Topi: Do të jem plotësisht mbi palët, për një politikë bashkëpunuese



MIRELA MILORI/Uashington/ 21/07/2007
Në një intervistë për Zërin e Amerikës, presidenti i sapozgjedhur i Shqipërisë Bamir Topi tha se do të jetë mjaft objektiv dhe promotor që klima politike shqiptare të jetë bashkëpunuese në interes të sfidave madhore që ka Shqipëria: rritjen ekonomike të vendit, qetësinë shoqërore si dhe dy sfidat më të mëdha që janë integrimi në Europë dhe në NATO
Zëri i Amerikës: Zoti Topi, si garantues i unitetit të vendit dhe i zbatimit të kushtetutës, si mendoni ta realizoni këtë synim, i cili padyshim që nënkupton një ekuilibër të vështirë, aq më tepër që ju vini nga një e kaluar partiake? Pra si do te mund te beni ju shkeputjen e plote nga partia juaj?

Bamir Topi: Natyrisht sot unë duhet të flas ndryshe nga dita e djeshme jo sepse brenda 24 orësh ndryshon pozicioni në mënyrë radikale por ka qenë një bindje e thellë qysh në momentin kur unë vendosa të pranoj kandidimin për kreun e shtetit. Pra isha i prirur të lançoja një platfortë të qartë që kishte të bënte pikërisht me dokumentin themeltar të shtetit, i cili qoftë në frymë apo në gërmë, garanton jo vetëm balancimin e institucioneve por presidenti i republikës është institucioni që garanton edhe ekuilibër të plotë midis partive politike dhe në mbarë shoqërinë shqiptare. Nga kjo pikpamje gjëja më e rëndësishme e këtij procesi që u realizua ndoshta në një klimë të ndërlikuar në mënyrë artificiale, ishte kthimi te Kushtetuta, te dokumenti themeltar i shtetit, e cila presupozonte në mënyrë të qartë që gara presidenciale zhvillohej jo në tryeza partish por në kuvendin e Shqipërisë, aty ku përfaqësuesit kishin jo vetëm të drejtën por edhe detyrimin kushtetues si atribut i njerëzve të zgjedhur nga populli në 100 zona elektorale, ku 40 të tjerë janë në listën proporcionale, pikërisht për të zgjedhur me votën e tyre të fshehtë dhe të lirë presidentin, që kërkonte sipas Kushtetutës 84 vota. Nga kjo pikëpamje, gjithçka që u konsumua në fillim nuk ishte në linjën e procesit kushtetues ndërsa në momentin kur në garë u fut zoti Nano, u regjistrova edhe unë. Besoj se qysh nga ai moment, gara u fut në linjë kushtetuese, e pranuar nga të gjithë sepse nuk do të kishte asnjë lloj sensi nëse presidenti i republikës do të dilte jashtë dokumentit themeltar të shtetit për të cilin ai mban përgjegjësi dhe është i detyruar t’i referohet. Në momentin kur u fut zoti Ceka në lojë, natyrisht procesi ishte legjitim, atij iu shtua legjitimiteti dhe u garantua që gara do të shkonte deri në fund. Nga kjo pikpamje, unë mendoj se si proces kushtetues ai tashmë është realizuar dhe presidenti i shtetit duhet që, në mënyrë të detyrueshme, ato që ka thënë me fjalë t’i realizojë me vepra hap pas hapi, duke qenë rigoroz jo vetëm në atë çka është e shkruar në dokumentin themeltar të shtetit por të kontribuojë me të gjitha mënyrat e veta për një detantë midis të gjitha partive politike, për të qenë në një pozicion të barasvlefshëm dhe për të injektuar në shoqërinë shqiptare, për fat të keq problematike, të gjithë ata elementë të civilizimit dhe të standardeve që ne kërkojmë të arrijmë sipas atyre që kemi premtuar për t’u integruar në familjen europiane dhe euroatlantike.
Zëri i Amerikës: Zoti Topi, duket se shija e fitores sikur eshte cënuar disi nga qendrimi kritik i opozitës ndaj procesit të votimit që ju solli ju në postin më të lartë të shtetit. E majta flet për blerje votash dhe në fakt ju u votuat edhe nga ata që kishin kundërshtuar kandidaturën tuaj, ndjekësit e zotit Nano. Në një situatë të tillë, si mund ta rifitoni ju besimin e opozitës?
Bamir Topi: Unë mendoj se, që të marrësh 85 vota në parlament, natyrisht që kësaj mund t’i bësh shumë komente nga pozicione të ndryshme politike por ju e dini se gara u realizua edhe me qejfmbetje nga kampet respektive, qoftë nga zoti Nano apo nga zoti Ceka. Por e rëndësishme është se të gjithë deputetët që ishin të pranishëm duhen konsideruar nga një tjetër këndvështrim si deputetë të përgjegjshëm, të cilët në respekt të votës që kanë marrë nga shoqëria shqiptare dhe nga populli erdhën për të plotësuar një detyrim kushtetues për të mos e lënë vendin në krizën e zgjedhjeve të parakohëshme. Nga kjo pikëpamje, sa kohë që procesi konsiderohet legjitim, pa asnjë lloj paragjykimi që vjen nga një parti e majtë, do të thoja që presidenti i republikës duhet t’u largohet paragjykimeve dhe duhet të jetë mbi palët. Unë u premtoj, në këtë moment që flas, jo vetëm partive të djathta por edhe partive të majta, në mënyrë të veçantë partisë më të madhe opozitare, Partisë Socialiste, që do të jem totalisht mbi palët, do të jem në një pozicion mjaft objektiv dhe promotor që klima politike shqiptare të jetë bashkëpunuese në interes të sfidave madhore që ka Shqipëria: rritjen ekonomike të vendit, qetësinë shoqërore dhe besoj për dy sfidat më të mëdha që janë integrimi në Europë dhe në NATO.
Zëri i Amerikës: Shkaku që prishi konsensusin për një president konsensual ishte çështja e shkarkimit të Prokurorit të Përgjithshem. Për zgjedhjen tuaj nuk u vu ky kusht. A duhet ta marrim të mirëqenë se ju do ta shkarkoni kreun e akuzës? Nëse po, si do te realizohej kjo?
Bamir Topi: Unë e kam shprehur edhe më parë që Presidenti i Republikës nuk zgjidhet duke u kondicionuar nga pozicioni i Prokurorit të Përgjithshëm. Presidenti i Republikës, sikurse është premtuar, do të jetë iniciues dhe bashkëpunues në reformimin e sistemit të drejtësisë i cili është shfaqur mjaft problematik. Ky nuk është koment dhe pozicioni që është marrë vetëm nga partitë politike shqiptare por edhe nga institucionet ndërkombëtare. Kjo presupozon që institucioni i prokurorit të përgjithshëm është një etapë e cila duhet patjetër tejkaluar jo vetëm për shkak të punës së pamjaftueshme, mjaft problematike, por për shkak të atij pozicioni të palimituar që e çon institucionin e prokurorit të përgjithshëm në një mandat të paprecedent ndërkohë që të gjithë personalitetet, qofshin këto në nivelet më të larta të shtetit, por qoftë edhe në nivelin e prokurorit të përgjithshëm në vende të tjera, kanë një afat. Nga kjo pikëpamje, pozicioni i institucionit të prokurorit të përgjithshëm do të jetë pjesë e një reforme të thellë ku natyrisht presupozohet edhe një marrje në konsideratë e pozicionimit të ri për institucionin e prokurorit.
Zëri i Amerikës: Zoti Topi, ndër deklarimet tuaja të para mbrëme ishte edhe ai për pavaresinë e Kosovës. Situata është kritike për shkak se rezoluta për Kosovën nuk do të hidhet në votë në Këshillin e Sigurimit. Cili do të ishte mesazhi juaj për Kosovën në këto momente?
Bamir Topi: Mesazhi im për Kosovën në këto momente është që të jetë pikërisht në kohezion të plotë me pjesën më substacionale të mendimit të faktorit ndërkombëtar, të jetë në koherencë të plotë me ato pozicione që marrin miqtë e mëdhenj të Kosovës, të Shqipërisë dhe të vendeve demokratike, pra të jetë përkrah Shteteve të Bashkuara të Amerikës, të cilat me kohë kanë projektuar një të ardhme të re për Kosovën। Unë jam i bindur që populli i Kosovës është një popull i cili jo vetëm ka vuajtur por është formuar gjatë procesit të izolimit dhe të diskriminimit social dhe ka arritur në një pjekuri politike ku klasa politike e Kosovës sot është e sinkronizuar, është në një mendim unik. Besoj që së shpejti ai do të gëzojë frytet e pavarësisë së Kosovës, status që do të vijë patjetër, natyrisht jo i vetmuar por si pjesë e një koalicioni të gjerë botëror i cili e ka projektuar në mënyrë të padiskutueshme statusin e pavarësisë së Kosovës.

