autoritete vendimmarrëse të pushtetit lokal dhe përfaqësues të grupeve minoritare, si dhe vizitoi drejtoritë e policisë, vendet e paraburgimit, qendrat e strehimit të viktimave të trafikimit, spitalet psiqiatrike, si dhe një jetimore. “Akuzat e shpeshta në lidhje me brutalitetin e ushtruar nga policia dhe mbipopullimi i qelive të paraburgimit errësojnë zhvillimet përmirësuese të kohëve të fundit dhe duhen trajtuar me efektivitet”, vuri në dukje Komisioneri Hammarberg, duke shtuar se autoritetet politike relevante në nivelin më të lartë duhet të japin një mesazh të qartë ndëshkimi në lidhje me këto fenomene. Duke denoncuar të metat e konstatuara në sektorin e paraburgimit, Komisioneri bëri thirrje për futjen e mënyrave alternative të ndëshkimit përveç atij me burgim, si dhe të shërbimeve efikase të lirimit me kusht; e për më tepër, ngritjen e një sistemi drejtësie të veçantë e të specializuar për minorenët.
“Mbajtja e minorenëve të moshës 14-vjeçare në të njejtin vend me të burgosurit në moshë madhore është jo vetëm çnjerëzore, por edhe e kundër-efektshme”, theksoi Komisioneri. “Këta të rinj mund të jenë lehtësisht të influencueshëm nga kriminelët e burgosur bashkë me ta, e kjo gjë veçse nxit pikërisht atë çka ne po përpiqemi të luftojmë”, përfundoi ai.
Gjithashtu, duhen bërë më shumë përpjekje për integrimin me efektivitet të popullsisë rome në shoqëri dhe në jetën politike. Sigurimi i mbështetjes dhe shërbimeve për romët është përgjegjësi , në radhë të parë, e Qeverisë, përmes angazhimit edhe të ekspertizës së Organizatave jo-Qeveritare. Duke vënë në dukje rolin e rëndësishëm që luan media në një shoqëri demokratike, Komisioneri nënvizoi tendencën e përgjithshme në Europë për heqjen totale të sanksioneve penale në lidhje me shpifjen në media.
“Klima e vazhdueshme e informalitetit dhe korrupsionit – qoftë ky një perceptim apo realitet – kërcënon të minojë të gjithë sistemin e drejtësisë”, përfundoi Komisioneri.
Raporti i Komisionerit do të bëjë vlerësime për fusha prioritare, si shteti ligjor, kushtet në burgje e trajtimi i të burgosurve, mos-diskriminimi, të drejtat e fëmijëve, lufta kundër trafikimit të qenieve njerëzore dhe gjendja në sektorin e medias, si dhe do të bëjë rekomandime praktike.

Harper: Shqipëria,e para në listën e zgjerimit të NATO

2007-11-03T21:35:00.000Z

Kryeministri kanadez, Stephen Harper, tha dje gjatë një takimi me kryeministrin Sali Berisha, se Shqipëria është vendi i parë në listë për t'u anëtarësuar në NATO. "Kryeministri Harper, pasi falënderoi dhe vlerësoi lart kontributin e Shqipërisë në NATO, dhe veçanërisht në Afganistan, nënvizoi se Kanadaja mbështet zgjerimin e NATO-s dhe se Shqipëria është në krye të listës së vendeve që kërkojnë të anëtarësohen", thuhet në njoftimin për shtyp të Këshillit të Ministrave. Kryeministri kanadez vlerësoi programin e qeverisë shqiptare dhe arritjet e saj në luftën kundër korrupsionit dhe krimit të organizuar, politikën fiskale, reformat e ndërmarra, etj. Më tej, ai u shpreh se qeverisja Berisha është një qeverisje shumë e mirë konservatore. Nga ana e tij kryeministri Berisha i bëri një paraqitje të plotë të punës së qeverisë, duke theksuar nevojën e rritjes së bashkëpunimit ekonomik dhe të investimeve midis Kanadasë dhe Shqipërisë. Më tej, kryeministri u shpreh, se Shqipëria do të ishte e gatshme për një marrëveshje tregtare me Kanadanë në mënyrë që të nxiten më tej marrëdhëniet ekonomike midis dy vendeve, si dhe investimet kanadeze në Shqipëri. Kryeministri Berisha e informoi z. Harper për interesin e kompanive kanadeze për të investuar në Shqipëri, si dhe për përpjekjet e qeverisë për të krijuar një klimë sa më të favorshme për investimet e huaja", thuhet më tej në njoftim. Kryeministri zhvilloi një takim edhe me presidentin e EDC-së (Agjencia për Zhvillimin e eksporteve) ku inkurajoi investitorët kanadezë për të investuar në Shqipëri. Siegel tha, se ai ishte në dijeni të progresit të reformave dhe ekonomisë shqiptare në këto 2 vite, veçanërisht në luftën kundër krimit të organizuar dhe korrupsionit, luftën ndaj konfliktit të interesit dhe evazionit fiskal. Mesditën e djeshme kryeministri zhvilloi një takim edhe me kryetarin e Parlamentit, Peter Milliken. Kreu i Parlamentit kanadez u shpreh në këtë takim, se "Ne jemi në Afganistan dhe çmojmë shumë edhe angazhimin serioz të Shqipërisë atje. Unë shpresoj që të vazhdoni në këtë rrugë me reformat dhe për këtë do të keni tërë mbështetjen tonë". Në fjalën e tij në Asamblenë e Përgjithshme të Këshillit të Traktatit të Atlantikut, kryeministri Berisha u ndal edhe në çështjen e Kosovës. Berisha theksoi, se "Shqipëria u bën thirrje autoriteteve të Kosovës të mos marrin veprime të njëanshme në shpalljen e pavarësisë, por qëndrimet e tyre t'i bashkërendojnë me qëndrimet e Shtetet e Bashkuara të Amerikës dhe vendeve të tjera mike, që kanë mbështetur planin e Ahtisarit. Ne gjithashtu përshëndesim traktatin për bashkëpunim dhe pajtim me Serbinë, që udhëheqja politike e Kosovës ka paraqitur gjate bisedimeve të fundit, si një kontribut për paqen, qëndrueshmërinë dhe për të ardhmen e Ballkanit".
Marrë nga gazeta “Panorama”

De Hoop Shefer: "Nuk ka garanci" që NATO do të ftojë anëtarë të rinj t'i bashkohen

2007-10-31T22:05:00.000Z

30/10/2007 Vendet kandidate duhet të përmbushin të gjitha kushtet në qoftë se shpresojnë të marrin një ftesë në samitin e NATO-s në prill 2008, tha sekretari i përgjithshëm Jaap de Hoop Shefer gjatë një vizite në Bukuresht. Zgjerimi, zhvillimet në Ballkanin Perëndimor dhe mbrojtja ndaj raketave do të jenë midis çështjeve në axhendën e samitit të prillit 2008 të NATO-s në Bukuresht, tha të hënën (29 tetor) sekretari i përgjithshëm i NATO-s Jaap de Hoop Shefer në kryeqytetin rumun.Shqipëria, Kroacia dhe Maqedonia kanë nënshkruar secila Planin e Veprimit të Anëtarësimit me Aleancën dhe shpresojnë të ftohen për t'u bashkuar me paktin 26-vendesh në pranverë. De Hooop Shefer e bëri të qartë të hënën se nuk ishte marrë ende ndonjë vendim. "Në këtë çast nuk ka garanci që NATO do të ftojë shtete të reja por padyshim takimi do të jetë i suksesshëm pasi do të ketë shumë çështje të rëndësishme në axhendën e vet," tha ai në një konferencë shtypi në Bukuresht pas bisedimeve me presidentin rumun Traian Bashesku. Vendet që kërkojnë të bashkohen me NATO duhet të tregojnë arritje të mira, theksoi de Hoop Shefer duke u kërkuar kandidatëve të punonin për të zbatuar reformat në ushtri dhe fushat jo-ushtarake në mënyrë që të përmbushin kriteret strikte të Aleancës. Biletat e ftesave nuk janë "gati" ende, tha ai. Lidhur me mundësinë e Ukrainës për t'u ftuar në NATO, de Hoop Shefer vuri në dukje se dialogu me vendin qe intensifikuar në muajt e fundit por se do të varej nga ukrainasit të vendosnin në qoftë se do të donin të ndërtonin lidhje më të ngushta me Aleancën. "Populli ukrainas do të vendosë se çfar kursi do të ndjekë Ukraina përballë NATO dhe përballë BE," tha shefi i NATO-s. Sa për Gjeorgjinë, raportet të hënën cituan diplomatë të paemër të sugjeronin se duhej të zgjidhej së pari "konflikti i saj i ngecur" me Rusinë lidhur me Osetinë e Jugut dhe Abkhazinë. Qëllimi i vizitës një-ditore të de Hoop Shefer në Bukuresht ishte të diskutonte përgatitjet për samitin e prillit me Basheskun dhe zyrtarë të tjerë, duke përfshirë kryeministrin Kalin Popesku Tarikeanu dhe ministrin e jashtëm Adrian Kioroianu. Mbrojtja nga raketat është një tjetër çështje e madhe ku krerët e shteteve dhe të qeverive do të përqendrohen gjatë samitit. Duke ju drejtuar shqetësimeve të Rumanisë se ajo do të lihej e pambuluar nga sistemi mbrojtës i raketave që Shtetet e Bashkuara ka në plan të ndërtojë në Evropën Lindore, shefi i NATO-s tha se pandarshmëria e sigurisë së anëtarëve të NATO-s është parimi bazë që duhet të qeverisë bisedimet në Bukuresht. "Rumania është një anëtar i NATO-s. Në NATO ne nuk kemi anëtarë të klasës A dhe të klasës B. Të gjithë anëtarët e NATO-s, të gjithë aleatët janë të barabartë," u tha ai gazetarëve në një konferencë shtypi me Basheskun. Ai tha se mburoja e mbrojtjes raketore të SHBA ka qenë subjekt i takimeve të shumta brenda Aleancës.Projekti parashikon vendosjen e dhjetë interceptorëve tokësorë në Poloni dhe të një sistemi të sofistikuar radari në Republikën Çeke. Përveç Rumanisë, anëtarët e NATO-s, Bullgaria, Greqia e Turqia do të mbeten jashtë gamës së mbrojtjes të mburojës së SHBA. Megjithatë, tha de Hoop Shefer, sistemi i ri mbrojtës i NATO-s duhet t'i bashkëngjitet mburojës së planifikuar të SHBA. "Të gjitha vendet e NATO-s ...gëzojnë të njëjtën shkallë mbrojtjeje,' tha ai. "Po qe se diskutojmë mbrojtjen nga raketat, kjo do të thotë se çdo aleat i vetëm i NATO-s do të ketë të njëjtën mbrojtje si çdo aleat tjetër." Situata në Afganistan dhe kërcënimet e sfidat e reja, duke përfshirë sigurinë e energjisë, do të diskutohen gjithashtu në samitin e Bukureshtit.
Kjo përmbajtje është autorizuar nga SETimes.com
(marrë nga www.balkantimes.com)