Zëri i Amerikës, VOA

Balkantimes: Bashkëpunimi gjyqësor, një domosdoshmëri për integrimin


Nga Zoran Nikolovski për Southeast European Times në Shkup – 16/07/07

Anëtarësimi në BE dhe NATO varet nga bashkëpunimi gjyqësor
Anembanë Evropës Juglindore, reformat gjyqësore dhe lufta kundër krimit të organizuar janë kyç për perspektivat e integrimit. Veçanërisht për shkak të veprimeve kriminale ndërkufitare, bashkëpunimi midis vendeve është jetik. Maqedonia dhe Serbia ofruan së fundmi shembuj të vlefshëm të një bashkëpunimi të tillë duke punuar së bashku në dy raste kriminale të profilit të lartë. Në janar, policia serbe arrestoi Stanislava Kokorovska-Poletan me akuzat e kondrabandës së gati 500 kg kokainë në Maqedoni. Poletan, e cila ka shtetësi të dyfishtë maqedonase e serbe, jetonte atë kohë në Serbi. Pasi autoritetet në Shkup lëshuan një urdhër-arrest ndërkombëtar për të, policia serbe e ndaloi. Sipas autoriteteve, Poletan është përfshirë në kontrabandën e cigareve dhe alkoolit që nga koha e Millosheviçit. Në qershor 2006, policia në Beograd arrestoi Metodija Smilenski, një biznesmen i dyshuar për mashtrim e parregullsi që kishte shkaktuar dëme që shkonin në 50 milion euro. Smilenski që ka shtetësi të dyfishtë maqedonase e austriake, u kap gjatë një kontrolli rutinë. Një ditë përpara se afati përfundimtar një-vjeçar i ekstradimit të skadonte, Smilenski ju dorëzua autoriteteve maqedonase. Zyra e prokurorisë maqedonase pret që deklarimet e Smilenskit mund të shpien në zyrtarë të tanishëm e të mëparshëm të nivelit të lartë që qenë përfshirë si mbrojtës apo partnerë në bëmat e tij. Zyrtarët thonë se një bashkëpunim i tillë gjyqësor dërgon një mesazh të fuqishëm për kriminelët, duke i paralajmëruar ata se nuk do të jenë më në gjendje të kërkojnë mbrojtje duke shkarë nëpër kufij dhe se sjellja e tyre nuk do të tolerohet në cilindo vend.
Nga bashkëpunimi midis institucioneve dhe autoriteteve, të gjithë ata që kanë kryer akte kriminale do të mbahen përgjegjës për krimet e tyre, u zotua kohët e fundit ministri maqedonas i drejtësisë Mihajlo Manevski. Vrulli i kohëve të fundit drejt bashkëpunimit mund t'i vishet ofertave të vendeve për në BE e NATO. Anëtarësimi në dy organizatat ndërkombëtare është kushtëzuar me ngritjen e sektorëve të pavarur gjyqësorë dhe mbështetjen e një lufte të efektshme kundër krimit. Një gjyqësor i dobët dhe mungesa e bashkëpunimit të ndërsjelltë dhe rajonal e bën të pamundur luftimin e krimit të organizuar. "Maqedonia dhe Serbi-Mali i Zi, si edhe vendet e tjera në rajon nuk kanë alternativë tjetër me përjashtim të koalicionit tashmë ekzistues rajonal për të kundërshtuar botën e paligjshme kriminale me organizim edhe më të mirë, krahasuar me periudhën e mëparshme të bashkëpunimit ndërqeveritar," tha presidenti maqedonas Branko Crvenkovski në një intervistë vitin e kaluar. Policia maqedonase transferon Stanislava Kokorovska-Poletan, organizatoren e dyshuar të një dërgese rekord kokaine, nga një pikë kalimi kufitar në një makinë të policisë në 10 majShumë krerë rajonalë kanë shprehur pikëpamje të ngjashme në takimet mbajtur nën patronazhin e BE, NATO, Paktit të Stabilitetit dhe Këshillit të Evropës. Vitin e kaluar një konferencë në Moskë organizuar nga Këshilli Evropian përfundoi me një zotim për të nisur një luftë edhe më të suksesshme kundër krimit, veçanërisht nëpërmjet procedimeve penale më të efektshme. Midis strategjive të diskutuara ishte krijimi i një baze të dhënash që rreshton procedurat ekzistuese në vendet pjesëmarrëse lidhur me tipe të ndryshme krimesh dhe formimin e një rrjeti me persona të kontaktit.Në shkurt të vitit të kaluar, ministrat e drejtësisë e të brendshëm të dhjetë vendeve të Evropës Juglindore ranë dakord të forcojnë bashkëpunimin në luftën kundër krimit të organizuar, trafikut njerëzor dhe terorizmit. Shqipëria, Bosnje dhe Herzegovina (BiH), Bullgaria, Kroacia, Greqia, Maqedonia, Molldavia, Rumania, Serbi-Mali i Zi dhe Turqia u zotuan të miratojnë ligjet e tyre që përmbushin standardet e BE dhe të Këshillit të Evropës. Ministrat ranë gjithashtu dakord të ngrenë grupe pune me prokurorë e oficerë policie për të hetuar krimin e organizuar në nivelet kombëtare e rajonale. BE dhe NATO kanë ngritur programe që synojnë rritjen e bashkëpunimit nëpërmjet edukimit dhe trainimit. Një sërë projektesh për trainim gjyqtarësh, buxhetimin, zhvillimin institucional , krijimin e institucioneve të reja gjyqësore dhe programet e mbrojtjes së dëshmitarëve janë mbajtur në tërë rajonin nëpërmjet programit të BE, CARDS. Vendet në rajon duhet të kapërcejnë dobësitë dhe të arrijnë bashkëpunim më të mirë për një numër arsyesh. Së pari, gjyqësori i pavarur e i besueshëm është një çelës për stabilitetin institucional. Së dyti, një sistem gjyqësor efektiv e i ndershëm është edhe më i rëndësishëm për rritjen e zhvillimit ekonomik dhe tërheqjen e investitorëve të huaj. Së treti, sistemet gjyqësore në rajon priren të jenë të ngadalta dhe kanë raste të panumërta të pazgjidhura prej kohësh. Dështimi i këtyre sistemeve rrit mungesën e besimit të qytetarit në qeverinë dhe institucionet e saj. Kjo, nga ana e vet, shpie në krim e korrupsion të mëtejshëm, kështu që krijohet një rreth i mbyllur. Ekspertët theksojnë se kufijtë, kombësitë dhe feja nuk duhet të bëhen pengesë për kapjen e kriminelëve. Ajo që është penalisht e papranueshme në një vend duhet të mos tolerohet në një tjetër. Bashkëpunimi në çështjet gjyqësore do të forcojë çdo vend individualisht duke rritur kështu opinionin për rajonin si të tërë. Në të njëjtën kohë, suksesi në nivelin rajonal do të forcojë gjithashtu perspektivat për vendet individuale.
Kjo përmbajtje është autorizuar nga SETimes.com

Senatorët amerikanë Nunn dhe Lugar përshëndesin shkatërimin e agjentëve kimikë në Shqipëri


TIRANE / 20 korrik 2007
Ministria e Mbrojtjes në Tiranë, deklaroi sot, më 20 korrik 2007 se në përgjigje të konferencës për shtyp të datës 11 korrik 2007, të zv/ministrit Petrit karabina, për shkatërrimin e armëve dhe të agjentëve kimikë në Shqipëri, zyra e Senatorëve Nunn dhe Lugar në SHBA në adresë të Ministrisë shqiptare të Mbrojtjes ka dërguar një njoftim për shtyp, ku që në krye të tij nëvizohet: “Shkatërrohen mbetjet e armëve kimike në Shqipëri”. Në këtë njoftim theksohet: “Ministria e Mbrojtjes e Shqipërisë njoftoi shkatërrimin e mbetjeve të armëve kimike, për të parën herë jashtë ish-Bashkimit Sovjetik, nëpërmjet Programit të Reduktimit të Rrezikut të Kërcënimit Nunn-Lugar. “Theksoj se bashkëpunimi dhe mbështetja nga SHBA, nëpërmjet programit të reduktimit të kërcënimeve nga armët kimike, në kuadër të luftës kundër terrorizmit, inicuar dhe mbështetur nga Senatorët e nderuar amerikan Nunn dhe Lugar, ka qenë faktor mjaft i rëndësishëm për realizimin me sukses të këtij projekti.” - tha zv.ministri i Mbrojtjes së Shqipërisë Petrit Karabina. “Puna për shkatërrimin e kimikateve në vendin tonë fillojë pas miratimit të fondeve për këtë projekt nga Kongresi Ammerikan, - deklaroi Karabina javën e kaluar,- Në dhjetor 2002 u bë zbulimi i Armëve Kimike, të një sasie prej rreth 16 tonësh, disa prej të cilave nga më të rrezikshmet që njihen deri më sot” Senatori Lugar, në gusht të vitit 2004, vizitoi vendin e magazinimit të armëve kimike në Shqipëri për të diskutuar për përmirësimitn e masave të ruajtjes dhe për planin e asgjesimit të tyre. Pajisjet e shkatërrimit u transportuan për në Shqipëri vitin e shkuar. “Unë përgëzoj Qeverinë e Shqipërisë për bashkëpunimin e ngushtë dhe përpjekjet për asgjesimin e këtyre Armëve të Shkatërrimit në Masë. Bota është më e sigurtë dhe një kontribut domethënës është bërë për sigurinë rajonale dhe atë ndërkomëbëtare,” –tha Senatori Lugar. Në vitin 2003, Kongresi miratoi Ligjin e Zgjerimit Nunn-Lugar, me autor Senatorin Lugar, i cili lejojë Presidentin Bush të përdorë 50 milion USD në fondet Nunn-Lugar për aktivitetet jashtë ish-Bashkimit Sovjetik. Presidenti Bush nënshkroi autorizimin për punën në Shqipëri në vitin 2004. “Programi Nunn-Lugar ka krijuar një rezervuar të thellë ekperience dhe talenti, që mund të zbatohet anembanë botës, për të arritur objektivat e mospërhapjes. Ligji origjinal Nunn-Lugar, ishte i lidhur vetëm me ish- Bashkimin Sovjetik, sepse aty ishin dhe mbetjet më të mëdha të armëve dhe materialeve të shkatërrimit në masë. Sot ne duhet të jemi të përgatitur me para dhe ekspertizë, për të zgjeruar konceptin Nun-Lugar, kudo ku mund të zbatohet.” - deklaroi Senatori Lugar, anëtari më i vjetër dhe ish-kryetar i Komitetit të Marrëdhënieve me Jashtë të Senatit. “Në nëntor 1991, Senatori Lugar dhe ish-Senatori Nunn u bënë autorë të ligjit Nunn-Lugar, që krijojë Programin e Reduktimit të Kërcënimit. Ky program ka siguruar fonde dhe ekspertizë për të ndihmuar ish- Bashkimin Sovjetik për ruajtjen dhe çmontimin e mbetjve të panumërta nukleare, të Armëve Kimike dhe Biologjike, si dhe materialeve që lidhen me to e Sistemeve të Shpërndarjes së tyre. Programi Nunn-Lugar tashmë shënon një total prej 6,982 kokash bërthamore të ç’aktivizuara, 651 Raketa Balistike Ndërkontinentale të shkatërruara, 485 ICBM silos të shkatërruara, 101 ICBM lëshues të lëvizshëm të shkatërruar, 612 lëshues raketash balistike nëndetsesh, 436 SLBM lëshues të shkatërruar, 30 nëndetëse bërthamore të afta për lëshimin e raketave balistike të shkatërruara, 155 bombardues të shkatërruar, 906 Raketa Ajër-Tokë të shkatërruara, 194 tunele të provave bërthamore të shkatërruar, 351 trena transportues të armëve bërthamore, 12 vendruajtje armësh kimike janë sot me sistem ruajtje të përmirësuar dhe janë ndërtuar 9 stacione biologjike për monitorimin. Ndoshta më e rëndësishme është që Ukraina, Bjellorusia dhe Kazakistani janë vende të pastra nga armët bërthamore, si rezultat i Programit Nunn-Lugar. Këto vende renditeshin i treti, i katërti dhe i teti në listën e fuqive të vendeve bërthamore. Përtej asgjesimit bërthamor, programi Nunn-Lugar siguron dhe shkatërron armët kimike, biologjike dhe bërthamore dhe ka mundësuar ripunësimin e shkenctarëve në iniciativat kërkuese paqeruajtëse. Qëndrat Ndërkombëtare Teknologjike dhe Shkencore, të cilat sponsorizohen nga SHBA, angazhojnë afro 58000 ish-shkencëtar bërthaamor. Programi Ndërkombëtar i Parandalimit ka financuar 750 projekte dhe përfshirë 14 000 shkëncëtar armësh, si dhe ka krijuar 580 vende pune. Senatori Lugar realizon udhëtime vjetore inspektimi në vendmagazinimet e këtyre armëve në ish-Bashkimin Sovjetik. Këtë gusht vizita do të përfshijë aktivitete në Moskë dhe në Astana, duke përkujtuar 15-vjetorin e Programit Nunn-Lugar.

Gjenerali John Reith: Shqipëria hapa të dukshëm për anëtarësimin në NATO


TIRANE / 18 Korrik 2007
Ministri i Mbrojtjes Fatmir Mediu priti në një takim të veçantë zv.komandantin e Komandës Strategjike të Aleancës në Europë dhe komandant i Operacionit ALTHEA të BE-së, gjeneralin John Reith, i cili, në krye të një delegacioni, ka ardhur për vizitë zyrtare në vendin tonë. Në këtë takim ishte i pranishëm edhe shefi i Shtabit të Përgjithshëm i FA–së gjeneral major Luan Hoxha. Ministri Mediu, duke i uruar mirëseardhjen në vendin tonë ushtarakut të lartë të NATO-s dhe delegacionit që ai kryeson, shprehu falenderimet e tij dhe të qeverisë shqiptare për ndihmën dhe mbështetjen e vazhdueshme që Shqipëria dhe Forcat e saj të Armatosura kanë patur dhe kanë nga strukturat e Aleancës së Atlantikut të Veriut në procesin e reformave integruese euroatlantike. Më tej, Ministri Mediu informoi gjeneralin Reith për punën e bërë për transformimin dhe modernizimin e FA Shqiptare, duke u ndalur sidomos në implementimin e strukturës së re, në krijimin dhe funksionimin tashmë të Komandës së Forcës së Bashkuar, në rritjen e profesionalizmit të Forcave tona të Armatosura me qëllim që ato, brenda vitit 2010 të jenë një Forcë e vogël në numër, por tërësisht profesioniste dhe të ndërveprueshme me NATO-n. Pjesëmarrja në operacionet paqeruajtëse dhe në luftën kundër terrorizmit përkrah forcave aleate në disa pika të nxehta të globit, theksoi ndër të tjera Ministri Mediu, është një tregues i qartë jo vetëm i angazhimit tonë, por edhe i rritjes së shkallës së profesionalizmit dhe të operacionalitetit të trupave dhe strukturave tona ushtarake. Edhe shtimi 113 trupave të Reagimit të Shpejtë në operacionin e drejtuar nga NATO në Herat të Afganistanit është një tjetër dëshmi e kësaj rritjeje dhe këtij angazhimi që ka Shqipëria në operacionet për ruajtjen e paqes dhe të sigurisë në botë. Gjenerali John Reith vlerësoi arritjet dhe treguesit pozitiv në rrugën e reformave për transformimin e Forcave të Armatosura Shqiptare, si dhe angazhimin serioz të qeverisë shqiptare për mbështetjen që i jep reformave në fushën e mbrojtjes dhe reformimit e modernizimit të FA, duke rritur për këtë qëllim edhe buxhtin financiar. Gjenerali Reith vlerësoi veçanërisht pjesëmarrjen e trupave paqeruajtëse shqiptare në misionet në Irak e Afganistan në përbërje të Koalicionit Ndërkombëtar, si dhe në operacionin ALTHEA të BE-së në Bosnjë-Hercegovinë. Duke folur për procesin e anëtarësimit në NATO, ai theksoi se Shqipëria dhe Forcat e saj të Armatosura kanë bërë hapa të dukshëm në rrugën e tyre drejt anëtarësimit në NATO. Gjeneral Reith dhe delegacioni që ai kryeson u prit në takim një takim të veçantë edhe nga shefi i Shtabit të Përgjithshëm i FA-së, gjeneral major Luan Hoxha, ndërsa më pas për delegacionin e lartë të NATO-s u dha një brifing për transformimin e FA të Republikës së Shqipërisë dhe integrimin në NATO.

Ministri Mediu takon zv.asistentin e Sekretarit Amerikan të Shtetit, Larry Butler


TIRANE / 17 Korrik 2007
Ministri shqiptar i Mbrojtjes Fatmir Mediu priti në një takim të veçantë zv.asistentin e Sekretarit Amerikan të Shtetit, Larry Butler, i cili shoqërohej nga drejtori i OSD për Koalicionin Peter McVety, i ngarkuari me punë në Tiranë Stephen Christina, si dhe zyrtarë dhe ushtarakë të tjerë të lartë amerikan në Shqipëri. Burimet zyrtare nga Ministria e Mbrojtjes, njoftuan se “në këtë takim ishte i pranishëm edhe shefi i Shtabit të Përgjithshëm i FA-së gjeneral major Luan Hoxha, komandanti i Forcës së Bashkuar gjeneral brigade Shpëtim Spahiu, si dhe drejtorë dhe ushatarkë të tjerë të lartë të Ministrisë së Mbrojtjes”. Sipas burimeve zyrtare, Ministri Mediu, pasi i uroi mirëseardhjen në Tiranë ambasadorit Butler, vlerësoi marrëdhëniet dhe bashkëpunimin e ngushtë midis Shqipërisë dhe SHBA-së, duke theksuar se “angazhimi ynë është që të vazhdojmë të punojmë akoma më shumë për ta forcuar më tej këtë bashkëpunim në të ardhmen”. Ministri Mediu nënvizoi edhe njëherë rëndësinë historike të vizitës së Presidentit Bush në Tiranë, duke e vlerësuar atë si një mbështetje të fuqishme të SHBA-së për vendin tonë. Më tej, Ministri Mediu u ndal në pjesëmarrjen e trupave tona ushtarake në misionet paqeruajtëse në Irak dhe Afganistan, të cilat i kanë kryer dhe po i kryejnë me përkushtim dhe profesionalizëm detyrat e ngarkuara. Ne, nënvizoi Ministri Mediu, jemi dhe do të vazhdojmë të jemi të angazhuar përkrah SHBA-së dhe vendeve të tjera pjesëmarrëse në Koalicionin Ndërkombëtar kundër terrorizmit. Pjesëmarrja e trupave tona në këto misione tashmë u ka dhënë atyre një përvojë të re, e cila po u shërben edhe trupave të tjera të Forcave tona të Armatosura. Gjithashtu, theksoi zoti Mediu, pjesëmarrja në këto misione u jep mundësi ushtarakëve tanë jo vetëm që të komunikojnë më trupat ushtarake të vendeve aleate, por edhe të krijojnë marrëdhënie miqësore e njerëzore që zgjasin edhe pas kryerjes së këtyre misioneve.

Presidenti Amerikan George W.Bush i shkruan Sali Berishës: Vazhdo të punosh për anëtarësimin e Shqipërisë në NATO

TIRANE – Zëdhënësi i Qeverisë shqiptare Dritan Mishta, në një konferencë shtypi lajmëroi sot në Tiranë se Kryeministri i vendit Sali Berisha, ka marrë një mesazh falendertimi nga Presidenti i SHBA, George W.Bush. Kreu i Shtëpisë së Bardhë ka inkurajuar Kryeministrin shqiptar të vazhdojë punën për integrimin e vendit në NATO. Më pas, Bush falenderon Sali Berishën, për mikpritjen gjatë vizitës në Tiranë. “Jam këtu për t’ju informuar se sot Kryeministri i Republikës, z. Sali Berisha ka marrë një mesazh të ngrohtë përshëndetjeje, falenderimi dhe inkurajimi nga Presidenti i Shteteve të Bashkuara të Amerikës, z. Xhorxh W. Bush, i cili, me një akt të pazakontë dhe shumë miqësor, e ka shkruar këtë letër tërësisht me dorën e tij”, tha zëdhënësi i Qeverisë. Ai më pas lexoj mesazhin tekstualisht:

“I dashur Sali!
Ju falenderoj për mikpritjen tuaj të ngrohtë. Udhëtimi ishte një sukses i madh.
Faleminderit gjithashtu për bisedën tonë konstruktive.
Vazhdo të punosh shumë për reformat e nevojshme për anëtarësimin në NATO.
Me urimet më të mira dhe falenderimet e sinqerta.
Xhorxh W. Bush”

Njoftim i Presidences se Shqiperise:

Presidenti Moisiu merr një mesazh nga Presidenti i SHBA-së, Xhorxh W. Bush.


Presidenti i Republikës, Alfred Moisiu, mori sot paradite një mesazh falenderimi në dorëshkrim nga Presidenti i Shteteve të Bashkuara të Amerikës, Xhorxh W. Bush lidhur me vizitën e tij në Tiranë në datën 10 qershor 2007, ku shprehet me fjalë shumë të ngrohta e miqësore për pritjen që iu bë, ashtu edhe për bisedimet dhe pikëpamjet e shprehura nga Presidenti Moisiu.