Presidenti i Shqipërisë: Integrimi i vendit në NATO dhe BE, përparësi kombëtare

2007-10-31T21:54:00.000Z

Pallati i Brigadave, 31 tetor, 2007

Të nderuar anëtarë të Qeverisë, Të nderuar ambasadorë, Zonja dhe zotërinj, Politika e jashtme e Shqipërisë, veprimtaria, vizioni dhe strategjia e saj për të përballuar me sukses partneritetin dypalësh dhe shumëpalësh, për të pasur një zë të nderuar në debatin e vështirë të politikës ndërkombëtare, për të ofruar një kosto sa më të vogël në konkurrencën e vështirë të procesit të globalizimit politiko-ekonomik në shërbim të interesave afatgjatë kombëtarë mbetet, jo vetëm në vëmendje dhe në ndjekje të afërt, por përbën edhe një nga përparësitë e Presidentit të Republikës. Unë mendoj se rezultatet e politikës së jashtme janë të lidhura ngushtë me zhvillimin politiko-ekonomik të një vendi dhe me mirëqenien e shtetasve të tij. Vetëm në këtë mënyrë përfaqësuesit tanë diplomatikë, kudo ku ata janë, të të gjitha niveleve, duhet të ndiejnë përgjegjësitë e përfaqësimit dhe të përllogarisin vlerat e tyre në shoqërinë shqiptare, pjesë e së cilës ata janë dhe së cilës duhet t’i shërbejnë me devotshmëri.
Viti që kaloi dhe viti që jemi na japin një bilanc ngjarjesh politike në planin e brendshëm dhe të jashtëm, të cilat kanë nevojë për një analizë të hollësishme.
Shqipëria sot, megjithëse është duke përballuar pasojat e një krize të rëndë energjetike, karakterizohet nga një situatë e qëndrueshme makroekonomike dhe nga një ecuri e domosdoshme reformash. Investitorë të huaj, duke marrë pjesë në projekte të rëndësishme të ekonomisë shqiptare, si ato të energjisë, minierave, bankave tregtare, turizmit dhe infrastruktures provojnë se ky vend ka një të ardhme më të mirë. Kjo klimë e përgjithshme pozitive rriti ndjeshëm numrin e turistëve, në krahasim me vitin e kaluar.
Debati politik në Shqipëri po provon dukshëm se ky vend është, në mënyrë të pakthyeshme, i vendosur të ndërtojë demokracinë pluraliste, jo vetëm në Kuvendin e Shqipërisë, por edhe në media dhe në publik. Unë do të vazhdoj të nxis debatin dhe shprehjen e ideve alternativave mbi çështje dhe probleme, të brendshme apo të jashtme, të cilat shqetësojnë shoqërinë shqiptare siç janë reforma në drejtësi apo ajo zgjedhore, raportet midis pushtetit qendror e vendor, integrimi i vendit në NATO dhe Bashkimin Evropian, çështja e Kosovës, gjithnjë në funksion të interesave kombëtarë të vendit.
Bota dhe zhvillimi njerëzor, në fillimet e këtij mijëvjeçari të tretë, së bashku me zhvillimin dhe shpresën për të jetuar në një shoqëri të hapur, në paqe dhe begati, po përjeton edhe pasigurinë për të ardhmen.
Terrorizmi global, varfëria, prapambetja e uria, krizat rajonale politike apo ekonomike, dhunimi i të drejtave të njeriut nga regjime diktatoriale, të cilat kërcënojnë miliona njerëz, janë përballja me sfida të mëdha, me sfida që kërkojnë përgjigje të ngutshme, përgjigje që duhet të artikulohen jo mbi baza të interesave të ngushtë kombëtarë apo rajonalë, por më tepër mbi bazat e interesave të mirëfilltë të komunitetit botëror dhe të racës njerëzore.
Zonja dhe zotërinj,
Dëshiroj të konfirmoj edhe një herë se dy përparësitë kombëtare të shtetit shqiptar mbeten integrimi i Shqipërisë në NATO dhe Bashkimin Evropian. Vizitat e mia të para në Bruksel më përforcuan bindjen se Shqipëria ka miq shumë të mirë, të cilët janë të gatshëm të na japin një partneritet të ndershëm, afatgjatë dhe të qëndrueshëm.
Unë besoj se ne jemi të përgatitur t’i përgjigjemi me të njëjtën ndershmëri e përgjegjshmëri miqve tanë në Bruksel.
NATO-ja po jeton sot periudhën më impenjative që prej kohës së krijimit të saj. Shndërrimi i saj, nga një qasje gjeografike në një qasje funksionale të sigurisë, përbën logjikën e partneritetit global dhe sigurisë globale, në përballje me “pasigurinë e globalizuar”.
Përtej bilancit të reformave të brendshme dhe të angazhimeve në partneritete ushtarake jashtë vendit, të detyrueshme për standartet e Aleancës, të cilat tanimë njihen nga të gjithë, argumentet e kontributit të Shqipërisë brenda saj, mund të renditen në vendosmërinë e vendit tonë për përballimin dhe ndarjen e rreziqeve dhe barrës së kërcënimeve ndaj pasigurive rajonale apo globale, ndaj terrorizmit ndërkombëtar dhe organizatave të tyre. Ne mund të kontribuojmë në ndërtimin e kapaciteteve individuale të përshtatshme të sigurisë, në koordinimin sa më të mirë me të gjithë aleatët për siguri dhe zhvillim, si dhe në përsosjen e vlerave strategjike të partneritetit ose të rrjeteve të tjera të tij. Ne e shikojmë NATO-n, si një tribunë të debatit politik në zgjidhjen e natyrës së ndërlikuar të mjedisit tonë të sigurisë, si një forum që gjeneron forcë dhe ofron mundësi sigurie, zhvillim rajonal dhe global, të qëndrueshëm dhe afatgjatë.
Nuk mund të ketë zhvillim pa siguri.
Shqipëria në NATO do të ndihmojë zvogëlimin e perimetrit të pasigurisë brenda kontinentit evropian, do të japë modelin e suksesit më të rëndësishëm të arritur në një vend ish-komunist dhe në një rajon nga ku kanë filluar konflikte rajonale dhe botërore dhe, së fundi, do të japë provën se, demokratizimi i shoqërive diktatoriale, janë e vetmja rrugë e drejtë, për t’u shkëputur nga e kaluara e tyre. NATO-ja, me Shqipërinë, do të siguronte shtrirjen e saj Adriatiko-Joniane dhe lidhjen me partneritetet e rëndësishme si Dialogu Mesdhetar dhe Nisma Bashkëpunuese e Stambollit.
Shqipëria është gati për këto sfida partneriteti. Samiti i ardhshëm i Bukureshtit duhet të marrë në konsideratë këto garanci.
Nënshkrimi vitin e kaluar i Marrëveshjes së Stabilizim-Asociimit me Bashkimin Evropian shënon arritjen më të madhe të Shqipërisë në historinë e raporteve të saj me Evropën dhe botën e qytetëruar. Asnjëherë Shqipëria nuk ka qenë më afër asaj, së cilës ajo i përket që në lashtësi; asnjëherë shqiptarët nuk kanë qenë më afër rikthimit në etnogjenezën e tyre. Ky nënshkrim përmbylli një kapitull të gjatë dhe shumë të vështirë transformimesh të domosdoshme dhe të rëndësishme demokratike, politike, ekonomike, sociale e institucionale. Vlerësimi i përparimit në raportet me Bashkimin Evropian i hapën rrugën nënshkrimit sivjet të Marrëveshjes për Lehtësimin e Vizave me BE-në.
Tashmë, përballë nesh, sfida është më e madhe, më e vështirë, më përgjegjëse, por më konkrete. Brukseli nuk është Santa Klausi. Ai është kryeqyteti administrativ dhe politik i Evropës, ai është e vetmja mbërritje pas një rruge të gjatë, por të vendosur drejt demokracisë. Ai është mishërimi i idesë dhe përpjekjeve të mendimtarëve dhe burrave të mëdhenj si: Monnet, Schuman, Adenauer, De Gasperi.
Sivjet, në 50-vjetorin e “Traktatit të Romës“, Evropa miraton “Traktatin e ri të Lisbonës”, duke e cilësuar këtë si një fitore evropiane, e cila mund të shohë përpara drejt së ardhmes me më shumë besim, duke i dhënë fund pasigurisë së saj institucionale të dy viteve të fundit.
Bisedimet për anëtarësim zhvillohen në Bruksel, por reformat duhet të zbatohen në Shqipëri. Procesi i bisedimeve me institucionet evropiane është vetëm një pjesë e vogël dhe e dukshme e punës, në krahasim me vështirësitë e zbatimit në mjedisin shqiptar.
Për këtë arsye, çdo çështje apo kapitull bisedimesh duhet mirëfilli të përkthehet në veprime konkrete dhe jo të politizohet me ekzaltime nga një anë dhe kritika nga ana tjetër. Suksesi i këtij zbatimi nuk duhet të varet kurrë më nga rezultatet elektorale dhe nga zyrtarët e zgjedhur. Këto dhe sisteme të tjera kombëtare duhet të fillojnë të funksionojnë, pavarësisht nga zyrtarët e emëruar.
Nga ana tjetër, çdo fshehje e problemeve tona apo fajësimi i të tjerëve, do të vonojë dhe do të ngadalësojë procesin e bisedimeve. Ne jemi duke kaluar një periudhë nën një vëzhgim të detajuar dhe diagnostikues në të gjitha fushat nga partnerët tanë në Bashkimin Evropian, të cilët na kanë ofruar kapacitetet thithëse të tyre në shkëmbim të standardeve demokratike .
Unë besoj në marrëveshjen rreth interesave madhorë kombëtarë dhe të zhvillimit; unë jam i gëzuar që ato deklarohen publikisht dhe në mënyrë të qartë, duke mos qenë subjekt i asnjë kundërshtie nga krahët e ndryshëm politikë në Shqipëri.
Shtetet dhe institucionet evropiane dhe euroatlantike janë partnerët tanë në bisedime dhe reforma. Por ka edhe një partner tjetër ekstremisht të rëndësishëm: shoqëria dhe publiku ynë, i cili duhet të përfshihet, duhet të informohet dhe duhet të motivohet duke u bërë pjesë. Publiku duhet të informohet jo vetëm në fund të bisedimeve, jo vetëm në gjysmën e dytë të tyre, jo vetëm thjesht me gjysmë të vërteta, por me fakte dhe argumente që prej minutës së parë të procesit.
Mendoj se kjo është mënyra më e mirë për të realizuar zbatimin e suksesshëm dhe të shpejtë të reformave që na shkurtojnë kohën e mbërritjes në NATO dhe në Bashkimin Evropian; kjo besoj, është e vetmja provë e seriozitetit dhe e përgjegjësisë sonë përballë partnerëve tanë dhe popullit shqiptar.
Zonja dhe zotërinj,
Vendet e Evropës Juglindore po përjetojnë sot zhvillimet më dinamike të historisë së tyre. Udhëheqësit politikë dhe qeveritë e tyre ofrojnë modelet specifike të zhvillimeve demokratike, por brenda një orientimi: integrimit euro-atlantik të vendeve të tyre. Diplomacia rajonale e Shqipërisë, megjithë qëndrimet e qarta dhe maturinë e saj për të cilat është vlerësuar nga partnerët ndërkombëtarë, duhet të ndërtojë programe dhe strategji të drejtpërdrejta rezultative për Shqipërinë në planin dypalësh me të gjitha vendet e rajonit, shumë të afërta dhe të afërta gjeografikisht. Ajo duhet të vihet në ndjekje të përvojës pozitive të tyre për të krijuar jo vetëm bashkëpunim politik, por edhe ndërvarje dhe liri tregjesh e kapitalesh, shkëmbime energjish dhe burimesh njerëzore.
Shqipëria mbetet një portë strategjike hyrje në tregun ballkanik.Vendodhja gjeografike e saj krijon një akses shumë të mirë në tregjet falë edhe nënshkrimit të Marrëveshjeve të Tregtisë së Lirë dhe më vonë CEFTA-n me vendet e rajonit përbëhet nga 25 milionë konsumatorë, të cilët nxiten drejt tregtisë së lirë të produkteve industriale, bujqësore dhe shërbimeve në një zonë ekonomike sipas normave evropiane.
Integrimi i suksesshëm i Shqipërisë në strukturat euroatlantike mund të përmbushet vetëm duke zhvilluar një partneritet dypalësh me vendet anëtare të këtyre strukturave dhe me të gjitha vendet e tjera. Intensifikimi i marrëdhënieve të bashkëpunimit me këto vende duhet të jetë përparësi e diplomacisë dypalëshe të Republikës së Shqipërisë dhe të konsiderohet si çelësi i suksesit të integrimit të vendit. Nëpërmjet thellimit të marrëdhënieve dypalëshe me Italinë, Greqinë e Turqinë, si vende fqinje dhe Gjermaninë, Britaninë e Madhe, Francën apo vendet e vjetra dhe të reja, anëtare të BE-së dhe NATO-s, ne duhet të përpiqemi të sjellim në ekonominë shqiptare teknologjitë e reja evropiane të zhvillimit dhe të sigurisë.
Politika e jashtme e Shqipërisë duhet të vlerësojë seriozisht në planin dypalësh marrëdhëniet me vendet anëtare të Këshillit të Sigurimit të OKB-së si dhe me të gjitha vendet e tjera, pavarësisht sa larg apo afër Shqipërisë ndodhen ato.
Vizita e Presidentit të SHBA-së George W. Bush në Shqipëri është ngjarja më kulmore në ecurinë e marrëdhënieve midis Shqipërisë dhe Shteteve të Bashkuara të Amerikës, është suksesi më i madh në historinë e politikës së jashtme të Shqipërisë. Mesazhet e saj shumëdimensionale vlerësuan arritjet demokratike në Shqipëri, inkurajuan politikën rajonale të saj, mbështetën procesin e integrimit të Shqipërisë në familjen euroatlantike, dëshmuan për një klimë sigurie në ekonominë shqiptare, krijuan një pasaportë të re për imazhin e saj në botë dhe vërtetuan qëndrimin e SHBA-së se ka ardhur koha që Kosova të jetë e pavarur.
Të nderuar zonja dhe zotërinj,
Zotërinj ambasadorë,
Kosova është dhe duhet të jetë e pavarur.
Kosova është e pavarur, sepse ajo nuk mund të kthehet më në situatën e para vitit 1999; ajo nuk mund të bashkohet me asnjë vend tjetër dhe as nuk mund të ketë më në territorin e saj rikthim të forcave ushtarake serbe. Këto parime të pranuara nga të gjithë u bënë bazë e pandryshuar e procesit të bisedimeve Ahtisaari dhe të Planit të tij.
Kosova është e pavarur, sepse ajo ka institucionet e saj të zgjedhura në mënyrë demokratike, ka Presidentin e saj, Kuvendin dhe Kryeministrin me një qeveri të përgjegjshme.
Kosova është e pavarur, sepse ka buxhetin e saj të pavarur, ka programet e saj të zhvillimit, ka ushtrinë e saj dhe forcat e saj policore dhe doganore.
Ajo është e pavarur, sepse në të gjitha raportet e saj me partnerët ndërkombëtarë, me NATO-n, Bashkimin Evropian, me OKB-në po sillet me një pjekuri të pashembullt, me një përgjegjshmëri evropiane, e denjë për të qenë subjekt ndërkombëtar.
Përse ajo duhet të jetë e pavarur?
Sepse Kosova, si procesi i pakthyeshëm, nuk mund të mbetet peng i një statusi të papërcaktuar, as i status quosë së përjetshme dhe as pjesë e papërfunduar e një procesi demokratik të domosdoshëm, të nisur nga NATO dhe BE në vitin 1999;
Kosova nuk mund të bëhet shembulli evropian i dështimit të proceseve të zbatimit dhe shtrirjes së sigurisë, as edhe precedenti i mungesës së një qëndrimi të unifikuar të politikës së jashtme të BE-së;
Ajo mund të ndihmojë, në të kundërtën, në përmirësimin e marrëdhënieve NATO-BE dhe, duke patur parasysh përmasat e sfidave të sotme të sigurisë, do t’i sjellë më afër këto dy struktura në një dialog të qëndrueshëm dhe në një harmonizim të patrazuar për të ardhmen. Kjo marrëdhënie mund të shërbejë si çelës për zhvillimin e një qasjeje vërtet tërësore për sigurinë ndërkombëtare;
Ndaj shqetësimin se ndërlikimet e mëtejshme, të padëshirueshme dhe të pajustifikueshme në procesin e përcaktimit të statusit do të kishin një ndikim negativ me kosto të lartë politike dhe ekonomike për Kosovën, Ballkanin e me gjerë, si dhe do të minonin të gjitha përparimet e arritura nga Kombet e Bashkuara dhe institucionet vetëqeverisëse të përkohshme në Kosovë.
Shqipëria ndjek me shumë vëmendje procesin e tanishëm të Trojkës, por në pikëpamjen tonë, dhe të një shumice në rritje të vendeve anëtare të OKB-së, fundi i 120-ditëshit është edhe fundi i proceseve të angazhimit të palëve për gjetjen e një zgjidhjeje, dhe, pas kësaj, duhet të kalohet në veprime. Në tryezë kemi një produkt të balancuar, të drejtë, të qëndrueshëm të OKB-së, që është Plani Ahtisaari;
Kosova është një çështje evropiane; Ne gjykojmë se integrimi i Serbisë në BE e NATO mund të merret në konsideratë edhe në varësi të qëndrimit konstruktiv ose jo, të Beogradit në procesin mjaft të rëndësishëm rajonal, evropian e më gjerë, për percaktimin e statusit përfundimtar të Kosovës;
Shpallja e njëanshme e pavarësisë nuk është skenari i preferuar për Shqipërinë, por nëse kjo është e vetmja alternativë që i lihet Kosovës, rajonit e vendeve që kanë investuar kaq shumë në stabilitetin e tij, atëherë është në përgjegjësi dhe detyrim moral të hidhet hapi tjetër. Ne do të qëndrojmë afër Kosovës në përcaktimin e të ardhmes së saj jo vetëm si një detyrim kombëtar, por si të vetmin qëndrim që ndihmon Kosovën, Serbinë dhe gjithë rajonin që, të ardhmen e brezave që do të vijnë, ta ndërtojnë larg luftrave të dhunshme etnike, nacionaliste dhe fetare, ta ndërtojnë në Evropën e lirë dhe të civilizuar.
Zotërinj ambasadorë,
Dëshiroj së fundi të ndalem në një çështje shumë të rëndësishme.
Për Shqipërinë, emigrimi mbetet ende një problem tejet i madh. Me mbi 20 për qind të popullsisë totale ose me më shumë se 30 për qind të popullsisë aktive, të larguar nga vendi në këto 17 vitet e fundit, Shqipëria përbën një rast unikal, duke u klasifikuar në grupin e vendeve me rrjedhjen më të lartë emigruese në botë. Përmasa të tilla të fluksit migrator e bëjnë, maksimalisht të domosdoshme nevojën që të gjitha institucionet shtetërore pa përjashtim, në mënyrë të veçantë Ministria e Punëve të Jashtme, Trupi ynë Diplomatik, të vihen si duhet në rolin e bashkëbiseduesit kryesor sensibilizues për institucionalizimin e mirëkuptimit dhe bashkërendimit të punëve midis komuniteteve shqiptare kudo në botë dhe shtetit të tyre. Këtë detyrë kushtetuese e përforcon dhe e bën edhe më të ngutshme Marrëveshja e Stabilizim-Asociimit, që nënshkruam me Bashkimin Evropian.
Gjykoj që menaxhimi i fenomenit të migrimit, si një çështje madhore me rëndësi parësore edhe për diplomacinë tonë, mund e duhet të përmirësohet më tej në të ardhmen.
Nga ky këndvështrim, kërkohet një vizion më i qartë e bashkëkohor për lidhjen e ngushtë që ekziston midis procesit integrues në BE dhe emigracionit shqiptar. Ky vizion do të mënjanonte çdo lloj defekti të konstatuar deri tani në procesin e hartimit të politikave dhe përparësive në fushën e emigracionit, nëpërmjet një programi realist e të detajuar të diplomacisë sonë për përmirësimin e imazhit për Shqipërinë dhe për emigrantët shqiptarë. Përfaqësitë tona diplomatike e konsullore duhet të përballojnë më me përgjegjesi sfidën për mbrojtjen e lirive dhe të drejtave demokratike të emigrantëve tanë, të shtetasve tanë, në vendet pritëse, në përputhje me detyrimet që burojnë nga ligji themelor, Kushtetuta e Republikës së Shqipërisë.
Diplomacia jonë, duhet të vlerësojë gjithnjë e më objektivisht ankesat e emigrantëve tanë për vonesat e papërligjura në procesin e legalizimit të tyre, për shfaqje të një klime jofavorizuese, madje deri diskriminimi e ksenofobie, që manifestohen jo rrallë ndaj tyre në disa nga vendet pritëse; po kështu kërkohet një angazhim më i madh për t’i lehtësuar ata në procesin e globalizimit dhe për t’u integruar sa më mirë e denjësisht në tregun ndërkombëtar të punës.
Këto procese integruese, të realizuara sipas standardeve më të përparuara të BE-së, nënkuptojnë edhe një punë tuajën më aktive për integrimin social, ekonomik e kulturor të emigrantëve tanë, duke e gërshetuar këtë me ruajtjen dhe zhvillimin e trashëgimisë kulturore shqiptare. Sigurisht, këtu nuk e kam fjalën për romantizmin e folklorizmin e dikurshëm, por që t’i kushtohet kujdesi i duhur problemeve të tilla: fëmijëve shqiptarë të mos u nxirren pengesa për mësimin plotësues në gjuhën amtare dhe të mos u mungojnë librat; të ngrihen realisht Qendrat e Kulturës Shqiptare e të mos vazhdohet me premtime boshe, siç ka ndodhur për vite me radhë; të bashkëpunohet më ngushtë me shoqatat dhe drejtuesit e tyre; të promovohen rregullisht emigrantët e sukseshëm; të gjejë zgjidhjen më të mirë të mundshme e transparente problemi i dërgesave në para nga emigrantët, nëpërmjet bashkëpunimit të gjitha institucioneve e faktorëve që lidhen me të, për të rritur ndikimin e këtyre dërgesave në zhvillimin e vendit etj. Sa më mirë të punohet për sa më sipër, aq më normalisht do të ecet edhe për kurorëzimin me sukses të Kongresit të Diasporës, që është planifikuar të zhvillohet në Tiranë, në vitin 2009, për të cilin Instituti Kombëtar i Diasporës dhe gjithë Trupi ynë Diplomatik kanë detyra dhe përgjegjësi esenciale.
Zonja dhe zotërinj ambasadorë,
Dëshiroja të ndaja me ju, në këtë takim të parë, këto mendime, mbi sfidat e vështira që politika e jashtme e Shqipërisë e ka për mision të përballë me sukses në të ardhmen e saj, një të ardhme ambicioze dhe të denjë. Unë besoj se i gjithë Trupi Diplomatik i Shqipërisë e ka tashmë të qartë se vendi ynë i vogël nuk ka kohë të humbë në shpejtësinë e tij integruese. I gjithë trupi ynë diplomatik duhet të jetë sinonim i përgjegjësive, mishërim i interesave kombëtare, njohës shumë i thellë i historisë sonë dhe asaj botërore, vlerësues i vëmendshëm i tendencave ekonomike, i aftë të fitojë, jo vetëm garën informuese me sistemin mediatik, por dhe miqësinë e tij në ndjekjen e zhvillimeve të ditës, krijues në koncepte dhe strategji, i vendosur e i guximshëm për zgjidhje të vështira, parashikues dhe së fundi, vetëm profesionist e aspak partiak.
Jam i prirur të besoj se vetëm këto kritere i japin diplomacisë sonë një fytyrë të re për ta kthyer atë nga një nocion teoriko-mistik, në një shkencë bashkëkohore në shërbim të interesave të shtetasve shqiptarë.
Me këtë rast, ju uroj suksese në përmbushjen e misionit tuaj!
Fjala e Presidentit në konferencën me Ambasadorët e Republikës së Shqipërisë

Gjenerali amerikan: Trupat ushtarake shqiptare kanë arritur nivelin e NATO-s

2007-10-29T21:23:00.000Z

TIRANE - 29 tetor 2007
Në mjediset e Brigadës së Reagimit të Shpejtë në Zall-Herr u zhvillua Dita e Vizitorëve të Shquar në Stërvitjen “Cooperative Lancer/Longbow 2007”. Në këtë veprimtari ishte i pranishëm zv.ministri i Mbrojtjes Petrit Karabina, shefi i Shtabit të Përgjithshëm i FA-së, gjeneral lejtnant Luan Hoxha, zv.komandanti i Komponentit Tokësor i NATO-s në Heidelberg në Gjermani, gjeneral lejtnant John D. Gardner, komandanti i Forcës së Bashkuar, njëkohësisht dhe bashkëdrejtues i kësaj stërvitje gjeneral major Shpëtim Spahiu, bashkëdrejtuesi tjetër i Stërvitjes gjeneral brigade Claudio Vercelloti, gjeneralë dhe ushtarakë të tjerë të lartë të NATO-s dhe të Forcave tona të Armatosura, atashe ushtarakë të akredituar në vendin tonë etj. Kjo stërvitje ka filluar që me datë 9 tetor 2007 dhe është më e madhja që zhvillohet në vendin tonë në bashkëpunim me NATO-n. Në të marrin pjesë afërsisht 1100 ushtarakë nga 23 vende të NATO-s, PfP-së dhe të Dialogut të Mesdheut. Stërvitja u zhvillua në dy faza. Faza e parë ishte stërvitje e shtabit të një Brigade Shumëkombëshe dhe u zhvillua në mjediset e Komandës së Doktrinës dhe Stërvitjes, ndërsa faza e dytë ishte stërvitje fushore e një batalioni shumëkombësh për përfshirje në operacione paqeruajtëse, e cila për disa ditë rresht u zhvillua në rajonin e Zall-Herrit. Gjatë kësaj faze është realizuar një program që ka pasur si qëllim trajnimin, stërvitjen dhe nxitjen e ndërveprimit të forcave të PfP, NATO-s dhe vendeve të Dialogut të Mesdheut, duke përdorur standarde të NATO-s në skenarin e një operacioni reagimi në rast krizash. Disa prej detyrave themelore të kësaj stërvitjeje kishin të bënin me sigurimin e pikave kyçe, si dhe ruajtjen e një mjedisi të sigurtë, duke u përqendruar në operacione kundër terrorizmit që parandalojnë destabilizimin e një rajoni. Pas një brifingu që u mbajt për qëllimin, forcat pjesëmarrëse, detyrat, angazhimin dhe arritjet e shënuara përgjatë këtyre 20 ditëve në këtë stërvitje, Dita e Vizitorëve të Shquar ka vijuar me zhvillimin e një varg demonstrimesh, nëpërmjet të cilave u kombinuan aftësitë dhe përvoja e fituar nga forcat pjesëmarrëse gjatë stërvitjes së tyre. Ndër demonstrimet më kryesore ishin ato të zhvilluara në dislokimin e kompanisë së parë me trupa shqiptare “Zemër luanët” e b.2.k të BrRSH si organizimi i ruajtjes së bazës, veprimet në pikën e kontrollit, menaxhimi i turmës etj. Më tej, kompania multinacionale demonstroi veprime në pikat e kontrollit të lëvizshëm, ndërsa në stacionin e fundit të stërvitjes trupat multinacionale demonstruan veprime luftarake në qendrat e banuara. Vlen të theksohet se, ndonëse në një terren të vështirë dhe në kushte atmosferike të vështira, trupat pjesëmarrëse në të gjithë elementët që demonstruan pasqyruan disiplinë dhe dinamizëm, shpirt sakrifice dhe profesionalizëm në lartësinë e standardeve të NATO-s. Zv.komandanti i Komponentit Tokësor i NATO-s në Heidelberg, gjeneral lejtnant John D. Gardner duke iu përgjigjur interesimit të gazetarëve për rolin dhe profesionalizmin e shfaqur nga ushtarakët shqiptarë në këtë stërvitje, theksoi se gjatë këtyre tre jave trupat pjesëmarrëse kanë punuar shumë, ato janë stërvitur në mënyrë intensive duke përballuar më sukses jo vetëm kërkesat e larta që kishte stërvitja, por edhe vështirësitë e tjera të motit, të terrenit etj. “Ne jemi të impresionuar nga bashkëpunimi që kemi pasur me forcat shqiptare që nga fillimi dhe deri më sot, - tha ndër të tjera gjeneral Gardner, - Ky bashkëpunim ka qenë jo vetëm në planin e planizimit të përbashkët të stërvitjes, por edhe gjatë gjithë zhvillimit të saj”. “Ne jemi të impresionuar, ka vijuar më tej ai, nga shkalla e përgatitjes së oficerëve dhe ushtarëve shqiptarë dhe shpreh konsideratën tim se trupat ushtarake shqiptare janë në nivelin e standardeve të NATO-s. Kjo më bën të pohoj se Shqipëria duhet të jetë krenare për Forcat e saj të Armatosura”. Ndërsa shefi i Shtabit të Përgjithshëm, gjeneral lejtnant Luan Hoxha, pasi vlerësoi rëndësinë dhe arritjet e shënuara në këtë stërvitje, falenderoi Komandën e Komponeneti Tokësor në Heidelberg në Gjermani që zgjodhi Shqipërinë për zhvillimin e stërvitjes. Ai falenderoi gjithashtu të gjithë trupat pjesëmarrëse për disiplinën dhe profesionalizmin e lartë të manifestuar gjatë stërvitjes, për ndërveprimin e shkëlqyer mes tyre dhe përvojën e fituar, e cila do t’i shërbejë akoma më shumë stërvitjeve tona të përbashkëta në kuadër të NATO-s. Stërvitja e përbashkët “Cooperative Longbow/Lancer 2007” përfundon më 30 tetor 2007.

Shqipëria, gati për kontribute shtesë në misionet paqeruajtëse në Afganistan

2007-10-27T18:12:00.000Z

Në datën 24 tetor 2007, Ministri i Mbrojtjes Fatmir Mediu mori pjesë në Takimin e Ministrave të Mbrojtjes të vendeve të NATO-s dhe atyre partnere të cilat marrin pjesë në Misionin ISAF në Afganistan, që u zhvillua në Noordvijk të Holandës. Ministri Mediu njohu të pranishmit me reformat e ndërmarra nga Qeveria Shqiptare në prag të Samitit të NATO-s të pranverës së ardhshme në Bukuresht, ku vendi ynë pritet të marrë ftesën për anëtarësim në Aleancën e Atlantikut të Veriut. “Në Samitin e Rigës, Sekretari i Përgjithshëm i NATO-s kërkoi kontribute shtesë nga vendet pjesëmarrëse në Misionin ISAF në Afganistan. Shqipëria iu përgjigj menjëherë kësaj thirrje, duke dërguar një kompani shtesë nën komandën Italiane në Herat”, - theksoi Ministri Mediu. – “Aktualisht, Shqipëria është e pranishme në Afganistan me tre kontribute të rëndësishme, një togë nën Komandën Turke në Kabul, një kompani në Herat dhe ekipin e përbashkët mjekësor në kuadër të Kartës së Adriatikut, nën komandën Çeke”. Ministri Mediu, konfirmoi gjithashtu gatishmërinë e Shqipërisë për të dërguar specialistë ushtarakë në Afganistan, të cilët do të ndihmojnë në rritjen e profesionalizmit të Ushtrisë dhe Policisë Afgane. Ky është prioriteti aktual i NATO dhe ISAF lidhur me Afganistanin. “Shqipëria do të qëndrojë në Afganistan deri në përfundim të Misionit ISAF. Ky angazhim është serioz dhe i pandryshueshëm, për të ndërtuar një demokraci përmes paqes dhe stabilitetit”, theksoi Ministri Mediu. Gjatë takimit me Komandantin Suprem të Aleancës për Europën, Gjeneral John Craddock, u fol për kontributet paqeruajtëse të Shqipërisë dhe mbi çështjen e Kosovës. Gjenerali Craddock u shpreh që “NATO është e përgatitur të qëndrojë në Kosovë, të ruajë sigurinë e saj dhe të ndihmojë në ndërtimin e institucioneve kosovare të sigurisë”. Ministri Mediu zhvilloi një takim dypalësh edhe me homologun e tij danez Soren Gade. Të dy ministrat shprehën nevojën e shtimit të bashkëpunimit mes Shqipërisë dhe Danimarkës. Ministri danez Gade theksoi se vendi i tij mirëpret anëtarësimin e Shqipërisë në NATO. Gjatë takimit me Ministrin Sllovak të Mbrojtjes Frantisek Kasicky, u rikonfirmua mbështetja e Sllovakisë për zgjerimin e Aleancës me vende të tjera. Të dy ministrat shprehën të njëjtën mendim që çdo vonesë në përcaktimin e statusit final të Kosovës, nuk sjellë asnjë të mirë për rajonin dhe bashkësinë ndërkombëtare.