"I dashur Alfred,

Faleminderit për mikpritjen Tuaj të ngrohtë! Udhëtimi në Shqipëri ishte një përvojë e mrekullueshme. Faleminderit edhe për dialogun tonë të rëndësishëm! Unë i vlerësoj pikëpamjet tuaja", - shkruan ndër të tjera në mesazhin e tij Presidenti i SHBA-së, Bush.

“Publiku i përjashtuar nga drama politike e Shqipërisë”

Nga Klodjan Seferaj për Southeast European Times në Tiranë – 13/07/07

“Politikanët shqiptarë, mbërthyer në një tërheqje litari, nuk po u a vënë veshin shqetësimeve të qytetarëve të thjeshtë, sugjeron një bloger”
Opinioni publik është lënë jashtë ekuilibrit politik, thonë blogerët.
Shqipëria erdhi më pranë zgjedhjeve të parakohëshme parlamentare këtë javë pasi negociatat mbi një kandidat të përbashkët presidencial dështuan. Demokratët e kryeministrit Sali Berisha mbeten disa vota më pak se 84 të nevojshme për të zgjedhur kandidatin e tyre Bamir Topi dhe socialistët e opozitës vazhdojnë të bojkotojnë dhe t'i mohojnë parlamentit kuorumin e kërkuar.
Duke shkruar në peshkupauje, Blendi ja vesh politikanëve të vendit të ndalurit efektiv të qytetarëve shqiptarë nga procesi. "Majtas apo djathtas, lart apo poshtë, kudo që të shohësh gjatë këtyre ditëve të nxehta të korrikut, shohim politikanët shqiptarë të përfshirë në një garë të madhe për të zgjedhur presidentin e ri... Është e dukshme se opinioni publik është eleminuar me sukses nga i gjithë ekuilibri."
"Edhe në qoftë se quhet 'forca e katërt' opinioni publik në Shqipëri nuk ka ndonjë funksion real," shton Blendi. "Publiku nuk është një faktor përcaktues në marrjen e një vendimi."
StrangeMan komenton: Ti ke të drejtë Blendi, por më thuaj, si mund ta bëjmë publikun një faktor? Këta politikanë arritën një sukses të madh ndërsa ja dolën ta mbajnë popullin e zakonshëm injorant. Në qoftë se ky vend nuk nis seriozisht të kujdeset për arsimin e një brezi të ri me vlera të vërteta...ne me të vërtetë nuk kemi asnjë shans."
E ardhmja e kryeprokurorit Theodhori Sollaku u dëshmua të jetë pengesë e pakapërcyeshme për kompromisin, vë në dukje Olsi. Berisha dhe demokratët e tij qenë përgatitur të mbështesnin një kandidat presidencial nga e majta për deri sa Sollaku të shkarkohej. "Në momentin e fundit, opozita ngurroi, duke e transformuar këtë problem në problemin më të rëndësishëm."
Olsi mbron këmbënguljen e demokratëve për heqjen e Sollakut. "Shumica mori përgjegjësi përpara popullit shqiptar për të luftuar korrupsionin dhe grupet kriminale dhe për dy vjet ka qenë krejtësisht e bllokuar."
Abdullah Zeneli në Thopia sheh një luftë më të gjerë politike. "Krahu i majtë, e rregullt apo e parregullt kjo, nuk do të lejonte shumicën të kishte kryeministrin, kreun e parlamentit dhe presidentin. Krahu i djathtë ...ngurron të lejojë të majtën të ketë në të njëjtën kohë kryetarin e bashkisë së Tiranës që është kreu i partisë më të madhe të opozitës, dhe presidencën."
Më së fundi, Drejteuropes qahet se kaq shumë çështje janë lënë pas dore ndërsa nëvendnumërimi vazhdon. "Në një periudhë kur politikanët duhet të kujdeseshin për turizmin, për veprimtaritë kulturore apo pushuese, mungesën e ujit e të elektricitetit, problemet ekonomike që nuk mbarojnë kurrë, apo me problemet e korrupsionit, vendi ynë humbet kohën me zgjedhjen e presidentit.
"Ne nuk jemi me të vërtetë në gjendje të luajmë rolin që kemi në rajon dhe veçanërisht në këtë kohë kur pavarësia e Kosovës është në proces."
Kjo përmbajtje është autorizuar nga SETimes.com

Kushtet për anëtarësimin në NATO, Shqipëria asgjëson lëndët kimike


Trazhgim Sokolaj/ TIRANE
“Një hap tjetër më pranë NATO-s”. Kjo është fjalia me të cilën Ministria e Mbrojtjes në Tiranë e perkufizoi përfundimin e procesit të shkatërrimit të armëve dhe agjentëve kimikë në të gjithë vendin. “Republika e Shqipërisë arriti të shkatërrojë armët dhe agjentët kimikë tepër të rrezikshëm për popullsinë duke ruajtur një ambient të sigurt. Sot ne deklarojmë se me shkatërrimin e tyre, vendin e bëjmë më të sigurtë dhe njëkohësisht realizojmë detyrën për arritjen e standardeve të kërkuara nga NATO”, u shpreh zv/ministri i Mbrojtjes Petrit Karabina në konferencë shtypi. Konventa e Ndalimit të Armëve Kimike është firmosur në vitin 1993 dhe është ratifikuar brenda të njëjtit vit. Ajo ka hyrë në fuqi më 29 prill të vitit 1997. Sipas Ministrisë së Mbrojtjes, aktualisht në këtë organizatë janë të anëtarësuar 182 shtete dhe Shqipëria është i pari dhe i vetmi vend anëtar që realizoi detyrimin e Konventës sipas standardeve. Ministria e Mbrojtjes deklaroi se realizimi me sukses i këtij projekti të rëndësishëm dhe të vështirë, i dedikohet bashkëpunimit të shkëlqyer të stafit të Ministrisë së Mbrojtjes dhe Forcave të Armatosura, i të gjithë institucioneve të vendit tonë me organizata dhe vende të tjera mike. “Theksoj se bashkëpunimi dhe mbështetja nga SHBA, nëpërmjet programit të reduktimit të kërcënimeve nga armët kimike, në kuadër të luftës kundër terrorizmit, inicuar dhe mbështetur nga senatorët e nderuar amerikan Noon dhe Lugar, ka qenë faktor mjaft i rëndësishëm për realizimin me sukses të këtij projekti”, u shpreh më tej zv/ministri i Mbrojtjes Karabina. Me miratimin nga Kongresi Amerikan të fondit përkatës lidhur me këtë projekt në vendin tonë filloi puna për shkatërrimin e armëve kimike. Në dhjetor 2002 u bë zbulimi i armëve kimike, të një sasie prej rreth 16 tonësh, disa prej të cilave nga më të rrezikshmet e njohura deri më tani.
Ministria e Mbrojtjes tha se procesi i shkatërrimit u realizua në 4 faza:
1. Faza e parë, deklarimi i agjentëve kimikë në OPCË, Hagë, Hollandë;
2. Faza e dytë, siguria fizike e depos me elementë shtese;
3. Faza e tretë, përgatitja e kuadrit ligjor për t’i paraprirë procesit të shkatërrimit;
4. Faza e katërt, procesi i shkatërrimit të agjentëve kimikë
Mbështetja financiare e këtij projekti është bërë nga qeveria e SHBA, ndërsa mbështetja financiare për koston e inspektimit është bërë nga qeveria zvicerane dhe qeveria greke”. Zv/ministri shqiptar falenderoi të gjithë kontribuesit në procesin e shkatërrimit të armëve kimike që ndodheshin në Shqipëri. Zyrtarë të NATO-s e kanë cilësuar asgjesimin e lëndëve kimike dhe radioaktive në Shqipëri si një proces të domosdoshëm për shkak se përqendrimi i lëndëve të tilla në raport me sipërfaqen dhe popullsinë ka qenë i madh. Më përfundimin e këtij procesi, besohet se Shqipëria ka arritur të plotësojë edhe një tjetër standard në fushën e Mbrojtjes, të kërkuar për anëtarësimin në NATO-s. Përqendrimi i madh i lëndëve kimike ushtarake shpjegohet me politikat e mbrojtjes të ndjekura nga udhëheqja e Shqipërisë gjatë viteve të regjimit komunist.

Ata nuk janë lypës, janë Skllevër...


Trazhgim Sokolaj/ TIRANE
Oraret e mërzitshme të punës që bëj, nuk me kanë lejuar shpesh, madje pothuajse asnjëherë ta shikoj Tiranën në muzg. Dal në mëngjes nga shtëpia dhe zakonisht kthehem disa orë pas mesnatës por kurrë më herët se 15 minuta para se ora të shënojë 00:00. Më ka qëlluar rrallë gjithsesi, ta shikoj Tiranën në muzg. Duket qytet interesant. Njerëzit sikur ngjajnë më të qetë në atë kohë, nuk nxitojnë për në punë apo në takime. Po si nuk më ka shkuar në mëndje më parë, të shikoj nëse ATA qëndrojnë në vendin e zakonshëm kur muzgu bie në Tiranë. Muzg? Nuk e di nga më erdhi në mendje, por ngaqë në mëngjes i kam parë rrëzë ndërtesave, kur u mendova, Muzgu më ngjau si koha e vetme kur më duket se nuk i kam parë ATA, atje në vendin e tyre, rrugëve me pluhur. E kam vënë re se Tirana duket më e pastër nën gjysmë errësirën e muzgut që “zhduk” pluhurin e pashëm dhe mbeturinat gjithandej. Por asnjëherë nuk më ka shkuar në mendje të shikoj nëse ATA janë aty në muzg, pra kur rrugët e Tiranës fillojnë të errësohen.
E kam fjalën për lypësit. Ata që ulen trotuareve dhe nuk lodhen duke zgjatur dorën gjithë ditën në kohë me shi, ditë të mërzitshme me diell përvelues apo stinë drimri të ftohta. Dhe e di pse e kam fjalën për lypësat e veçantë të Tiranës? Jo se më parë nuk ma kanë tërhqeur vëmendjen, por sot, po po sot, teksa po kaloja gjithë nxitim diku në qendër, pashë një mesoburrë që i fliste asaj. Është një femër me flokë gjysmë të djegura nga dielli dhe gjysmë të gjata, ndoshta të rëna që rri zakonosht në troruare nga qendra e Tiranës deri në afërsi të Maternitetit që ndodhet pranë Stacionit të Trenit. Ky burrë që po i fliste asaj lypëses femër, ma tërhoqi vëmendjen krejt pasi po i thoshte diçka të tmerrshme. “Rri këtu deri nga ora 5 dhe pastaj lëviz......Nuk di nëse bëhet fjalë për orën pesë të mëgjesit apo pesë të mbasdites. Por jam i sigurt se po e instruktonte kur të dilte, si të rrinte, çfarë të thoshte dhe kur duhej të largohej. Ai burrë, pak i thinjur dhe i veshur në mënyrë të rrregullt më tërhoqi vëmendjen teksa fliste me lypësen sepse kishte kontrast mes tyre. Gati sa nuk ndalova edhe pse i ngadalësova hapat. Nuk e di sepse po kaloja dhe teksa po mendoja për mesoburrin, ai me ngjau me një mafioz me të cilin nuk duhet të ngatërrohet askush. Ndaj u përpoqa ti bëja një fotografi fshehurazi teksa ai po i fliste asaj, lypëses që nuk i ndërron rrobat kurrë dhe që flokët nuk e di nëse i kanë rënë, i janë këputur, apo i ka të prera.... E pra, ai që unë mendoj se nuk është vetëm shfytëzues i asaj, ishte përkulur dhe po i fliste lypëses. Në fillim unë po mendoja mos ishte ndonjë njeri i dhembshur që po e pyeste për prindërit, por shtëpinë.....por jo, kur kisha ngadalësuar hapat e dëgjova, po e instruktonte, po e porosiste. Ja pra, e zgjidha edhe një mister. Gjithmonë kisha menduar nëse ato fjalë që shqiptojnë lypësit nëpër rrugë kur para tyre kalojnë njerëzia, janë të ndjera apo pjesë e profesionit. Tani nuk kam më dyshim, të paktën për pjesën dërrmuese të lypësve. Më erdhi në mendje një artikull interesant i Ll. Tako tek “Peshku pa Uje” disa kohë më parë, që bënte apel, që këtyre lypësve në rrugët e Tiranës, të mos u jepen para, por vetëm ndonjë ushqim. Sepse nëse u japim para ata do të jenë përsëri aty, në rrugë duke kërkuar para të tjera, xhiron e radhës për mesoburrat e veshur pastër e në mënyrë të rregullt. Pak kohë më vonë, në një konferencë Kombëtare për Antitrafikun, mesazhin që kishte dhënë Llukani e pashë në një njoftim zyrtar shtypi që më mbërriti në e-mail. Nuk mendova negativisht. Është një mesazh që duhet ta përsërisim të gjithë, mos u jepni para lypësve në rrugët e Tiranës, ashtu do ti lini përgjithnjë në skllavëri. Në mendje më vijnë tani, breshëritë e fjalëve dhe urimeve që leshon një tjetër lypëse e cila qëndron diku në afërsi të Stadiumit Dinamo në Tiranë. “Të rroftë e dashura çuni, të rrofshin njerëzit e shtëpisë bosi.....”. Sa inat më vjen, edhe këta duan të mashtrojnë....

PS: Ndoshta nuk do të gabohej çdo lexues i përshtypjeve më lart, nëse do të mendonte, çlidhje ka faqja dhe objektivi i saj, me një temë si kjo e artikullit në fjalë. Përgjitha ime është se Organizmat Ndërkombëtare i kanë dokumentuar mirë rastet në rritje të shfrytëzimit të fëmijëve brenda vendit. Jo vetëm për të lypur në rrugë, por edhe për të vjedhur, ndoshta edhe për shfrytëzim seksual. Dhe të gjitha këto raste, mbahen mirë shënim në seksionet e caktuara të dokumenteve strategjike që lidhen me vendosjen e shtetit ligjor, luftën kundër shfrytëzimit të fëmijëve dhe garantimin e të Drejtave të Njeriut për të cilat Shqipëria kritikohet vazhdimisht ndërsa politikanëve tanë u kërkohet vazhdimisht llogari duke e cilësuar shfrytëzimin e njerëzve dhe veçanërisht fëmijëve një krim të llahtarshëm. Ja pra, kjo mendoj se është lidhja...

Vendet e “A3” shpresa për ftesën e anëtarësimit në NATO, në Samitin e Bukureshtit 2008


Trazhgim Sokolaj

BRUKSEL – Zëdhënësi i Organizatës së Atlantikut Verior James Appathurai deklaroi se ka shpresa serioze që tri vendet e kartës së Adriatikut, Shqiperia, Kroacia dhe Maqedonia të marrin ftesën për anëtarësim në samitin e ardhshëm të NATO-s që pritet të zhvillohet në Bukuresht në vitin 2008. Sipas zëdhënësit të NATO-s, shanset janë të barabarta për të tri vendet që aspirojnë anëtarësimin në Organizatë. “Këto vende kanë bërë progres të dukshem në arritjen e standarteve të kërkuara nga NATO, standarte politike, ekonomike, demokratike dhe ushtarake”, cilësoi Appathurai. Zëdhenësi i NATO-s theksoi më pas se edhe pse tri vendet e Kartës së Adriatikut kanë punuar shume për arritjen e standarteve të kërkuara, ende kanë shumë punë për të bërë. Vendet e Kartës “Adriatik 3”, Shqipëria, Kroacia dhe Maqedonia janë pjesë e plan-veprimit të NATO-s, për anëtarësimin në Organizatën e Atlantikut Verior. Liderët e tri vendeve kanë deklaruar se shpresojnë që të marrin ftesën për anëtarësim në NATO, në Samitin e Organizatës që pritet të mbahet në prill 2008. Aktivitetet e përbashkëta të tri vendeve të “A3” me Organizatën e Atlantikut Verior kanë ardhur gjithnjë në rritje, ashtu si vlerësimet e zyrtarëve të NATO-s lidhur me përpjekjet e vendeve që dëshirojnë anëtarësimin. Shqipërisë por edhe ccdo vendi tjetër që kërkon të anëtarësohet në NATO, i është bërë e qartë se pjesëmarrja në Organizatë nuk është vetëm përfitim, por edhe detyrime më shumë për të qenë partner funskional dhe i besueshëm.

Shqipëri, hapet stërvitja e përbashkët shqiptaro-amerikane “Shqiponja Guximtare 07”


Në territorin e BRSH u çel ceremonia e stërvitjes dy palëshe midis nënreparteve të Batalionit të Dytë të Brigadës së Reagimit të Shpejtë dhe Gardës Kombëtare të Neë Jersey-it, të SHBA-së. Kjo stërvitje e emërtuar “Shqiponja guximtare 07” është një tjetër bashkëpunim, që dy vendet tona kanë zhvilluar prej vitesh edhe në fushën ushtarake. Ajo synon rritjen cilësore të ndërveprimit, perfeksionimin e procedurave standarde të veprimit të NATO-s, njohjen e armatimit, zhvillimin e qitjeve luftarake, aftësimin e drejtuesve të niveleve taktike, rritjen e nivelit të nënoficerëve, dhënien e ndihmës së parë mjekësore, orientimin topografik, si dhe mjaft elementë të tjerë luftarak, dhe aspekte të tjera të karakterit psikologjik, kulturor, social, të mësimit të gjuhës angleze etj. Të gjitha këto synojnë rritjen cilësore dhe në përputhje me standardet e NATO-s të kapaciteteve tona luftarake, praktikimin e përbashkët të përvojave më të mira të Gardës së Neë Jersey-it dhe veçanërisht rritjen e besimit reciprok për pjesëmarrjen në misione të përbashkëta në interes të paqes dhe stabilitetit ndërkombëtar. Nga pala shqiptare marrin pjesë 33 ushtarë, nënoficerë dhe oficerë, ndërsa nga pala amerikane 47 ushtarë, nënoficerë, oficerë dhe një ekip mjekësor. Stërvitja do të zhvillohet në dy faza. Faza e parë ka filluar më 7 korrik dhe përfundon më 21 korrik 2007 dhe do të zhvillohet në rajonin e dislokimit të Brigadës së Reagimit të Shpejtë në Zall-Herr. Faza e dytë do të zhvillohet nga data 11-25 gusht 2007 në Bazën Ushtarake të Fort Drum-it, Neë Jork, SHBA. Bashkëpunimi midis Shqipërisë dhe Gardës së Neë Jerseit, ka filluar që në maj të vitit 2001, duke përfshirë fushat e shërbimit zjarrfikës, operacionet e emergjencave civile, të ruajtjes së mjedisit, shkëmbim midis universiteteve, binjakëzim të qyteteve, asistencë për shërbimin shëndetësor dhe operacione të sigurimit të kufirit dhe luftës kundër trafikut. Kontigjenti shqiptar që merr pjesë në këtë stërvitje, është përzgjedhur nga kompania e dytë, e cila sapo kaloi me sukses vet-vlerësimin e nivelit të parë, sipas konceptit të NATO-s për vlerësimin e aftësive operacionale [OCC]. Në këtë ceremoni ishin të ftuar zv.ministri i Mbrojtjes Petrit Krabina, shefi i Shtabit të Përgjithshëm të FA-së gjeneral major Luan Hoxha, komandanti i Forcës së Bashkuar gjeneral brigade Shpëtim Spahiu, komandanti i Shtabit të NATO-s në Tiranë gjeneral brigade Anastasios Rintis, si dhe ushtarakë të tjerë të lartë të Ministrisë së Mbrojtjes dhe Shtabit të Përgjitshëm. I pranishëm gjithashtu ishte edhe zv.ambasadori amerikan në Tiranë Stephan Christina, atasheu ushtarak amerikan Cdr. Bryan Moore, përfaqësues të tjerë të Ambasadës Amerikane, të Zyrës së Bashkëpunimit Ushtarak Shqipëri-SHBA etj. Në fjalën që mbajti komandanti i BRSH kolonel Vladimir Qiriazi, theksoi se ne do të stërvitemi së bashku për një periudhë dy javore. BRSH është njësia kryesore e FA dhe ajo vijon të stërvitet sipas standardeve të NATO-s, në bashkëpunim me partnerët tanë. Duke iu drejtuar ushtarëve të B2K të BRSH-së, kolonel Qiriazi theksoi se, ju do të përfitoni shumë nga përvoja e kolegëve tuaj amerikan, por edhe do të njihni kolegët tuaj me traditat, arritjet dhe përvojën tonë të mirë. Më pas të pranishmit i përshëndeti zv.ministri i Mbrojtjes Karabina, i cili që në fillim të fjalës së tij vuri në dukje bashkëpunimin në fushën e mbrojtjes midis Shqipërisë dhe SHBA-së, e cila i ka rrënjët në miqësine e vjetër midis dy vendeve tona dhe ka shënuar progres të vazhdueshëm në të gjitha fushat, politike, ekonomike, të mbrojtjes, diplomacisë, ligjore dhe çeshtjet e sigurisë. ”Në bashkëpunimin në fushën ushtarake,- nënvizoi zoti Karabina,- SHBA-ja është për Shqipërinë partneri strategjik dhe zë vendin kryesor në modernizimin e Forcave tona të Armatosura. Ky bashkëpunim përfshin Programin e Luftës kundër Terrorizmit, të Edukimit dhe Stërvitjes, të Financimit të Projekteve të Mbrojtjes, asistencës humanitare, mbështetjes logjistike, modernizimin e FASH, nismën e Kartës së Adriatikut, emergjencat civile, etj”. Në përfundim të fjalës së tij, zv.ministri Karabina, duke iu drejtuar ushtarakëve pjesëmarrës në stërvitje, tha: “Jam plotësisht i bindur se ju së bashku, do të realizoni objektivat e kësaj stërvitje për familjarizimin me procedurat standarde të veprimit të NATO-s, njohjen e armatimit, aftësimin e drejtuesve të niveleve taktike, aftësimin e nënoficerëve në rolin e drejtuesit të stërvitjes dhe aspekte të tjera kulturore dhe psikologjike, duke forcuar më tej miqësinë e bashkëpunimin midis dy vendeve tona”. Të pranishmit u përshëndetën edhe nga shefi i Zyrës së Bashkëpunimit Ushtarak pranë MM-së major Lary Harison dhe zv.ambasadori amerikan në Tiranë Stephan Christina.