Presidenti i Shqipërisë merr mbështetje nga BE për thellimin e reformave

2007-10-25T14:49:00.000Z

Presidenti i Komisionit Evropian, Hoze Manuel Barroso, shprehu mbështetjen e tij që Shqipëria të vazhdojë reformat në vend, pas një takimi me kreun e Shtetit Bamir Topi.“Shqipëria ka një perspektivë të qartë dhe ambicioze europiane me qëllimin përfundimtar, anëtarësimin në BE. Rruga e integrimit europian dihet tashmë dhe kërkon, përmbushjen e kushteve për demokracinë, shtetin ligjor, dhe standardet europiane – tha zoti Barroso. Në takim është folur gjithashtu për statusin e Kosovës. Topi ka bërë të ditur qëndrimin e Shqipërisë pro planit Ahtisaari si një mundësi e mirë për të qetësuar situatën në rajon. Ndërsa Presidenti i Komisionit Evropian Barroso ka bërë të ditur se statusi i Kosovës është i një rëndësie të veçantë për Ballkanin. "Ne do të presim raportin nga sekretari i përgjithshëm dhe i inkurajojmë të gjitha palët të negociojë me një shpirt të mirë", tha ai.

Sekretari i Mbrojtjes: SHBA mbështet aspiratat e vendeve të “A3” për në NATO

2007-10-25T14:45:00.001Z

Ministri shqiptar i Mbrojtjes Fatmir Mediu dhe homologët e tij kroat dhe maqedonas patën një takim të veçantë, në formatin US-A3, me Sekretarin e Mbrojtjes të SHBA-së, Robert M. Gates, i cili mori pjesë në punimet e takimit të përvitshëm të SEDM-it, që u zhvillua në Kiev të Ukrainës. Sekretari Amerikan i Mbrojtjes Gates vlerësoi me nota pozitive kontributin e vendeve të A3, duke theksuar se: “Për SHBA ju keni qenë aleatë të mirë”. Sekretari Gates përgëzoi ministrat e Mbrojtjes të Kartës së Adriatikut për progresin e arritur në reformat në fushën e mbrojtjes. “Amerika”, - u shpreh ai, - “vazhdon të jetë mbështetëse e fuqishme e aspiratës suaj për integrim në NATO”. Si shprehje të mbështetjes për vendet e Kartës së Adriatikut, Sekretari Gates pohoi synimin e zhvillimit të një takimi US-A3 në Washington, në janar të vitit 2008. Duke folur në këtë takim të rëndësishëm me Sekretarin Gates, Ministri Mediu bëri një ekspoze të reformave që janë ndërmarrë dhe po intensifikohen për integrimin euroatalantik të vendit tonë, sidomos për progresin e bërë në reformimin e Forcave të Armatosura, përkushtimin tonë për të vazhduar misionin në Irak, përpjekjet për të arritur 8 % të komponentit tokësor të dislokueshëm në dispozicion të NATO-s dhe 40% gati për rotacion etj. Në këtë kontekst, Sekretari Gates u shpreh se do të ishte i kënaqur nëse do të shihte tek aleatët e tjerë të NATO-s gatishmërinë për të kontribuar në Irak dhe Afganistan, siç e sheh tek vendet e Kartës së Adriatikut. Lidhur me çështjen e Kosovës, Sekretari për Mbrojtjen Gates në fjalën që mbajti në takimin e SEDM-it, u shpreh që “po i japim shansin e duhur bisedimeve për konsensus, por më 10 dhjetor NATO, BE dhe gjithë bashkësia ndërkombëtare duhet të jenë të përgatitur për hapin tjetër. Dhe ai do të jetë zbatimi i planit të Ahtisaarit”. Në ditën e dytë të takimit të SEDM-it Ministri Mediu u takua edhe me ministrin e Mbrojtjes të Turqisë Vecdi Gonul, ku u fol për marrëdhëniet dypalëshe midis vendeve tona , anëtarësimin në NATO të Shqipërisë dhe mbështetjen në këtë proces nga Turqia, situatën në Irak si dhe mbi të ardhmen e Kosovës. Gjithashtu Ministri Mediu me datë 22 tetor u takua me Ministrin e Mbrojtjes të Serbisë, Dragan Sutanovac. Ministri Mediu rikonfirmoi mbështetjen e palëkundur të Qeverisë Shqiptare për zbatimin e Planit Ahtisaari mbi të ardhmen e Kosovës së pavarur. Ministri Serb Sutanovac deklaroi se: “Bashkëpunimi me KFOR-in ka qenë shumë i mirë dhe në të ardhmen ne do të vazhdojmë të kemi të njëjtin bashkëpunim të mirë për të ruajtur stabilitetin dhe paqen në Kosovë. Serbia nuk ka asnjë qëllim për të ndërhyrë ushtarakisht në Kosovë”. Gjatë takimit të SEDM-it në Kiev, Ministri Mediu pati një takim edhe me komandantin e Komandës së NATO-s në Napoli , Admiralin Ulrich, me të cilin diskutoi për reformimin e Forcave tona të Armatosura, për pjesëmarrjen e e tyre në operacionet e NATO-s në rajon e më gjerë.

Fillimi i besimit të BE-së ndaj kapaciteteve menaxhuese të Shqipërisë

2007-10-22T17:05:00.000Z

Ani Ruci/ TIRANE
Kohët e fundit BE decentralizoi menaxhimin e mbeshtetjes financiare per vendet kandidate për anëtarësim. 220 milionë eurot e Brukselit për Shqipërinë do të menaxhohen nga vetë autoritetet e saj. Një instrument i unifikuar i BE për vendet kandidate dhe kandidatë potenciale „Ndihma para anëtarësimit“ bën të mundur që edhe Shqipëria, të përfitojë prej tij: një mbështetje financiare prej 220 milionë eurosh për periudhën 2007- 2009. Kjo ndihmë financiare shënon fillimin e besimit të BE tek aftësitë menaxhuese te aktorëve vendas. Ndryshe nga deri më sot kur ato janë menaxhuar nga vetë BE përmes agjensive të tij, kësaj here do të jenë autoritetet kombëtare ato që do të mbulojnë gjithë hallkat e përdorimit të ndihmës financiare të BE. Ambasadori i Komisionit Europian në Tiranë, Helmuth Lohan e quajti këtë risi „decentralizim të menaxhimit“. Duke dhënë disa hollësi gjatë nënshkrimit të marrveshjes në Tiranë Lohan tha se“ kjo do të thotë që vetë autoritetet shqiptare janë përgjegjese për programimin prokurimet dhe përdorimin e kësaj shume.“ Por marrëveshja parashikon rregulla të përcaktuara mirë, të detyrueshme për t´u zbatuar nga gjithe aktorët lokalë që do të merren me menaxhimin e 220 milion eurove. Instrumenti i ri i Parazgjerimit, i BE, (IPA) nuk është asgjë tjetër veçse vazhdimi i Programit CARDS. Ai synon të forcojë kapacitetet e vendeve kandidate apo të kandidateve potenciale siç është rasti i Shqipërisë për të zbatuar bazën ligjore të BE.
Si do të përdoren fondet? Gjatë dy muajve që kanë mbetur nga 2007 do të përdoren vetëm 54.3 milionë euro, Kjo shumë do të mbështesë projekte të mëdha për përmirësimin e infrastrukturës së ujësjellës-kanalizimeve, ngritjen e qendrave të paraburgimit, forcimin e ndërmarjeve të vogla dhe të mesme, pjesëmarrjen në programet e BE me shumë përfitues si Tempus, Erasmus Mundus. Pjesa tjeter prej 185,7 milion eurosh do të përdoret deri në vitin 2009 për përafrimin e legjislacionit të Shqipërisë me atë të BE, forcimin e institucioneve demokratike dhe vendosjes së shtetit ligjor, reformën në administratën publike, reformën ekonomike, respektimin e të drejtave të njeriut, minoriteteve, zhvillimin e shoqërisë civile dhe bashkëpunimin rajonal, mbështetjen e zhvillimit dhe zbutjen e varfërisë. Marrëveshja e sapo nenshkruar shihet në Shqipëri si një ngjarje e shënuar, që mbyll një etapë dhe hap një tjetër në marrëdhëniet e Tiranës me Brukselin: atë të besimit të BE në kapacitete menaxhusese vendase. Rritja e këtyre kapaciteteve duket se ecën në të njëjtin kah me rritjen e përqindjes së popullsisë pro anëtarësimit. Në bazë të një sondazhi të Institutit Shqiptar për Studime Ndërkombetare, të publikuar sot në Tiranë, shqiptaret dëshirojnë integrimin europian më shumë se të gjitha vendet e tjera kandidate. 92.5 për qind e të intervistuarve ne rastin e nje referendumi, do të votonin në favor të anëtarësimit të vendit në BE dhe vetëm 1,5 % rezultojnë kundër. Marrë nga Deutsche Welle (shqip)

Anëtarësimi i Shqipërisë në NATO, çfarë do të ndodhë në Bukuresht 2008?!

2007-10-22T13:10:00.000Z

Trazhgim Sokolaj/ TIRANE

Kryeministri Sali Berisha në mënyrë të përsëritur dhe figurative është shprehur kohët e fundit se Shqipëria ndodhet në kilometrin e fundit të rrugës së anëtarësimit në Organizatën e Atlantikut Verior, NATO. Kreu i Qeverisë shqiptare thotë më tej se hyrja në NATO është prioritet dhe qëllim kryesor i ekzekutivit shqiptar teksa i referohet Samitit të pritshëm të Bukureshtit, ku vendet anëtare të NATO-s pritet të marrin një vendim rreth anëtarësimit jo vetëm për Shqipërinë, por edhe për Kroacinë dhe Maqedoninë, si vende anëtare të kartës “Adriatik 3”.

Presidenti i vendit Bamir Topi i cili pak ditë më parë zhvilloi takime në Shtabin e Përgjithshëm të NATO-s në Bruksel si dhe me vetë Sekretarin e Përgjithshëm të Aleancës, Jap de Hoop Schefer, e cilësoi si shumë të rëndësishëm procesin e anëtarësimit të Shqipërisë në NATO. Nga ana tjetër, Ministri i Mbrojtjes Fatmir Mediu duket se është aktiv në këtë drejtim. Gjithçka lidhet me anëtarësimin e vendit në NATO por edhe me marëdhëniet me vendet e “A3” duket se është në vëmendjen e Ministrit shqiptar të Mbrojtjes, i cili tashmë i ka sqaruar për të gjithë të mirat që i sjell vendit anëtarësimi në Organizatën e Atlantikut të Veriut.

Por çfarë do të ndodhë? Çfarë ka bërë dhe nuk ka bërë Shqipëria për të merituar ose për të mos merituan ftesën në Bukuresht në prillin e vitit 2008?

Nëse i referohemi deklaratës së Sekretarit të Përgjithshëm të NATO-s, pas takimit që ai zhvilloi me Presidentin Topi, është e qartë se mendimi i tanishëm i krijuar rreth Shqipërisë nuk parashikon përgatitjen e ndonjë ftese apo siç u cilësua “bilete” për në NATO. Dhe kjo deklaratë në fakt nuk duhet të kuptohet keq, pasi në të vërtetë filozofia e anëtarësimit në NATO, parashikon që vendet aspirante të monitorohen me kujdes deri në momentin e fundit.

Sekretari i Përgjithshëm Schefer tha se anëtarësimi i Shqipërisë varet shumë nga dy elementë, stabiliteti politik dhe reforma në drejtësi. Pikërisht këtij momenti mendoj se duhet ti kushtohet rëndësi referuar asaj që po ndodh në Tiranë. Politika shqiptare në fakt, duket se i ka kthyer në prioritet dhe tema të ditës dy argumentet e përmendura nga Sekretari i Përgjithshëm i NATO-s. Çështja është si po punohet në këto dy drejtime. Maxhoranca duket e interesuar deri në fund për reformë në drejtësi, ndërsa opozita kërkon që reforma të mos lidhet me emrin e Kryeprokurorit Sollaku, i cili po hyn në vitin e dytë të konfliktit të hapur me Qeverinë dhe anëtarët e ekzekutivit. Të djathtët e argumentojnë këtë qëndrim të opozitës me faktin se ish-qeveritarët që kanë kryer abuzime kanë një garanci tek Sollaku. Nga ana tjetër të majtët, konsiderojnë se tentativat dhe sulmet për largimin e Sollakut jo vetëm që janë pa argumente por edhe nuk kanë të bëjnë shumë me vetë Kryeprokurorin sesa me përpjekjen e Qeverisë për të futur nën ndikimin e saj organin e akuzës. Stabiliteti politik në Shqipëri duket lehtësisht i ndikueshëm nga humori i liderëve apo politikanëve të ndryshëm. Në fakt këtë vit përplasjet në Parlament kanë munguar. Edhe komunikimi dhe dialogu politik duket se është maturuar. Por çfarë do të ndodhë? Askush nuk e di! Është e qartë se vendimi për Shqipërinë do të merret nga vendet anëtare të NATO-s në momentin fundit. Deri atëherë do të ketë kohë të mjaftueshme për të parë ecurinë dhe legjitimitetin e reformës në drejtësi por edhe garancitë dhe qëndrueshmërinë e stabilitetit politik.

Kryeministri i Shqipërisë: Po përpiqemi intensivisht për anëtarësimin në NATO

2007-10-21T14:20:00.000Z

TIRANE - Gjatë fjalës së mbajtur në Konferencën e 12-të të Këshillit të Atlantikut për Shqipërinë, Kryeministri Berisha bëri një prezantim të ecurisë së reformave në vend dhe rezultateve konkrete dhe të prekshme të tyre. Kryeministri u ndal në rezultatet në luftën kundër krimit të organizuar, trafiqeve, korrupsionit, në reformën në administratë, reformën në fushën ekonomike, lehtësitë e krijuara për biznesin dhe investimet dhe shmangien e procedurave burokratike, dixhitalizimin e shërbimeve kryesore, reformën në fushën ushtarake, zhvillimin e turizmit, etj. Kryeministri tha se përpjekjet dhe rezultatet e qeverisë në këto dy vjet, në luftën kundër krimit të organizuar dhe trafiqeve kanë qenë thelbësore. “Në dy vjet, Shqipëria është një nga vendet më të sigurta në Evropë dhe kjo është arritur me një punë të jashtëzakonshme, duke aplikuar zero tolerancë ndaj krimit të organizuar”, vijoi Kryeministri. Ai theksoi se organet e zbatimit të ligjit në Shqipëri ia kanë dalë të çmontojnë mbi 204 grupe dhe organizata kriminale të vendit, 850 anëtarë dhe drejtues të tyre janë vendosur para ligjit, ndërkohë janë vendosur para ligjit mbi 1200 të tjerë, të cilët ishin persona në kërkim. “Ka një rënie dramatike të trafiqeve dhe këtë nuk e tregojnë vetëm statistikat tona, por këtë gjë e tregojnë statistikat e Italisë, bregut përkarshi, të cilat këtë vit janë tërësisht ndryshe dhe tregojnë një rënie shumë të madhe”, u shpreh kryeministri. Në këtë rënie të trafiqeve, shtoi ai, një ndihmesë të madhe ka dhënë ligji i ndalimit të skafeve në ujërat tona territoriale. Kryeministri siguroi se qeveria shqiptare është e gatshme të nënshkruajë çdo marrëveshje me qeveritë e vendeve të tjera për të adaptuar në Shqipëri dhe kudo, “zero tolerancë” ndaj krimit të organizuar. Duke u ndalur në luftën kundër korrupsionit, Kryeministri tha se në një hark kohor të shkurtër ka rezultate konkrete inkurajuese, duke permendur ketu shkurtimin e shpenzimeve operative në administratë me 40 për qind, shkurtimin e administratën qendrore me 25 për qind dhe punonjësit e saj me 30 për qind, ulja e kostos së prokurimeve publike me 23 për qind, nxjerrjen e administratës jashtë konfliktit të interesit, duke ligjëruar se cilido që gjendet në administratë në konflikt interesi, largohet prej saj. Gjithashtu, Kryeministri tha se qeveria ka realizuar dixhitalizimin e një seri procedurash dhe po privatizon një sërë shërbimesh të tjera. Kryeministri tha se për dy vjet me radhë parlamenti shqiptar ka votuar në muajin qershor një buxhet të dytë suplementar, rreth 24 për qind të buxhetit vjetor, ndërkohë që të ardhurat në buxhetin e shtetit për këtë vit janë 27 për qind, krahasuar me 22 për qind të Prodhimit të Brendshëm bruto që ishin në vitin 2005. “Ne ia kemi dalë të rrisim të ardhurat me 1.2 miliardë dollarë në buxhetin tonë”, tha Kryeministri. Kryeministri siguroi se në drejtim të luftës kundër korrupsionit, ligji nuk do të kursejë asnjë njeri që do të mund të përdorë paratë publike për qëllimet e veta. Me gjithë vështirësitë e njohura që janë hasur, tha kryeministri, janë vendosur para ligjit rreth 50 zyrtarë nga të gjitha nivelet. “Demokracia dhe varfëria nuk ecin njëra me tjetrën. Shqipëria është një vend me potenciale të mëdha, të jashtëzakonshme, potenciale të mëdha njerëzore, burime të mëdha natyrore, e megjithatë ajo renditej poshtë në nivelin e tërheqjes së investimeve të huaja. Korrupsioni, krimi i organizuar, burokracia, mungesa e transparencës, të gjitha këto kishin bërë që Shqipëria, ky vend me potenciale shumë të mëdha, të humbasë interesin e biznesit ndërkombëtar”, vijoi Kryeministri. Duke iu referuar nismave të marra për nxitjen e investimeve në vend, Kryeministri theksoi se objektivi më ambicioz i qeverisë ishte të shndërronte Shqipërinë në një vend tërheqës për investimet e huaja dhe kjo është bërë këtë atëherë kur ky objektiv dukej shumë i largët. Krahas luftës kundër krimit e korrupsionit, Kyeministri tha se është bërë një punë shumë serioze në zvogëlimin e barrës burokratike për biznesin. Nëse dy vjet më parë koha e regjistrimit të një biznesi ishte 42 ditë, sot një biznes regjistrohet brenda një ore në “One Stop Shop”. Së shpejti, nis punën nisma “One Stop Shop” edhe për licencat dhe lejet. Një javë më parë, u inaugurua taksa on-line dhe kjo do të jetë edhe për doganat. Shqipëria ka inauguruar dhe së shpejti e instalon përfundimisht prokurimin elektronik, si formën më transparente të prokurimit. Tashmë, Shqipëria është vendi me barrën fiskale më të ulët në Evropë, vendi me koston e prodhimit më të lirë në Evropë, u shpreh Kryeministri, duke nënvizuar se këto dy objektiva janë realizuar plotësisht. Për sa i përket zhvillimit të turizmit, Kryeministri tha se në dy vite Shqipëria ka pasur një bum të madh turistik dhe në këto dy vite turizmi është rritur me 70 për qind. Nga ana tjetër, Kryeministri vuri në dukje se nuk është regjistruar në regjistrat e policisë shqiptare as edhe incidenti më i vogël, qoftë edhe ndaj një turisti të vetëm. Kryeministri u ndal edhe në përpjekjet e qeverisë për krijimin e zonave industriale dhe të parqeve Industriale, ndërsa theksoi se ligji i ri mbi Partneritetin Publik Privat, në disa sektorë, ka një funksionim të shkëlqyer, ndërsa ligji i ri për prokurimet publike i ka bërë ato më transparente. Duke renditur rezultatet e këtyre reformave dhe treguesit e ekonomisë shqiptare, kryeministri tha se ka 28 për qind rritje të eksporteve, ka 22 për qind rritje të indeksit të shitjes, ka 25 për qind rritje të depozitave bankare, ka pothuaj dyfishim të kreditit bankar për ekonominë dhe ka një fluks të panjohur më parë të kompanive të mëdha. Kompani të mëdha nga vendet të huaja, nga Norvegjia në Qipro, ndodhen në Shqipëri, të cilat marrin pjesë me investime në punët publike apo private. Kompani shumë të mëdha janë vendosur në tregjet bankare dhe financiare, të tjera në fushën e energjetikës, në turizë, në çimento. Kryeministri iu referuar shkrimit të një gazete të njohur të Londrës, “Observer”, e cila disa ditë më parë shkruante se Shqipëria është një nga 20 vendet më të përshtatshme për investime dhe për investitorët vendas dhe të huaj dhe siguroi se ambicia e qeverisë mbetet që të konsiderojë këto që janë arritur vetëm si hapat e parë. “Ne mbetemi të vendosur që ta shndërrojmë vërtetë Shqipërinë në vendin më tërheqës për investimet e huaja. Ne jemi shumë të inkurajuar për këto rezultate, por absolutisht ato janë thjesht një stacion për të arritur rezultate të tjera”, tha Kryeministri. Për sa i përket reformës në fushën ushtarake, Kryeministri Berisha nënvizoi se ushtria shqiptare është një nga institucionet më të reformuara të këtij vendi, me një ushtri të vogël, profesionale, të mirë trajnuar. Njësitë tona janë shndërruar në përfaqësues të shkëlqyer të vendit dhe të kombit tonë në misionin që kryejnë në Bosnje, në Afganistan, në Irak.“Nga Bukureshti na ndajnë 4 muaj, disa e quajnë 100 metërshi i fundit, disa të tjerë 400 metërshi, por unë e quaj kilometri i fundit. Ne jemi të vendosur të bëjmë çdo përpjekje me reformat në fushën politike, ekonomike dhe ushtarake, reformën zgjedhore, reformën në sistemin e drejtësisë dhe reforma të tjera. Jemi të vendosur të aftësojmë çdo ditë e më shumë njësitë tona ushtarake, në mënyrë që këtë kilometër ta përshkojmë ashtu siç kërkohet nga Aleanca e Atlantikut për të arritur kriteret dhe standardet e saj dhe të meritojmë ftesën”, tha Kryeministri Berisha.