Burimi: Ministria e Mbrojtjes

Shqipëri “e pasigurt””


Trazhgim Sokolaj / Tirane

Askush nuk e di çdo të ndodhë. Do të kemi një President edhe ne si pjesa tjetër e botës, apo do të shkojmë në zgjedhje të parakohshme. Duket se nuk di shumë as Fatos Nano, që dje demonstroi dijeninë e tij edhe për orarin e kthimit në biletën e kandidatit konsensual për President Arian Zaimi. “Nga të dhënat qytetare që kam, më rezultoi se Ai do të kthehet nesër në ora 05:00 në Bruksel me avionin e Vjenës (siç ndodh zakonisht)”, tha Nano, i cili gjithsesi nuk po mundet të shikojë fundin e tunelit të errët presidencial derisa nuk ka reklamuar ndonjë zgjidhje apo rezultat të mundshëm. Berisha duket se ka gjetur një zgjidhje morale derisa çoi kandidaturën e Barmit Topit në Parlament, duke shuar një zjarr të brendshëm Brenda PD-së që ishte hapur me tërheqjen e kandidaturës së nënkryetarit të demokratëve. Si dhe duke llogaritur ndoshta, se është më mirë të shkohet në zgjedhje të parakohshme, për të cilat edhe e majta nuk duket tërësisht e përgatitur sesa të bëhet një kompromis për Presidentin duke sakrifikuar qëndrimin në detyrë të Kryeprokurorit. Largimi i tij mund të cilësohet ndoshta kauza e kryeministrit actual të Shqipërisë. Edi Rama tha se PS ka ndezur motorët e zgjedhjeve të parakohshme ndërsa pohoi gatishmërinë e qëndrueshme të opozitës për të votuar kandfidatin e cilësuar konsensual Arian Zaimi. Nuk dihet nëse motorët e të majtës janë zgjedhur vërtet për në zgjedhje apo jo, por dihet se deri më tani, edhe pse më parë opozita kishte deklaruar objektivin e saj për zgjedhje të parakohshme, se të majtët morën pjesë në ngociata ashti siç mori pjesë edhe Sali Berisha, njëriu që sot në Shqipëri është ndoshta më pak i interesuari për zgjedhje të parakohshme. Nga ana tjetër pas acarimit të mardhënieve me Bamir Topin, Sali Berisha ka rrezikuar seriozisht edhe me Fatmir Mediun, aleatin e tij më potencial. Ministri actual i Mbrojtjes, ka qenë autori i hedhjes së emrit të Arian Zaimit në tryezën e negociatave për zgjedhjen e Presidentit. Mospranimi i kësaj kandidature nga Berisha thuhet se ka shkaktuar një “tërmet’ në komunikimin mes të dyve. Duket se Ministri i Mbrojtjes është tronditur më shumë nga dështimi i negociatave, sesa nga refuzimi që Sali berisha i ka bërë kandidaturës së hedhur nga Mediu. Ky i fundit deklaroi publikisht se negocioi takimin Berisha-Rama dhe bisedimet mes tyre, vetëm sepse zgjedhja kushtetuese e Presiodentit është kërkesa e partnerëve ndërkombëtarë që do të japin edhe vlerësimin për anëtarësimin e Shqipërisë në NATO. Rasti më i afërt kur mund të ndodhë kjo, është Samiti i Bukureshtit 2008. Fatmir Mediu e theksoi disa herë se arritja e konsensusit duhej ti dedikohej edhe atyre kushteve dhe kërkesave të bëra nga ndërkombëtarët. Porn ë kushtet ku jemi, kur nuk dihet çfarë do të ndodhë pas pak orësh ndërsa parashikimet me ditë e me muaj, janë tërësisht të pashpresa, duket se kjo është gjendja më katastrofike në të cilën një vend mund të ndodhet në vitin 2007. Pa krye. Në një kohë kur politika duhet të jetë e angazhuar me turizmin, ndonjë aktivitet kulturor apo argëtues, me mungesën e ujit dhe të energjisë elektrike, me problemet ekonomike që nuk po marrin fund asnjëherë apo qoftë edhe me korrupsionin, vendi ynë humbet kohë më Presidentin, pa dëshmkuar se mund të zgjidhë edhe këtë problem. Dhe në këto kushte ku ndodhet sot Shqipëria si dhe ku ka gjasa të shkojë, në vërtet nuk do të mundemi të luajmë atë rol që duhet në rajon, dhe veçanërisht në stadin ku ndodhet procesi për pavarësinë e Kosovës. Prej Shqipërisë kërkohet importim i sigurisë, kur Shqipëria në fakt, është e pasigurt së brendshmi në një kënvështrim.

Dubrovnik, Shefi i NATO-s: Vendet e “A3” të hartojnë Programeve Kombëtare Vjetore për anëtarësim në Aleancë