Schefer: Anëtarësimi në NATO varet nga reforma në drejtësi dhe stabiliteti politik

2007-10-19T13:42:00.000Z

Presidenti i Shqipërisë Bamir Topi zhvilloi sot një takim në Bruksel me Sekretarin e Përgjithshëm të NATO-s, Jap de Hoop Schefer. Kreu i shtetit shqiptar ndodhet për vizitë pune në Shtabin e Përgjithshëm të Organizatës së Atlantikut Verior. Sekretari i Përgjithshëm i Aleancës Schefer tha se ftesat për anëtarësim në NATO bazohen në ecurinë e reformave të shteteve kandidate.
“Rëndësi të veçantë paraqesin reforma në drejtësi dhe klima e qetë politike”, është shprehur Sekretari i Përgjithshëm Schefer pas takimit me Presidentin e Shqipërisë. Kreu i Organizatës së Atlantikut Verior, bëri thirrje që shumica dhe pakica politike në Shqipëri të bashkëpunojnë për anëtarësimin e Shqipërisë në NATO.

FJALA E PRESIDENTIT TOPI në Institutin Mbretëror për Marrëdhëniet Ndërkombëtare, EGMONT

2007-10-19T12:49:00.000Z

Të nderuar zonja dhe zotërinj,
Jam shumë i nderuar që ndodhem sot në foltoren e Institutit Mbretëror të Marrëdhënieve më Jashtë, EGMONT sepse e konsideroj këtë vend si një tribunë të demokracisë, të fjalës së lirë, si një hapësirë nga ku lindin, shkëmbehen dhe shpërndahen ide, mendime, opinione për çështje shumë të rëndësishme për të ardhmen e shteteve, kombeve dhe njerëzimit.
Ju falënderoj për pjesëmarrjen tuaj!
Zonja dhe zotërinj,
Jam sot në Bruksel, me cilësinë e Presidentit të Shqipërisë, në viziten time të parë jashtë vendit tim, për të sjellë në këtë kryeqytet të Evropës përgjegjësinë, mesazhin, vullnetin e sinqertë dhe aspiratën historike të popullit tim për t’u bërë pjesë e pandarë e familjes euroatlantike, si dhe një pasqyrë të kontributit tonë modest në përballjen e sfidave globale të politikës së sotme ndërkombëtare.
Këtë përgjegjësi, të nderuar pjesëmarrës, do ta ndaj së pari nesër me përfaqësuesin më të lartë të NATO-s, Sekretarin e Përgjithshëm, Jaap de Hoop Scheffer dhe të gjithë ambasadorët e vendeve anëtare të NATO-s dhe, javën që vjen, me Presidentin e Komisionit Evropian, Manuel Barroso, me Komisionerin për Zgjerimin, Olli Rehn dhe në pritje me Përfaqësuesin e Lartë të BE-së për Politikën e Jashtme dhe të Sigurisë, Havier Solana, të cilët kanë qenë jo vetëm nxitësit, por edhe këshilltarët më të mirë dhe të sinqertë të Shqipërisë në sfidën e saj historike integruese. Gjej rastin t’i falënderoj të gjithë publikisht!
Integrimi i Shqipërisë në NATO dhe në Bashkimin Europian (BE) mbeten dy përparësitë kombëtare për popullin shqiptar.
Shqipëria po përjeton sot një nga transformimet më të mëdha në historinë e saj.
Ky vend, i cili feston këtë vit 95- vjetorin e krijimit të shtetit të pavarur, ka kaluar më shumë se gjysmën e moshës së tij nën diktaturën më të ashpër të kohëve moderne, ku NATO ishte armiku i betuar, ku demokracia, liria e individit dhe e fjalës ishin të dhunuara, ku bota perëndimore ishte shumë e largët në horizont, ku izolimi kishte mbuluar çdo rreze drite, por shpresa për një të ardhme më të mirë qëndronte e fshehur në shpirtin shqiptar.
Rrëzimi i Murit të Berlinit, përfundimi i Luftës së Ftohtë dhe ndryshimet demokratike që pësoi Shqipëria i dhanë asaj rilindjen e shpresës së fshehur historike, evropiane. Shqipëria ishte vendi i parё, nga ato tё ish bllokut komunist, qё nënshkroi Dokumentin Themelor të PfP, mё 23 shkurt 1994 dhe qё kёrkoi zyrtarisht anëtarёsimin nё NATO.
Sot 94% e shqiptarëve mbështesin integrimin euroatlantik të vendit të tyre. Kjo është prova e pakundërshtueshme që integrimi i Shqipërisë në NATO dhe BE mbeten përparësi kombëtare të të gjitha forcave politike dhe qeverive shqiptare.
Vij këtu sot, të dashur miq, si Presidenti i Shqipërisë i zgjedhur në linjë kushtetuese nga Kuvendi i Shqipërisë. Ky veprim tregoi maturinë e klasës politike parlamentare e cila, jo vetëm e ktheu procesin e vështirë të zgjedhjes së Presidentit në rrugën e vet kushtetuese dhe ndaloi një nga krizat më të thella politike, ekonomike, sociale dhe të sigurisë që mund të kalonte ky vend pas asaj të vitit 1997, por e zgjidhi këtë situatë pa nevojën e ndërmjetësimit ndërkombëtar.

Në fjalën time të betimit në Kuvendin e Shqipërisë, më 20 korrik 2007, unë premtova se do të jem një President mbi palët dhe mes palëve gjatë ushtrimit të misionit tim, konform Kushtetutës së Shqipërisë.
Gjykoj sot se debati politik në Shqipëri është në nivelin e një debati pluralist në Kuvendin e Shqipërisë, në media dhe në publik, në funksion të shprehjes së ideve dhe alternativave mbi çështje dhe probleme, të brendshme apo të jashtme, të cilat shqetësojnë shoqërinë shqiptare në funksion të programeve politike të secilës parti.
Që në fillim, në takimet e organizuara me kryetarët e partive parlamentare gjeta dëshirën dhe vullnetin për të përshpejtuar reformën në sistemin e drejtësisë, reformën zgjedhore, për të nxitur luftën kundër krimit të organizuar dhe korrupsionit si rruga e vetme për vendosjen e një demokracie të shëndoshë e funksionale dhe forcimin e shtetit ligjor.
Në tryezën e partive politike parlamentare mbi reformën në sitemin e drejtësisë të organizuar nga Presidenti i Republikës, më 17 shtator 2007, u nënvizua domosdoshmëria e krijimit të një drejtësie të pavaruar dhe larg influencave e mbështetjeve politike dhe u vendos njëzëri krijimi i një komisioni të posaçëm parlamentar i mbështetur nga një komision tjetër me ekspertë të fushës, vendas dhe të huaj. Përshëndes sot, mbledhjen disa ditë më parë, të komisionit parlamentar dhe përgjegjësinë, me të cilën u diskutua në të!
I përgjegjshëm se kjo klimë pozitive politike dhe debati midis pozitës dhe opozitës ka nevojë për frymëmarrje dhe mirëkuptim social e kam shtrirë këtë debat të rëndësishëm, jo vetëm në nivelin e pushtetit lokal, por edhe në Organizatat Jofitimprurëse (OJF) dhe mediat ku kam gjetur mbështetje, përgjegjësi dhe angazhim.
Kam bindjen se edhe komisioni bipartizan parlamentar i 31 majit 2007, për plotësimin e rekomandimeve të ndërkombëtarëve mbi reformimin e sistemit zgjedhor në një proces konform normave të një shteti demokratik, krahas të tjerave, tregon një përgjëgjesi, vullnet dhe emancipim të përbashkët (pozitë-opozitë) politik në Shqipëri.
Ecuria e Shqipërisë drejt integrimit në strukturat euroatlantike me konsensusin e gjerë të të gjitha forcave politike dhe të mbarë shoqërisë shqiptare është kthyer në një projekt madhor, gjithëpërfshirës, me rëndësi strategjike për kombin dhe shtetin shqiptar, një aspiratë që tejkalon çdo barrierë ideologjike apo çdo interes individual të formacioneve të ndryshme politike. Unë shpreh bindjen se qeveria dhe opozita janë të sinqerta dhe të gatshme të bashkëpunojnë, në mënyrë konstruktive, për të ardhmen euroatlantike të Shqipërisë.
Në një vlerësim sintetik, ekonomia e Shqipërisë, megjithëse është duke e përballuar pasojat e krizës energjetike, karakterizohet nga një situatë e qëndrueshme makroekonomike. Prodhimi i Brendshëm Bruto (GDP) ka pësuar rritje vjetore 6%, me një inflacion të kontrolluar në kuotën 2,4 % dhe me një deficit të brendshëm buxhetor prej 2.6%. Eksportet shqiptare janë rritur në 28% gjatë vitit 2007. Investimet e huaja direkte (FDI) janë tre herë më të larta se mesatarja e 10 viteve të fundit dhe kreditimi i bankave në ekonomi është rritur në rreth 30% të GDP nga 70% shkojnë drejt kreditimit të biznesit privat. Shqipëria po vendoset në fokus të interesit të investitorëve të fuqishëm të huaj duke marrë pjesë në projekte të rëndësishme të ekonomisë shqiptare, si ato të energjisë, minierave, bankave tregëtare, turizmit dhe infrastrukturës. Reforma fiskale e këtij viti, me taksën e sheshtë prej 10% më të ulët nga të gjitha vendet e Evropës, si dhe krijimi i agjensisë së regjistrimit të bisnesit vendas në sistemin One-stop-shop gjykoj që krijojnë terren për tërheqjen e investimeve të huaja dhe mbështetje për bizneset vendas. Kjo klimë pozitive dha një sezon të suksesshëm turistik për Shqipërinë, me një rritje të numrit të turistëve në 70%, në krahasim me vitin e kaluar.
Vlerësimi i progresit në fushat e mësipërme, si dhe synimi për një zhvillim të qëndrueshëm ekonomik, i hapën rrugën nënshkrimit, vitin e kaluar, të Marrëveshjes së Stabilizim-Asociimit me Bashkimin Evropian, si dhe, pak kohë më parë, të Marrëveshjes për Liberalizimin e Vizave me BE-në. Nënshkrimi i MSA-së është një nga arritjet më të rëndësishme për progresin dhe afirmimin ndërkombëtar të Shqipërisë. Shqipëria ka siguruar një dokument substancial ku do të mbështetet në të ardhmen e afërt për të kryer reformat komplekse, që do e afrojnë jo vetëm me BE-në, por njëkohësisht dhe më shpejt me NATO–n.
Reforma në Forcat e Armatosura
Qëllimi ynë është krijimi i një force të armatosur nëpërmjet identifikimit dhe zhvillimit të kapaciteteve të specializuara (Niche capabilities), për t’u përshtatur me nevojën e NATO-s për forca të specializuara.

Ndihem krenar teksa deklaroj se Shqipëria, në sajë të programit Nun-Lugar, ka eliminuar me sukses të gjitha armët kimike, duke u bërë vendi i parë në botë pa materiale dhe arme kimike. Shfrytëzoj këtë rast që të falënderoj Qeverinë e Shteteve të Bashkuara të Amerikës, Gjermanisë, Italisë, Greqisë, Zvicrës, të cilat kanë dhënë një mbështetje teknike dhe financiare të çmueshme për të kryer këtë objektiv mjaft të rëndësishëm.
Kujdes i veçantë i është kushtuar aftësive të ardhshme operacionale (veprimeve strategjike) sipas rekomandimeve që dolën nga Samiti i Rigës.
Më duhet të nënvizoj që, së fundi u miratua buxheti i mbrojtjes prej 2% të GDP në 2008, dy vjet para afatit të përcaktuar, ndërsa transformimi i ushtrisë në një ushtri tërësisht profesionale, do të plotësohet në vitin 2010, në vend të vitit 2013 që ishte planifikuar më parë.

Duke pasur parasysh pjesëmarrjen e deputetëve të nderuar në delegacion, dëshiroj të përmend rëndësinë që po merr kontrolli parlamentar mbi ecurinë e procesit për anëtarësimin e vendit në NATO. Kuvendi i SHqipërisë po luan një rol gjithnjë e më thelbësor në monitorimin e zbatimit të programeve dhe reformave të domosdoshme për standardet euroatlantike. Pjesë e këtij angazhimi parlamentar është dhe krijimi i komisionit të përkohshëm bipartizan për promovimin e reformave përkatëse legjislative për integrim në NATO.
Bashkëpunimi me Aleancën e Atlantikut të Veriut
Gjatë 15 vjetëve, vendi ka pasur një bashkëpunim të ngushtë, të pandërprerë dhe besnik me Aleancën e Atlantikut të Veriut, duke vënë në dispozicion të saj portet, aeroportet, territorin e saj për qëllime stërvitore dhe misione të tjera të rëndësishme. Gjatë këtij procesi bashkëpunimi, ne shpesh kemi vepruar si anëtarë de facto të Aleancës. Në këtë frymë do të vijojmë dhe pas anëtarësimit de jure në të.
Transparenca dhe konstruktiviteti kanë qenë tipar themelor i këtij bashkëpunimi Shqipëri – NATO, tipar që u përsos dhe u pasurua më tej, pas Samitit të Uashingtonit, me krijimin e procesit të Planit të Veprimit për Anëtarësim (MAP). Shqipëria e konsideron procesin e MAP-it si mekanizmi kryesor për vlerësimin e kandidaturave, i mbështetur në performancën individuale të çdo vendi. Me këtë rast, dëshiroj të falënderoj vendet tuaja për mesazhet tepër inkurajuese dhe mbështetjen ndaj aspiratës së Shqipërisë për anëtarësim në NATO, në takimin që hapi ciklin e 9-të të MAP-it për vendin tim, datë 25 shtator 2007! Unë jam i bindur se vizioni perëndimor i veprimit dhe reformave, përqafuar tashmë nga politika dhe mbarë shoqëria shqiptare, si dhe ristrukturimi dhe modernizimi i Forcave tona të Armatosura, na bëjnë gjithnjë e më shumë pjesë të vlerave themelore, mbi të cilat mbështeten strukturat euroatlantike.
Mbështetja e gjerë popullore që gëzon anëtarësimi i vendit tonë në NATO, është një tjetër shtysë, që politika në vend duhet të jetë totalisht e angazhuar, në mënyrë që, në Samitin e Bukureshtit, pritshmëria e njerëzve të bëhet një realitet.
Lufta kundër terrorizmit dhe operacionet paqeruajtëse
Më lejoni të ritheksoj se ngjarjet tronditëse të 11 shtatorit nuk globalizuan fenomenin e terrorizmit, ato globalizuan luftën kundër tij. Këto ngjarje gjeneruan, ndër të tjera, jo vetëm solidaritetin e njerëzve me njerëzit (people to people solidarity), por dhe koalicionin më të gjerë të organizatave dhe shteteve në të dy anët e Atlantikut, pavarësisht madhësisë dhe fuqisë specifike reaguese të gjithësecilit. Në këtë kuadër, dëshiroj të përmend kontributin e Shqipërisë në të dy planet: në planin e përbashkët dhe atë individual. Shqipëria, së bashku me Maqedoninë dhe Kroacinë, kanë dërguar Skuadrën e Përbashkët Mjekësore në Afganistan.

Vendi im është një nga pjesëmarrësit aktivë në Operacionin “Iraku i Lirë”, me një kontingjent prej 120 trupash komando, si dhe në Operacionin ISAF të udhëhequr nga NATO me një kontingjent prej 135 vetësh.

Një tjetër kontribut, prej 70 vetash, Shqipëria jep në operacionin ALTHEA të udhëhequr nga BE.
Hartimi i legjislacionit përkatës, ngrirja e pasurive të personave të dyshuar për lidhje me organizatat terroriste, si dhe dëbimi nga vendi i personave të dyshuar, që kanë lidhje me to, janë ndër masat konkrete që janë marrë brenda vendit për të kontribuar në këtë luftë.

Politika e jashtme rajonale e Shqipërisë
Politika e jashtme e Shqipërisë është, me të drejtë, një nga arritjet e saj të viteve të transformimit, sidomos në kuadrin e bashkëpunimit rajonal. Në shërbim dhe në përmbushje të detyrimeve që vendi im ka në procesin e integrimit të tij në Bashkimin Evropian e në NATO të harmonizuara me interesat kombëtare Shqipëria ka dhënë shembullin e një politike për forcimin e paqes, të stabilitetit dhe të sigurisë afatgjatë në rajon, duke nxitur një klime besimi reciprok nëpërmjet zgjerimit dhe thellimit të marrëdhënieve diplomatike, ekonomike, politike e kulturore me të gjitha vendet e rajonit.
Më vjen mirë të përmend se prej vitesh, politika e jashtme e Shqipërisë është vlerësuar pozitivisht nga organizatat dhe institucionet ndërkombëtare. Shqipëria është shumë e ndjeshme ndaj këtij vlerësimi dhe ka përforcuar filozofinë perëndimore për bashkëpunim, stabilitet dhe përparim. Ajo e sheh këtë filozofi si një shtysë edhe më të madhe në afrimin më të shpejtë të anëtarësimit të saj euroatlantik.
Në kuadër të veprimtarive të NATO-s, si dhe të nismave dhe organizatave të tjera rajonale, Shqipëria ka zhvilluar një bashkëpunim të ngushtë me fqinjët në shumë çështje me interes të përbashkët, si: lufta kundër trafikut të qenieve njerëzore dhe drogave, manaxhimi i integruar dhe siguria e kufijve, krijimi i masave të besimit reciprok, shkëmbimet tregtare dhe ekonomike.
Karta e Partneritetit A-3 që kemi me Kroacinë dhe Maqedoninë, është pjesë domethënëse e një mentaliteti krejtësisht ndryshe tashmë në Ballkan.
Bashkëpunimi i frytshëm që ne kemi vendosur ka ndikuar dukshëm në përmirësimin e besimit reciprok ndërmjet tre vendeve tona. Ndarja e vlerave dhe qëllimeve të njëjta i kanë dhënë këtij procesi bashkëpunimi rëndësinë e një çasti historik, të nevojshëm për stabilitetin e rajonit, në një kohë, që ndryshime të rëndësishme e presin atë.

Shqipëria është kthyer tashmë nga një vend konsumator i sigurisë, në një vend që prodhon siguri rajonale edhe globale. Ai është shembulli një vendi, që nuk ka asnjë çështje apo problem të hapur me ndonjë vend tjetër për t’u zgjidhur drejtpërdrejt apo nëpërmjet një arbitrazhi a palë të tretë, e cila do të cënonte sigurinë, paqen, apo procesin integrues të vetin edhe të rajonit.
Duke besuar se edhe ju çështjen e Kosovës e konsideroni të rëndësishme si në planin rajonal, ashtu edhe në atë evropian, por edhe më gjerë, më lejoni të ndalem duke shprehur pikëpamjen time:
Unë mendoj se çështja e Kosovës është çështje që duhet të gjejë sa më parë zgjidhje të qëndrueshme dhe afatgjatë duke garantuar jo vetëm tërësinë tokësore të Kosovës, por edhe integritetin funksional të institucioneve të saj në të gjitha planet. Ajo nuk mund të mbetet peng i një statusi të papërcaktuar, as i statuquo-së së përjetshme dhe as pjesë e papërfunduar e një procesi demokratik të domosdoshëm, të nisur nga NATO-ja dhe BE-ja që në vitin 1999. Kosova nuk mund të bëhet shembulli evropian i dështimit të proceseve të zbatimit dhe shtrirjes së sigurisë, ashtu edhe precedenti i mungesës së një qëndrimi të unifikuar të politikës së jashtme të BE-së.
Gjykoj në të kundërtën se Kosova mund të bëhet shembulli më i mirë i zbatimit të sigurisë dhe demokracisë, të ekonomisë së tregut dhe të shtetit të së drejtës nën veprimin e përbashkët të të gjithë faktorëve ndërkombëtarë, OKB-së, NATO-s, BE-së, Grupit të Kontaktit, Trojkës dhe SHBA-së, të cilët kanë investuar kohë, energji dhe burime njerëzore në këtë proces.
Së bashku me shpresën, më lejoni të ndaj edhe shqetësimin se ndërlikimet e padëshirueshme dhe të pajustifikueshme në procesin e përcaktimit të statusit do të kishin një ndikim negativ me kosto të lartë politike dhe ekonomike për Kosovën, Ballkanin e më gjerë, si dhe do të minonin të gjitha përparimet e arritura nga Kombet e Bashkuara dhe institucionet e vetëqeverisjes së përkohshme në Kosovë.
Jam shumë i motivuar të nënvizoj këtu dhe të përshëndes të gjithë përgjegjësinë dhe pjekurinë politike të autoriteteve të Kosovës që në fillimet e procesit dhe, njëkohësisht, të shpreh keqardhjen për veprimet refuzuese, paragjykuese dhe mohuese të Beogradit ndaj të gjithë hallkave apo nismave të ndërmarra në mënyrë të sinqertë nga të mandatuarit e partnerëve ndërkombëtarë.
Unë jam i nxitur të vlerësoj në mënyrë optimiste çdo çast të kohës 120-ditore, i cili do t’i vlente përfundimit të një marrëveshjeje mes palëve në bisedime, por në të njëjtën kohë, optimizmi im bëhet më pragmatik kur shikoj se me kalimin e kohës, shtrihet bindja se programi më evropian, më integrues dhe më i plotë, për momentin, për të ndërtuar një shtet ku demokracia dhe të drejtat e njeriut e ato të minoriteteve, konsiderohen vlera sociale të garantuara me ligj, mbetet Plani i Presidenit Ahtisari.
Kam bindjen se zbatimi sa më parë i këtij plani do të ishte hapi më i madh historik jo vetëm për Kosovën dhe për Serbinë, por për të gjithë rajonin e Ballkanit. Shpresoj se të gjithë popujt e Ballkanit e shikojnë të ardhmen e fëmijëve të tyre në NATO dhe BE dhe jo peng të konflikteve të dhunshme historike, etnike, fetare, nacionaliste dhe dhimbjeve të tyre të shkaktuara nga këto konflikte. Kjo kërkon të dish të falësh. Më duket se shqiptarët e Kosovës e kanë bërë këtë veprim.
Mendoj, së fundmi, se integrimi i Shqipërisë në NATO dhe BE, ashtu si dhe integrimi i rajonit, në perspektive do të konsiderohej si një sukses i rëndësishëm i arritur në kontinentin evropian me shmangien e luftërave dhe shndërrimin demokratik të shoqërive diktatoriale të Luftës së Ftohtë. Siguria e shoqërive do të jetë e konsoliduar, qytetarët, me rënien e komunizmit dhe zhvillimin e demokracisë dhe ekonomisë së tregut, do ndihen më të sigurt dhe më të përgatitur për sfidat dhe rreziqet e tjera rajonale dhe globale që kanosin sigurinë e tyre.
Zgjerimi i NATO-s në Ballkan do të krijonte, në planin gjeostrategjik, një NATO me karakter Adriatiko-Jonian, dhe mbylljen e plotë të gjirit të rëndësishëm që laget nga këto dete, lidhjen pa pengesa me detin e Mesdheut, duke zgjeruar e forcuar perimetrin e zonës së stabilitetit edhe në këtë rajon të rëndësishëm e të pasur, si dhe duke i dhënë sigurisë globale një dimension të rëndësishëm mesdhetar.
Një Ballkan në NATO do të thotë që këto vende të bëhen më tërheqëse për investime direkte, më të suksesshme në përdorimin e burimeve të tyre njerëzore, natyrore dhe turistike, më të afta për të ndërtuar vlera evropiane dhe më të sigurta për qytetarët e tyre. Ndoshta në fjalën time nuk kam mundur të plotësoj interesimin tuaj të plotë mbi zhvillimet dhe rolin e vendit tim në rajon, ndaj mbetem i hapur për çështjet që dëshironi të ngrini.
Falemnderit!

Presidenti i Shqipërisë zhvillon vizitë zyrtare në Shtabin e Përgjithshëm të NATO-s në Bruksel

2007-10-19T12:43:00.000Z

18 tetor, 2007
Presidenti i Republikës, Bamir Topi filloi vizitën zyrtare në Shtabin e Përgjithshëm të Aleancës së Atlantikut të Veriut (NATO), në Bruksel (Belgjikë). Në këtë vizitë të tij, Kryetari i Shtetit shoqërohet nga z. Fatos Beja dhe z. Ylli Bufi, Nënkryetarë të Kuvendit të Shqipërisë. Presidenti i Republikës mbajti një fjalë në Institutin Mbretëror të Marrëdhënieve Ndërkombëtare, ku është përqendruar në procesin dhe ecurinë e reformave të rëndësishme për integrimin e vendit tonë në strukturat euroatlantike. Në këtë kuadër, Kryetari i Shtetit i është përgjigjur edhe interesimit të pjesëmarrësve lidhur me aspekte të zhvillimeve politike dhe ekonomike në Shqipëri, si dhe me këndvështrimet e tij sa i përket të ardhmes integruese të vendit. Të pranishmit vlerësuan figurën dhe përvojën politike të z. Topi, e cila është kurorëzuar me zgjedhjen e tij si President i Republikës në mënyrë kushtetuese nga Kuvendi i Shqipërisë. Ditën e nesërme, Kryetari i Shtetit do të ketë një takim me Sekretarin e Përgjithshëm të NATO-s, Jap de Hop Shefer, në përfundim të së cilit do të zhvillohet një konferencë e përbashkët për shtyp. Presidenti Topi do zhvillojë gjithashtu një takim edhe me ambasadorët e vendeve anëtare të NATO-s. Kjo vizitë e parë zyrtare e Kryetarit të Shtetit jashtë vendit vjen në momentin, kur Shqipëria po vijon në rrugën e reformave të saj për integrim dhe është në pritje të samitit të zgjerimit të NATO-s, që do mbahet vitin e ardhshëm në Bukuresht, ku vendi ynë shpreson të marrë ftesën e anëtarësimit në Organizatën e Atlantikut të Veriut.

17 tetor 2007
Presidenti i Republikës, Bamir Topi do të zhvillojë, në datat 18-19 tetor, një vizitë zyrtare në Shtabin e Përgjithshëm të Aleancës së Atlantikut të Veriut (NATO), në Bruksel (Belgjikë). Kjo vizitë e parë zyrtare e Kryetarit të Shtetit jashtë vendit vjen në momentin, kur Shqipëria po vijon në rrugën e reformave të saj për integrim dhe është në pritje të Samitit të zgjerimit të NATO-s, që do të mbahet vitin e ardhshëm në Bukuresht, ku vendi ynë shpreson të marrë ftesën e anëtarësimit në Organizatën e Atlantikut të Veriut. Në këtë kuadër, Presidenti Topi do të ketë një takim me Sekretarin e Përgjithshëm të NATO-s, Jap de Hop Shefer, në përfundim të së cilit do të zhvillohet një konferencë e përbashkët për shtyp. Presidenti Topi do zhvillojë një takim edhe me ambasadorët e vendeve anëtare të NATO-s, ndërsa do të mbajë një fjalë në Institutin Mbretëror të Marrëdhënieve Ndërkombëtare, në Bruksel.

Shqipëria mikpritëse e njërës prej stërvitjeve më të mëdha të Nato-s për 2007-ën

2007-10-18T18:08:00.001Z

Ilirian Agolli 18-10-2007 NATO po organizon këto ditë në Shqipëri njërën nga stërvitjet e saj më të mëdha për vitin 2007। Komandantë dhe ushtarë të mbi 20 shteteve anëtare dhe kandidate të Aleances po kryejnë në Tiranë stervitje komandë dhe nesër fillojnë manovrat në terren. Shefi i Shtabit te Pergjithshem të ushtrisë shqiptare, gjeneral lejtnant Luan Hoxha thotë në një intervistë për Zërin e Amerikës, se trupat shqiptare në këtë stërvitje do të vlerësohen se sa janë ato teknikisht të gatshme për antarësim në NATO.

Zëri i Amerikës: Duke ju uruar për punën me stërvitjen e re shumëkombshe, që sapo ka filluar, ju lutem na tregoni diçka për sfidat e organizimit të kësaj stërvitje dhe pjesën e kontributit të Shqipërisë si një vend mikpritës në të.
Luan Hoxha: Besoj se ardhja juaj dhe e shumë mediave të tjera, shpreh interesin e madh për këtë stërvitje. Kjo është një nga stërvitjet më të mëdha të zhvilluara në vendin tonë, jo vetëm për vendin tone, por edhe një nga stërvitjet më të mëdha që NATO zhvillon në Shqipëri. Është një stërvitje e cila ka filluar me kohë. Ka më se 7-8 muaj që ka filluar konferenca planëzuese për stërvitjen, një stërvitje që ka një përfshirje shumë të madhe. Janë mbi 20 vende që marrin pjesë, nga këto janë shumë vende të NATO-s, vende partnere dhe aspirante, si dhe vendeve të Dialogut Mesdhetar. Pjesëmarrja e Shqipërisë në këtë stërvitje është shumë e madhe, për vetë faktin që ne shërbejmë si vendi pritës për zhvillimin e stërvitjes dhe në këtë stërvitje, në të gjitha fazat e saj, përfshihen rreth 120 oficerë e nënoficerë shqiptarë. Në fazën e dytë, “Lancer”, janë përfshirë edhe trupa që do të lëvizin dhe marrin përsipër stimulime të ndryshme në terren, veçanërisht nga Brigada e Reagimit të Shpejtë dhe Rregjimenti Komando.
Zëri i Amerikës: Zoti gjeneral, cila është e reja e kësaj stërvitjeje? Kemi dëgjuar që ka një pjesë teorike, ku komandat po mundohen të gjejnë gjuhën e përbashkët në veprimet e përbashkëta. Pra, cila është e veçanta e kësaj stërvitjeje? Ku ndryshon ajo nga stërvitjet e tjera?
Luan Hoxha: Veçanëria e kësaj stërvitje qëndron në faktin se është stërvitje Komando-Shtabi dhe, në vetvete, ka si synim të unifikojë veprimet dhe të standardizojë të gjitha proçeset vendimmarrëse në stërvitjet e tjera Komando-Shtabi për shtabet multinacionale. Duke qënë një stërvitje e tillë, që bazohet në shumë norma e standarde, ose me kodin që përdor, “CPX”, i jep mundësi të gjithë personelit të punojë me një gjuhë të përbashkët, me një kod të përbashkët, me një simbolikë të përbashkët për të ushtruar gjatë stërvitjes të gjitha kompetencat dhe veprimet që kanë të gjitha pjesët përbërëse të shtabit dhe për të dalë në vendimmarrjeje, të cilën e merr komandanti i Brigadës Shumëkombëshe. Veçanëri tjetër është që, në këtë stërvitje personeli shqiptar, i cili është angazhuar totalisht, është zgjedhur qëllimisht që të përfitojë nga kjo stërvitje, në rastin e një anëtarësimi të mundshëm dhe të dëshirueshëm në Aleancë. Ky personel duhet të jetë i gatshëm të punojë me këto standarde, duke përfaqësuar denjësisht dhe cilësisht oficerin shqiptar, në përbërje të shtabeve shumëkombëshe që do të bëhen në të ardhmen.
Zëri i Amerikës: Zoti gjeneral, ju lutem na tregoni diçka lidhur me përpjekjet e FA shqiptare për t’u antarësuar në NATO. Cilat janë detyrat e fundit të cilat kanë mbetur pa u kryer për të plotësuar kriteret, pra për të marrë një ftesë për t’u pranuar si anëtar i plotë? Luan Hoxha: Proçesi i anëtarësimit në NATO, ne kemi folur edhe herë të tjera, është një proçes shumë i gjatë dhe, natyrisht një proçes dinamik, që ndryshon nga koha në kohë. Pra, nuk do të thotë që këto masa do jenë statike. Vazhdimisht, dhe me marrjen e ftesës, do të ketë objektiva të reja, do të ketë sfida dhe objektiva të reja për t’u përballuar. Në këtë kohë që ka mbetur në Samitin e Bukureshtit, ne kemi ndërtuar një program të qartë pune, të cilin e kemi quajtur “Nga Samiti i Rigës deri në atë të Bukureshtit”. Në këtë program pune janë përfshirë të gjitha masat që do merren, të gjitha strukturat që do jenë të angazhuara për plotësimin e këtyre masave, koha në të cilat do të ekzekutohen këto masa dhe, niveli që do të arrihet për ekzekutimin e tyre. Mund të them që sfida kryesore është plotësimi i objektivit për kalimin në ushtri tërësisht profesioniste. Do të thotë që, deri në fund të vitit 2010 ne do të kemi një ushtri krejtësisht profesioniste. Sfida e dytë është përgatitja e një Batalioni të dislokueshëm dhe të gatshëm për t’u angazhuar në operacionet e NATO-s në rast nevoje. Faktikisht, edhe gjatë kësaj stërvitjeje ky batalion do të jetë i angazhuar dhe do të lozë në këtë stërvitje, në mënyrë që të mundësojë vlerësimin e tij për nivelin 1, sipas konceptit OCC, dhe më pas të kalojmë në fazat e tjera. Mendoj që këto janë dy objektiva madhore, të cilat do të kenë peshën kryesore edhe për vlerësimin e përgatitjes së Forcave tona të Armatosura për meritimin e ftesës për anëtarësim.
Zëri i Amerikës: Nuk është vetëm Shqipëria që pret një ftesë, janë edhe Kroacia e Maqedonia, si vende të “Kartës së Adriatikut”. Cili është mendimi juaj për bashkëpunimin dhe garën mes këtyre tre vendeve? Luan Hoxha: Keni të drejtë. Realisht është bashkëpunim e garë. Nuk do të ketë kuptim bashkëpunimi pa patur garë dhe, mendoj që kjo garë është shumë pozitive, sidomos për atmosferën në të cilën tre vendet bashkëpunojnë në kuadrin e A3-it. Ne kemi takime të shpeshta dhe pas disa ditësh kemi takimin e shefave të Shtabeve të A3-it. Mendoj që kjo inciativë ka luajtur një rol të rëndësishëm për përgatitjen dhe përfitimin e ekperiencës së njeri tjetrit, por dhe përfitimin në kuadrin e A3-it të eksperiencave të tjera, nga secili vend që ka patur marrëdhënie ose aktivitete bilaterale me vendet e NATO-s ose jo të NATO-s. Mendoj që të tre vendet kanë arritur, për pjesën ushtarake, nivele jashtëzakonisht të mira. Një nivel të krahasueshëm edhe me vendet që janë pjesë e Aleancës sot dhe, mendoj se bashkëpunimi ynë ka qenë një nga sukseset e arritjes së këtyre niveleve.
Marrë nga Zëri i Amerikës (VOA)

Italia mbështet procesin e integrimit të Shqipërisë në BE dhe në NATO

2007-10-18T13:53:00.000Z

Ministri i Mbrojtjes Fatmir Mediu priti në një takim të veçantë ambasadorin e Republikës Italiane të akredituar në Tiranë, Saba D’Elia.Ministri Mediu, pasi e uroi zotin D’Elia për detyrën e re si ambasador fuqiplotë i Italisë në vendin tonë, vlerësoi marrëdhëniet mjaft të mira që ekzistojnë prej vitesh midis dy vendeve tona, duke u ndalur sidomos në bashkëpunimin midis Ministrisë tonë të Mbrojtjes dhe Forcave të Armatosura Shqiptare me Ministrinë e Mbrojtjes dhe Forcat e Armatosura Italiane.Ministri Mediu shprehu vlerësime të larta për ndihmën e pakursyer që qeveria italiane dhe FA të Italisë kanë dhënë dhe vazhdojnë të japin për reformimin dhe modernizimin e Forcave të Armatosura Shqiptare, si dhe për mbështetjen e palëkundur të tyre për integrimin e Shqipërisë në NATO. Tek Italia, theksoi Ministri Mediu, ne kemi gjetur kurdoherë një aleat të fuqishëm dhe të qëndrueshëm dhe për këtë u jemi mirënjohës për gjithçka keni bërë për vendin tonë dhe Forcat e Armatosura.Nga ana e tij, amabasadori Saba D’Elia falenderoi Ministrin Mediu për pritjen e ngrohtë që i rezervoi dhe shprehu bindjen se Italia do të vazhdojë të jetë në mbështetje të plotë të Shqipërisë dhe të Forcave të saj të Armatosura në rrugën për integrimin në NATO dhe BE. Ai shprehu gjithashtu gatishmërinë e tij për të vazhduar më tej rrugën e bashkëpunimit dhe të kontakteve të vazhdueshme me Ministrinë e Mbrojtjes dhe Shtabin e Përgjithshëm të FA për të ndjekur e zbatuar të gjitha projektet që ekzistojnë midis dy vendeve tona në fushën ushtarake, si dhe për të rritur më tej këtë bashkëpunim në të ardhmen.Po sot, Ministri Mediu priti në një takim të veçantë edhe ambasadorin hungarez në Tiranë, Sandor Molnari. Ministri Mediu uroi zotin Molnari për detyrën e re të ambasadorit hungarez në Tiranë, ndërsa më pas të dy bashkëbiseduesit evidencuan marrëdhëniet e mira midis dy vendeve dhe ushtrive tona, përpjekjet dhe progresin që ka bërë Shqipëria në rrugën drejt integrimit euroatlantik, si dhe shprehën qëndrime të njëjta për situatën në rajon e më gjërë.

Ministria e Integrimit dhe Komisioni Europian nënshkruajnë Marrëveshjen Kuadër për programin e para anëtarësimit

2007-10-18T13:48:00.000Z

Ministrja e Integrimit znj. Majlinda Bregu dhe Shefi i Delegacionit të Komisionit Evropian në Tiranë, Ambasadori Helmuth Lohan nënshkruan sot Marrëveshjen Kuadër mes Qeverisë shqiptare dhe Komisionit Evropian për menaxhimin e ndihmës financiare të Bashkimit Evropian nën Instrumentin e Ndihmës së Para Anëtarësimit (IPA).E veçanta e kësaj Marrëveshjeje qëndron në faktin se përgjegjësia për implementimin e IPA-s në vitet në vijim do të transferohet tek autoritetet kombëtare, ndërkohë që dokumenti parashikon rregulla të përcaktuara mirë lidhur me përgjegjësitë e secilit prej aktorëve të përfshirë në manaxhimin e fondeve të ndihmës të Programit IPA. “Ndihma financiare e ofruar nga Bashkimi Evropian përbën shtyllën kryesore mbështetëse për përmbushjen e detyrimeve që rrjedhin nga Marrëveshja e Stabilizim-Asociimit. Qëllimi i saj është mbështetja e Shqipërisë në procesin integrues të vendit duke përfshirë mbështetjen për forcimin e shtetit të së drejtës dhe stabilizimin demokratik, vendosjen e standarteve europiane si dhe zhvillimin ekonomik dhe social të vendit”, tha ministrja Majlinda Bregu, menjëherë pas nënshkrimit. Ndërsa ambasadori Lohan tha se “Komisioni Europian pret që administrata shqitare të marrë në dorë gjithnjë e më shumë programimin dhe përgjegjësinë e vënies në jetë të aktiviteteve të financuara nga IPA”. Z.Lohan sqaroi më tej se IPA ka për qëllim t’i japë ndihmë Shqipërisë për përafrimin me legjislacionin e Bashkimit Evropian, për forcimin e institucioneve demokratike dhe vendosjes së shtetit ligjor, reformën në administratën publike, për reformën ekonomike, respektimin e të drejtave të njeriut, minoriteteve dhe barazisë gjinore, zhvillimin e shoqërisë civile dhe bashkëpunimit rajonal, për mbështetjen e zhvillimit dhe zbutjen e varfërisë. Nga viti 2007, vendi ynë mbështetet nga Instrumenti i ri i Parazgjerimit (IPA), i cili është një vazhdimësi e Programit CARDS. Shuma e programuar për vitin 2007 është 54.3 milion euro dhe do të mbështesë kryesisht projekte të mëdha për përmirësimin e infrastrukturës së ujësjellës kanalizimeve, ngritjen e qendrave të paraburgimit, forcimin e SME-ve, pjesëmarrjen në programet me shumë përfitues (Tempus, Erasmus Mundus) etj.IPA është një istrument i unifikuar për të gjithë vendet kandidate dhe potencial kandidate dhe ka si qëllim forcimin e kapaciteteve të këtyre vendeve për zbatimin e acquis (bazes ligjore te BE). Shuma totale e fondeve akorduar vendit tonë për periudhën 2007 – 2009 është 219.9 milion Euro. Alokimi i këtyre fondeve është një tregues i qartë i mbështetjes në rritje të Bashkimit Evropian, por edhe një kusht për administratën e vendit përfitues për të forcuar kapacitetet e tij me qëllim përfitimin në kohë të kësaj asistence.