TIRANE - Ministri i Punëve të Jashtme të Shqipërisë Lulzim Basha mori pjesë në Samitin “Jugu i Ri i Europës” që u zhvillua në Dubrovnik të Kroacisë më 06-07 korrik 2007. Në këtë Samit morën pjesë kryetarë shtetesh, kryetarë të qeverive, ministra të jashtëm nga vendet e rajonit, Sekretari i Përgjithshem i NATO-s, z. Jaap de Hoop Scheffer, Kryesuesi i radhës së OSBE-së, Ministri i Jashtëm i Spanjës z. Miguel Angel Moratinos, , Sekretari i Përgjithshëm i Këshillit të Evropës z. Terri Davis, Ndihmës Sekretari i Shtetit z. Daniel Fried, opinionbërës të njohur si Zbignieë Brzezinski, Janusz Bugajski, etj. Samiti u zhvillua nën kujdesin dhe drejtimin e Kryeministrit të Kroacise, z. Ivo Sanader. Në Fjalen e tij, Ministri Basha midis të tjerave, u ndal në transformimet e mëdha që ka pësuar rajoni në 15-20 vitet e fundit, duke e shndëruar atë nga një rajon konfliktual në një rajon që gjeneron çdo ditë e më tepër paqe, stabilitet, siguri dhe progres. Më tej, Ministri Basha theksoi se sfida e integrimit në të dy nivelet – në atë rajonal dhe në atë europian, përbën sfidën më madhore që qëndron para vendeve tona. Duke vënë në dukje disa nga arritjet e fundit në konkretizimin e bashkëpunimit rajonal, Ministri Basha u shpreh se thellimi i integrimit të vendeve të rajonit nuk mund të kuptohet pa lëvizjën e lirë të njerëzve, të mallrave dhe të kapitaleve. Ai e quajti jo normale situatën aktuale, kur ekzistojne një numur barrierash për lëvizjen e lirë të qytetarëve shqiptarë brenda rajonit dhe kërkoi reciprocitetin e vendeve fqinje në drejtim të liberalizimit apo të heqjës së regjimit të vizave. Duke u ndalur në statusin përfundimtar të Kosovës, z. Basha e vlerësoi atë si një çështje madhore, jo vetëm për sigurinë rajonale, por edhe më gjërë, që për fat të keq, mbetet ende e pazgjidhur, si pasojë e përpjekjeve nga faktorë brenda dhe jashtë rajonit për ta shtyrë pa fund përcaktimin e statusit të saj. Në këtë kontekst ai vuri në dukje disbalancen që egziston midis pretendimeve të ndonjë faktori të jashtëm për vendimmarrje lidhur me çështjen e Kosovës, duke e mbajtur peng statusin e saj të papërcaktuar dhe angazhimteve të tij konkrete për zgjidhjen e problemeve reale të sigurisë dhe stabilitetit në Kosovë. Unilateralizmin bllokues në Këshillin e Sigurimit e konsideroi si pengesë për miratimin e rezolutës që do ti hapte rrugë sanksionimit de jure të gjendjes se re të krijuar në terren, pavarësisë de fakto të Kosovës, të mbikqyrur nga faktori ndërkombëtar. Duke përfunduar, Ministri Basha theksoi se plani i Ahtisarit është një plan realist dhe që ka në themel kompromisin dhe bëri thirrje që sa më shpejt që të njihet dhe të pranohet ky plan, i diktuar nga realitetet dhe sensibilitetet në Kosovë, aq më mirë do të jetë për vetë Kosovën, për fqinjët e saj dhe krejt rajonin tonë. Ndërsa Sekretari i Përgjithshëm i NATO-s, z. Jaap de Hoop Scheffer, gjatë fjalës së tij, shprehu bindjen e thellë se integrimi euro-atlantik ofron kuadrin e nevojshëm për reforma të pakthyeshme në gjithë rajonin e Europës Juglindore. Tre vendet aspirante, Shqipëria, Kroacia dhe Maqedonia, theksoi ai, kanë ndërmarrë reforma të guximshme që i kanë afruar më shumë, jo vetëm me NATO-n, por edhe me BE. Hapi i ardhshëm i tyre tani është hartimi i Programeve Kombëtare Vjetore për anëtarësim në Aleancë. Gjithashtu ai kërkoi angazhimin e Parlamenteve përkatëse si dhe informimin e opinioinit publik për avantazhet, por edhe për përgjegjësitë që bart anëtarësimi në NATO. Lidhur me çëtjen e Kosovës, z. Scheffer theksoi se zhvillimi i mëtejshëm i rajonit varet nga stabiliteti, i cili do të forcohej shumë me zgjidhjen e statusit të Kosovës. Planin e Ahtisarit e quajti një bazë të qëndrueshme dhe gjithëpërfshirëse, mbi të cilën mund të mbeshtetet vendimi i Keshillit të Sigurimit. Scheffer bëri thirrje që të shmangen vonesat e panevojshme për gjetjen e zgjidhjes të statusit të Kosovës. Nga ana e tij Ndihmes Sekretari i Shtetit i SHBA-se, z. Daniel Fried, pjesën më të madhe të fjalës së tij ia kushtoi Kosovës. Ai e quajti atë një sfide që nuk mund të shmanget. Sipas tij, statukuoja aktuale nuk funksionon, ndërkohe që Plani i Ahtisarit është mjaft i qartë dhe ofron zgjidhje të drejtë dhe të qëndrueshme. Këshilli i Sigurimit duhet të marrë përsipër përgjegjësinë që i takon dhe të miratojë rezolutën e re. Në çdo rast, përfundoi ai, ne duhet të ecim përpara. E ardhmja e Kosovës dhe Serbisë është ne Europë. Analisti dhe studjuesi i njohur, Zbignieë Brzezinski u ndal në konceptin e „lodhjes“ së Evropes nga zgjerimi i mëtejshëm i saj, duke e cilësuar atë si një koncept që mund të çojë në destabilizim. Sipas tij, proceset integruese duhet të përfshijnë jo vetëm Ballkanin Perendimor, por edhe Turqinë, Ukrainën, Gjeorgjinë dhe Moldavinë. Për çështjen e Kosovës, ai u shpreh se populli i saj meriton vetvëndosjen. Ai theksoi se ky parim nuk duhet të bllokohet nga shtetet që kanë një rekord negativ në respektimin e të drejtës së popujve për vetvëndosje. Gjatë zhvillimit të punimeve të Samitit, Ministri Basha zhvilloi, gjithashtu, disa takime informale dypalëshe si me Sekretarin e Përgjithshëm të NATO-s, z. Jaap de Hoop Scheffer, Kryeministrin e Kroacisë, z. Ivo Sanader, Kryeministrin e Kosovës, z. Agim Çeku, Ministren e Punëve të Jashtme të Kroacisë, znj. Kolinda Grabar Kitarovic, Ministrin e Punëve të Jashtme të Suedisë z. Karl Bild, Ministrin e Mbrojtjes së Maqedonisë z. Lazar Elenovski, etj. Burimi: Ministria e Jashtme

Shqipëri, dritëhijet presidenciale

Trazhgim Sokolaj

TIRANE - Ka pluhur në rrugët që pastrohen rrallë. Asfalti është mbuluar me një shtresë të ndyrë dhe të lëvizshme prej dheu të hollë. Në trotuare nuk gjenden vetëm bishta cigaresh, por edhe kosha plehrash të sakatosur e të deformuar, shishe plastike të boshatisura plotësisht ose përgjysmë, qese mbeturinash te hedhura nga pallatet e larta, që kanë shpërthyer në momentin e rënies në tokë apo kushedi se kur. Autobusët që lëvizin gjithë ditën në Unazën e Tiranës duket sikur po kalojnë çastet e fundit para shpërthimit. Në shtyp kam lexuar që i cilësuan “sauna lëvizëse” por gjithsesi qytetarët e Tiranës në përpjekje për ti shpëtuar vapës përveluese dhe pluhurit të merzitshëm, përsëri lëvizin me autobusë, i mbushin plot ata. Tirana po përjeton ato momentet kur banorët fillojnë dhe rrallohen dhe në rrugë duken gjithnjë e më pak njerëz. Kjo vazhdon deri në ditët e fundit të muajit gusht kur ndodh e kundërta. Është vapë këto ditë. Ambienti duket si një furrë e madhe që nxeh e nxeh krejt i pavarur nga gjendja e energjisë elektrike. Bën vapë kur ka energji por edhe kur mungon ajo. Kohët e fundit po na ndodh që po flemë gjithnjë e më vonë. Qëndrojmë zgjuar sepse duam të mësojmë ç`po ndodh në vendin e shqipeve, çfarë përfundimesh dhe pretendimesh kërkesash a kontestimesh po bisedohen në atë proces negociatash të stërgjatura dhe të vonuara që po konkurron dukshëm me çdo program televiziv edhe pse me audiencë gjithnjë në rënie. Mungesa e gjumit na e mpin kokën krejt, skemi durim, jemi nervozë për shumëçka. Në këto ditë të vapshme, kur na mungojnë shumë gjëra, jemi kapluar si mos më keq nga ngerçi presidencial nga i cili vendi dhe politikanët tanë nuk po dalin dot. Sikur të mos mjaftonin të gjitha të tjerat edhe kjo na mungonte. Na kërcënohet një notë dhe vlerësim negativ nga ndërkombëtarët, zgjedhje te parakohshme dhe një katrahurë të paparë që askush nuk e merr me mend konkretisht. E pra, ja ku jemi. Në udhëkryq. Pjesa më e madhe e punonjësve të administratës por edhe punëmarrësit në subjektet privatë ose janë duke marrë pushimet, ose po i planifikojnë e ndoshta i kanë filluar ato. A është i shkrehur shteti? Ministritë ku pati ndryshime pas zgjedhjeve të 18 shkurtit kur u bënë edhe ndërhyrje në Qeveri, duket se kanë përfunduar ambientimin me “reformat” e radhës. Në Polici, pak ditë para se të merrnin pushimet, 852 punonjës morën mandatën se u janë shkurtuar funskionet organike, ose shkurt e thjeshtë: janë shkarkuar nga puna. Ministri i Brendshëm i Kosovës, i ankua pak ditë më parë tek homologu i tij shqiptar se kosovarët që po vijnë për turizëm në Shqipëri, po lënë kokën rrugëve, një familje kosovare u shua gati e gjitha pas një aksidenti të tmerrshëm në afërsi të Elbasanit. Prokuroria është në ethe. Pjesë e negociatave dhe bisedimeve për zgjedhjen e Presidentit të Republikës, është bërë edhe kushti i maxhorancës aktuale për ndryshime në statusin e Prokurorit të Përgjithshëm, konkretisht kalim i varësisë së tij nën Qeverinë dhe kufizimi i mandatit për ushtrimin e funskionit. Si një jurist me përvojë dhe një profesionist i matur dhe i duruar, Sollaku ka heshtur deri më tani edhe pse duket se ka një pezmatim nga fakti se politika për interesa të saj e përfshiu së fundi edhe Prokurorinë, në “pazarin presidencial”. Në disa zona të vendit ka probleme me ujin e pijshëm dhe me furznimimin me energji elektrike. Gjithandej thuhet se po bien zjarre që po bëjnë kërdinë, ndërsa maturantët e dalluar të gjimnazeve të Tiranës janë llaftarisur kur për herë të parë pas katër viteve që kur kanë frekuentuar shkollën e mesme, kanë marrë nota të tilla si 5, 6 apo 7, në provimin e Letërsisë për Maturën Shtetërore. Kryeministri i vendit duket sikur ka harruar fare funskionin e tij qeverisës, ose kështu shfaqet publikisht së paku, ashtu si kryetari i opozitës i cili edhe ai, nuk po bën oponencën e qeverisë për vendimet e saj të radhës. Është me vend të përsëritet ndoshta, se negociatat dhe mënyra si u zhvilluan ato, lanë të kuptohej emërimin dhe jo zgjedhjen e Presidentit kushdo qoftë ai, ndërs nxorën jashtë loje institucionin bazë të demokracisë, Parlamentin. Megjithatë vlen të theksohet se së paku, këto negociata që na futën tmerrin dhe na stresuan këto ditë të vështira, na shërbyen për disa gjëra. Disa gjëra të shtrenjta për ne, por jo për kombe të tjera të Europës. E kam fjalën për uljen në një tavolinë të dy kundërshtarëve kryesore politikë të këtij vendi që vetëm kanë thumbuar njëri-tjetrin duke bojkotuar çdo kontakt të mundshëm mes tyre. Nuk e kam fjalën vetëm për efektin viziv që na dha ulja e Ramës dhe Berishës në një tavolinë, por edhe per produktin: Reforma në Drejtësi, kjo e shumëpërfolur reformë në prokurori, gjykata, KLD etj. Besoj se këto ishin produkte të mira të këtyre negociatave të mërzitshme dhe të mos harrojmë, pas uljes së Ramës dhe Berishës në tryezë, emrat e kandidatëve për President filluan ti largohen gjithnjë e më shumë botës politike, ndikimit dhe prejardhjes së saj. Kjo mendoj se është me gjithë mend një gjë e mirë. Përkundër të gjitha këtyre, edhe njëherë klasa jonë politike, e shfaqi veten të paaftë për dialog dhe për marrëveshje. Natyrisht, kjo nuk është një skenë e mirë në sytë e ndërkombëtarëve dhe për këtë mjafton të kujtojmë fytyrën e vërenjtur të Ministrit të Mbrojtjes Fatmir Mediu i cili sikurse thuhet, negocioi takimin Berisha-Rama. Mediu jam i bindur se e di mirë, çfarë kërkohet nga Shqipëria në Samitin e ardshëm të NATO-s në Bukuresht. Me sa dijeni kam unë, kërkohet: Stabiliteti politik mes të tjerash, qëndrueshmëria dhe digalogu politik ndoshta është më e rëndësishmja që kërkojnë nga ky vend. Ndaj për këtë stabilitet ende të munguar kam përshtypjen se ishte i shqetësuar Fatmir Mediu, sepse pa stabilitet politik, ekonomia nuk mund të jetë e qëndrueshme ndërsa institucionet nuk mund të përforcohen. Dhe Mediut besoj se i ka ndodhur, për shkak të detyrës që kryen, që ndërkombëtarët t`ia përsërisin disa herë atë që kërkojnë aktualisht nga Shqipëria për të dhënë më pas OK-un e japjes së portave të integrimit.

Jugu i Ri i Europës, Ministri i Jashtëm i Shqipërisë në Samitin e Dubrovnikut


Ministria e Jashtme në Tiranë njoftoi se më 6 korrik 2007, kreu i diplomacisë shqiptare Lulzim Basha, në kryesim të një delegacioni zyrtar, do të marrë pjesë në takimin e nivelit të lartë, të titulluar “Jugu i ri i Europës”. Aktiviteti është organizuar dhe mbahet në Dubrovnik të kroacisë. Sipas burimeve zyrtare nga Ministria e Jashtme në Tiranë, “ky Samit do të zhvillohet në qytetin kroat të Dubrovnikut, më 6- 7 korrik 2007 ndërsa do të marrin pjesë kryeministra, ministra të jashtëm si dhe personalitete të tjera të larta të vendeve të rajonit tonë, të disa vendeve europiane si dhe të SHBA–ve”. Në deklarratën e Ministrisë së Jashtme në Tiranë, thuhet se në Samit “do të jenë të pranishëm gjithashtu edhe përfaqësues të lartë të BE-së, NATO-s dhe të Këshillit të Europës. Në këtë Samit, në të cilin Ministri i Jashtëm z.Basha do të mbajë një fjalë në emër të delegacionit shqiptar, pritet të trajtohen ccështje të rëndësishme si bashkëpunimi rajonal, procesi i integrimit në BE dhe NATO, cështja e përcaktimit të statusit final të Kosovës etj. Gjatë këtij takimi të nivelit të lartë, Ministri Basha sipas konfirmimeve zyratare do të zhvillojë edhe takime dypalëshe me përfaqësuesit e vendeve apo organizatave pjesëmarrëse në aktivitetin që zhvillohet në Dubrovnik.

Luksemburgu ratifikon marrëveshjen e Stabilizim-Asociimit me Shqipërinë

Në datë 3 korrik 2007, Dhoma e Deputetëve e Dukatit të Madh të Luksemburgut ka ratifikuar me unanimitet Marrëveshjen e Stabilizimit dhe Asocimit me Shqipërinë.Luksembourgu bëhet kështu vendi i dhjetë i BE-së që e ka ratifikuar marrëveshjen duke iu bashkuar Letonisë, Sllovenisë, Sllovakisë, Polonisë, Suedisë, Hungarisë, Spanjës, Lituanisë dhe Irlandës.Vende të tjera anëtare të Bashkimit Europian janë në përfundim të procedurave të ratifikimit. Ministria e Punëve të Jashtme e konsideron këtë process si një ndër aspektet më të rëndësishëm të aktivitetit të saj. Ajo është në kontakt të vazhdueshëm me vendet anëtare të BE-së për të mundësuar ecurinë normale të procesit të ratifikimit të MSA-së në përputhje me procedurat përkatëse të çdo vendi.

“Franca mbështet integrimin euroatlantik të Shqipërisë”


Trazhgim Sokolaj / TIRANE
“Shqipëria është përfshirë në reforma të rëndësishme të mbrojtjes me qëllim integrimin euroatlantik, ju siguroj edhe njëherë mbështetjen e Francës në këtë përpjekje”. Ky është një fragment i letrës që Ministri Shqiptar i Mbrotjes Fatmir Mediu ka marrë nga homologu i tij francez Herve Morin. Burime zyrtare të Ministrisë së Mbrojtjes, deklaruan se Ministri Fatmir Mediu ka marrë një letër nga ministri i Mbrojtjes i Francës Herve Morin, i cili i shpreh falenderimet e tij për mesashin dashamirës që Ministri shqiptar Mediu i ka dërguar këto ditë atij me rastin e emërimit në postin e lartë të Ministrit të Mbrojtjes në qeverinë e re të Francës. “Ju falenderoj përzemërsisht për mesazhin dashamirës që ju më keni drejtuar me rastin e emerimit tim në postin e Ministrit të Mbrojtjes”, i shkruan, ndër të tjera, Ministrit Mediu homologu i tij francez Morin. Më tej, ministri franzez ka theksuar se, jam i kënaqur nga intensifikimi i marrëdhenieve dypalëshe midis dy vendeve tona në këto vitet e fundit dhe ju siguroj edhe njëherë për ndjenjat e forta të Francës për lidhjet e miqësisë dhe besimit që na bashkojnë. “Shqipëria është përfshirë në reforma të rëndësishme të mbrojtjes me qëllim integrimin euroatlantik, vijon më tej në letrën e tij ministri francez i Mbrojtjes Morin, u siguroj edhe njëherë mbështetjen e Francës në këtë përpjekje. Të jeni të sigurt se do të gjeni tek unë një bashkëbisedues të vëmendshëm dhe disponibël, gjithmonë të gatshëm për të punuar për forcimin e bashkëpunimit dypalësh në fushën e mbrojtjes”. “Duke ju përsëritur falenderimet e mia, ju lutem të besoni, Zoti Ministër, në sigurimin e konsideratës më të lartë”, e mbyll letrën e tij drejtuar zotit Mediu, kreu i Mbrojtjes Franceze, Herve Morin. Ministri i Mbrojtjes Mediu, ka zhvilluar një aktivitet të dendur në zgjerimin e mardhënieve me vendet anëtare të Organizatës së Atlantikut Verior, të cilat duhet të votojnë në rast se Shqipëria ftohet në Samitin e radhës të NATO-s në Bukuresht. Pjesa më e madhe e këtyre vendeve janë vizituar deri më tani nga Mediu i cili ka marrë mbështetje për procesin e integrimit dhe veccanërisht vlerësime për përparimin në fushën e Mbrojtjes.

Përfaqësuesit e kompanive McDonald’s dhe Heineken, takime me Kryeministrin e Shqipërisë


Trazhgim Sokolaj/TIRANE
Kryeministri i Shqipërisë Sali Berisha ka pritur sot në një takim në zyrën e tij pranë Këshillit të Ministrave përfaqësues të lartë të dy kompanive të mëdha Haineken dhe McDonald’s. Sipas burimeve zyrtare nga Këshilli i Ministrave, mësohet se Drejtori për Evropën Qendrore për Heineken z. Xavier Belison i ka shprehur në këtë takim Kryeministrit të Shqipërisë Sali Berisha interesin për të filluar aktivitetin e prodhimit të birrës Heineken edhe në Shqipëri. Të njëjtin interes, për ngritjen e një rrjeti McDonald’s jo vetëm në Tiranë, por edhe në qytete të tjera të Shqipërisë i ka shprehur Kryeministrit Berisha edhe menaxheri i përgjithshëm i McDonald’s z. Zoran Matliesvski. Burimet zyrtare thanë se Kryeministri u ka garantuar përfaqësuesve të këtyre kompanive mbështetjen e qeverisë shqiptare për kapërcimin e procedurave administrative, që të bëhet e mundur zhvillimi i këtyre dy aktiviteteve të mëdha në Shqipëri. Gjatë pjesës së parë të ditës Kryeministri Berisha ka pritur ne zyrën e tij drejtues të lartë të kompanisë italiane COLACER. Presidenti i kompanisë Pasquale Colaiacovo dhe adminitratori Carlo Colaiacovo i kanë paraqitur Kryeministrit projektin e ndërtimit të një fabrike çimentoje në Lezhë, me vlerë 200 milionë dollarë. Një projekt ky që ka marrë gjithashtu mbështetjen e Kryeministrit Berisha. Interesimi i kompanive të huaja për tu njohur me klimën e biznesit në Shqipëri vjen vetëm pak kohë pas vizitës së Presidentit të Shteteve të Bashkuara të Amerikës në Tiranë. Një eveniment historik i cili sicc është pranuar masivisht në Shqipëri, ka ndikuar së tepërmi në përmirësimin e imazhit ndërkombëtar për vendin e vogël ballkanik. Situta e rendit dhe qetësisë vlerësohet pozitivisht krahasuar me dhjetë vitet e fundit ndërsa i vetmi aspekt ku artikulohen kritika është stabiliteti politik.

Rreth meje

Arkivi i blogut

Tirane, Festohet 12 Qershori, 1-vjetori i nenshkrimit te MSA-se Shqiperi-BE

Tirane, Festohet 12 Qershori, 1-vjetori i nenshkrimit te MSA-se Shqiperi-BE

Welcome Mr.President Bush

Welcome Mr.President Bush
Rruga e Elbasanit, Tirana

Qytetaret shqiptare mirepresin Presidentin Bush

Qytetaret shqiptare mirepresin Presidentin Bush

President George W.Bush in Tirana

President George W.Bush in Tirana

President Bush, in Fushe-Kruja, Albania

President Bush, in Fushe-Kruja, Albania

President Bush, in Fushe-Kruja, Albania

President Bush, in Fushe-Kruja, Albania