Italia dhe Britania e Madhe ratifikojnë MSA-në me Shqipërinë

2007-10-18T13:46:00.001Z

Parlamenti italian ka miratuar me shumicë votash Marrëveshjen e Stabilizim Asociimit mes Bashkimit Europian dhe Shqipërisë, e cila pritet të kalojë së shpejti në dhomat e senatit italian. Ministrja e Integrimit, znj.Majlinda Bregu e ka vlerësuar si mjaft të rëndësishëm këtë fakt, duke qenë se nuk bëhet fjalë thjesht për një vend më shumë në listën e vendeve që kanë ratifikuar MSA-në me vendin tonë, por një vend fqinj që konsiderohet si partner strategjik i Shqipërisë në rrugën drejt integrimit europian.
Gjithashtu, edhe Britania e Madhe ka ratifikuar së fundmi MSA-në me Shqipërinë duke çuar në 12 numrin e vendeve që kanë ratifikuar këtë Marrëveshje me vendin tonë: Letoni, Lituani, Luksemburg, Poloni, Sllovaki, Slloveni, Spanjë, Suedi, Hungari, Irlandë, Itali, Britani e Madhe.

Vizita e Topallit, Kanadaja konfirmon votën pro për anëtarësimin e Shqipërisë në NATO

2007-10-16T18:51:00.000Z

Kryetari i Senatit kanadez: “Jemi shumë të impresionuar me pasurimin e zhvillimit të demokracisë në Shqipëri dhe ky është atribut i Kryetares së Kuvendit dhe i parlamentit tuaj.” Fillim të një epoke të re në marrëdhëniet dypalëshe, u konsiderua vizita e Kryetares së Kuvendit të Shqipërisë, Jozefina Topalli në Kanada nga autoritet më të larta të shtetit të dytë më të madh në botë. Vizita e zonjës Topalli dhe e delegacionit parlamentar shqiptar, ndër të parat vizita zyrtare të këtij niveli në Kanada u realizua me ftesë të Kryetarit të Dhomës kanadeze të Përfaqësuesve, Peter Milliken. Me një axhendë mjaft të ngjeshur me takime me përfaqësuesit e lartë të shtetit kanadez, kjo vizitë merr një rëndësi të veçantë në prag të Samitit të Bukureshtit, ku Shqipëria pret të marrë ftesën për antarësim në NATO dhe përpara zgjidhjes së statusit të Kosovës. Këto ishin edhe dy çështjet kryesore të diskutuara në takimet që Kryetarja e Kuvendit zhvilloi në ditën e parë të vizitës së saj. Në takimin mjaft miqësor me Kryetarin e Senatit të Kanadasë, Noël Kinsella, Kryetarja Topalli i shprehu falënderimet për mbështetjen e vazhdueshme që Kanadaja ka dhënë për Shqipërinë edhe përmes projekteve të saj. Pasi e njohu zotin Kinsella me reformat, rezultatet dhe sfidat në forcimin e shtetit të së drejtës dhe në zhvillimin ekonomik e social të Shqipërisë, zonja Topalli tha se Shqipëria ka si prioritete të saj antarësimin në BE dhe NATO. Nga ana e tij, zoti Kinsella theksoi se Shqipëria ka bërë një progres impresionues në forcimin e demokracisë dhe garantoi mbështetjen e vendit të tij në proceset integruese të vendit tonë. Çështja e Kosovës ishte një tjetër pikë e diskutimit në takim. Zonja Topalli theksoi qëndrimin e Shqipërisë se pavarësia e Kosovës është e vetmja zgjidhje për paqen e qëndrueshme në rajon e më gjerë. Zoti Kinsella tha se Kanadaja mbështet propozimet e Paketës Ahtisari dhe se në Kosovë mund të funksionojë shteti multietnik. Bashkëbiseduesit ndanë të njëjtin mendim për rolin e diplomacisë parlamentare dhe se vizita të tilla duhet të nxisin bashkëpunimin mes parlamenteve, por edhe shkëmbimin e vizitave të grupeve të të rinjve dhe të studentëve. Kryetarja e Kuvendit të Shqipërisë e ftoi zotin Kinsella për një vizitë në Shqipëri, në vendin e paeksploruar, siç u shpreh ajo, që po thith gjithnjë e më shumë turistë dhe investitorë të huaj.
Në fund të takimit zonja Topalli dhe zoti Kinsella dhanë një intervistë për mediat shqiptare:
Pyetje: Zoti Kinsella, cila është pikëpamja juaj mbi zhvillimin e Shqipërisë? Zoti Kinsella: Unë dhe shumë kolegë të mi jemi shumë të impresionuar me pasurimin e zhvillimit të demokracisë në Shqipëri dhe ky është atribut i Kryetares së Kuvendit dhe i Parlamentit tuaj. Ne ndamë mendimin se shoqëria civile në Kanada dhe Shqipëri është shumë e rëndësishme në lidhjen mes dy vendeve. Na vjen mirë që Kryetarja e Kuvendit do të jetë këtu e do të marrë pjesë në çeljen e sesionit të ri parlamentar.
Pyetje: Si e shihni antarësimin e Shqipërisë në NATO, në një kohë kur shqiptarët shpresojnë në marrjen e ftesës në Samitin e ardhshëm? Zoti Kinsella: Së pari, jemi të kënaqur që vitin e shkuar anëtarë të Parlamentit të Shqipërisë, që janë pjesë e organizatës parlamentare të NATO-s, erdhën në Kanada në takimin e përgjithshëm dhe luajtën një rol aktiv dhe nënvizuan rëndësinë e anëtarësimit të vendit tuaj. Kanadaja ka qenë një mbështetëse entuziaste e integrimit tuaj të plotë në NATO dhe ne si parlamentarë në çdo rast do të theksojmë gjithmonë rëndësinë e këtij anëtarësimi. Ne jemi partnertë të mirë në këtë proces dhe e dimë që është një prioritet për Qeverinë, mbështetur edhe nga Parlamenti
Pyetje: Cili është vizioni juaj për çështjen e Kosovës? Zoti Kinsella: Është një sfidë dhe çështje e vështirë. Në fund të pranverës hymë në një proces të ri dhe ne vazhdojmë të inkurajojmë negociatat dhe bisedimet. Në fund të fundit janë njerëzit e atij komuniteti që do të vendosin dhe fqinjët duhet të luajnë një rol të madh në lehtësimin e arritjes së një rezolute.
Pyetje: Si e shihni Paketën Ahtisari? Zoti Kinsella: Kanadaja është e kënaqur me Paketën Ahtisari dhe mbështet propozimet dhe rekomandimet e bëra në këtë dokument. Në fakt, është më mirë të flasësh si historian dhe jo si profet, por unë do të riskoja këtë shprehje, jo duke folur si profet, por kam shpresë që në fund Kosova do ta gjejë rrugën në një unitet kombëtar dhe të luajë atë rol që ajo pjesë e botës ka luajtur në histori.
Pyetje: Zonja Topalli, si e vlerësoni këtë vizitë tuajën në Kanada?
Zonja Topalli: Është një ndër vizitat më të rëndësishme që unë kam bërë gjatë karrierës si Kryetare e Kuvendit. Kjo, jo se nuk ka pasur të tjera takime, por nuk ka pasur vizita zyrtare me takime të një niveli kaq të lartë, në një moment vendimtar siç është ai i marrjes së mbështetjes për ftesën për anëtarësim në NATO dhe, në të njëjtën kohë, për mbështetjen për statusit final të Kosovës, pavarësinë. Edhe në takimin që kam pasur me Ministrin e Jashtëm edhe në takimin me Kryetarin e Senatit kam gjetur mbështetje maksimale për këto dy pika kryesore që janë sfida të kohës për Shqipërinë dhe rajonin dhe unë i jam shumë mirënjohëse, jo vetëm për mbështetjen që kanë dhënë në procesin e antarësimit në NATO, por edhe në perspektivën për t’i bërë më dinamike, më reale dhe më konkrete marrëdhëniet tona, duke shpresuar që kjo vizitë, e para zyrtare, do të pasohet me të tjera vizita shumë të rëndësishme, që do të bëjnë të mundur jo vetëm shkëmbimin e vizitave të grupeve të studentëve, por edhe mbërritjen e investimeve të kompanive më serioze të Kanadasë në Shqipëri. Besoj se është një ndër vizitat më të suksesshme dhe me programin më të veçantë e të ngjeshur që kam realizuar.Në takimin me Ministrin e Jashtëm, Maxime Bernier, Kryetarja e Kuvendit mori garancinë se në politikën e saj të jashtme Kanadaja është partnere dhe mbështetëse në antarësimin e vendit tonë në Organizatën e Atlantikut të Veriut.Kryetarja Topalli e njohu shkurtimisht ministrin Bernier me prioritetet e shtetit shqiptar duke u fokusuar në prioritetet e politikës sonë të jashtme. Ajo nënvizoi rezultatet e arritura në sajë të reformave të guximshme në luftëm kundër krimit, kundër informalitetit dhe në fushën ekonomike.

Italia ratifikon MSA-në me Shqipërinë

2007-10-16T18:09:00.001Z

Parlamenti italian ka miratuar me shumicë votash Marrëveshjen e Stabilizim Asociimit mes Bashkimit Europian dhe Shqipërisë, e cila pritet të kalojë së shpejti në dhomat e senatit italian. Ministrja e Integrimit, znj.Majlinda Bregu e ka vlerësuar si mjaft të rëndësishëm këtë fakt, duke qenë se nuk bëhet fjalë thjesht për një vend më shumë në listën e vendeve që kanë ratifikuar MSA-në me vendin tonë, por një vend fqinj që konsiderohet si partner strategjik i Shqipërisë në rrugën drejt integrimit europian.Së bashku me Italinë, bëhen gjithsej 11 vende që kanë ratifikuar MSA-në me vendin tonë, Letoni, Lituani, Luksemburg, Poloni, Sllovaki, Slloveni, Spanjë, Suedi, Hungari, Irlandë.

Anëtarësimi në NATO, Ministri shqiptar i Mbrojtjes Fatmir Mediu zhvillon vizitë zyrtare në Vjenë

2007-10-15T14:39:00.000Z

Me ftesë të Ministrisë së Mbrojtjes të Republikës së Austrisë, më 11 tetor 2007, ministri ynë i Mbrojtjes Fatmir Mediu zhvilloi një vizitë zyrtare në Vienë. Takimet e zhvilluara në Parlament dhe në Ministrinë e Mbrojtjes së Austrisë, vlerësuan marrëdhëniet shumë të mira që ekzistojnë midis dy vendeve tona dhe u shpreh dëshira për të zhvilluar edhe më tej veçanërisht bashkëpunimin dypalësh në fushën e mbrojtjes. Ministri Mediu u prit në një takim të veçantë nga kryetari i Komisionit të Mbrojtjes të Parlamentit të Austrisë, Dr. Peter Fichtenbauer. Në këtë takim, Ministri Mediu vlerësoi ndihmat që Austria i ka dhënë vendit tonë në procesin e integrimit euro-atlantik, si dhe rolin dhe ndikimin që Austria ka në rajonin e Ballkanit. Të dy palët vlerësuan se midis dy vendeve tona ka lidhje historike, të cilat na afrojnë më shumë në rrugën e bashkëpunimit dhe të miqësisë. Më tej, Ministri Mediu bëri një pasqyrë të reformave të ndërmarra në Shqipëri, sidomos në progresin e bërë për plotësimin e standardeve që kërkon marrja e ftesës për anëtarësimin në NATO, si dhe shtroi domoshmërinë e intensifikimit të bashkëpunimit të komisioneve palamentare të sigurisë të të dy vendeve tona. Në fushën e bashkëpunimit ushtarak midis dy vendeve u vlerësua ecuria e tij, si dhe u shpreh dëshira për intensifikimin e mëtejshëm në të ardhmen. Në këtë kuadër, si një shprehje e vullnetit të mire, pala austriake i dhuroi FA Shqiptare sasi të konsiderueshme ndihmash. Gjithashtu, në këtë takim u diskutua lidhur me çështjen e Kosovës. Ministri Mediu u shpreh për zgjidhjen pa vonesë të statusit përfundimtar të Kosovës në mbështetje të Planit Ahtisari duke e konsideruar këtë plan si bazë për zhvillimin e mëtejshëm të negociatave. Nisur nga roli i Austrisë në rajon, Ministri Mediu kërkoi mbështetjen e Austrisë lidhur me këtë çështje. Nga pala austriake u theksua se Austria do të vazhdojë të luajë rol aktiv në zgjidhjen e statusit përfundimtar të Kosovës. Në këtë takim, u diskutua gjerësisht edhe për bashkëpunimin mes vendeve të A3 (Shqipëri, Maqedoni dhe Kroaci), arritjet dhe konkretizimin e projekteve të përbashkëta rajonale, si dhe domosdoshmërinë për zgjerimin e bashkëpunimit me vendet e ftuara në PfP nga Samiti i Rigës, Bosnje-Herzegovina, Mali i Zi dhe Serbia. Gjatë zhvillimit të aktivitetit, Ministri Mediu u takua me Ndihmës Zëvendës Sekretaren e Shtetit të SHBA, Rosemary di Carlo, ku mori edhe njëherë inkurajimin për reformat e bëra. Gjithashtu Ministri Mediu u takua edhe me homologët e tij nga vendet e rajonit ku u rikonfirmuan qëndrimet për një bashkëpunim sa më të mirë dhe të frytshëm në fushën e integrimit Euro-Atlantik.

Mediu: Anëtarësimi në NATO forcon progresin dhe demokracinë në Ballkan

2007-10-15T14:33:00.000Z

14 Tetor, Tirane- Ministri i Mbrojtjes Fatmir Mediu mori pjesë në Takimin e Ministrave të Mbrojtjes dhe atyre të Jashtëm të vendeve të Kartës së Adriatikut (Shqipëri, Kroaci, Maqedoni dhe SHBA), tre vendeve të Balltikut (Estoni, Letoni, Lituani) si dhe përfaqësues të NATO-s, që u zhvillua në Split të Kroacisë më 13 Tetor 2007. Takimi i Splitit pati në qendër të bisedimeve forcimin e bashkëpunimit dhe shkëmbimin e eksperiencave në proçesin e përgatitjeve për anëtarësim në NATO. Çështjet kryesore të diskutimeve përfshinë zgjerimin e NATO-s në Samitin e ardhshëm të 2008, forcimin e bashkëpunimit, marrjen e eksperiencës nga vendet e Balltikut, bashkëpunimin rajonal dhe probleme të sigurisë. Në këtë takim, Ministri i Mbrojtjes Fatmir MEDIU bëri një pasqyrë të ecurisë së reformave politike, ekonomike dhe ushtarake të ndërmarra në Shqipëri për arritjen e standarteve për të merituar anëtarësimin në Samitin e ardhshëm të Bukureshtit. Ministri i Mbrojtjes njohu delegacionet pjesëmarrëse me arritjet e fundit të Shqipërisë, si krijimi i Komisionit Parlamentar bipartizan për integrimin në NATO, krijimin e komisionit parlamentar për reformën në drejtësi, krijimin e institucionit të Koordinatorit Kombëtar për Integrimin në NATO si dhe me rezultatet në luftën kundër korrupsionit dhe krimit të organizuar. Gjithashtu, Mediu njohu pjesëmarrësit edhe me arritjet e reformave në Forcat tona të Armatosura, me kontributin e tyre në Operacionet Paqeruajtëse si dhe përpjekjet për profesionalizimin, modernizimin, rritjen e kapaciteteve dhe ndërveprueshmërisë për përafrimin sa më të shpejtë me standartet e NATO-s. Gjatë fjalës së tij, Ministri i Mbrojtjes Fatmir Mediu theksoi se Shqipëria e cilëson anëtarësimin e vendit tonë në NATO si mënyrën e vetme të forcimit të progresit dhe demokracisë jo vetëm në Evropën Jug-Lindore por dhe për komunitetin Euro-Atlantik. “Roli i Shqipërisë në misionet ushtarake në Afganistan, Bosnje-Hercegovinë dhe Irak ka konfirmuar profesionalizmin e Forcave tona të Armatosura dhe rolin aktiv të Shqipërisë në sigurimin e paqes dhe stabilitetit në pikat më të nxehta të globit”, - theksoi ai. Ministri Mediu theksoi domosdoshmërinë e zgjidhjes sa më të shpejtë të Statusit Përfundimtar të Kosovës në mbështetje të planit Ahtisari, si element i rëndësishëm që do të kontribuojë ndjeshëm në stabilizimin e paqes dhe sigurisë në rajon.

Ministri i Jashtëm i Shqipërisë, takohet me Këshilltarin diplomatik të Presidentit francez Sarkozy

2007-10-14T20:10:00.000Z

Më datë 11 Tetor, Ministri i Punëve të Jashtme, z. Lulzim Basha u prit në Pallatin Elize nga z. Jean-David Levitte, Këshilltar Diplomatik i Presidentit të Republikës Franceze, z. Nikolas Sarkozy. Në takim u diskutua gjerësisht për nivelin e shkëlqyer të dialogut politik mes dy vendeve dhe mbi nevojën e rigjallërimit të tij të mëtejshëm në nivel të lartë. Në këtë kuadër, z. Levitte i përcolli Ministrit të Jashtëm Basha ftesën që Presidenti Sarkozy i drejton Kryeministrit të vendit, z. Sali Berisha për të vizituar Parisin zyrtar, në një kohë sa më të afërt. Dy bashkëbiseduesit ranë më tej dakord se arritjet e fundit dhe ecuria e suksesshme e reformave të ndërmarra në Shqipëri, përbëjnë një garanci të sigurt për përmbushjen e objektivave parësorë të Qeverisë Shqiptare në drejtim të integrimit në NATO dhe Bashkimin Europian.Z. Levitte e siguroi Ministrin Basha për vullnetin personal të Presidentit Sarkozy dhe gatishmërinë e plotë të Francës, për sa i përket aspiratave te Shqipërisë për anëtarësim në NATO dhe ratifikimin e shpejtë të MSA-së me Shqipërinë. Në takim u trajtua gjerësisht edhe zgjidhja e statusit final të Kosovës, si një faktor i domosdoshëm për stabilizimin përfundimtar të rajonit. Bashkëbiseduesit këmbyen mendime dhe informacione duke iu referuar edhe takimit te fundit Putin-Sarkozy ne Moske. Ministri Basha zhvilloi gjithashtu një darke pune me z. Patrick Devedjian, Sekretar i Përgjithshëm i Partisë së Bashkimit për Lëvizjen Popullore, (UMP).

Di Carlo: SHBA përkrah vendet e “Adriatik 3” për anëtarësimin në NATO

2007-10-13T16:13:00.000Z

Split, 13 tetor (MIA) - Zëvendësndihmësja e sekretares amerikane të shtetit Rozmari di Karlo në konferencën e shtypit pas takimit "Adriatik-Baltik-Atlantik" theksoi se SHBA-ja i përkrah vendet e rajonit për anëtarësim në NATO, njoftoi raportuesi i MIA-s nga Spliti."Shpresoj se Maqedonia, Kroacia dhe Shqipëria do të vazhdojnë me reformat dhe do të paraqitin një kandidaturë më të mirë në Samitin në Bukuresht. SHBA-ja do të vazhdojë të punojë me ta dhe do të kujdeset që anëtarësimi të realizohet. Nuk duam të spekulojmë, NATO ende nuk ka sjellë vendime, por progresi është evident në disa fusha në të tre vendet, ndërsa pjesëmarrjen e tyre në operacionet e NATO-s e vlerësojmë shumë", theksoi Di Karlo. Duke u përqëndruar në situatën në Kosovë, ajo theksoi se status-kuoja nuk është e mirë për rajonin dhe shprehu besim se diskutimet do të japin rezultat. Di Karlo gjithashtu tha se në zgjidhjen e çëshjtes kosovare SHBA-ja e përkrah planin e Marti Ahtisarit. Ministri i Punëve të Jashtme i Estonisë Urmas Paet pozitivisht e vlerësoi përparimin e Maqedonisë "Pozicioni ynë është se dyert e NATO-s duhet të jenë të hapura dhe vlerësojmë se gjithashtu është e rëndësishme reformat e çdo vendi të vlerësohen në veçanti. Për sa i përket Maqedonisë, reformat lëvizin në drejtimin e dukur, ka akoma për të bërë, por nga ana tjetër ka edhe kohë të mjaftueshme, para jush është një gjysmë viti i tërë. Shpresoj se do të jetë e mundur NATO-ja nga ana e tyre t'u japë përgjigje pozitive në samitin e ardhshëm", theksoi Paet. Ministrat e Punëve të Jashmte dhe të Mbrojtjes së Maqedonis, Antonio Milloshoski dhe Llazar Elenovski shprehën kënaqësi nga përkrahja, si nga ana e SHBA-së ashtu edhe nga shtetet baltike për anëtarsimin e Maqedonisë në Aleancën Veriatlantike. Pas takimit "Adriatik-Baltik-Atlantik" shefi i diplomacisë maqedonase Antonio Milloshoski theksoi se Maqedonia, Shqipëria dhe Koracia janë në pragun e asaj që ta përsërisin suksesin e vendeve baltike, të cilat nën sponsorizimin e SHBA-së u bënë anëtare të Aleancës Veriatlantike. "Konfirmuam se kemi aftësi për bashkëpunim rajonal dhe solidaritet në vetë Grupin e Adriatikut, që mundëson një kandidaturë më të mirë. Maqedonia me njërën këmbë ka hyrë në NATO, së bashku me partnerët e saj, mbetet që ta bëjmë hapin tjetër, t'i përkushtohemi reformave në periudhën e ardhshme. Në takim u konfirmua se suksesi për NATO-n është zgjerimini saj, ndërsa për Samitin në Bukuresht zgjerimi do të jetë sukses edhe për rajonin", theksoi Milloshoski. Ministri i Mbrojtjes Llazar Elenovski theksoi se në takimin e sotëm u konfirmua përkrahja për anëtarësimin e Maqedonisë në NATO, si nga përfaqësuesit e SHBA-së ashtu edhe nga përfaqësuesit e shteteve baltike. Edhe një herë u konfirmua se zgjerimi i NATOs do të jetë në grup. Në asnjë moment nuk u tha se dikush nga vendet e Grupit të Adriatikut është më i avancuar se tjetri në fushën e reformave", the Elenovski. Ai shprehu optimizëm se në samitin e ardhshëm të NATO-s në prill të vitit 2008 Maqedonia do të marrë ftesë për anëtarësim. Në margjinat e takimit "Adriatik-Baltik-Atlantik", ministrat e Punëve të Jashtme të Maqedonisë dhe të Kroacisë, Antonio Milloshoski dhe Kolinda Grabar-Kitaroviq në prani të përfaqësuesve të bashkësisë maqedonase në Kroaci nënshkruan Marrëveshje për mbrojtjen e pakicave. "Marrëveshja është shumë e rëndësishme, me rëndësi të madhe për të dy vendet, të cilët me këtë tregojnë se i respektojnë normat më të larta për të drejtat e njeriut, theksoi Graber-Kitaroviq. Milloshoski tha se pakica maqedonase ka një etablim të mirë në shoqërinë kroate, duke theksuar se ka edhe përfaqësuesin e saj në Parlamentin kroat. Ai dokumentin e vlerësoi si "urë të vogël por të fuqishme për afrim dhe edhe një shembull si në rajon duhet investuar në të drejtat e njeriut. Burimi: MIA

OFICERI SHQIPTAR SHPALLET HEROI I PARE NE STERVITJEN E NATO-s, "COOPERATIVE LONGBOV/LANCER 07"

2007-10-13T14:31:00.000Z

TIRANE - Major Kosta Jano, oficer i Shtabit Shqiptar, u vlerësua për profesionalizmin e tij, cilësitë e shkëlqyera dhe aftësinë për t’u integruar lehtësisht në një mjedis shumëkombësh, duke u shpallur Heroi i Parë i Ditës për stërvitjen "Cooperative Longbow/Lancer 2007", e cila po zhvillohet aktualisht në Tiranë, Shqipëri.
Major Kosta Jano gjatë kësaj stërvitjeje ka luajtur rol kryesor në Qendrën e Operacioneve Taktike dhe në seksionin e planizimit. Ai drejtoi me sukses aktivitetin operacional të Brigadës Shumëkombëshe dhe aktualisht është duke planifikuar operacione që do të kryhen në të ardhmen.
"Jam shumë i lumtur dhe i nderuar të jem i pari që i akordohet ky shpërblim," tha Major Kosta Jano. "Megjithëse për shumëkënd mund të duket si një shpërblim i vogël, ky vlerësim është mishërim i punës së madhe që ne po bëjmë gjatë kësaj stërvitjeje", shtoi ai.
Me qëllim që të arrinte objektivat e tij në mënyrë të suksesshme, Major Kosta Jano i koordinoi përpjekjet e tij me Major Rudolf Halbartschlager, i cili drejton Qendrën e Operacioneve Taktike. Major Halbartschlager, të cilit iu akordua gjithashtu vlerësimi, është përgjegjës për informimin mbi operacionet aktuale dhe siguron informacionin tërësor mbi situatat operacionale.
Gjeneral Lejtnanti amerikan John Gardner, i cili aktualisht është Zëvendës/Komandant në Selinë Qendrore të NATOS, në Heildelberg, për profesionalizmin e shfaqur gjatë stërvitjes dhe aftësitë drejtuese shumë të mira, vlerësoi Major Kosta Jano dhe Major Rudolf Halbartschlager, dy përfaqësuesit e Vendeve të Partneritetit për Paqe, me një dhuratë simbolike, në praninë e pjesëmarrësve të tjerë.
Stërvitja e Partneritetit për Paqe të NATO-s shërben si instrument jetësor në zhvillimin dhe nxitjen e aftësisë së forcave të ndryshme ndërkombëtare për të punuar sëbashku, në mënyrë efektive gjatë operacioneve në mbështetje të paqes dhe reagimit në raste krizash të drejtuara nga NATO. Burimi: ATSH

Komandanti i Komponentit Tokësor të NATO-s, vlerëson ndryshimet në Shqipëri

2007-10-11T21:18:00.000Z

Kryeministri Berisha zhvilloi sot një takim me Gjeneral Lejtnant, Roland Kather, Komandant i Komponentit Tokësor të NATO-s, në Heidelberg në Gjermani, i cili ndodhet në Shqipëri në kuadër të stërvitjes së përbashkët “Cooperative Longbow/Lancer 07”. Në takim të dy palët vlerësuan bashkëpunimin e shkëlqyer mes Shqipërisë dhe Aleancës së Atlantikut të Veriut. Kryeministri Berisha dhe Gjeneral Lejtnant Kather, e cilësuan si mjaft të rëndësishme stërvitjen e përbashkët “Cooperative Longbow/Lancer 07”, e cila synon të ndihmojë ndërveprimin ndërmjet NATO-s dhe forcave partnere në kryerjen e një operacioni kompleks e dinamik.Kryeministri e njohu z. Kather me reformat e ndërmarra nga qeveria shqiptare për modernizimin e Forcave të Armatosura Shqiptare, për krijimin e një ushtrie të vogël, tërësisht profesioniste, të mirëpajisur dhe të mirëstërvitur.Gjithashtu Kryeministri e vuri theksin në mbështetjen financiare që u ka dhënë qeveria këtyre reformave duke veçuar rritjen e buxhetit për Forcat e Armatosura me 2 për qind të Prodhimit të Brendshëm Bruto, në vitin 2008.Nga ana e tij, Gjeneral Lejtnant, Roland Kather, pasi falënderoi Kryeministrin Berisha për pritjen, shprehu vlerësimin e tij për arritjet e reformave në Shqipëri. “Jam i impresionuar me ndryshimet rrënjësore që janë bërë në Shqipëri dhe zhvillimin e madh që ka marrë vendi”, tha Komandanti i Komponentit Tokësor të NATO-s, Roland Kather.Gjithashtu Gjeneral Lejtnant, Roland Kather vlerësoi nivelin e lartë të përgatitjes të ushtarakëve në Shqipëri, dhe profesionalizmin e tyre, të demonstruar gjatë stërvitjes “Cooperative Longbow/Lancer 07”. Kjo stërvitje është një nga aktivitetet kryesore të NATO-s që zhvillohet në Shqipëri për vitin 2007. Stërvitja është një mesazh i angazhimit serioz të vendit, që do t`u shërbejë oficerëve dhe nënoficerëve shqiptarë për familjarizimin me metodat e punës në shtabe në një ambient shumëkombësh. Gjithashtu stërvitja në terren do të shërbejë në unifikimin e procedurave të drejtimit të trupave, në përputhje me ato ta Aleancës dhe të ndërveprimit me Aleancën.

Forcat e Armatosura të Shqipërisë, përfundon stërvitja “Luftëtari i Çeliktë”

2007-10-11T21:08:00.000Z

Që nga data 10 shtator 2007, në rajonin e Zall-Herrit studentët e vitit të dytë të Universitetit Ushtarak “Skënderbej” zhvilluan stërvitjen e vjeshtës dhe stërvitjen fushore të koduar “Luftëtari i Çeliktë”.Me këtë rast, sot u organizua “Dita e hapur”, ku sipas një programi të veçantë u zhvilluan disa veprimtari, përfundimi i të cilave shënoi edhe mbylljen me sukses të këaj stërvitje të rëndësishme, që përfshinë programi i arsimimit të studentëve tanë ushtarak. Krahas studentëve pjesëmarrës në stërvitje, në këtë aktivitet ishte i pranishëm komandanti i Doktrinës dhe Stërvitjes Sandër Lleshi, rektori i UU “Skënderbej” Dr. Prof. Elmaz Leci, drejtorë dhe ushtarakë të lartë të Ministrisë së Mbrojtjes dhe Shtabit të Përgjithshëm të FA-së, atashe ushtarakë të akredituar në vendin tonë, përfaqësues të CUBIC etj.

Fillimisht për të pranishmit, studenti i vitit të katërt, Adrian Prençi, në cilësinë e shefit të Qendrës Operacionale të stërvitjes, paraqiti një brifing, ku foli për konceptin e arsimimit dhe të stërvitjes në UU “Skënderbej”, për organizimin e trupës studentore dhe shpërndarjen e tyre në këtë stërvitje, për rajonin e stërvitjes dhe specifikat e tij, si dhe për fazat dhe aspekte të shumta të zhvillimit të saj.Më pas, aktiviteti vijoi me një seri veprimtarishë dhe demonstrimesh stërvitore, si kalimi me litar dhe mjete të tjera në liqen, kalimi i pengesave xheniere, kalimi i zonës së infektuar nga lëndët helmuese luftarake, dhënia e ndihmës së parë të të plagosurve, zhvillimi i qitjeve me armët personale etj. Gjajtë këtyre demonstrimeve ushtarake ra në sy disiplina dhe dinamizmi i studentëve dhe i drejtuesve të tyre, si dhe profesionalizmi i lartë në zbatimin e kërkesave dhe të standardeve të përcaktuara në programin e stërvitjes.Stërvitja “Luftëtari i Çeliktë” zhvillohet nga studentët e vitit të dytë në fillim të vitit akademik dhe realizohet në disa faza, gjatë të cilave studentët përpunojnë dhe përvetësojnë mjaft elementë të stërvitjes individuale taktike, njohjen e armatimit dhe qitjen me armët organike të këmbësorisë, kalimin e pengesave të ndryshme malore dhe ujore, të patrullimit, të goditjes së objektit, të stërvitjes me skuadër në operacionet e mbështetjes së paqes, si dhe kombinimin e elementëve të përgatitjes teknike dhe kompaktësimin e grupit.

Në stërvitjen e vjeshtës dhe stërvitjen fushore të koduar “Luftëtari i Çeliktë” morën pjesë 134 studentë të vitit të dytë, ndërsa 17 studentë të vitit të tretë kanë vepruar në rolin e komandantit të skuadrës dhe 15 studentë të vitit të katërt në rolin e komandantit të togës dhe në detyra shtabi. Gjatë këtij muaji, studentët e tjerë të vitit të tretë dhe të vitit të katërt të UU “Skënderbej” janë shpërndarë në në njësitë e repartet e Forcave të Armatosura duke kryer detyra në rolin e komandantit të skuadërs dhe të komandantit të togës.Në mbyllje të stërvitjes, komandanti i Doktrinës dhe Stërvitjes kolonel Sandër Lleshi përshëndeti studentët për përfundimi me sukses të stërvitjes, ndërsa për studentët pjesëmarrës u shpërndanë certifikata.

Zyrtarët shqiptarë, vizitë studimore në Zyrën e kryeprokurorit të Madridit

2007-10-11T14:32:00.001Z

Në datat 25-28 Shtator 2007, u organizua një vizitë studimore në Qendrën e Trajnimit për Studime Juridike dhe zyrën e Prokurorit të Përgjithshëm në Madrid, si dhe në Shkollën e Magjistraturës në Barcelonë (Spanjë). Në këtë vizitë merrte pjesë një delegacion shqiptar i përbërë nga dhjetë pjesëmarrës përfaqësues të Shkollës së Magjistraturës, Këshillit të Lartë të Drejtësisë, Ministrisë së Drejtësisë, si dhe kancelarë nga disa gjykata të vendit. Gjatë kësaj vizite, delegacionit shqiptar iu dha mundësia të njihet nga afër me mënyrën e organizimit të trajnimit fillestar dhe të vazhduar për gjyqtarët, prokurorët dhe administratën gjyqësore në Spanjë. Kjo vizitë pati një rëndësi të veçantë duke pasur parasysh faktin se përkon me kohën kur është ngritur tashmë një grup pune i përbërë nga përfaqësues të Ministrisë së Drejtësisë, Shkollës së Magjistraturës dhe Gjykatave, i cili po punon për hartimin e një programi për trajnimin e vazhduar të administratës gjyqësore në Shqipëri.
Ky informacion është marrë nga faqja zyrtare e Këshillit të Europës për Shqipërinë, në adresën http://www.coealb.org

Vizita në Francë, Ministri i Jashtëm në konferencën “Roli i Shqipërisë për stabilitet në rajonin e Ballkanit”

2007-10-10T21:03:00.000Z

Ministri i Punëve të Jashtme z. Lulzim Basha niset më datën 10.10.2007 në një vizitë pune në Paris. Ai do të zhvillojë një takim pune me homologun e tij francez, Ministrin e Punëve të Jashtme z. Bernard Kouchner.Në qendër të bisedimeve dypalëshe do të jenë çështje të marrëdhënieve dypalëshe, perspektiva evropiane e euroatlantike e Shqipërisë, zhvillimet në rajon dhe çështja e statusit të Kosovës.Gjatë vizitës së tij në Paris Ministri i Jashtëm z. Lulzim Basha do të takohet me Drejtorin e Përgjithshëm të UNESCO-s z. Matsuura, do të ketë takime të veçanta në Komisionet e Politikës së Jashtme në Senat dhe në Asamblenë Kombëtare, si dhe do të zhvillojë takime me zyrtarë të tjerë të lartë francezë.Ministri Basha do të marrë pjesë dhe do të referojë në Konferencën me temë “Roli i Shqipërisë për stabilitet në rajonin e Ballkanit”.

Filloi stërvitja e NATO-s në Shqipëri, “Cooperative Longbow/Lancer 07”

2007-10-10T20:59:00.000Z

Sot pasdite në ambjentet e Komandës së Doktrinës dhe Stërvitjes në Tiranë u zhvillua ceremonia e hapjes së stërvitjes “Cooperative Longbow/Lancer 07”.

Në këtë aktivitet të rëndësishëm ishte i pranishëm ministri i Mbrojtjes Fatmir Mediu, shefi i Shtabit të Përgjithshëm të FA-së gjeneral lejtnant Luan Hoxha, deputetë të Komisionit Parlamentar të Sigurisë, ambasadorë dhe atashetë ushtarakë të vendeve të NATO-s dhe vendeve partnere, përfaqësues të Shtabit të NATO-s, të DIE-s, ODC-së etj. Gjithashtu të pranishëm ishin edhe komandanti i Komponentit Tokësor të NATO-s në Heidelberg në Gjermani, gjeneral lejtnant Roland Kather, si dhe zv.komandanti i këtij Komponeti, gjeneral lejtnant John D. Gardner.
Kjo stërvitje është një ndër veprimtaritë më të mëdha ushtarake që zhvillohet në vendin tonë në bashkëpunim me NATO-n dhe më e madhja e këtij viti. Qëllimi i saj është të ndihmojë ndërveprimin ndrëmjet NATO-s dhe forcave partnere në kryerjen e një operacioni kompleks e dinamik, si dhe të sigurojë një balancim më të mirë midis kërkesave trajnuese të NATO-s dhe nevojave për trajnim të vendeve partnere, duke përfshirë këtu edhe eksperiencën botërore në operacione reale. Në stërvitje do të marrin pjesë afërsisht 1100 ushtarakë nga 25 vende të NATO-s dhe PfP-së si: SHBA-ja, Britania e Madhe, Kanadaja, Greqia, Hungaria, Polonia, Shqipëria, Armenia, Austria, Azerbaxhani, Maqedonia, Gjeorgjia, Zvicra, Ukraina etj. Stërvitja do të zhvillohet në dy faza: stërvitje e shtabit të një Brigade Shumëkombëshe në mjediset e Komandës së Doktrinës dhe Stërvitjes dhe stërvitje fushore e një batalioni shumëkombësh për përfshirje në operacione paqeruajtëse, e cila do të zhvillohet në rajonin e Zall-Herrit. Kjo stërvitje përfundon në fund të muaji tetor 2007.

Fjalën e hapjes në këtë ceremoni e mbajti shefi i Shtabit të Përgjithshëm i FA-së, gjeneral lejtnant Luan Hoxha. Më pas përshëndeti ministri i Mbrojtjes Fatmir Mediu, i cili, pasi i uroi mirëseardhjen në Shqipëri pjesëmarrësve të stërvitjes “Cooperative Longbow/Lancer 2007”, theksoi se vendimi i Shtabit të NATO-s për të zgjedhur Shqipërinë si vend pritës është një nder dhe privilegj për Forcat tona të Armatosura dhe vendin tonë dhe në të njëjtën kohë është një rast tjetër i mirë për FA Shqiptare për t’u stërvitur më tej në përputhje me standardet dhe procedurat e NATO-s. “Si stërvitja ushtarake më e madhe ndërkombëtare e realizuar ndonjëherë në Shqipëri dhe një nga stërvitjet më të rëndësishme të NATO-s për vitin 2007, theksoi më tej në fjalën e tij Ministri Mediu, kjo është një ngjarje e shënuar me rëndësi të madhe për Shqipërinë, si një vend që pret ftesën për anëtarësim në Aleancën e Atlantikut të Veriut në pranverë të vitit të ardhshëm”.
Në vijim, duke folur për angazhimin e ushtarakëve shqiptarë në këto veprimtari, ai u shpreh se, FA Shqiptare prej një periudhe tashmë të gjatë janë shndërruar në një pjesëmarrëse aktive në operacionet e NATO-s, në programet trajnuese dhe stërvitjet e përbashkëta. Kjo ka sjellë rritjen natyrale të prezencës së oficerëve shqiptarë në shtabet dhe komandat e vartësisë së NATO-s. “Qëllimi ynë, nënvizoi Ministri Mediu, është të implementojmë më tej standardet e stërvitjes së NATO-s, jo vetëm në njësitë e deklaruara tashmë në grupin “OCC Pool of Forces” dhe në njësitë tona prioritare brenda Forcës së Bashkuar, por gjithashtu në gjithë FA. Një shembull i objektivave tona për standardet e trajnimit, do të jetë dhe vlerësimi zyrtar i një kompanie këmbësorie të Brigadës sonë të Reagimit të Shpejtë gjatë stërvitjes “Cooperative Longbow/Lancer 2007”.”
Në fund të fjalës së tij, duke shprehur bindjen në përfundimin me sukses të kësaj stërvitje, ministri i Mbrojtjes Fatmir Mediu deklaroi të hapur stërvitjen e NATO-s “Cooperative Longbow / Lancer 2007”.

Pjesëmarrësit e stërvitjes dhe të pranishmit e tjerë i përshëndeti edhe komandanti i Komponentit Tokësor të NATO-s në Heidelberg në Gjermani, gjeneral lejtnant Roland Kather.
Po sot, ministri i Mbrojtjes Fatmir Mediu priti në një takim të veçantë komandantin e Komponentit Tokësor të NATO-s në Heidelberg në Gjermani, gjeneral lejtnant Roland Kather, si dhe zv.komandantin e këtij Komponeti, gjeneral lejtnant John D. Gardner. Në këtë takim, krahas stërvitjes “Cooperative Longbow/Lancer 07” që filloi sot në vendin tonë, u diskutua edhe për probleme të tjera që lidhen me progresin e bërë në realizimin e reformave në fushën e mbrojtjes, për reformimin dhe modernizimin e FA Shqiptare dhe angazhimin e tyre për plotësimin e standardeve që kërkohen për anëtarësimin në NATO.

Rezoluta e Asamblesë Parlamentare të NATO-s mbështet anëtarësimin e vendeve të “Adriatik 3”

2007-10-10T14:12:00.000Z

Asambleja Parlamentare e Organizatës së Atlantikut Verior miratoi në Reikjavik të Islandës një rezolutë ku mbështet Shqipërinë, Kroacinë dhe Maqedoninë për marrjen e ftesës së anëtarësimit në NATO, në Samitin e pritshëm të Bukureshtit vitin e ardhshëm. Rezoluta e miratuar nga deputetët e vendeve anëtare të NATO-s, inkurajon Shqipërinë, Kroacinë dhe Maqedonisë, si vende të kartës “Adriatik 3” të forcojnë përpjekjet e tyre në thellimin e reformave. Në rezolutë u bëhet thirrje krerëve të Organizatës së Atlantikut Verior që në Samitin e ardhshëm të ftojnë tri vendet e “A3” për nisjen e bisedimeve për anëtarësim. Kryeministri shqiptar Sali Berisha i cili bashkë me Sekretarin e Përgjithshëm të NATO-s Jap te Hoop Schefer ishte drejtues i seancës para miratimit të rezolutës, garantoi Organizatën për vullnetin dhe përpjekjet e Shqipërisë në arritjen e standardeve politike dhe ushtarake. Berisha në fjalën e tij para Asamblesë së deputetëve të NATO-s, beri në prezantim të reformave të ndërmarra nga Qeveria për ta kthyer Shqipërinë në një vend të sigurt dhe me ekonomi të qëndrueshme. Berisha ka përmendur reformën fiskale, luftën kundër krimit të organizuar dhe përpjekjet e qeverisë për ndëshkimin dhe luftën kundër korrupsionit. Kryeministri Berisha tha se Shqipëria beson në mbështetjen e vendeve anëtare të NATO-s dhe vlerësimin e tyre pozitiv që në prill të vitit 2008 të meritojë ftesën për anëtarësim në Organizatën e Atlantikut Verior.

Ambasadori i Çekisë në NATO: Mbështesim përpjekjet e Shqipërisë për anëtarësim

2007-10-05T20:18:00.000Z

Kryeministri Berisha zhvilloi sot një takim me përfaqësuesin e përhershëm të Republikës së Çekisë në NATO, zotin Stefan Fule. Në takim Kryeministri Berisha u shpreh se integrimi në NATO është dhe mbetet prioritet i qeverisë shqiptare. Kryeministri e njohu ambasadorin Fule me reformat e ndër marra nga qeveria shqiptare dhe arritjet në kuadër të integrimit në NATO dhe BE.Kryeministri theksoi se integrimi në NATO gëzon mbështetjen e 94 % të publikut shqiptar dhe të të gjitha forcave politike. “Gjatë 15 vjetëve të fundit Shqipëria ka mbajtur marrëdhënie të ngushta me Aleancën dhe ka vënë në dispozicion të saj portet dhe aeroportet, si dhe është përfshirë në misionet paqeruajtëse të NATO-s në Afganistan dhe Bosnje”, u shpreh Kryeministri.Gjithashtu Kryeministri e vuri theksin në reformat që janë ndërmarrë në Forcat e Armatosura dhe rritjen e buxhetit për ushtrinë në 2 % të Prodhimit të Brendshëm Bruto në vitin 2008, me qëllim krijimin e një ushtrie të vogël, por tërësisht profesioniste. Më tej Kryeministri theksoi se Shqipëria është një demokraci funksionuese dhe efektive. “Zgjedhjet e vitit 2005, zgjedhjet lokale të 2007 dhe zgjedhja e Presidentit dëshmuan pjekurinë e demokracisë shqiptare”, nënvizoi Kryeministri. Kryeministri e njohu Ambasadorin Fule me vendosmërinë e qeverisë për të vijuar luftën kundër krimit të organizuar, korrupsionit , zhvillimin ekonomik dhe shndërrimin e Shqipërisë në vendin më tërheqës për investimet e huaja. Nga ana e tij ambasadori Fule shprehu mbështetjen e Republikës së Çekisë për integrimin e Shqipërisë në NATO. Ambasadori vlerësoi mbështetjen e gjerë publike dhe politike që gëzon integrimi në NATO dhe në BE.Gjithashtu z. Fule vlerësoi arritjet e reformave dhe inkurajoi qeverinë shqiptare në vazhdimin e tyre me qëllim përmbushjen e të gjitha standardeve për anëtarësimin në NATO.

Kryeministri shqiptar takohet me Drejtorin e Zyrës së Sigurisë së NATO-s

2007-10-05T20:05:00.000Z

Kryeministri Berisha prit sot në një takim zotin Thomas E. McKeever, Drejtor i Zyrës së Sigurisë së NATO-s dhe Këshilltar i Sekretarit të Përgjithshëm të NATO-s për Çështjet e Sigurisë.

Gjatë takimit, Kryeministri Berisha e njohu zotin McKeever me reformat e thella dhe të gjithanshme të ndërmarra nga qeveria shqiptare, në kuadër të procesit të integrimit në NATO, në të gjitha fushat, ekonomike, politike, të mbrojtjes, në fushën e sigurisë së informacionit të klasifikuar, etj. Gjithashtu, Kryeministri shprehu vendosmërinë e plotë të qeverisë shqiptare për të thelluar edhe më tej këto reforma, për të merituar ftesën për anëtarësim në NATO.

Zoti McKeever falënderoi përzemërsisht Kryeministrin për mikpritjen dhe shprehu vlerësimin e tij për ecurinë e reformave, në veçanti punën e bërë për sa i përket sigurisë së informacionit të klasifikuar. Ai e siguroi Kryeministrin për mbështetjen e plotë të Aleancës në përpjekjet e Shqipërisë për anëtarësim në NATO.

“Arrestimet për korrupsion duhet të përfundojnë me dënime”

2007-10-04T16:34:00.000Z

Trazhgim Sokolaj/TIRANE
Shefi i programit amerikan ICITAP në
Tiranë: Kërkohet ndjekje penale efektive
Arrestimet e kohëve të fundit janë vetëm fillimi i luftës efektive kundër korrupsionit. Darrel Hart, shefi i programit amerikan ICITAP që vepron në Shqipëri prej vitit 1997 thotë se ndjekja penale e rasteve të korrupsionit ka efekt vetëm nëse përfundon me dënime. “Korrupsioni në Shqipëri është një prej shkaqeve kryesore, në mos kryesori, për shqetësim në komunitetin ndërkombëtar në lidhje me sigurinë publike dhe sundimin e ligjit”, shprehet Hart. Në intervistën e tij për gazetën “Panorama”, shefi i ICITAP në Shqipëri, komenton reformën dhe shkarkimet në polici të cilat janë përcjellë më shqetësim ndërsa rrëfen fushat ku po bashkëpunohet me organet shqiptare të rendit drejtim të përmirësimit të shërbimeve që ato ofrojnë për qytetarët.
Programi ICITAP është i pranishëm në Shqipëri që në vitin 1998, cilat kanë qenë fushat në të cilat keni bashkëpunuar me autoritetet shqiptare në këto 9 vjet? A mund të na thoni diçka lidhur me rezultatet që keni arritur në bashkëpunim me palën shqiptare?
Një histori mbi programin e ICITAP në Shqipëri mund të gjendet në faqen e të dhënave bashkëngjitur. Në përgjithësi, jemi të përkushtuar të ndihmojmë me reformat për një drejt një shoqërie demokratike në lindje e sipër dhe në zhvillim, një shoqëri ku sundimi i ligjit përbën një përparësi. Profesionalizimi i policisë mund të marrë shumë drejtime dhe është i mbushur me sfida të përhershme, duke pasur parasysh donatorët e shumtë ndërkombëtarë që janë aktivë këtu. Prandaj është i nevojshëm bashkërendimi nëpërmjet Konsorciumit Ndërkombëtar dhe shtatë Grupeve të Punës në të. Ndërkohë që në Shqipëri janë shënuar shumë arritje të rëndësishme gjatë 10 viteve të fundit, një numër domethënës prej tyre janë arritur vetëm kohët e fundit.
Së pari – Këtë verë, Roja Bregdetare e Sh.B.A. kreu një vlerësim të Porteve Ndërkombëtare Shqiptare dhe gjeti që janë thelbësisht në përputhje me Kodet IMO ISPS. Situata nuk ishte e tillë deri dy vite më parë dhe tregon se çfarë mund të arrijë qeveria shqiptare kur merr asistencë.
Së dyti – Dy shkolla bazë rekrutësh janë diplomuar në programin e ri të Patrullave të Përgjithshme në Akademi. Tani, fokusi do të kthehet mbi trainimin e afro 6,000 oficerëve në detyrë me anë të këtij koncepti. Me pak fjalë, ky trainim ndryshon mënyrën se si Policia e Shtetit kryen punën dhe ofron shërbime. Patrullat e Përgjithshme janë të përgatitur më mirë për të trajtuar sfidat e shumta të policimit në një shoqëri demokratike në krahasim me përgatitjen nga shkolla e mëparshme. Mënyra më e mirë për të sjellë ndryshim në një organizatë është nëpërmjet një programi të gjithanshëm me synime të qarta. Trainimi për të gjitha nivelet e policisë, nga oficeri që sapo fillon shkollën deri në Drejtorin e Përgjithshëm, duhet të jetë i planifikuar, i organizuar dhe i ofruar me anë të një Departamenti Trainimi profesionist.
Së treti – Miratimi i Ligjit të Policisë së Shtetit. Ndërkohë që PAMECA ka kryesuar hartimin e këtij ligji, edhe ICITAP dhe OSBE ndihmuan dhe ishin të pranishme në Komisionet Parlamentare për të trajtuar pyetje dhe shqetësime. Kjo pikë shqyrtohet më hollësisht më poshtë.
Duke iu referuar bashkëpunimit që keni me Ministrinë e Brendshme në Shqipëri, por edhe ekspertizës tuaj në fushën e ndihmës dhe mbështetjes në drejtim të Hetimit Kriminal, cilat mendoni se janë sfidat e kohës për këtë institucion, kam parasysh këtu në mënyrë të veçantë policinë shqiptare? Çfarë mendoni se duhet të ndryshojë policia shqiptare për rritjen e efektivitetit të saj në luftën kundër krimit të organizuar dhe përmirësimit të shërbimeve për qytetarët?
Bashkësia ndërkombëtare, përfshi edhe ICITAP, ka punuar për të ndërtuar kapacitetin e Policisë së Shtetit në këtë fushë me anë të programeve të shumta të trainimit, dhurimit të pajisjeve, si dhe udhëzimit e këshillimit të personave përgjegjës për kryerjen e hetimeve penale. Kjo përpjekje minohet kur ata oficerë që i kanë zhvilluar këto aftësi hiqen apo transferohen në detyra të tjera. Operatorët e sistemit TIMS në Pikat e Kontrollit Kufitar, partnerët tanë në Hetimin e Krimit të Organizuar si dhe homologët tanë në Akademinë e Policisë përbëjnë vetëm pak nga shembujt. Ndërkohë që një përqindje ndryshimi stafi është normale dhe e pritshme, përqindja e lartë e ndryshimeve përjetuar në Policinë e Shtetit gjatë vitit të kaluar ka shkaktuar shqetësim. Ne do të vazhdojmë të ofrojmë trainim dhe asistencë në këtë fushë, por burimet tona janë të kufizuara. Po punojmë me Policinë e Shtetit për t’i ndihmuar të ndërtojnë kapacitetet e veta në këtë fushë e shumë të tjera.
Duke mbetur përsëri tek policia, këtë vit u miratua Ligji i ri për Policinë e Shtetit, cili ka qenë kontributi juaj për hartimin e kësaj baze ligjore dhe a konsideroni se ajo shërben për përmirësimin e shërbimeve të policisë, konkretisht a ndihmon në rritjen e pavarësisë së policisë, përmirësimin e statusit të punonjësve të policisë apo në aspekte që lidhen me rezultatet në luftë kundër kriminalitetit?
Kjo pyetje është shumë e vlefshme. PAMECA drejtoi përpjekjet për hartimin e Ligjit të Ri të Policisë, ndërsa ICITAP ofroi një Këshilltar dhe Ndihmës të përhershëm për ta mbështetur këtë përpjekje. Është besimi ynë i palëkundur që ky ligj i ri do të çojë në një organizatë më profesionale që ofron shërbime për sigurinë e publikut për qytetarët shqiptarë. Zbatimi do të kërkojë kohë, përpjekje dhe durim. Ligji i ri përbën një ndryshim thelbësor në mënyrën se si Policia e Shtetit kryen punën dhe, për të qenë i suksesshëm, do të duhet udhëheqje si dhe pranim eventual nga të gjitha palët. Ka pasur debate në lidhje me disa dispozita që janë pjesë e Ligjit të Policisë së Shtetit. Ndryshimet organizative nuk ndodhin kurrë pa debate, sidomos ato që kanë të bëjnë me organet e zbatimit të ligjit. Pjesë e këtyre debateve janë pasoja të keqkuptimit të dispozitave në përmbajtje të Ligjit të Policisë së Shtetit. Një pjesë e debateve ekzistojnë për arsye se ligji i ri sfidon status quo-në – e cila, nga një perspektivë ndërkombëtare, ka shumë hapësirë për përmirësime. Nëse zbatohet dhe ndiqet siç duhet, ligji i ri do të çojë në arritjen e synimeve që radhitët në pyetjen tuaj. Do të çojë në një agjenci të pavarur nga ndikimi politik, oficerët e policisë do të fitojnë respekt për rolin e tyre në këtë shoqëri dhe qytetarët shqiptarë do të shohin një shërbim policor më të efektshëm, i cili çon në zbatim më të mirë të ligjit dhe ndjekje më të mirë penale të krimit, ndërkohë që trajtohen edhe masat parandaluese.
Si e konsideroni reformën në polici, nënkuptoj shkurtimet deri në fund të 2006 dhe më pas në muajt e parë të 2007? Disa institucione vendase, si Avokati i Popullit p.sh, e kanë konsideruar fushatën e shkurtimeve në polici po citoj “arbitrare, pa shkaqe ligjore, në vend të efektivave të trajnuar që janë hequr nga puna me argumentime fiktive, kanë hyrë në polici individë pa arsim përkatës....”
Siç e përmenda më parë, komuniteti ndërkombëtar ka qenë i shqetësuar për disa kohë në lidhje me procesin se si ka ndodhur zvogëlimi i efektivave të Policisë së Shtetit. Ndërkohë që ky organ mund të justifikojë një shkurtim personeli bazuar mbi krahasimet me vende të tjera, mënyra se si bëhet kjo duhet shqyrtuar me kujdes. Shqetësimet tona i janë paraqitur udhëheqjes në qeverinë shqiptare, Ministrinë e Brendshme dhe Policinë e Shtetit dhe kemi besim që janë duke u trajtuar.
Gjatë dy viteve të fundit kur është fjala për hetimin e ndonjë krimi apo arrestimin e ndonjë të kërkuari, policia shqiptare nënvizon rezultatet e sistemit TIMS, i cili është sot në shfrytëzim falë ndihmës dhe angazhimit tuaj, a mendoni se autoritetet shqiptare sot e kanë infrastrukturën teknike dhe njerëzore të parandalojnë trafiqet e paligjshme, të kontrollojnë kufijtë dhe të parandalojnë krime që lidhen me këtë fushë të veprimtarisë së paligjshme?
Projekti TIMS i ICITAP-it është ndërtuar për t’i dhënë Shqipërisë një sistem menaxhimi të informacionit të kohëve më të fundit, i cili aktualisht përqendrohet në katër fusha: 1) Kontrolli i Kufirit, 2) Trajtimi i rasteve, 3) Zbulimi Penal, dhe 4) Regjistri Kriminal. Por, cilësinë e këtij sistemi e përcakton informacioni që futet në të dhe mënyra se si analizohet dhe përdoret ai informacion. Kjo, sigurisht, varet nga elementi njerëzor. Projekti TIMS është ende në fazën e vënies në zbatim. Megjithatë, edhe me instalimet e kufizuara që ekzistojnë aktualisht, sistemi ka ndihmuar për shumë hetime penale dhe arrestime si dhe ka rritur eficiencën dhe identifikimet në Pikat e Kontrollit të Kufirit. Në kohën kur flasim, vetëm një përqindje e vogël e kapacitetit të këtij sistemi është duke u përdorur.
ICITAP-i është në procesin e zhvillimit të ekspertizës teknike të qeverisë shqiptare, Ministrisë së Brendshme dhe Policisë së Shtetit. Këshilltarët dhe stafi i ICITAP-it janë duke trainuar homologët e tyre dhe po zhvillojmë planet për kalimin përfundimtar të këtij sistemi në duart e qeverisë shqiptare. Këto plane përfshijnë kërkesat e nevojshme buxhetore me qëllim që të ruhet mirëmbajtja dhe operacionet e këtij sistemi. Është shumë i kushtueshëm dhe do të duhet një përkushtim këmbëngulës financiar nga qeveria shqiptare me qëllim që sistemi të vazhdojë të operojë dhe të zhvillohet sipas projektit.
Kohët e fundit u shënuan disa raste të arrestimit të zyrtarëve të lartë në tatime dhe në ministrinë e transporteve, gjatë vitit 2006 dhe 2007 janë arrestuar dhjetëra zyrtarë dhe punonjës policie të implikuar në abuzime të ndryshme me detyrën deri në bashkëpunim me trafikantët, si i komentoni këto goditje të rasteve të korrupsionit dhe a besoni se policia shqiptare ka kapacitete të ndikojë në rënien e nivelit të korrupsionit?
Korrupsioni në Shqipëri është një prej shkaqeve kryesore, në mos kryesori, për shqetësim në komunitetin ndërkombëtar në lidhje me sigurinë publike dhe sundimin e ligjit. Ato që kemi parë kohët e fundit janë përpjekje fillestare për ta luftuar këtë fenomen. Do të jetë më mirë. Policia e shtetit po zhvillon kapacitetet për ta luftuar korrupsionin. Kjo sfidë është e vështirë. Oficerët e ndershëm dhe me integritet druhen prej të korruptuarve. Hetimi i korrupsionit kërkon nder dhe trimëri, sepse në fakt, janë jetët e oficerëve që vihen në rrezik kur zbulojnë korrupsionin dhe përpiqen të ndërmarrin veprime ndaj tij. Aktualisht ka shumë përpjekje për ta ndërmarrë këtë sfidë. ICITAP-i është duke ndihmuar partnerin tonë të Departamentit të Drejtësisë së Sh.B.A., OPDAT, me Njësinë e Përbashkët të Hetimit për Krimet Financiare dhe Ekonomike. Megjithatë, sado arrestime që të bëhen – ato mund të quhen të efektshme nëse ndiqen penalisht me sukses dhe përfundojnë me dënime. OPDAT-i po punon edhe me gjyqësorin për të përmirësuar ndjekjen penale të krimit.
A mund të na tregoni diçka lidhur me projektet dhe fushat ku aktualisht jeni në proces bashkëpunimi duke ndihmuar palën shqiptare?
ICITAP-i ka 5 fusha programore:
1) Menaxhimi i Integruar i Kufirit
a. Policia Kufitare dhe e Migracionit
b. Siguria e Porteve
c. Anti-trafikimi
2) Krimi i Organizuar
3) Llogaridhënia e Policisë dhe Menaxhimi i Burimeve Njerëzore
4) Trainimi i Policisë dhe Zhvillimi i Akademisë
5) Sistemi i Menaxhimit Total të Informacionit (TIMS)
Ky material është publikuar në gazetën “Panorama” më 3 tetor 2007

Kthehet nga misioni në Irak Kontigjenti i 9-të i Paqeruajtësve Shqiptarë

2007-09-29T20:12:00.000Z

Në mesditën e sotme, në aeroportin “Nënë Tereza” u oganizua ceremonia e kthimit në atdhe të Kontigjentit të 9-të Paqeruajtës, i cili kreu me sukses të plotë misionin e tij në Mosul në përbërje të koalicionit ndërkombëtar “Lira e Irakut”.Për pritjen e trupave paqeruajtëse kishin dalë zv.ministria e Mbrojtjes Zana Xhuka, zv.shefi i Shtabit të Përgjithshëm të FA-së gjeneral brigade Agim Lala, përfaqësues të pushtetit vendor, familjarë dhe të afërm të paqeruajtësve etj.Gjithashtu, në këtë ceremoni ishte i pranishëm edhe zv.ambasadori i SHBA-së në Tiranë Stephan Cristina.Kontigjenti i 9-të Paqeruajtës kishte në përbërje të tij 120 oficerë, nënoficerë dhe ushtarë profesionistë të Regjimentit Komando. Ky kontingjent, ashtu si dhe kontigjentet parardhëse të kësaj njësie, kreu me disiplinë dhe profesionalizëm të lartë misionin për ruajtjen e paqes në qytetin e Mosulit, në veri të Irakut, në përbërje të një Brigade Shumëkombëshe të drejtuar nga SHBA.Zv.ministria e Mbrojtjes Zana Xhuka, në emër të ministrit të Mbrojtjes, i uroi mirëseardhjen në atdhe trupave paqeruajtëse të Kontigjentit të 9-të dhe i përgëzoi ata për realizimin me nder të misionit të tyre në Irak. “Ju i kryet me sukses detyrat tuaja në këtë mision fisnik, tha më tej në fjalën e saj zv.ministria Xhuka, duke vepruar me përkushtim dhe profesionalizëm të lartë përkrah aleatëve tanë, sidomos të forcave amerikane, për mbrojtjen e vlerave demokratike dhe të lirisë së popullit irakenë”. Ajo përgëzoi edhe familjarët e paqeruajtësve për mbështetjen që u kanë dhënë atyre gjatë kohës që realizuan me sukses këtë mision.Trupat e Kontingjentit të 9-të Paqeruajtës i përshëndeti edhe zv.ambasadori amerikan në Tiranë Stephan Cristina. ”Unë, tha zoti Cristina, ju falenderoj në emër të qeverisë amerikane për ndihmën që keni dhënë në krah të forcave tona ushtarake në Irak dhe për shembullin e shkëlqyer që keni dhënë për realizimin e këtij misioni të shenjtë”. Mëpas, paqeruajtësit e sapokthyer nga Iraku u takuan me familjarët edhe të afërmit e tyre që kishin dalë për t’i pritur.

Berisha: Vendet anëtare të NATO-s, mbështesin ftesën për Shqipërinë në Samitin e Bukureshtit

2007-09-29T20:07:00.000Z

TIRANE

Kryeministri Berisha u shpreh sot, gjatë mbledhjes së qeverisë, se në të gjitha takimet që zhvilloi me përfaqësues të vendeve anëtare të NATO-s, gjatë qëndrimit në Nju Jork, ata pa përjashtim dhanë mbështetjen për ftesën e Shqipërisë në Samitin e Bukureshtit. Kryeministri tha se kjo mbështetje do të thotë se Shqipëria duhet të vazhdojë dhe të intensifikojë më tej ritmin e reformave, të plotësojë detyrimet që rrjedhin nga Cikli i 9-të i Planit Kombëtar të Veprimit. Raporti i paraqitur disa ditë më parë në Bruksel, vijoi Kryeministri, ka patur një rezonim plotësisht pozitiv, ndërkohë që do të bëhen edhe raportime të tjera gjatë muajve që vijnë. “E rëndësishme është që të tri vendet tona të shkojnë bashkërisht në Samitin e Bukureshtit për të marrë ftesën për anëtarësim në NATO”, u shpreh Kryeministri.